ယွၼ်ႉလူမ်းလႅင်ႉတၢႆႊၾူၼ်ႊ ၵႃႇၵျီႇၵီႇ (KAJIKI) ဢၼ်ပတ်ႉထွင်းယူႇတီႈ ၼႂ်းပၢင်ႇလၢႆႇၶႄႇပွတ်းၸၢၼ်းၼၼ်ႉသေ တီႈၼႂ်းမိူင်းႁူမ်ႈတုမ်မၢၼ်ႈ ဢိၵ်ႇပႃးမိူင်းတႆး ၾူၼ်တေတူၵ်းႁႅင်း၊ တေၸၢင်ႈမီးၽေး ၼမ်ႉၼွင်းထူမ်ႈ၊ လိၼ်ႇၵူၼ်ႇပင်း ဝႃႈၼႆ။

ဢူးၵျေႃႇမူဝ်းဢူး ၽူႈၵုမ်းၸီႉသင်ႇ တီႈႁွင်ႈၵၢၼ် ၾၢႆႇၾိင်ႈၾႃႉရႃႇသီႇမိူင်းမၢၼ်ႈ လၢတ်ႈဝႃႈ – ၼႂ်းၶမ်ႈဝၼ်းတီႈ 25 ၼႆႉ လူမ်းလႅင်ႉ ၵႃႇၵျီႇၵီႇ တေၽတ်ႉထွင်းၶဝ်ႈ ၼႂ်းမိူင်းဝႅတ်ႉၼၢမ်း ႁၢဝ်ႈႁႅင်း။ ႁႅင်းလူမ်းတေဢူၼ်ႈၵႂႃႇ ၽွင်းႁွတ်ႈထိုင်တီႈၼႂ်းမိူင်းလၢဝ်း။ မိူင်းႁူမ်ႈတုမ်မၢၼ်ႈၵေႃႈ တေၺႃးၽွၼ်းတုမ်ႉယွၼ်ႈၸွမ်း မိူၼ်ၼင်ႇ – ၼမ်ႉၼွင်းထူမ်ႈ၊ လိၼ်ၵူၼ်ႇပင်းလႄႈ ၾႃႉတႅၵ်ႇၾႃႉမႅပ်ႈ ၸိူဝ်းၼႆႉ ဝႃႈၼႆ။

ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ မိူင်းမၢၼ်ႈ ၶၢတ်ႈလၢမ်းဝႆႉဝႃႈ – ၼႂ်းဝၼ်းတီႈ 27 ၼႆႉ လူမ်းလႅင်ႉႁႅင်းလဵၵ်ႉ တေၽတ်ႉထွင်းၶဝ်ႈၸွမ်း လႅၼ်လိၼ်မိူင်းထႆး – မိူင်းလၢဝ်း – မိူင်းမၢၼ်ႈ။ ၼႂ်းဝၼ်းတီႈ 28 သမ်ႉ လူမ်းလႅင်ႉ ၵႃႇၵျီႇၵီႇ ႁႅင်းတေဢူၼ်ႈၵႂႃႇသေ ၽတ်ႉထွင်ႈၶဝ်ႈၼႂ်း မိူင်းတႆးပွတ်းဢွၵ်ႇလႄႈ ပွတ်းၸၢၼ်း။

ၵွပ်ႈၼၼ် တႄႇဢဝ်ဝၼ်းတီႈ 25/08/2025 တေႃႇထိုင် ဝၼ်းတီႈ 01/09/2025 ၼႆႉ တီႈၼႂ်းမိူင်းႁူမ်ႈတုမ်မၢၼ်ႈပတ်းပိုၼ်ႉ ၾူၼ်လူမ်း တေတူၵ်းႁႅင်း ဝႃႈၼႆ။

လူမ်းလႅင်ႉ တၢႆႊၾူၼ်ႊ ၵႃႇၵျီႇၵီႇၼႆႉ မုင်ႈၼႃႈၸူး ၾၢႆႇတူၵ်းဝဵင်းသၢၼ်ႇယႃႇ (Sanya )၊ ၵုၼ်ႁၢႆႇၼၢၼ်ႇ (Hainan Island) ၼႂ်းမိူင်းၶႄႇ၊ ၾၢႆႇဢွၵ်ႇလႄႈ ၸဵင်ႇႁွင်ႇဝၼ်းဢွၵ်ႇ ဝဵင်းတွင်ႇႁႂၢႆး (Donghoi) မိူင်းဝႅတ်ႉၼၢမ်း၊ ၸဵင်ႇၸၢၼ်းဝၼ်းဢွၵ်ႇလႄႈ ၾၢႆႇၸၢၼ်းဝဵင်းႁႃႊၼွႆး (Hanoi) ဝႆႉ ၼႆယဝ်ႉ။