ၽွင်းႁိူၼ်းယေးၵူၼ်းမိူင်းၼႂ်းၼွင်ႁၢႆးယႃႈ လူႉၵွႆယွၼ်ႉၼမ်ႉထူမ်ႈ- ယွၼ်ႉၽေးၽႅၼ်ႇလိၼ်ဝႆသေ ပႆႇၸၢင်ႈပူၵ်းပွင်ၶိုၼ်းၼၼ်ႉ တႃႇပႂ်ႉႁပ်ႉတွၼ်ႈၽြႃးၸၢမ်ၵဝ်ႈတွၼ်ႈလူင်းမိူင်းၼႆသေ  ႁွင်ႈၵၢၼ် ၾၢႆႇလိူမ်ႈလႆႇ တႂ်ႈသိုၵ်းမၢၼ်ႈ ၸီႉသင်ႇၵူၼ်းမိူင်းၼႂ်းဝဵင်းယွင်ႁူၺ်ႈ   ၸဵမ်ႁိူၼ်းၼိူဝ်ၵုင်း လႄႈႁိူၼ်း ၾင်ႇၼွင်ဢိၵ်ႇၼႂ်းၼွင်ႁၢႆးယႃႈ ႁဵတ်းလွင်ႈမူတ်းသႂ် လုမ်းလႃးတႃးသီႁိူၼ်းယေးၽႂ်မၼ်း   ဝႃႈၼႆ ။

 ၾၢႆႇလိူမ်ႈလႆႇသူင်ႇလိၵ်ႈလူင်းၸူးထိုင်ၵူၼ်းမိူင်းၼႂ်းၸႄႈဝဵင်းယွင်ႁူၺ်ႈဝႃႈ  ႁႂ်ႈလုမ်းလႃး ႁိူၼ်းယေး ၽႂ်မၼ်းႁႂ်ႈမုင်ႈသႃႇႁၢင်ႈလီတႃ၊ ႁႂ်ႈ ၽဵဝ်ႈၸွမ်း သဵၼ်ႈတႃႈသၢႆတၢင်း ၼႂ်းပွၵ်ႉ ၼႃႈႁိူၼ်း ၽႂ်မၼ်းႁႂ်ႈယဝ်ႉတူဝ်ႈၼႂ်းဝၼ်းတီႈ 20 /8/2025   ဝႃႈၼႆ ။

ၼႂ်းၶၢဝ်းတၢင်း 4-5 ပီမႃးၼႆႉ ယွၼ်ႉပိူဝ်ႈပၢႆးမၢၵ်ႈမီးတူၵ်း၊ ၵၢၼ်ႁႃၵိၼ်လဵင်ႉတွင်ႉဢမ်ႇပဵၼ်ၵၢၼ်လႄႈၵူၼ်းမိူင်းၼႂ်းထုင်ႉၼွင်ႁၢႆးယႃႈယၢပ်ႇၽိုတ်ႇငိုၼ်းတွင်း၊ ၼႂ်းၵႄႈၼႆႉသမ်ႉထူပ်းၽေးသၽႃႇဝထႅင်ႈလၢႆလၢႆၵမ်းလႄႈ ပဵၼ်ဢၼ်ယၢပ်ႇၽိုတ်ႇတႃႇပူၵ်းပွင်လုမ်းလႃးၶိုၼ်းႁိူၼ်းယေးဝၢၼ်ႈဢိူင်ႇ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ပေႃးၼမ်ႉထူမ်ႈဝႃႇ ႁိူၼ်းယေးၵူၼ်ႇပင်းလူႉၵွႆဝႃႇၸိူဝ်းၼႆႉ ၶဝ်(ႁွင်ႈၵၢၼ်ၾၢႆႇလိူမ်ႈလႆႇ) ဢမ်ႇတွၼ်ႉမႃး ၸွႆႈသင် ၵူၼ်းမိူင်းသေပွၵ်ႈ  ၊ ၵူၼ်းမိူင်းထူပ်းၽေးသၽႃႇဝ လႄႈၽေးပၢႆးမၢၵ်ႈမီးတူၵ်း ၊ ႁိူၼ်းယေးၵူၼ်ႇပင်းလူႉၵွႆ တေႃႇထိုင်ယၢမ်းလဵဝ်ပႆႇၸၢင်ႈမေးပူၵ်းပွင်ၶိုၼ်း။ၶဝ်ဢမ်ႇထၢမ်တၢင်းယၢပ်ႇၽိုတ်ႇၵူၼ်းမိူင်းသေဢမ်ႇၵႃး သမ်ႉပၢႆမႃးၸႂ်ႉၵူၼ်းမိူင်းႁႂ်ႈလုမ်းလႃးႁိူၼ်းယေးၸဝ်ႈၵဝ်ႇထႅင်ႈ။ ပၢႆလၢတ်ႈသႃႈ ဢမ်ႇႁဵတ်းဢမ်ႇ လႆႈ ၼႆထႅင်ႈလူးၵွၼ်ႇ”- ဝႃႈၼႆ။  

ယွၼ်ႉပိူဝ်ႈသိုၵ်းမၢၼ်ႈၸႂ်ႉဢႃႇၼႃႇသေ ၸီႉသင်ႇၸူးၵူၼ်းမိူင်းလႄႈယၢမ်းလဵဝ်ၼႂ်းႁွင်ႁၢႆးယႃႈၼႆႉၸဵမ်ၼႂ်းပွၵ်ႉယွမ်ႇပႃးၸဵမ် ၵျွင်းမုၼ်ၸဝ်ႈ ဢွၼ်ၵၼ်လႆႈႁဵတ်းလွင်ႈမူတ်းသႂ်။ လိူဝ်ၼၼ်ႉသိုၵ်းမၢၼ်ႈသင်ႇႁႂ်ႈၵၢင်ႉၵႄႇၶၢႆႉၵူၼ်းပၢႆႈၽေးသိုၵ်းၸိူဝ်းမႃးသွၼ်ႈယူႇဝႆႉၼႂ်းဝတ်ႉဝႃးၽႃသိူဝ်ႇ ၼႂ်းဢိူင်ႇၼႂ်းဝၢၼ်ႈ  ၸိူဝ်းၼႆႉဝႆႉပႃး။ ပိူင်လူင်ပဵၼ်ဝတ်ႉၸိူဝ်းဢၼ် ႁုၼ်ႇႁၢင်ႈၽြႃးၸၢမ်ၵဝ်ႈတွၼ်ႈ တေၶိုၼ်ႈမႃးဝႄႉမႃးလိုဝ်ႈ မႃးၵိင်း တႃႇႁႂ်ႈၵူၼ်းမိူင်းလႆႈမႃးလူႇမႃးဝႆႈ – ဝႃႈၼႆ။

 လိူဝ်ၼၼ်ႉ ၸွမ်းၼင်ႇထုင်းၼႂ်းၼွင်ႁၢႆးယႃႈသေ -ပေႃးထိုင်ပွႆးၽြႃးၸၢမ်ၵဝ်ႈတွၼ်ႈလူင်းမိူင်းမႃး ၼိုင်ႈဝၢၼ်ႈၼႆႉလႆႈသူင်ႇႁိူဝ်းမႂ်ႇပၼ်တီႈၸုမ်းၸတ်းပွႆး ၼိုင်ႈလမ်း။ ဝၼ်းမိူဝ်ႈၼႆႉ ႁိူဝ်းၼိုင်ႈလမ်း မီးၵႃႈၶၼ် 50 သႅၼ်ပျႃး။ တွၼ်ႈတႃႇဢၼ်ၼႆႉၵေႃႈၵၢင်ႉၵႄႇလူင်းၼႂ်းဢိူင်ႇၼႂ်းဝၢၼ်ႈ ၵဵပ်းငိုၼ်းၵူၼ်းမိူင်းၼိုင်ႈႁိူၼ်း   1 မိုၼ်ထိုင် 3 မိုၼ်ႇပျႃးထႅင်ႈ။

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ တႃႇသွမ်းၽြႃးလႄႈ  တႃႇႁိူဝ်းၼႆသေ ၵဵပ်းၵႂႃႇၼိုင်ႈႁိူၼ်း 3 မိုၼ်ႇဢေႃႈ ၊ ႁိူၼ်းယေးၸိူဝ်းၼႆႉၵေႃႈ တေလႆႈႁဵတ်းလွင်ႈမူတ်းသႂ် တင်းမူတ်းၼႆၶႃႈ ၊ ႁဵတ်းလွင်ႈမူတ်းသႂ်မႄးပူၵ်းပွင်ႁိူၼ်းယေးၼႆႉ ဢမ်ႇငၢႆႈၶႃႈ ၊ ငိုၼ်းၵေႃႈသဵင်ႈထႅင်ႈတလဵဝ် ငိုၼ်းတႃႇႁႃၵိၼ်လဵင်ႉတွင်ႉပေႃးယၢပ်ႇယူႇယဝ်ႉဢေႃႈ”- ဝႃႈၼႆ ။

သိုၵ်းမၢၼ်ႈပိုၼ်ၽၢဝ်ႇဝႃႈ တေယေႃးပၢင်းၽြႃးလူင်းၵျွင်း ၼႂ်းဝၼ်းတီႈ 22/9 /2025  သေပၼ်ႇလဵပ်ႈၶဝ်ႈ ဢွၵ်ႇဝၢၼ်ႈ လိုဝ်ႈၵိင်းတီႈဝတ်ႉၼႂ်းၼွင် 21 တီႈ ၊ ထိုင်ဝၼ်းတီႈ 9/10/2025 ၸင်ႇတေယေႃးမုၼ် ၶဝ်ႈဝတ်ႉၵျွင်းလူင်ၸၢမ်ၵဝ်ႈတွၼ်ႈၶိုၼ်းဝႃႈၼႆ ။

ၼႂ်းပီ 2025 ၼႆႉ ယူႇတီႈသိုၵ်းမၢၼ်ႈလႄႈ ပျီႇတူႉၸိတ်ႉ တေဢဝ်ႁူမ်ႇလူမ်ႈသေ ၸတ်းႁဵတ်းပွႆးၵႂႃႇ – ၵူၼ်းပိုၼ်ႉတီႈလၢတ်ႈၼင်ႇၼႆ ။