ၼႂ်းဝၢၼ်ႈမိူင်း ၸိူဝ်းမီးၵူၼ်းလူႉတၢႆၼမ် ယွၼ်ႉပၼ်ႁႃပတိၵ်ႈၶၢတ်ႈ ဢၼ်ပဵၼ်ယူႇတူဝ်ႈလုမ်ႈၾႃႉၼၼ်ႉ မိူင်းမၢၼ်ႈ ပဵၼ်ဝႆႉမၢႆ 4 ၼႆ – ၸုမ်းၾၢႆႇၵဵပ်းၶေႃႈမုလ်း လွင်ႈမၢႆတွင်း ဢွင်ႈတီႈမီးပၼ်ႁႃပတိၵ်ႈၶၢတ်ႈ The Armed Conflict Location & Event Data Project (ACLED) ႁၢႆးငၢၼ်းဝႆႉၼင်ႇၼႆ။

ACLED လၢတ်ႈဝႃႈ – ၼႂ်းပီ 2024 ပူၼ်ႉမႃးၼႆႉ ယွၼ်ႉပၼ်ႁႃပတိၵ်ႈၶၢတ်ႈသေ ၵူၼ်းမိူင်းႁူမ်ႈတုမ်မၢၼ်ႈ လႆႈလူႉတၢႆၵႂႃႇ 15,420 ၵေႃႉ ဝႃႈၼႆ။

မိူင်းဢၼ်မီးၵူၼ်းလူႉတၢႆၼမ်လိူဝ်ပိူၼ်ႈသုတ်းသမ်ႉ ပဵၼ်မိူင်းယူႊၶရဵၼ်ႊ ဢၼ်ပဵၼ်ပၢင်တိုၵ်းၵၼ်ဝႆႉတင်း မိူင်းရတ်ႉသျႃး၊ ထီႉသွင်သမ်ႉ ပဵၼ်ၼႂ်းပိုၼ်ႉတီႈ ပႃႊလႅတ်ႊသတၢႆႊ ဢၼ်ၺႃး ဢိတ်ႊသရေႊ ထူဝ်းသိုၵ်းတိုၵ်းတေႃးဝႆႉသေ ထီႉသၢမ်ပဵၼ် မိူင်းသူႊတၼ်ႊ ဢၼ်မီးပၼ်ႁႃပတိၵ်ႈ ၶၢတ်ႈၼႂ်းမိူင်းဝႆႉၼၼ်ႉ ၼႆယဝ်ႉ။

ၵူၺ်းၵႃႈ တီႈၼႂ်းၶေႃႈမုလ်းဢၼ် ACLED ၵဵပ်းဝႆႉၼၼ်ႉ ၵူၼ်းမိူင်းၸိူဝ်းလူႉတၢႆ တီႈၼႂ်းမိူင်းမၢၼ်ႈ ၼမ်လိူဝ်သေ ၼႂ်းမိူင်းသီႊရီႊယိူဝ်ႊ ၼပ်ႉႁူဝ်ႁဵင်။ မိူင်းသီႊရီႊယိူဝ်ႊၼႆႉ ယူႇဝႆႉတီႈမၢႆ 5 ၼႆယဝ်ႉ။

ၾၢႆႇၼိုင်ႈၵေႃႈ ဝၢႆးလင် သိုၵ်းမၢၼ်ႈပိုၼ်ၽၢဝ်ႇ ဝၼ်းတေၸတ်းႁဵတ်းပၢင်လိူၵ်ႈတင်ႈယဝ်ႉ သိုၵ်းမၢၼ်ႈ တိူဝ်းၸႂ်ႉႁိူဝ်းမိၼ် ပွႆႇမၢၵ်ႇၼႂ်းၼႃႈတီႈ ၸုမ်းလုၵ်ႉၽိုၼ်ႉၶဝ်ၵုမ်ၵမ်ဝႆႉ ႁၢဝ်ႈႁႅင်း။

ၸုမ်း ACLED ၼႆႉ ပဵၼ်ၸုမ်းဢၼ်ပၵ်းတႃပႂ်ႉတူၺ်း လွင်ႈၵေႃႇၵၢၼ်ႁၢႆႉလႄႈ ပၼ်ႁႃပတိၵ်ႈၶၢတ်ႈ တူဝ်ႈလုမ်ႈၾႃႉဝႆႉ – သိုဝ်ႇၶၢဝ်ႇ BBC ဢွၵ်ႇဝႆႉၼင်ႇၼႆ။