ၼႂ်းမိူင်းမၢၼ်ႈၼႆႉ ယွၼ်ႉသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းလႄႈ လွင်ႈၶတ်းၸႂ် ႁဵတ်းသၢင်ႈ တႃႇႁႂ်ႈ သုၼ်ႇလႆႈ ၸၢႆးယိင်းမီးလွင်ႈၽဵင်ႇပဵင်းၵၼ် (Gender Equality) ၼၼ်ႉၵေႃႈ ႁူၼ်လင်တူၵ်းလိုၼ်းၵႂႃႇၶိုၼ်းၼႆ – ၽူႈတၢင်တူဝ်ၶိုၵ်ႉတွၼ်း ၸုမ်းသုၼ်ႇလႆႈသုၼ်ႇပဵၼ်ၵူၼ်း ၸၢတ်ႈၸိုင်ႈလုမ်ႈၾႃႉ တွမ်ႊဢႅၼ်ႊတရူႊ ပိုၼ်ၽၢဝ်ႇဢွၵ်ႇ ၽိုၼ်လိၵ်ႈႁၢႆးငၢၼ်း ၼႂ်းဝၼ်းတီႈ 2 လိူၼ်ၵျူႊလၢႆႊ ၼင်ႇၼႆ။

ၼႂ်းၽိုၼ်လိၵ်ႈႁၢႆးငၢၼ်းၼၼ်ႉ ပႃးဝႆႉဝႃႈ – ၼၢင်းယိင်း ၊ ၼုမ်ႇယိင်း ၊ ယိင်းႁၵ်ႉယိင်း ၊ ၸၢႆးႁၵ်ႉၸၢႆး (LGBT) ၸိူဝ်းၼႆႉ ထုၵ်ႇတပ်ႉသိုၵ်းမၢၼ်ႈ ၵေႃႇၵၢၼ်ႁၢႆႉ တဵၵ်းတဵင်ပေႉၵိၼ် ၊ ဢဝ်ၼမ်ႉမျၢတ်ႈ ၼမ်ႉတွၼ်း လူၺ်ႈ ၵူႈလွၵ်းလၢႆးတၢင်း – ၼႆယဝ်ႉ။

မိူၼ်ၼင်ႇ ၸွမ်းပိုၼ်ႉတီႈဢၼ်ပဵၼ်ပၢင်တိုၵ်း ၸွမ်းၵိတ်ႉ/ လၢၼ်ႇ ၵူတ်ႇထတ်းလႄႈ တပ်ႉပၢင်သဝ်းၸိူဝ်း ၼႆႉၵေႃႈ သိုၵ်းမၢၼ်ႈ ႁဵတ်းပူၼ့်ပႅၼ်တၢင်းၵႃႇမ ႁၢဝ်ႈႁႅင်းမႃးယူႇတႃႇသေႇ။ လွင်ႈၸႅၵ်ႇၽႄၸၼ်ႉထၢၼ်ႈ ၸၢႆးယိင်းလႄႈ လွင်ႈလွၵ်ႇငိုတ်ႈ ၵေႃႇၵၢၼ်ႁၢႆႉ ပူၼ်ႉပႅၼ်တၢင်းၵႃႇမၼႆႉ ႁဵတ်းႁႂ်ႈတုမ်ႉတိူဝ်ႉ ပၢႆးတူဝ်ပၢႆးၸႂ် – ဝႃႈၼႆ။

ဝၢႆးလင် သိုၵ်းမၢၼ်ႈ ယိုတ်းဢႃႇၼႃႇမႃးၼႆႉ ၼၢင်းယိင်းလႄႈ LGBT ဢၼ်မီးၼႂ်းမိူင်းမၢၼ်ႈ လႆႈသုမ်း သုၼ်ႇလႆႈႁဵၼ်းသွၼ်လိၵ်ႈလၢႆး ၊ သုၼ်ႇလႆႈပၢႆးယူႇလီလႄႈ ပၢႆးမၢၵ်ႇမီး ၸိူဝ်းၼႆႉမႃးတင်းၼမ်  – ၼႆယဝ်ႉ။

မိူၼ်ၼင်ႇ ၼၢင်းယိင်းၸၢဝ်းၶိူဝ်း ရူဝ်ႊႁိၼ်ႊၵျႃႊ ၶဝ်ၵေႃႈ ၼွၵ်ႈလိူဝ် ၺႃးၸႅၵ်ႇၽႄယဝ်ႉ ဢမ်ႇမီးလွင်ႈ ႁူမ်ႇလူမ်ႈ ၊ ၺႃးပၢၵ်ႈထဵင်ဝႆႉ တႃႇတေႁပ်ႉပဵၼ်ၵူၼ်းၵိုၵ်းမိူင်း ၊ ဢမ်ႇမီးငဝ်ႈၶၢမ်ႇပိုၼ်ႉ သုၼ်ႇလႆႈသုၼ်ႇ ပဵၼ်ၵူၼ်းသေဢမ်ႇၵႃး ၼႂ်းၸၢဝ်းၶိူဝ်း ရူဝ်ႊႁိၼ်ႊၵျႃႊၶဝ်ၼင်ႇၵၼ်ၵေႃႈ ၸွမ်းၼင်ႇ ၾိင်ႈႁိတ်ႈႁွႆးၶဝ်မီးဝႆႉသေ ယင်းၺႃးၸႅၵ်ႇၽႄၵၼ်ထႅင်ႈ – ဝႃႈၼႆ။

ၵူၺ်းၵႃႈ ၼႂ်းၵႄႈငဝ်းလၢႆး ယၢပ်ႇၵိၼ်းလၢႆလွင်ႈယူႇၼႆ ၼၢင်းယိင်းလႄႈ LGBT ၶဝ်ယင်းၶဝ်ႈပႃး ၼႂ်းၵၢၼ် တေႃႇသူႈ ၽဵဝ်ႈမူၺ်ႉ ၸဝ်ႈဢႃႇၼႃႇသိုၵ်းမၢၼ်ႈ သေဢမ်ႇၵႃး ၶတ်းၸႂ်ႁဵတ်းသၢင်ႈ ၼင်ႇႁိုဝ် တေဢဝ်တၢင်းၽိတ်း ၵူၼ်းၸိူဝ်းပူၼ်ႉ ပႅၼ်တၢင်းၵႃႇမလႄႈ ၼင်ႇႁိုဝ် ယိင်းၸၢႆး တေမီးလွင်ႈၽဵင်ႇပဵင်းၵၼ် ၸိူဝ်းၼႆႉယူႇ။

ၵွပ်ႈၼၼ် ယူႇတီႈ ၵူႈၸိုင်ႈမိူင်းၵေႃႈ ထုၵ်ႇလီႁူမ်ႈႁွမ်း ၵွင်ႉသၢၼ်ၵၼ်တင်း ၸုမ်းတူင်ႇဝူင်းၵူၼ်း ၼႂ်းပိုၼ်ႉတီႈသေ ပၼ်တၢင်းၸွႆႈထႅမ်တီႈ ၼၢင်းယိင်းလႄႈ LGBT ၼႂ်းမိူင်းမၢၼ်ႈၵႂႃႇၼႆ – ၼႂ်းၽိုၼ်လိၵ်ႈ ႁၢႆးငၢၼ်းၼၼ်ႉ တိုၵ်းသူၼ်းလၢတ်ႈဝႆႉပႃး ၼင်ႇၼႆ။