ၼၢင်းယိင်းၵေႃႉၼႆႉ ၸိုဝ်ႈႁွင်ႉဝႃႈ ၶျႄႊလႃႊမၼ်ႊ Chella Man ဢႃယု 26 ပီ ။ မိူဝ်ႈလဵဝ် ပဵၼ်ၵူၼ်းမီးၸိုဝ်ႈသဵင်ၼႂ်းတူင်ႇဝူင်းၸုမ်းပၢႆးမွၼ်း မိူၼ်ၼင်ႇလဵၼ်ႈၸိူင်းလႂ် ႁဵတ်းမေႃႊတႅလ်ႊ (model) လႂ် ၸဵမ်ၸိူဝ်းၼႆႉ။
တႃႇမၼ်းၼၢင်းတေလႆႈမႃးၸၢတ်ႈပၢၼ် ဢၼ်ဢွင်ႇမၢၼ်ၸိူင်ႉၼႆမႃး မၼ်းၼၢင်းလႆႈလတ်းၶၢမ်ႈလွင်ႈတၢင်းတုၵ်ႉ လွင်ႈၵိၼ်းၸႂ်ၸိူင်ႉႁိုဝ်လၢႆလၢႆၼႆ ႁဝ်းမႃးတူၺ်းၸွမ်းၵၼ်ၶႃႈ ။
ၶျႄႊလႃႊမၼ်ႊ Chella Man ၼႆႉ မီးၼႃႈတႃ ႁၢင်ႈလဝ်း မီးတူဝ်ၶိင်းၶိုၵ်ႉၶမ်ႇဝႆႉလႄႈ ယူႇၾၢႆႇၼွၵ်ႈတူၺ်း မိူၼ်ႁၢင်ႈပဵၼ်ဝႆႉ ၵူၼ်းၸၢႆးၸႅတ်ႈၵေႃႉၼိုင်ႈ။ ၵူၺ်းၵႃႈ မၼ်းၵိူတ်ႇမႃး ပဵၼ်ၼၢင်းယိင်း ။
မၼ်းၼၢင်းၵိူတ်ႇႁၼ်ၼႃႈမႃး တီႈမိူင်းဢမေႊရီႊၵၢၼ်ႊ မိူဝ်ႈလိူၼ်ၼူဝ်ႊဝႅမ်ႊပိူဝ်ႊ ဝၼ်းတီႈ 24 ပီ 1998။ပေႃႈပဵၼ်ၶႄႇ မႄႈပဵၼ်ၸၢဝ်းၶိူဝ်းၵျူး ပဵၼ်လုၵ်ႈၶိုင်ႈ။ မၼ်းၼၢင်း ဢမ်ႇလႆႈပဵၼ်လုၵ်ႈဢွၼ်ႇထမ်ႊမတႃႊမိူၼ်ၸိူင်ႉၼင်ႇပိူၼ်ႈ။ မိူဝ်ႈမၼ်းၼၢင်း ဢႃယုတိုၵ်ႉလႆႈ 4 ၶူပ်ႇၵူၺ်း ၵိုင်ႉၵၢင်ႉပဵၼ်တၢင်းပဵၼ် ႁူဢမ်ႇလီ ၊ ဢမ်ႇလႆႈငိၼ်းသဵင်သင်။ၸၢတ်ႈပၢၼ်မၼ်းၼၢင်း ႁၢမ်းလွင်ႈမုင်ႈမွင်းဝႆႉ။
ယွၼ်ႉႁူဢမ်ႇလီလႄႈ မၼ်းၼၢင်းလႆႈ တူၺ်းပၢၵ်ႇတူၺ်းသူပ်း ဢၼ်ၵူၼ်းႁိမ်းႁွမ်းလၢတ်ႈတေႃႇၵၼ်သေ သွၼ်ႁူႉမႃး တႃႇလႆႈလွင်ႈၵပ်းသိုပ်ႇၵပ်းသၢၼ်ၵူၼ်း။
ထိုင်မႃး ဢႃယု 14 ပီ မၼ်းၼၢင်း လႆႈၸႂ်ႉၶိူင်ႈသဵင်ထွမ်ႇႁူသေ တႄႇလႆႈငိၼ်းသဵင်မႃး။ၽိူဝ်ႇမၼ်းၼၢင်း ထိုင်မႃးဢႃယု 14-15 ပီ ၸင်ႇႁူႉၶိုၼ်းတူဝ်ၸဝ်ႈၵဝ်ႇဝႃႈ ပဵၼ်ယိင်းသေတႃႉ မီးၸႂ်ပဵၼ်ၸၢႆး။
ၶျႄႊလႃႊမၼ်ႊ Chella Man လၢတ်ႈဝႃႈ – “ ၶႃႈၼႆႉ တူဝ် လႄႈ ၸႂ် ႁၢင်ႇၵႆၵၼ်ၼႃႇပူၼ်ႉတီႈ။တူဝ်ပဵၼ်ယိင်းသေတႃႉ ၸႂ်ၶႃႈ ၶႂ်ႈပဵၼ်ၸၢႆးၵူၺ်း။ ႁိုင်မႃးၵေႃႈ ၶႂ်ႈယူႇသဝ်းမိူၼ်ၵူၼ်းၸၢႆးၵူၺ်း။ဢမ်ႇမုင်ႈမွင်းဝႃႈ တေလႆႈထူပ်း ယူႇၸွမ်းတူင်ႇဝူင်းၸိူင်ႉၼင်ႇၶႃႈပဵၼ်ၼႆႉ ။ တူဝ်ၸဝ်ႈၵဝ်ႇၵူၺ်း ဢၼ်တေသၢင်ႈပဵၼ်တူဝ်တေႉၸဝ်ႈၵဝ်ႇ ” – ဝႃႈၼႆ။
သဵၼ်ႈတၢင်းၸဝ်ႈၵဝ်ႇ တူဝ်ႇၵဝ်ႇ လူဝ်ႇလႆႈႁႃၵူၺ်းၼႆ မၼ်းၼၢင်း ပွင်ႇၸႂ်မႃးသေ ၸင်ႇႁႃလွၵ်းလၢႆး တႃႇလႅၵ်ႈပိၼ်ႇတူဝ်ပဵၼ်ၸၢႆးမႃး ၵူႈၶၢဝ်းယၢမ်း ။ မၼ်းၼၢင်း ႁႃသမ်းယႃႁေႃႊမူင်ႊၵူၼ်းၸၢႆးမႃးၶိူဝ်းယႂ်းသေ ဝၢႆးမႃး ထိုင်တီႈလၢႆႈႁၢင်ႈပဵၼ်ၵူၼ်းၸၢႆးတဵမ်တူဝ် ။
ၵူၼ်းတၢင်းၼမ်ၵေႃႈ ႁၼ်ထိုင်ဝႃႈ မၼ်းပဵၼ်ၵူၼ်းၸၢႆးၵေႃႉၼိုင်ႈ။ပိူင်ပဵၼ်ၸိူဝ်းၼႆႉ မၼ်းၼၢင်းပိုတ်ႇလၢတ်ႈၼႄ တီႈပေႃႈမၼ်းၼၢင်းၵူႈလွင်ႈ။ၵေႃႉပဵၼ်ပေႃႈမၼ်းၼၢင်းၵေႃႈ ယွမ်းႁပ်ႉလႆႈၵူႈလွင်ႈသေ ဢမ်ႇႁႄႉႁၢမ်ႈၶတ်းၶႂၢင်သင်။
မိူဝ်ႈဢႃယု ၶျႄႊလႃႊမၼ်ႊ Chella Man ထိုင်မႃး 19 ပီၼၼ်ႉ မၼ်းၼၢင်းလၢႆႈႁၢင်ႈၵူၼ်းၸၢႆးတဵမ်တူဝ်။ မိူၼ်ၼင်ႇ သဵင်လၢတ်ႈၸႃၵေႃႈ မိူၼ်ၵူၼ်းၸၢႆးၵေႃႉၼိုင်ႈ ယူႇၵိၼ်မိူၼ်ၵူၼ်းၸၢႆးမႃးလႆႈ ထၢင်ႇႁၢင်ႈလွတ်ႈလႅဝ်း။
တွၼ်ႈတႃႇမၼ်းၼၢင်းတေလႆႈလွင်ႈဢွင်ႇမၢၼ်ႈမႃး ၊ တႃႇပူၼ်ႉလွင်ႈတုၵ်ႉလွင်ႈၶီၸိူဝ်းၼႆႉ မၼ်းၼၢင်းမီးၵေႃႉႁၵ်ႉဝႆႉၵေႃႉၼိုင်ႈ ၵေႃႉဢၼ်ပၼ်ႁႅင်းၸႂ်မၼ်းၼၢင်းမႃး ဢမ်ႇသုတ်ႉဢမ်ႇထွႆ ၸိုဝ်ႈႁွင်ႉ မႄႊရီႊပၼ်ႊၼႂႃႊ။
လွင်ႈတၢင်းမၼ်းၼၢင်းလႆႈ လၢႆႈႁၢင်ႈၵူၼ်းၸၢႆးမႃးၸိူဝ်းၼႆႉ မၼ်းၶိုၼ်းပိုၼ်ၽႄၶိုၼ်းၶွင်ႈတူဝ်ထူပ်းမၼ်း ၼိူဝ်သူဝ်ႊသျႄႊမီႊတီႊယႃႊသေ ႁဵတ်းႁႂ်ႈ ၵူၼ်းႁူႉၸၵ်းမၼ်းၼၢင်းၼမ်မႃးလိူဝ်ၵဝ်ႇ။
မိူဝ်ႈမၼ်းသမ်းယႃႁေႃႊမူင်ႊၵူၼ်းၸၢႆးသေ ပိၼ်ႇပႅင်ႈသဵင်ႈလၢတ်ႈမၼ်းၼၼ်ႉၵေႃႈ မၼ်းထႆႇဝႆႉ ဝီႊတီႊဢူဝ်ႊ ၵူႈဝၼ်း မၼ်းတေဢတ်းသဵင်ထႆႇႁၢင်ႈတူင်ႉသေ လၢတ်ႈဝႃႈ- “ ၶႃႈႁဝ်းပဵၼ် ၶျႄႊလႃႊမၼ်ႊ ၼႆႉပဵၼ်သဵင်ႁဝ်း ၶၢဝ်းတၢင်းၼိုင်ႈဝၼ်း ၶၢဝ်းတၢင်းသွင်ဝၼ်း ” ၼႆတႄႇၵႂႃႇ တေႃႇထိုင် လုၵ်ႉတီႈသဵင်ၵူၼ်းယိင်းလႅၵ်ႈလၢႆႈပဵၼ်သဵင်ၵူၼ်းၸၢႆး။
လွင်ႈၸိူဝ်းၼႆႉၵေႃႈ မၼ်းၼၢင်းတၢင်ႇၼိူဝ်ဢွၼ်ႊလၢႆႊသေ ႁဵတ်းႁႂ်ႈၵူၼ်းတင်းလူၵ်ႈ သူၼ်ၸႂ်ၼိူဝ်မၼ်းၼၢင်း။ထိုင်မႃး 2018 မၼ်းၼၢင်း မီးၵူၼ်းၽိတ်ႈမွၵ်ႇႁွင်ႉဢဝ် ၵႂႃႇလၢတ်ႈၵႂၢမ်း လွင်ႈတၢင်းဢၼ်ဝႃႈ Gender (ၸႂ်ၸၢႆးၶႂ်ႈပဵၼ်ယိင်း ၸႂ်ယိင်းၶႂ်ႈပဵၼ်ၸၢႆး ) တီႈလၢႆးၵၢၼ်ၸိုဝ်ႈယႂ်ႇ TEDx Talks တီႈၼိုင်ႈသေ ႁဵတ်းႁႂ်ႈမၼ်းၼၢင်း လိုဝ်းလင်မႃးလိူဝ်ၵဝ်ႇ။
ဝၢႆးၼၼ်ႉ မီးၶွမ်ႊမၼီႊငဝ်းတူင်ႉ(ထႆႇၸိူင်း) ၶဝ် ႁွင်ႉမၼ်းၼၢင်း ႁူမ်ႈႁဵတ်းၵၢၼ် ပဵၼ် Model ၵေႃႉၼိုင်ႈ ထိုင်ႁၢၼ်ႉၼႆႉ။
ထိုင်မႃး 2019 ၼၼ်ႉ မၼ်းၼၢင်း လႆႈလဵၼ်ႈၸိူင်းဝႆႉ ၼႂ်းငဝ်းတူင်ႉ ဢၼ်မီးၸိုဝ်ႈဝႃႈ DC UNIVERSE လိူဝ်ၼၼ်ႉၵေႃႈ လႆႈၶဝ်ႈလဵၼ်ႈၸိူင်းၸွမ်း ၼႂ်းငဝ်းတူင်ႉၸိုဝ်ႈယႂ်ႇ လၢႆလၢႆဢၼ်။
လွင်ႈတၢင်း ဢၼ်လၢတ်ႈမႃးၸိူဝ်းၼႆႉ ၼႄဝႃႈ လုၵ်ႉတီႈၵူၼ်းဢမ်ႇမီးတၢင်းမုင်ႈမွင်းသင် ၊ ပဵၼ်ၵူၼ်းၼႂ်းလပ်းသိင်ႇ မိူၼ်ၼင်ႇ ပဵၼ်ၵူၼ်းႁူၼူၵ်ႇ ဢမ်ႇမေႃလၢတ်ႈၵႂၢမ်း ၊ တူဝ်ပဵၼ်ယိင်း ၸႂ်ပဵၼ်ၸၢႆး တႄႇၵႂႃႇၸိူဝ်းၼႆႉသေ မၼ်းၼၢင်းၶတ်းၸႂ် ဢမ်ႇယွမ်းၵၢၼ်ႉယွမ်းထွႆ ထိုင်တီႈ ပဵၼ်ၵူၼ်းမီးၼႃႈမီးတႃမႃး ၼႂ်းၵႄႈၵူၼ်းၼမ် ထိုင်တီႈ ၸိုဝ်ႈယႂ်ႇလိုဝ်းႁူင် ၸွတ်ႇလုမ်ႈၾႃႉလႆႈ ၼႆၼၼ်ႉယဝ်ႉ။
လိူဝ်သေၼၼ်ႉ မၼ်းၼၢင်း မီးလွင်ႈဢွင်ႇမၢၼ် လၢႆလွင်ႈယဝ်ႉသေတႃႉ မၼ်းမီးၸႂ် ၶႂ်ႈတင်ႈႁူင်းသဝ်း တွၼ်ႈတႃႇ ပူၵ်းပွင် ၵူၼ်းႁူၼူၵ်ႇတႃတၼ် လိူဝ်ၼၼ်ႉ မၼ်းၼၢင်း ဢွၵ်ႇလၢႆးၵၢၼ် ပၼ်ႁႅင်းၸႂ် တႃႇၵူၼ်းၸိူဝ်းပဵၼ် LGBT ( ၸႂ်ၸၢႆးပဵၼ်ယိင်း ၸႂ်ယိင်းပဵၼ်ၸၢႆး ) ၸိူဝ်းထုၵ်ႇပေႃႈမႄႈပီႈၼွင်ႉ ဢမ်ႇႁၼ်လီၸွမ်းလႄႈ ၺႃး ၵူၼ်းႁိမ်းႁွမ်း လူမဝ်သေႉသွမ်းၸိူဝ်းၼၼ်ႉယူႇ ။
ႁူမ်ႈဝႃႈ ၶျႄႊလႃႊမၼ်ႊ Chella Man ၼႆႉ ပဵၼ်လုၵ်ႈၶိုင်ႈ ၊ ႁူတၼ်လၢတ်ႈၵႂၢမ်းဢမ်ႇပဵၼ် လိူဝ်ၼၼ်ႉ ပဵၼ်ၵူၼ်းမႃးၵေႃႈ ဢမ်ႇၸႂ်ႈၸၢႆးတဵမ်တူဝ် ဢမ်ႇၸႂ်ႈယိင်းတဵမ်တူဝ် သေတႃႉ မိူဝ်ႈလဵဝ် ႁူႉပွင်ႇလွင်ႈတၢင်း မၼ်းၼၢင်းလီလီ။
ၼွၵ်ႈလိူဝ်ၼၼ်ႉ မၼ်းၼၢင်းႁူႉလွင်ႈပႅၵ်ႇပိူင်ႈလၢၵ်ႇလၢႆ ၼႂ်းတူဝ်ၵူၼ်းၸႂ်ၵူၼ်းလႄႈ လွၵ်းလၢႆးၶၢမ်ႈပူၼ်ႉ လွင်ႈႁၢႆႉၸႃႉၽဝၸူဝ်ႈပၢၼ်တူဝ်ၵဝ်ႇသေ မၼ်းၼၢင်းမေႃယူႇသၢင်ႈၵိၼ်သဝ်း ၸွမ်းလူၺ်ႈပိူင်ပဵၼ်ၼၼ်ႉသေ ယူႇလွတ်ႈမႃးလႆႈတေႃႇထိုင်ႁၢၼ်ႉမိူဝ်ႈလဵဝ်လႄႈ လွင်ႈၼႆႉ ထုၵ်ႇလီလႆႈဢဝ် ပဵၼ်တွၼ်ႈသွၼ် ၼႂ်းၸၢတ်ႈပၢၼ်ၽဝၵူၼ်းႁဝ်း ယူႇယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ