ၵူၼ်းၵႃႉၽၵ်းၶဵဝ်ၵေႃႉၼိုင်ႈ တီႈဝဵင်းမိူင်းယႆ ၺႃးၸူၼ်ၶူဝ်းၶွင်လႄႈငိုၼ်းၶမ်းသေၶႃႈႁႅမ်တၢႆၼႂ်းသူၼ်ဢွႆႈ ၽွင်းမၼ်းၼၢင်းၵႂႃႇၶၢႆၽၵ်းၶဵဝ် ။

မၼ်းၼၢင်းပဵၼ်Tom Boy (တူဝ်ယိင်းၸႂ်ၸၢႆး) ၵေႃႉၼိုင်ႈ ၸိုဝ်ႈႁွင်ႉ ဢေးတႆး (ႁိုဝ်) ဢွၼ်ႇၶိူဝ်း ဢႃယု 24 ပီ ယူႇပွၵ်ႉ 1 ဝဵင်းမိူင်းယႆ။

 ဝၼ်းတီႈ 17 /8/2025 ယၢမ်းၵၢင်ၼႂ် 6 မူင်း  ဢေးတႆး(ဢွၼ်ႇၶိူဝ်း)ၼႆႉ လုၵ်ႉဝၢၼ်ႈမေႃႈ ဢၢၼ်းၵႂႃႇၶၢႆၽၵ်းၶဵဝ်တီႈဝၢၼ်ႈႁူဝ်ၼႃး ဢၼ်မီးၼႂ်းၸႄႈဝဵင်းမိူင်းယႆ။ မၼ်းၼၢင်းဢွၵ်ႇႁိူၼ်းၵႂႃႇၸဵမ်ယၢမ်းၵၢင်ၼႂ် ထိုင်ၶၢဝ်းပွၵ်ႈႁိူၼ်းၶိုၼ်းၵေႃႈဢမ်ႁွတ်ႈထိုင်မႃးလႄႈ ၵူၼ်းႁိူၼ်းၸင်ႇဢွၼ်ၵၼ်ၸွမ်းႁႃၵေႃႈဢမ်ႇႁၼ်။

ထိုင်မႃးၼႂ်းဝၼ်းတီႈ 18 /8/2025 ၵူၼ်းဝၢၼ်ႈမေႃႈ ၸင်ႇၵႂႃႇထူပ်းႁၼ်တူဝ်တၢႆမၼ်းၼႂ်းသူၼ်ဢွႆႈ  ႁိမ်းၸမ်ဝၢၼ်ႈမေႃႈ ၼၼ်ႉဝႃႈၼႆ ။

ၵူၼ်းဝၢၼ်ႈလဵဝ်ၵၼ် လၢတ်ႈၽူႈတွႆႇႁွၵ်ႈဝႃႈ -“ ထူပ်းႁၼ်တူဝ်တၢႆမၼ်းၼႂ်းသူၼ်ဢွႆႈ  တၢင်းၽႄၵႂႃႇ ဝၢၼ်ႈႁူဝ်ၼႃးၼၼ်ႉဢေႃႈ။  ၺႃးၽၼ်း  5 ႁွႆး ၊ ၽၼ်းၵွၵ်းႁူဝ်ၼႆႉ 4 ႁွႆး ၊ ၽၼ်းၼႃႈ  ၽၼ်းမိုဝ်း ၸိူဝ်းၼႆႉ ၊ ၶူဝ်းဢၼ်မၼ်းဢဝ်ၵႂႃႇ တႃႇၵႂႃႇၶၢႆၼၼ်ႉလႄႈငိုၼ်းတွင်းမွၵ်ႈ 3 သႅၼ်ပျႃးၸိူဝ်းၼႆႉၵေႃႈ ႁၢႆမူတ်း ။   ”- ဝႃႈၼႆ ။  

တီႈၼႂ်းသူၼ်ဢွႆႈ ဢၼ်ၵူၼ်းဝၢၼ်ႈထူပ်းႁၼ်တူဝ်တၢႆ ဢေးတႆးၼၼ်ႉ မီးၸၢဝ်းမၢၼ်ႈတူင်ႈပဵင်း မႃးယူႇသဝ်းၵိၼ်ၸၢင်ႈတႅပ်းဢွႆႈဝႆႉ။ ၵူၺ်းၵႃႈ ဝၼ်းဢၼ်ႁၼ်တူဝ်တၢႆၼၼ်ႉတႄႉ ၸိူဝ်းၶဝ်ဢမ်ႇမီးၼႂ်းသူၼ်ၼၼ်ႉသေၵေႃႉယဝ်ႉ၊ ၸဵမ်ၵူၼ်းလႄႈၶူဝ်းၶွင် ႁၢႆဝႆႉမူတ်း ၵူၼ်းဝၢၼ်ႈလၢတ်ႈၼင်ႇၼႆ။

ၵူၼ်းၸၢႆးဢႃယု 40 ပီၵူၼ်းပိုၼ်ႉတီႈ လၢတ်ႈၽူႈတွႆႇႁွၵ်ႈဝႃႈ- “ ပေႃးတူၺ်းၼႆႉ လႅပ်ႈၶဝ်တေၸူၼ်သေႁႅမ်တၢႆပႅတ်ႈ ၸွမ်းတၢင်းလူင်ၼၼ်ႉသေ ၸင်ႇလၢၵ်ႈၶဝ်ႈသူၼ်ဢွႆႈ။ ၸွမ်းသဵၼ်ႈတၢင်းဢၼ်ၶဝ်လၢၵ်ႈၵႂႃႇၼၼ်ႉ ၶူဝ်းၶွင်မၼ်းသႃႉၽၵ်းမၼ်း သမ်ႉပေႃးမၢၵ်ႇမိူဝ်လူင်ၵႂႃႇၸွမ်းဢိူဝ်ႈ။ ၼႂ်းသူၼ်ဢွႆႈၼၼ်ႉသမ်ႉမီးမၢၼ်ႈ 5 ၵေႃႉပေႃႈမႄႈလုၵ်ႈ ၵိၼ်ၸၢင်ႈပႂ်ႉသူၼ်ဝႆႉ။ ၽိူဝ်ႇႁဝ်းၶႃႈၵႂႃႇတူၺ်းၼႆႉ ၸိူဝ်းၶဝ်ဢမ်ႇယူႇယဝ်ႉ ဢမ်ႇမီးသေၵေႃႉယဝ်ႉ။   မေႃႈၶဝ်ႈၶဝ်တႄႉတိုၵ်ႉတၢင်ႇၵဵင်းဝႆႉယူႇ ႁုင်သုၵ်းဝႆႉတဵမ်မေႃႈ၊ ၶူဝ်းၶဝ်တႄႉဢမ်ႇဢဝ်ၵႂႃႇပႃး။      ”- ဝႃႈၼႆ ။

ရူတ်ႉၶိူင်ႈဢေးတႆးတႄႉ ၵူၼ်းဝၢၼ်ႈႁၼ်သႃႉမၼ်းပူတ်းပႅတ်ႈဝႆႉတီႈထဵင်ၼၼ်ႉသေ ရူတ်ႉၶိူင်ႈတႄႉႁၢႆဝႆႉ ဝႃႈၼႆပႃး။

ၵဵဝ်ၵပ်းလွင်ႈၼႆႉ ၵူၼ်းပိုၼ်ႉတီႈၵႂႃႇတိူင်ႇလၢတ်ႈတီႈႁူင်းပလိၵ်ႈ ဝဵင်းမိူင်းယႆ။ ပလိၵ်ႈသမ်ႉဝႃႈ ဝၼ်းၼၼ်ႉမီးၶၢဝ်းတၢင်းၵူၼ်းလူင်ၶဝ်လႄႈ ပႆႇႁပ်ႉလိူင်ႈ။ ထႅင်ႈဝၼ်းၼိုင်ႈၸင်ႇမႃးၶိုၼ်းၼႆသေ ဢမ်ႇဢဝ်လိူင်ႈဢဝ်တၢင်းပၼ်။

ၵူၼ်းပိုၼ်ႉတီႈၶိုၼ်းၵႂႃႇလၢတ်ႈတီႈလုမ်းပႃႇတီႇမႂ်ႇသုင်ၸိုင်ႈတႆး ။ ၽူႈမၢႆလုမ်းၸွမ်းမႃးထၢႆႇၶႅပ်းႁၢင်ႈ ၵဵပ်းၶေႃႈမုလ်းပိူင်ပဵၼ်ယဝ်ႉသေ လၢတ်ႈဝႃႈ တေဢဝ်မိူဝ်းတၢင်ႇလၢတ်ႈၼေၵၼ်သေ တေသိုပ်ႇၸွပ်ႇထၢမ်လွင်ႈၼႆႉ တႃႇဢဝ်လိူင်ႈဢဝ်လၢဝ်းၵႂႃႇဝႃႈၼႆ။  

လွင်ႈၼႆႉပဵၼ်ဢၼ်လွၵ်ႇငိုတ်ႈလွင်ႈႁူမ်ႇလူမ်ႈၵူၼ်းပိုၼ်ႉတီႈလႄႈ ၶႂ်ႈႁႂ်ႈၸဵဝ်းသွၵ်ႈႁႃၽူႈပူၼ်ႉပႅၼ်ၶႃႈႁႅမ်ၵူၼ်းတၢႆၼၼ်ႉသေမႃးပၼ်တူတ်ႈတၢမ်ႇဝႆးဝႆးယူႇဝႃႈၼႆ။

ၵူၼ်းပိုၼ်ႉတီႈလၢတ်ႈဝႃႈ ၼႂ်းဝူင်ႈဝၢင်ႈၼႆႉ ၸႄႈဝဵင်းမိူင်းယႆၼႆႉ  ရူတ်ႉၶိူင်ႈၵႆႉႁၢႆ  ၊ ၽူႈလၵ်ႉၸၵ်ႉၶုတ်ႈလိူင်ႇၼမ်မႃး၊  ၵူၼ်းမိူင်း ပွတ်းမိူင်းယႆ မႆႈၸႂ် ယွၼ်ႉဢမ်ႇမီးလွင်ႈႁူမ်ႇလူမ်ႈဝႃႈၼႆ ။  

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“ မိူင်းယႆၼႆႉ မီးၸူၼ်ၼမ်ၼႃႇ ။ ၶူဝ်းၶွင်ၵေႃႈ ၵမ်းၵမ်းႁၢႆ ၊ မိူဝ်းဝႃး (ဝၼ်းတီႈ 19 ) ရူတ်ႉႁၢႆ ၼိုင်ႈလမ်း ၊ ၶဝ်ၵႂႃႇသူၼ်  ၵႂႃႇတမ်းဝႆႉၵမ်းၼိုင်ႈၵူၺ်း ၽိူဝ်ႇဢွၵ်ႇသူၼ်မႃးၶိုၼ်းၵေႃႈ ဢမ်ႇႁၼ်ယဝ်ႉ  ”- ဝႃႈၼႆ ။

ၼႂ်းမိူင်းတႆးပွတ်းႁွင်ႇၼႆႉ တင်ႈတႄႇပဵၼ်ၽႅၼ်ယၼ်ႇသိုၵ်း 1027 မႃး ၸုမ်းယိပ်းၵွင်ႈၵၢင်ႇ ၼမ်လိူင်ႇမႃး သေ ပၢင်တေႃႇလွင်း  ပိုတ်ႇပဵၼ်တၢင်းၵၢၼ်ၵေႃႈၼမ်လိူင်ႇ၊  ႁဵတ်းႁႂ်ႈမီးၽူႈလၵ်ႉ ၵူၼ်းၸူၼ် လိူင်ႇ။ ယွၼ်ႉၼၼ်လႄႈ လွင်ႈၸူၼ်ၵၼ်၊ ၶႃႈႁႅမ်၊ ပေႃႉထုပ်ႉၵၼ်တၢႆၸိူဝ်းၼႆႉၵေႃႈ ၵိူတ်ႇပဵၼ်မႃး။