ၸုမ်းပလိၵ်ႈၽဵဝ်ႈမူၺ်ႉယႃႈမဝ်းၵမ်လႄႈ ၸုမ်းသိုၵ်းမၢၼ်ႈ ႁူမ်ႈၵၼ်သေ ပႂ်ႉတီႉၺွပ်းဢဝ်ယႃႈမဝ်းၵမ် ၸွမ်းသဵၼ်ႈတၢင်းလႄႈ ၵဵတ်ႉလၢၼ်ႇၸိူဝ်းလတ်းၵႂႃႇမႃး ၼႂ်းမိူင်းတႆးပွတ်းႁွင်ႇ ပွတ်းၸၢၼ်းသေ တီႉၺွပ်းရူတ်ႉၵႃး ဢၼ်တေႃႉဢဝ်ယႃႈမဝ်းၵမ် ၼႂ်းၸႄႈဝဵင်းၵေးသီးလႄႈ ၸႄႈဝဵင်းမိူင်းယႆမႃး ပိုၼ်ၽၢဝ်ႇဝႃႈ ၵႃႈၶၼ်ၵိုင်ႇငိုၼ်းမၢၼ်ႈ 258.805 ပီႊလီႊယၼ်ႊပျႃး ၼႆယဝ်ႉ။

မိူဝ်ႈဝၼ်းတီႈ 07/08/2025 ယၢမ်းၵၢင်ၶမ်ႈ 8 မူင်းၶိုင်ႈ ၾၢႆႇၸုမ်းပလိၵ်ႈၽဵဝ်ႈမူၺ်ႉယႃႈမဝ်းၵမ်တင်း ၸုမ်းသိုၵ်းမၢၼ်ႈ ႁူမ်ႈၵၼ်သေ ၵူတ်ႇထတ်းၵႃးလမ်းၼိုင်ႈ ၼႂ်းဝၢင်းရူတ်ႉၵႃးလူင် ဢေးတႃႇယႃႇ ဝဵင်းတူၼ်ႈတီး ဢၼ်တၢင်ႇၵုၼ်ႇဝႆႉတဵမ်ပိၵ်းၼၼ်ႉသေ ထူပ်းႁၼ်ယႃႈၾိၼ်ႇၽိူၵ်ႇ ဢၼ်သႂ်ႇဝႆႉၼႂ်းၵွၵ်းသပ်ႉပျႃႇၵွၼ်ႈ၊ ယဵတ်ႈသႂ်ႇမႃးၼႂ်း Water Cooler တႃႇ 8 လုၵ်ႈ။

ယႃႈၾိၼ်ႇၽိူၵ်ႇၼၼ်ႉ တင်းသဵင်ႈၼမ်ႉၼၵ်းမီးယူႇ 7.02 ၵီႊလူဝ်ႊ ၵိုင်ႇငိုၼ်းမၢၼ်ႈ 1,053 သႅၼ်ပျႃး။ ယႃႈမဝ်းၵမ်ၸိူဝ်းၼႆႉ ဢၢၼ်းလုၵ်ႉတီႈၵႃးၵဵတ်ႈၼႆႉသေ တေသူင်ႇၵႂႃႇတၢင်းဝဵင်းၵၢတ်ႇလိုဝ်း(ၵလေး) တိူင်းၸႄႈၵႅင်း ၼႆယဝ်ႉ။

ၾၢႆႇၸဝ်ႈၼႃႈတီႈပလိၵ်ႈလႄႈ ၸုမ်းသိုၵ်းမၢၼ်ႈၶဝ် တီႉၺွပ်းဢဝ်လႆႈ ၵူၼ်းၸိူဝ်းတေႃႉယႃႈမဝ်းၵမ်ၼၼ်ႉမႃး မိူဝ်ႈဝၼ်းတီႈ 8 ယၢမ်းၵၢင်ၼႂ်မွၵ်ႈ 8 မူင်းၶိုင်ႈၼၼ်ႉထႅင်ႈ ၼႂ်းတိူင်းဝဵင်းလိူဝ်ႇ (မၼ်းတလေး) သေ တီႉၺွပ်းလႆႈထႅင်ႈ ယႃႈၾိၼ်ႇၽိူၵ်ႇ ႁူမ်ႈသဵၼ်ႈမီးယူႇ 56.36 ၵီႊလူဝ်ႊ ၵိုင်ႇငိုၼ်းမၢၼ်ႈ ႁဵင်ၸဵတ်းပၢၵ်ႇလၢၼ်ႉပျႃးပၢႆ (1.7063 ပီႊလီႊယၼ်ႊပျႃး) ၼႆယဝ်ႉ။

ၵူၼ်းၸိူဝ်းတေႃႉယႃႈမဝ်းၵမ်ၼႆႉ တေႃႉဢဝ်မႃးတၢင်းဝဵင်းလႃႈသဵဝ်ႈ ၵႂႃႇတၢင်းဝဵင်းၵလေး။ ၸိုဝ်ႈႁွင်ႉ ပွၵ်ႉလႃႇ (ဘောက်လာ (ခ) ဂျိမ်းဖော) ယူႇတီႈပွၵ်ႉၵွင်းမူးတူင်ႈ ဝဵင်းမူႇၸေႊ။ မၼ်းၸၢႆး သိုပ်ႇသူင်ႇၸူးၵူၼ်းၸၢႆး ၸိုဝ်ႈႁွင်ႉ သဵင်းလႅၼ်ႊထႅၼ်ႊ (စိန်းလျံထန်) လႄႈ ဢႃႇၵႃႇလိၼ်း (အာကာလင်း) တီႈၼႂ်းဝဵင်းလိူဝ်ႇ (မၼ်းတေလေး)၊ လုၵ်ႉတီႈဝဵင်းလိူဝ်ႇသေ ၵူၼ်းၸၢႆးၵေႃႉၸိုဝ်ႈႁွင်ႉ ၶျိတ်ႉမိၼ်းႁၢၼ်ႇ (ႁွင်ႉ) ဢသွႆႇ (ချစ်မင်းဟန် (ခ) အစွယ်) ဢၢၼ်းသူင်ႇၵႂႃႇထႅင်ႈတၢင်ႇတီႈ မိူဝ်ႈဝၼ်းတီႈ 12/08/2025 ၼၼ်ႉ ၼႆယဝ်ႉ။

လႆႈႁူႉဝႃႈ ယႃႈမဝ်းၵမ်တင်းသဵင်ႈၼႆႉ ၵူၼ်းၸၢႆးၸိူဝ်းၼႆႉ ၵႂႃႇသိုဝ်ႉဢဝ်တီႈ ၵူၼ်းၸိုဝ်ႈႁွင်ႉ ဢၢႆႈငိုၼ်းဢူး (ႁွင်ႉ) ဢၢႆႈၵျႅၼ်ႇဢူး ၵေႃႉယူႇတီႈ ဝၢၼ်ႈၸၢင်ႉ ၸႄႈဝဵင်းမိူင်းယႆသေ ႁၢၼ်ႉတေႃႇထိုင်ယၢမ်းလဵဝ်ၵေႃႈ ၾၢႆႇၸဝ်ႈၼႃႈတီႈၶဝ် ပႆႇတီႉၺွပ်းဢဝ်လႆႈ။ ၵူၼ်းၸိူဝ်းသိုပ်ႇတေႃႉဢဝ်ၵႂႃႇၶၢႆၼၼ်ႉတႄႉ ၾၢႆႇၸဝ်ႈၼႃႈ တီႈပလိၵ်ႈၶဝ် တီႉၺွပ်းၵုမ်းၶင်ဝႆႉသေ တေဢဝ်တၢင်းၽိတ်းၵႂႃႇ ၸွမ်းၼင်ႇပၵ်းပိူင်မၢႆမီႈဝၢၼ်ႈမိူင်းမီးဝႆႉ လူၺ်ႈလိူင်ႈယႃႈမဝ်းၵမ် ၼႆယဝ်ႉ။

မိူဝ်ႈဝၼ်းတီႈ 22 ပူၼ်ႉမႃးၼႆႉၵေႃႈ ၾၢႆႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႃႈ တီႉၺွပ်းလႆႈယႃႈမဝ်းၵမ် ဢၼ်သိုဝ်ႉမႃးတီႈ ၽူႈယႂ်ႇၵူၼ်းလူင် ၼႂ်းပႃႇတီႇမႂ်ႇသုင်ၸိုင်ႈတႆး (SSPP) ၵိုင်ႇငိုၼ်းမၢၼ်ႈ သွင်သႅၼ်ႁႃႈမိုၼ်ႇလၢၼ်ႉပျႃးပၢႆ (257 ပီႊလီႊယၼ်ႊပၢႆ) ဢၢၼ်းတေႃႉသူင်ႇၵႂႃႇၸူး တီႈၽူႈမီးၸၼ်ႉ ၼႂ်းတပ်ႉသိုၵ်းရၶႅင်ႇ (AA) သေ သူင်ႇဢွၵ်ႇၵႂႃႇတၢင်းလႅၼ်လိၼ် ပင်ႊၵလႃႊတဵတ်ႊၶျ်လႄႈ တႃႈႁိူဝ်းမိူင်းမလေးသျႃး ဝႃႈၼႆ။

ၵဵဝ်ႇလူၺ်ႈလွင်ႈၼႆႉ ၾၢႆႇပႃႇတီႇမႂ်ႇသုင်ၸိုင်ႈတႆးတႄႉ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ် တုမ်ႉတွပ်ႇဝႆႉဝႃႈ – ၸိုဝ်ႈၽူႈမီးၸၼ်ႉ ဢၼ်ၾၢႆႇသိုၵ်းမၢၼ်ႈ ပိုၼ်ၽၢဝ်ႇဢွၵ်ႇဝႆႉၼၼ်ႉ ဢမ်ႇမီးၼႂ်းပႃႇတီႇမႂ်ႇသုင်ၸိုင်ႈတႆး။ လိူင်ႈၼႆႉ ၾၢႆႇသိုၵ်းမၢၼ်ႈတင်း ၸုမ်းပလိၵ်ႈ တင်ႈၸႂ်ႁဵတ်းႁႂ်ႈၸိုဝ်ႈသဵင်ပႃႇတီႇၵၢၼ်မိူင်းလႄႈ ၵုင်ႇသိၵ်ႈၶႃႇလူႉၵူၺ်း ၸၢင်ႈႁဵတ်းႁႂ်ႈၶၵ်ႉၵၢၼ်ငမ်းယဵၼ်လႄႈ ၵၢၼ်ၽွမ်ႉႁူမ်ႈ လူႉၵွႆပႃးထႅင်ႈ ၼႆယဝ်ႉ။

တႅမ်ႈ – ၽူၺ်းၼုမ်ႇ