ဝၼ်းမိူဝ်ႈၼႆႉလႆႈဝႃႈ ပဵၼ်ပၢၼ်ဢၼ်ၶိုတ်းၵၢပ်ႈၶိုတ်းပၢၼ် ၾိင်ႈငႄႈၾိင်ႈထုင်းၵူၼ်းၶိူဝ်းယႂ်ႇၼႂ်းလုမ်ႈၾႃႉ ၽႄႈလၢမ်းႁူမ်ႇငမ်းထိုင်ၵူၼ်းမိူင်းၶူင်းၵၢင်ၶႂ်ႈဝႃႈၵမ်ႈပႃႈၼမ်။ ယွၼ်ႉဝႃႈ ၵၢၼ်သိုဝ်ႇသၢၼ် ဢိၼ်ႊထိူဝ်ႊၼႅတ်ႊ သိုဝ်ႇၼႅင်ႈသၢၼ် ၶဝ်ႈထိုင်မိုဝ်းၵူႈၵေႃႉ။ သင်ဝႃႈၸွမ်းလင်သိုဝ်ႇၼႅင်ႈသၢၼ်တိၵ်းတိၵ်းသေ ပွႆႇမၢင်ဝၢင်းႁဵဝ်ႇပႅတ်ႈ ၾိင်ႈငႄႈၾိင်ႈထုင်းၸဝ်ႈၵဝ်ႇၸိုင် ၸၢင်ႈဝွတ်ႈဝၢႆး ႁၢႆလၢႆၵႂႃႇလူၺ်ႈဢမ်ႇလႆႈသႂ်ႇဢဵၼ်သႂ်ႇႁႅင်း။ ၼႂ်းၵႄႈလွင်ႈၶဵင်ႇတႃႉလူင်ၼႆ ၵူၼ်းၼုမ်ႇတႆးႁဝ်းၵုသူဝ်ႇလီ တီႈမီးၵူၼ်းၼုမ်ႇတႆးဢၼ်ႁၵ်ႉၾိင်ႈငႄႈၾိင်ႈထုင်းတႆး လွင်ႈၵႃႈဝႅၼ်ၸၢတ်ႈသႅင်းလႄႈႁွင်ႉၽဵင်းၵႂၢမ်းပၢၼ်ၵဝ်ႇပၢၼ်မႂ်ႇယူႇ။ မၼ်းၸၢႆးတႄႉပဵၼ်ၵူၼ်းၼုမ်ႇသႅၼ်းႁုၼ်ႈမႂ်ႇ ၵိူတ်ႇၼႂ်းမိူင်းတႆးပွတ်းႁွင်ႇ ။ မၼ်းၸၢႆးပဵၼ်ၽႂ်။ ႁဵတ်းႁိုဝ်လႄႈၵူၼ်းၼုမ်ႇပၢၼ်ယၢမ်းလဵဝ် သမ်ႉမႃးသူၼ်ၸႂ်ႁၵ်ႉလွင်ႈၾိင်ႈထုင်းတႆးပၢၼ်ၵဝ်ႇ။ ၼၢင်းငိုၼ်းႁွမ် ၸုမ်းၶၢဝ်ႇၽူႈတွႆႇႁွၵ်ႈလႆႈတွင်ႈထၢမ်ဝႆႉၼင်ႇၼႆ။

ထၢမ် – ၵပ်းသိုပ်ႇၼႄႉၼမ်းပၼ် ၸိုဝ်ႈသဵင်၊ ၸႃႇတိ၊ တီႈၵိူတ်ႇဢိတ်ႉၼိုင်ႈၶႃႈ?

တွပ်ႇ – မႂ်ႇသုင်ထိုင်ပီႈၼွင်ႉ ႁဝ်းၶႃႈ ၼႂ်းမိူင်းၼွၵ်ႈမိူင်း ၵူႈတီႈၵူႈတၢင်းၶႃႈ။ ၶႃႈႁဝ်းၸိုဝ်ႈႁွင်ႉ ၸၢႆးၵွၼ်းလၢဝ်၊ ၸႃႇတိ တီႈၵိူတ်ႇတႄႉပဵၼ်ဝၢၼ်ႈၶႆႉ၊ ထုင်ႉပူင်ႇဝူဝ်း၊ ဝဵင်းၵျွၵ်ႉမႄး၊ ၸိုင်ႈတႆးပွတ်းႁွင်ႇၶႃႈ။

ထၢမ် – ပေႃးလၢတ်ႈဝႃႈ ၸၢႆးၵွၼ်းလၢဝ်ၼႆ ၵမ်ႈၼမ်တေဢွၼ်ၵၼ် ႁူႉၸၵ်းဝႃႈ ပဵၼ်မင်းသႃး ႁွင်ႉၽဵင်း ၵႂၢမ်းပၢၼ်ၵဝ်ႇၼႆၶႃႈၼေႃႈ။ ၵွပ်ႈၼႆ မိူၼ်ၼင်ႇလွင်ႈႁွင်ႉၽဵင်းၵႂၢမ်းပၢၼ်ၵဝ်ႇၼႆႉ သူၼ်ၸႂ်/ ပႃးၸႂ်မႃး ၸဵမ်မိူဝ်ႈၵေႃႉလဵၵ်ႉၶႃႈႁႃႉ?

တွပ်ႇ – ၸႂ်ႈယဝ်ႉၶႃႈ … မၼ်းယူႇၼႂ်းသၢႆလိူတ်ႈမႃး တင်ႈတႄႇၸဵမ်မိူဝ်ႈၵေႃႉလဵၵ်ႉဢေႃႈ။ ပေႃႈမႄႈၵေႃႈ ဢမ်ႇမေႃ၊ ၼႂ်းပီႈၼွင်ႉၸိူဝ်ႉၶိူဝ်းၵေႃႈ ဢမ်ႇမီးၽႂ်မေႃႁွင်ႉၶႃႈ။ ၵူၺ်းၵႃႈ ၸွမ်းၼင်ႇၶႃႈတွင်းလႆႈတႄႉ ၸဵမ်မိူဝ်ႈၵေႃႉလဵၵ်ႉ ပေႃးဝႃႈမီးပွႆးသၢင်ႇလွင်း/ ပွႆးလိူၼ်သီႇၼႆ တေၵႆႉဢဝ်သၢတ်ႇဢွၼ်ႇ ၵႂႃႇသိူဝ်ႇသေ တူၺ်းၸၢတ်ႈသႅင်း၊ မင်းသႃး/ ၼၢင်းသမီးၶဝ်ၵႃႈၵႃႈဝႅၼ်ဝႅၼ်၊ ႁွင်ႉၵႂၢမ်းမၢၵ်ႇၵၼ်ၸိူဝ်းၼႆႉ တေႃႇထိုင်မိူင်းပေႃးလႅင်း။ ပဵၼ်ၵူၼ်းၵျိူၵ်ႈ/ လႆႈၸႂ်ၸၢတ်ႈသႅင်းမႃး ၸဵမ်မိူဝ်ႈၵေႃႉလဵၵ်ႉၶႃႈဢေႃႈ။

ထၢမ် – မိူၼ်ၵၢပ်ႈပၢၼ်တေႃႈလဵဝ် ၵူၼ်းသူၼ်ၸႂ်ႁွင်ႉၽဵင်းၵႂၢမ်းပၢၼ်ၵဝ်ႇၵေႃႈ ဢမ်ႇမီးၼမ်၊ တႃႇတေမေႃ  ႁွင်ႉၼၼ်ႉၵေႃႈ ဢမ်ႇငၢႆႈ၊ ၵဵဝ်ႇလူၺ်ႈၽဵင်းၵႂၢမ်းၵဝ်ႇၼႆႉသေ ၸွင်ႇယၢမ်ႈလႆႈၾိုၵ်းမႃးၶႃႈႁႃႉ?

တွပ်ႇ – ၸႂ်ႈဢေႃႈ … ၽဵင်းၵႂၢမ်းပၢၼ်ၵဝ်ႇၼႆႉ ပဵၼ်ၽဵင်းၵႂၢမ်းဢၼ်တေလႆႈၸႂ်ႉတူဝ်ထူပ်း၊ ၸႂ်ႉပၢႆးဝူၼ်ႉတီႈ ဢၼ်ႁၼ်ၼႂ်းလွင်ႈဢၼ်ပဵၼ်ယူႇၼၼ်ႉသေ ႁွင်ႉဢွၵ်ႇမႃးၶႃႈဢေႃႈ။ ဢၼ်ၾိုၵ်းတႄႉ လႆႈၾိုၵ်းမႃးလူၺ်ႈ တူဝ်ၸဝ်ႈၵဝ်ႇၵူၺ်းၶႃႈ။ ႁႂ်ႈပေႃးဝႃႈ ၵႂႃႇႁဵၼ်းတီႈႁူင်းႁဵၼ်း မေႃသွၼ်ၶဝ်သွၼ်ပၼ်ၸိူင်ႉၼၼ်တႄႉ ဢမ်ႇမီးၶႃႈ။ ပေႃးဢမ်ႇၵျိူၵ်ႈ/ ဢမ်ႇသူင်ႇ၊ ဢမ်ႇပႃးဝႃႇသၼႃႇ၊ ဢမ်ႇမီးသူႇလသတီႇၼႂ်းတူဝ်ၼႆတႄႉ မၼ်းဢမ်ႇၸၢင်ႈႁွင်ႉဢွၵ်ႇလႆႈၶႃႈ။ မိူဝ်ႈယူႇတၢင်း မိူင်းတႆးႁဝ်းတႄႉၵေႃႈ ၶႃႈဢမ်ႇပႆႇယၢမ်ႈႁွင်ႉၽဵင်းၵႂၢမ်းပၢၼ်ၵဝ်ႇ၊ တိုၵ်ႉႁႃမၼ်းၾိုၵ်းႁွင်ႉ မိူဝ်ႈမႃးယူႇတၢင်းမိူင်းထႆးၼႆႉၵူၺ်းၶႃႈ။

ထၢမ် – ၽဵင်းၵႂၢမ်းပၢၼ်ၵဝ်ႇၼႆႉ ၸွင်ႇယၢမ်ႈဢတ်းဢွၵ်ႇပဵၼ်ၶႅပ်း ဢမ်ႇၼၼ် ဢတ်းဢွၵ်ႇသေပိုၼ်ၽႄႈ ၶႃႈၼေႃ?

တွပ်ႇ – ႁႂ်ႈႁဵတ်းဢွၵ်ႇပဵၼ် ၶႅပ်းဝီႊတီႊယူဝ်ႊတႄႉၵေႃႈ တေဢမ်ႇမီးၶႃႈ။ ယွၼ်ႉဝႃႈ မိူဝ်ႈလဵဝ်ၵေႃႈ ပဵၼ်ၵၢပ်ႈပၢၼ်ဢွၼ်ႊလၢႆႊ၊ သူဝ်ႊသျႄႊမီႊတီႊယိူဝ်ႊၼႆလႄႈ လႆႈႁွင်ႉသေတၢင်ႇဝႆႉပၼ်တီႈၼႂ်းၶျွင်ႉ YouTube လႄႈ Facebook သုၼ်ႇတူဝ်ၶႃႈယူႇလၢႆလၢႆၽဵင်း ပႃးၸဵမ်ၽဵင်းၵႂၢမ်းပၢၼ်မႂ်ႇတင်း ပၢၼ်ၵဝ်ႇၶႃႈ။ ၸိုဝ်ႈ YouTube တႄႉသႂ်ႇဝႆႉဝႃႈ Gonlao Channel ၼႆ ဢေႃႈ။ ၶဝ်ႈပၼ်ႁႅင်းထွမ်ႇငိၼ်းၽဵင်းၵႂၢမ်းပၢၼ်ၵဝ်ႇ၊ ပၢၼ်မႂ်ႇလႄႈ ပိုၼ်ႉႁူႉပၢႆးႁၼ်ၸိူဝ်းၼႆႉ လႆႈယူႇၶႃႈ။

ထၢမ် – မိူဝ်ႈပူၼ်ႉမႃးပႆႇႁိုင်ၼႆႉ လႆႈႁၼ်ဢွၵ်ႇဝႆႉၽဵင်းၵႂၢမ်းပၢၼ်မႂ်ႇယူႇ ႁူဝ်ၼိုင်ႈၶႃႈၼေႃ။ ၵွပ်ႈၼၼ် ယူႇတီႈတူဝ်ၸဝ်ႈၵဝ်ႇသေ ၽဵင်းၵႂၢမ်းပၢၼ်မႂ်ႇတင်း ပၢၼ်ၵဝ်ႇၼႆႉ ထုၵ်ႇၸႂ်/ လႆႈၸႂ်ႁွင်ႉဢၼ်လႂ်လိူဝ်ၶႃႈ?

တွပ်ႇ – ဢေႃႈ… လႆႈသိုဝ်ႉၶိုၼ်းၽဵင်းၵႂၢမ်း ၶူးၸၢႆးလၢဝ်သႂ် ဢၼ်မီးၸိုဝ်ႈဝႃႈ “သင်မၢၵ်ႇႁူဝ်ၸႂ်မီးပိၵ်ႇ” ၼၼ်ႉသေ မႃးႁွင်ႉၶိုၼ်းထႅင်ႈၵမ်းၼိုင်ႈဢေႃႈ။ ပေႃးတေထၢမ်ဝႃႈ ထုၵ်ႇၸႂ်ႁွင်ႉဢၼ်လႂ်လိူဝ်ပိူၼ်ႈၼႆတႄႉ ယူႇတီႈ ပဵၼ်ၵူၼ်းၵျိူၵ်ႈပၢႆးမွၼ်းသေ မၼ်းႁွင်ႉလႆႈယူႇတၢင်းသွင်ဢၼ်ၶႃႈ။ မိူဝ်ႈလႆႈယူႇၼႂ်း တူင်ႇဝူင်းၽဵင်းၵႂၢမ်းပၢၼ်ၵဝ်ႇၵေႃႈ ၸွမ်းၼင်ႇၼမ်ႉၵတ်ႉၸဝ်ႈၵဝ်ႇမီးသေ မၼ်းၵေႃႈတေႁွင်ႉဢွၵ်ႇမႃးလႆႈၼၼ်ႉ ၶႃႈၼႃႇၼေႃႈ။ လႆႈၸႂ်ႁွင်ႉတၢင်းသွင်ဢၼ်ယူႇၶႃႈ ယွၼ်ႉဝႃႈမၼ်းပဵၼ်ပၢႆးမွၼ်း။ ယဝ်ႉၵေႃႈ ၶေႃႈၵႂၢမ်းဢၼ်ဝႃႈ ပၢႆးမွၼ်းၼႆႉ မၼ်းဢမ်ႇၸႂ်ႈလွင်ႈၵၢၼ်ႁွင်ႉၽဵင်းၵႂၢမ်းဢၼ်လဵဝ်ၵူၺ်း၊ မိူၼ်ၼင်ႇ ၵၢၼ်တဵၼ်ႈၵႃႈဝႅၼ် ၸိူဝ်းၼႆႉၵေႃႈ ပဵၼ်ပၢႆးမွၼ်းယဝ်ႉၶႃႈ။ ႁဝ်းၶႃႈ ႁဝ်းဝႅၼ်ၸိူဝ်းၼႆႉ ပၼ်တၢင်းသိူဝ်းၸဝ်ႈၵဝ်ႇလႆႈလႄႈ ပၼ်တၢင်းသိူဝ်းတၢင်ၵေႃႉပႃး။ ပၢႆးမွၼ်းၼႂ်းတူဝ်ၸဝ်ႈၵဝ်ႇ ၸွမ်းၼင်ႇပွင်ပဵၼ်လႆႈၼၼ်ႉၵေႃႈ လႆႈဢဝ်ဢွၵ်ႇမႃးၼႄပၼ် ၸိူင်ႉၼၼ်ၶႃႈ။

ထၢမ် – သင်ဝႃႈ ၶႂ်ႈတုၵ်းယွၼ်း ႁႂ်ႈႁွင်ႉမၢၵ်ႇပၼ်ၸုမ်းၶၢဝ်ႇၽူႈတွႆႇႁွၵ်ႈ သေတွႆးၼိုင်ႈၸွင်ႇတေလႆႈယူႇၶႃႈႁႃႉ?

တွပ်ႇ – ဢေႃႈ… လႆႈၶႃႈဢေႃႈ။ ၶႃႈတေဢဝ်ၽဵင်းၵႂၢမ်း တႆးလူင်ၶႃႈၼႃ…တေဢမ်ႇမီးသဵင်တွႆႇ ၊ သဵင်တယေႃးၸိူဝ်းၼႆႉၶႃႈၼေႃႈ၊ တေပဵၼ်ၵႂၢမ်းတႆးလူင်ယူဝ်းယူဝ်းၶႃႈ။ ပေႃးၼၼ်ထွမ်ႇၵႂႃႇ ၸွမ်းၵၼ်ႁေတွႆးၼိုင်ႈၶႃႈၼေႃႈ။

သင်ဝႃႈ … မိူဝ်ႈၼႆႉ ၶႃႈတေႁွင်ႉၵႂၢမ်းမၢၵ်ႇၾၢၵ်ႇပၼ်မုၵ်ႉၸုမ်းၽူႈတွႆႇႁွၵ်ႈ…ဢေႃး…ၽူႈသိုဝ်ႇၶၢဝ်ႇ၊ ပၢဝ်ႇသဵင် လွင်ႈဢၼ်ၵူႈလွၵ်းၵူႈလၢႆး ႁႂ်ႈဢၼ်ၵူႈယိင်းၵူႈၸၢႆးဢွၼ်ႇ ပေႃးလႆႈငိၼ်းထွမ်ႇသဵင်ၸႅင်ႈလႅင်း ၵၼ်ၶႃႈၼႃ…သင်ဝႃႈမိူဝ်ႈၼႆႉ ၶႃႈၵေႃႈတေယွၼ်းႁွင်ႉၵႂၢမ်းဢွၼ်ၶႃႈ တွၼ်ႈၸူးပၼ်…ဢေႃႈၼေႃး… တွင်း တေႃႈတွင်းထွမ်ႇပၼ် ႁႂ်ႈပေႃးၸေး…ၸင်ႇဝႃႈပေႃးဢၼ် ၶႃႈလၢၼ်ၼွင်ႉၵွၼ်းဢွၼ်ႇ ႁွင်ႉမၢၵ်ႇၵႂႃႇ ၽၢၵ်ႇပၼ်ယဝ်ႉ ဢမ်ႇၸိုဝ်ႈဢမ်ႇၸႂ်ႈၼႆၵေႃႈ ၶႅၼ်းတေႃႈတၵ်းယႃႇပေသႄႉပေၼႄး …ၶႅၼ်းတေႃႈၶိုၼ်း မူၼ်ႉမႄးမႅင်ႇပၼ်ၶႃႈ လၢၼ်ၼွင်ႉၵွၼ်းၶဝ်ၶႃႈၼႃႉ … ၸင်ႇဝႃႈၼႆႉၵေႃႈ မုၵ်ႉၸုမ်းၽူႈသိုဝ်ႇၶၢဝ်ႇ ႁဝ်ၶႃႈ တင်းသဵင်ႈဝႃႇၼေႃး …မိူဝ်ႈၼႆႉၶႃႈၵေႃႈယွၼ်းသူးပၼ် ၶႃႈၼႃႉ …ႁႂ်ႈဢၼ်မုၵ်ႉၸုမ်း ၽူႈတွႆႇႁွၵ်ႈႁဝ်းၶႃႈ တင်းသဵင်ႈ ႁႂ်ႈပေႃးလႆႈယူႇလီၵိၼ်ဝၢၼ် ႁဵတ်းၵၢၼ်တိူဝ်းတွၼ်းၶႃႈၼႃႉ … မိူဝ်ႈဢၼ်ႁဵတ်းလွင်ႈၵၢၼ် လွင်ႈ ငၢၼ်းၼႂ်းမုၵ်ႉၸုမ်းၵေႃႈၸိုင် ႁႂ်ႈႁဵတ်းလႆႈမီးလွင်ႈတၢင်းမူၼ်ႈသိူဝ်းပျေႃႇ … ႁႂ်ႈပေႃးလႆႈမီးလွင်ႈတၢင်းၵျႃႉ သၢင်ႇတေႃႇၵၼ် ၵူႈၵေႃႉၵူႈၵူၼ်းၽႂ်ၶႃႈၼႃႈ…ႁႂ်ႈဢၼ်မုၵ်ႉၸုမ်းၽူႈတွႆႇႁွၵ်ႈႁဝ်းၶႃႈတင်းသဵင်ႈ မီးဢၼ် လွင်ႈတၢင်းမူၼ်ႈသိူဝ်းၸႂ်…ၼႆလႄႈ ၸၢႆးၶႃႈႁဝ်းၵေႃႈ ယွၼ်းႁွင်ႉၵႂၢမ်းမၢၵ်ႇပၼ်ပႃး…ၸင်ႇဝႃႈမိူဝ်ႈၼႆႉ လၢၼ်ဢွၼ်ၶႃႈႁဝ်းၼွင်ႉၵွၼ်းၵေႃႈ ၸူမ်းၼႃႇလိူဝ်လူၼ်ႉဢႃးလႃး…ဢေႃး…လႆႈမႃးႁူပ်ႉမုၵ်ႉၸုမ်း ၽူႈ သိုဝ်ႇၶၢဝ်ႇ…ပၢဝ်ႇသဵင်ၵူႈလွၵ်းၵူႈလၢႆးႁႂ်ႈဢၼ်ၵူႈယိင်းၵူႈၸၢႆးလုၵ်ႈတႆးဢွၼ်ႇ ပေႃးလႆႈငိၼ်းထွမ်ႇသဵင် ၸႅင်ႈလႅင်းၵၼ်ၼေႃ…ၸူမ်းတႄႉၼႂ်းသဵၼ်ႈၸႂ်သဵၼ်ႈၶေႃးဢွၼ်ႇ လၢၼ်ၶႃႈႁဝ်းၼွင်ႉၵွၼ်းဢွၼ်ႇလႆႈမႃး ႁွင်ႉၵႂၢမ်းမၢၵ်ႇၶၢၼ်တွၼ်ႈပျေႃးထေႃပၼ်ၶႃႈ မိူဝ်ႈၼႆႉၼႃ……။

ဢေႃႈၶႃႈ … ၼႆႉၵေႃႈ လႆႈႁွင်ႉၾၢၵ်ႇၵႂႃႇပွတ်းဢွၼ်ႇတွၼ်ႈၼိုင်ႈ ၶႃႈၼေႃႈ။

ထၢမ် – ဢေႃႈၶႃႈ … ယိၼ်းၸူမ်းယႂ်ႇၼမ်ၶႃႈဢေႃႈ။ ၵဵဝ်ႇလူၺ်ႈၽဵင်းၵႂၢမ်း ပၢၼ်ၵဝ်ႇႁဝ်းၶႃႈၼႆႉသေ ၶေႃႈၵႂၢမ်းၼႂ်းဢူၵ်းၼႂ်းၸႂ် ဢၼ်ၶႂ်ႈသင်ႇလၢတ်ႈ မီးၸိူင်ႉႁိုဝ်ၽွင်ႈၶႃႈ?

တွပ်ႇ – လွင်ႈၶႂ်ႈလၢတ်ႈတႄႉၵေႃႈ …ၸွမ်းၼင်ႇၵႂၢမ်းၵပ်းထုၵ်ႇတႆးႁဝ်းမီးဝႆႉဝႃႈ “ထုင်းၵဝ်ႇယႃႇႁႂ်ႈႁၢႆ လၢႆးမႂ်ႇ ႁႂ်ႈၶိုတ်းၵၢပ်ႈ” ၼႆၶႃႈၼႃႇၼေႃႈ၊ ႁဝ်းၶႃႈၵေႃႈ ပဵၼ်ၵူၼ်းပၢၼ်မႂ်ႇ ႁူဝ်ၸႂ်ပၢၼ်ၵဝ်ႇၵေႃႉၼိုင်ႈၶႃႈၼေႃႈ၊ ၼင်ႇႁိုဝ် ပၢၼ်ၵဝ်ႇႁဝ်းပေႃးတေဢမ်ႇႁၢႆ ၸွမ်းၼင်ႇပူႇမွၼ်ႇၼၢႆးယႃႈႁဝ်းဢွၼ်ႁဵတ်း ဢွၼ်သၢင်ႈမႃးၵေႃႈ ၼင်ႇႁိုဝ် ပေႃးတေဢမ်ႇလူင်ဢမ်ႇလိုမ်း ၵႂႃႇၼၼ်ႉ ၸွမ်းၼင်ႇႁဝ်းၶႃႈ ပွင်ပဵၼ်လႆႈႁဵတ်းလႆႈၵေႃႈ ထုၵ်ႇလီဢွၼ်ၵၼ် ႁဵၼ်းႁူႉသေယဝ်ႉၵေႃႈ ႁဵတ်းၵႂႃႇၸွမ်းတၢင်းၵျိူၵ်ႈ တၢင်းသူင်ဝႃႇသၼႃႇႁဝ်းယူႇၶႃႈဢေႃႈ။ ယဝ်ႉၵေႃႈ ပေႃးသူင်ၵျိူၵ်ႈၽဵင်းၵႂၢမ်းပၢၼ်မႂ်ႇၼႆၵေႃႈ မၼ်းပဵၼ်ၽဵင်းၵႂၢမ်း မိူၼ်ၵၼ်ၵူၺ်း၊ ပၼ်ႁႅင်းတင်းသွင်ၾၢႆႇယဝ်ႉၶႃႈ။ လႆႈၸႂ်ဢၼ်လႂ်ၵေႃႈ ႁဵတ်းသၢင်ႈဢၼ်ၼၼ်ႉၸိုင် မၼ်းတေဢွၵ်ႇမႃး ဢၼ်လီထီႉသုတ်းယူႇၼႆ ယွၼ်းၾၢၵ်ႇပၼ်ၽူႈႁၵ်ႉပၢႆးမွၼ်းႁဝ်းၶႃႈတင်းသဵင်ႈၼင်ႇၼႆၶႃႈ။

ထၢမ် – ပေႃးလၢတ်ႈဝႃႈ ၸၢႆးၵွၼ်းလၢဝ်ၼႆ ၵမ်ႈၼမ်ၵေႃႈ တေႁူႉၸၵ်းဝႃႈ ပဵၼ်ၵေႃႉမေႃႁွင်ႉၽဵင်ႈၵႂၢမ်းသဵင်ဝၢၼ်လႄႈ ႁၢင်ႈလီလဝ်းၼႆၶႃႈၼေႃႈ။ ၵွပ်ႈၼၼ်လႄႈ ၶႂ်ႈယွၼ်းထၢမ် ၵဵဝ်ႇလူၺ်ႈလွင်ႈသုၼ်ႇတူဝ် ဢိတ်ႉၼိုင်ႈၶႃႈဢေႃႈ … ယၢမ်းလဵဝ် ၸွင်ႇမီးဝႆႉၵေႃႉႁၵ်ႉ/ ၵေႃႉတမ်းၸႂ်ယဝ်ႉၶႃႈႁႃႉ?

တွပ်ႇ – ႁိုမ်ႈ…ႁိုမ်ႈ …ၵေႃႉႁၵ်ႉၵေႃႉတမ်းၸႂ်တႄႉ ယၢမ်းလဵဝ် မီးဝႆႉယဝ်ႉၶႃႈ၊ ဢမ်ႇၸႂ်ႈၵူၼ်းလွတ်ႈလႅဝ်းယဝ်ႉၶႃႈ။

ထၢမ် – ဢေႃႈၶႃႈ … ပေႃးၼၼ် ၵေႃႉႁၵ်ႉၵေႃႉပႅင်းၼႆႉ ပဵၼ်မၢဝ်ႇတင်းလႂ်ၶႃႈၼေႃ…ၸွင်ႇတေၸၢင်ႈလၢတ်ႈၼႄ ဢိတ်းဢွတ်းၶႃႈႁႃႉ?

တွပ်ႇ – ဢေႃႈၶႃႈ…လၢတ်ႈၼႄလႆႈယူႇၶႃႈ ပဵၼ်ၵူၼ်းတၢင်းမႄႈႁွင်ႈသွၼ် ၼႆႉၶႃႈဢေႃႈ။ မိူဝ်ႈပူၼ်ႉမႃးၼႆႉ ယွၼ်ႉဝႃႈဝူၼ်ႉလီ တႅပ်းတတ်းသဵၼ်ႈၸႂ် လီယဝ်ႉၼႆလႄႈ လႆႈပိုတ်ႇတူဝ်ၵႂႃႇပဵၼ်တၢင်းၵၢၼ်၊ ဢမ်ႇမီးသင် သိူင်ႇသိမ်းဝႆႉ၊ လႆႈပွၵ်ႈမႃးပဵၼ်တူဝ်ၸဝ်ႈၵဝ်ႇဢၼ်တႄႉ ဢၼ်ၸႅတ်ႈယဝ်ႉၶႃႈ။ လွင်ႈၼႆႉ ႁဵတ်းႁႂ်ႈထၢတ်ႈၸႂ် ပၢႆးၸႂ်ႁဝ်းၵေႃႈ လီၶိုၼ်ႈမႃး ယွၼ်ႉဝႃႈႁဝ်းပဵၼ်ၵူၼ်းဢၼ်ပွင်ႇၸႂ်တူဝ်ၸဝ်ႈၵဝ်ႇလီ၊ ယွမ်းႁပ်ႉတူဝ်ၸဝ်ႈၵဝ်ႇလႄႈ တေဢမ်ႇမီးၶေႃႈၵႂၢမ်း ဢၼ်တေတုမ်ႉတိူဝ်ႉတၢင်းပၢႆးၸႂ်ႁဝ်းၶႃႈထႅင်ႈယဝ်ႉ ပၢႆးဝူၼ်ႉႁဝ်းၵေႃႈ တေၸႅင်ႈတႅၵ်ႇလႅင်းလီ ၸိူင်ႉၼၼ်ၶႃႈ။

ထၢမ် – ယၢမ်းလဵဝ်ၼႆႉ ၵၢပ်ႈဝၢၼ်ႈပၢၼ်မိူင်းၵေႃႈၶိုၼ်ႈယႂ်ႇမႂ်ႇသုင်မႃး ပိူဝ်ႈတႃႇပဵၼ်သုၼ်ႇလႆႈၽဵင်ႇပဵင်း၊ တႃႇႁႂ်ႈပဵၼ်တၢင်းႁူႉတၢင်းႁၼ်တႃႇပီႈၼွင်ႉ ၽူႈပၼ်ႁႅင်းႁဝ်းၶဝ်ၼႆသေ ၶႂ်ႈထၢမ်ဝႃႈ ၸၢႆးၵွၼ်းလၢဝ်ၼႆႉ ယွမ်းႁပ်ႉတူဝ်ၸဝ်ႈၵဝ်ႇပဵၼ် LGBT ၼႆၸႂ်ႈတႄႉယူႇၶႃႈႁႃႉ?

တွပ်ႇ – ၸႂ်ႈယဝ်ႉၶႃႈ။ ပဵၼ်ၼႂ်းၵုမ်ႇ(group) တူဝ် G ၶႃႈဢေႃႈ။ တီႈၼႆႈ ၶႂ်ႈယွၼ်းသပ်းလႅင်းၼႄ လွင်ႈၼႆႉ ဢိတ်ႉၼိုင်ႈ။ ပေႃးဝႃႈ LGBT ၼႆ ပီႈၼွင်ႉတႆး ၼႂ်းတူင်ႇဝူင်းတႆးႁဝ်းၵမ်ႈၼမ် တေပႆႇပေႃးႁူႉၸၵ်းလီ။ မိူဝ်ႈလဵဝ်ၼႆႉသမ်ႉ ပဵၼ်ၵၢပ်ႈပၢၼ်ၶိုၼ်ႈယႂ်ႇမႂ်ႇသုင်၊ ၼႂ်းလုမ်ႈၾႃႉၵေႃႈပိူၼ်ႈပိုတ်ႇၵႂၢင်ႈ ဢမ်ႇဝႃႈလၢႆလၢႆၸိုင်ႈမိူင်း ပိူၼ်ႈတေပၼ်သုၼ်ႇလႆႈသုၼ်ႇပဵၼ် LGBT ၸၢႆး/ယိင်း ၽဵင်ႇပဵင်းၵၼ်သဵင်ႈသဵင်ႈ။

တီႈပွင်ႇ LGBT တႄႉ L ၼႆႉ ပဵၼ် lesbian ပွင်ႇဝႃႈ ပဵၼ်ၼၢင်းယိင်းသေ လႆႈၸႂ်ၼၢင်းယိင်းၶိုၼ်း၊ G သမ်ႉ ပဵၼ် gay (ၶႃႈၵေႃႈၶဝ်ႈပႃးၼႂ်းၼႆႉ) ဢၼ်ၼႆႉပဵၼ် ၵူၼ်းၸၢႆးတေႃႇ ၵူၼ်းၸၢႆးလႆႈၸႂ်ၵၼ်ၶိုၼ်း ၊ B ပဵၼ် bisexual ဢၼ်ၼႆႉပဵၼ်ၵူၼ်းၸိူဝ်း လႆႈၸႂ်ၸၢႆး/ယိင်း တင်းသွင်ဢၼ်၊ T ၼႆႉသမ်ႉပဵၼ် transgender မိူၼ်ၼင်ႇ တူဝ်ပဵၼ်ၵူၼ်းၸၢႆးသေတႃႉ သမ်ႉၶႂ်ႈမီးဢၢင်ႇၵႃႇလၵ်ႉၶၼႃႇပဵၼ်ၼၢင်းယိင်း (ၶႂ်ႈဝႆႉၶူၼ်ႁူဝ်ယၢဝ်း၊ ၶႂ်ႈမီးၼူမ်း) ဢမ်ႇၼၼ်ၵေႃႈ ၵိူတ်ႇမႃးပဵၼ်ၼၢင်းယိင်းယဝ်ႉ သမ်ႉၶႂ်ႈမီးပုင်ႈႁၢင်ႈတူဝ်ၶိင်းၵူၼ်းၸၢႆး သဵင်ႈသဵင်ႈ ၼႆႉၵေႃႈယူႇတီႈၼႂ်းၸုမ်းတူဝ် T ၼႆႉယဝ်ႉၶႃႈ။ ၸိူဝ်းၼႆႉမၼ်းၵေႃႈ တေယူႇၼႂ်းၵုမ်ႇလၢၵ်ႇလၢႆ (LGBT) ၵူၼ်းႁဝ်းၵျိူၵ်ႈဢမ်ႇမိူၼ်ၵၼ် ၵႂၢင်ႈၶႂၢင်ၵႂႃႇၸိူင်ႉၼႆၶႃႈ။

မိူၼ်ၶႃႈၶဝ်တႄႉၵေႃႈ ယူႇၼႂ်းၵုမ်ႇ Gay ၊ ႁဝ်းၶႃႈ ဢမ်ႇမီးၵၢင်ၸႂ်ဢၼ်ဝႃႈ ၶႂ်ႈမီးၶူၼ်ႁူဝ်ယၢဝ်း၊ ၶႂ်ႈမီးၶိူင်ႈဢၢင်ႇၵႃႇ မိူၼ်ၼၢင်းယိင်း ၸိူဝ်းၼႆႉ။ ႁဝ်းယူႇၼႂ်းပုင်ႇႁၢင်ႈတူဝ်ၶိင်း ဢၼ်ဝႃႈတိုၵ်ႉၶႂ်ႈပဵၼ်ၵူၼ်းၸၢႆး ၵူၺ်းၵႃႈ ပၢႆးၸႂ်ႁဝ်းသမ်ႉ ႁဝ်းယူႇၸွမ်းၵၼ်ယဝ်ႉမီးလွင်ႈပွင်ႇၸႂ်ၵၼ်လၢႆဢၼ်လၢႆမဵဝ်း မိူၼ်ၼင်ႇ ပၢႆးဝူၼ်ႉ၊ လွင်ႈယိူင်းမၢႆၸိူဝ်းၼႆႉ ႁဝ်းပိုတ်ႇမၢၵ်ႇႁူဝ်ၸႂ်ဢုပ်ႇ ဢူဝ်းၵၼ်လႆႈ၊ မၼ်းပဵၼ်လွင်ႈဢၼ်ႁဵတ်းႁႂ်ႈႁဝ်း သိူဝ်းၸႂ်လႄႈ ယူႇၸွမ်းၶဝ်ယဝ်ႉ ႁဝ်းမီးတၢင်းသိူဝ်းၸႂ် ဢမ်ႇၸႂ်ႈလွင်ႈၼိူဝ်တီႈၼွၼ်းမဵဝ်းလဵဝ်၊ ၶႃႈတႄႉႁွင်ႉမၼ်းဝႃႈ ပဵၼ်ၵူႈၸၢတ်ႈပၢၼ်ၼႆဢေႃႈ၊ ဢမ်ႇၸႂ်ႈၵူႈတၢင်းႁၵ်ႉမဵဝ်းလဵဝ် ၸိူင်ႉၼၼ်ၶႃႈ။ ၸၢတ်ႈပၢၼ်ၼႆႉ မၼ်းၵေႃႈ ၵႂၢင်ႈၶႂၢင်၊ ၸၢတ်ႈပၢၼ်ၵူၼ်းၼိုင်ႈၵေႃႉၼႆႉ ၸဵမ်ပၢႆးတူဝ်ပၢႆးၸႂ် ၵၢၼ်လၢႆဢၼ်လၢႆမဵဝ်းပၢႆးဝူၼ်ႉ (mindset) ႁဝ်းၶႃႈၵေႃႈ လူဝ်ႇမိူၼ်ၵၼ်၊ ဢုပ်ႇၵၼ်လႆႈၶႃႈ။

ယဝ်ႉၵေႃႈ LGBT ၼႆႉ ပိူၼ်ႈႁူႉၵၼ်တင်းလုမ်ႈၾႃႉ၊ လၢႆလၢႆၸိုင်ႈမိူင်းၵေႃႈ ပဵၼ်သုၼ်ႇလႆႈသုၼ်ႇပဵၼ်ၽဵင်ႇပဵင်းဝႆႉ ဢမ်ႇမီးလွင်ႈၸႅၵ်ႇၽႄ၊ ပေႃးတေမႃးတူၺ်းမိူၼ်ၼင်ႇ မိူင်းထႆးၼႆႉ ယၢမ်းလဵဝ် ႁဝ်းၵႂႃႇၸွၵ်ႉလႂ် ၸဵင်ႇလႂ်ၵေႃႈ ပၢႆႈၸုမ်း LGBT ၼႆႉဢမ်ႇလႆႈ။ ၵမ်ႈၼမ်ၶဝ်ၵေႃႈ ပဵၼ်ၵူၼ်းၸိူဝ်းမီးၼမ်ႉၵတ်ႉ မိူၼ်ၼင်ႇ ၼႂ်းတူင်ႇဝူင်းၵူၼ်းၵေႃႈ ပဵၼ်မေႃယႃ ၊ ပလိၵ်ႈ (တမ်ႇၼူတ်ႇ) ၸိူဝ်းၼႆႉ မီးၵူႈတီႈၵူႈတၢင်း။ ၵွပ်ႈၼၼ်လႄႈ သင်ႁဝ်း ပိုတ်ႇမၢၵ်ႇႁူဝ်ၸႂ်သေတူၺ်းၵမ်ႇၽႃႇၸိုင် မၼ်းတေႁၼ်ၵႂၢင်ႈ၊ မၼ်းယူႇတီႈၸႂ်ႁဝ်း ပေႃးၸႂ်ႁဝ်း ပိုတ်ႇၵေႃႈ ၵူႈၸိူဝ်းၵူႈလွင်ႈတေပိုတ်ႇ မၼ်းတေႁၼ်ၵမ်ႇၽႃႇၵႂၢင်ႈၶိုၼ်ႈ။ မိူဝ်ႈၵွၼ်ႇပူၼ်ႉမႃးတႄႉ ယွၼ်ႉဢမ်ႇၸႂ်ႈၵၢပ်ႈ Social Media လႄႈ ႁဝ်းဢမ်ႇႁူႉၵေႃႈပဵၼ်လႆႈ၊ ၵူၺ်းၵႃႈလွင်ႈၼႆႉ မၼ်းမီးမႃးၸဵမ်လႂ်ယဝ်ႉ မၼ်းပဵၼ်တၢင်းၵျိူၵ်ႈသုၼ်ႇတူဝ်ၵူၺ်း။ ၵူၼ်းၸိူဝ်းပဵၼ် LGBT ၼႆႉ ဢမ်ႇၸႂ်ႈၵူၼ်းမီးတၢင်းပဵၼ်ရေႃးၵႃႇ၊ ဢမ်ႇၸႂ်ႈၵူၼ်းမီးဝူတ်ႈၵၢမ်ႇလႄႈ မၼ်းဢမ်ႇၸႂ်ႈလွင်ႈလၢၵ်ႇလၢႆးသင်ၶႃႈ။ ပေႃးႁဝ်းၸႂ်ႉၾၢႆႇပၢႆးၸႂ်သေ တူၺ်းၸိုင် မၼ်းတေဢမ်ႇႁဵတ်းႁႂ်ႈပၢႆးၸႂ်ႁဝ်းတူၵ်း၊ ပိူင်လူင်မၼ်းယူႇတီႈတူဝ်ႁဝ်း တေၸႂ်ႉပၢႆးဝူၼ်ႉၸိူင်ႉႁိုဝ် ၊ တေလၢတ်ႈတေႃႇတူဝ်ၸဝ်ႈၵဝ်ႇၸိူင်ႉႁိုင် ၸိူင်ႉၼႆၶႃႈ။

ထၢမ် – တႄႇၾၢင်ႉမႅၼ်ႈႁူႉတူဝ်ၸဝ်ႈၵဝ်ႇဝႃႈ ပဵၼ် LGBT ၼႆၼၼ်ႉ မိူဝ်ႈလႂ်ၶႃႈၼေႃ ?

တွပ်ႇ – ဢိုမ်ႈ…တႄႇႁူႉမႃးၼႆႉ ၸဵမ်မိူဝ်ႈၵေႃႉလဵၵ်ႉယဝ်ႉၶႃႈ။ ၵူၺ်းၵႃႈ မိူဝ်ႈၽွင်းယၢမ်းပဵၼ်လုၵ်ႈဢွၼ်ႇၼၼ်ႉ တူင်ႇဝူင်းၵူၼ်းႁိမ်းႁွမ်းႁဝ်းသမ်ႉ ဢမ်ႇယွမ်းႁပ်ႉလွင်ႈၼႆႉ၊ ယဝ်ႉၵေႃႈ တူဝ်ႁဝ်းၵေႃႈ ဢမ်ႇမီးလွင်ႈတၢင်းႁူႉတၢင်းႁၼ် ၵဵဝ်ႇလူၺ်ႈလွင်ႈၼႆႉ။ မၼ်းပဵၼ်သၽႃႇဝမၼ်းဢေႃႈ – ၵူၼ်းႁဝ်းၼႆႉ ပေႃးဢမ်ႇမီး တၢင်းႁူႉတၢင်းႁၼ် ဢမ်ႇပွင်ႇၸႂ်ၼႂ်းဢၼ်တူဝ်ၸဝ်ႈၵဝ်ႇပဵၼ်ၼႆ ႁဝ်းတေဢမ်ႇမီးၵႂၢမ်းတွပ်ႇပၼ်၊ ပေႃးၸိူင်ႉၼၼ် ႁဝ်းၵေႃႈ တေယူႇၼႂ်းၵႂၢမ်းၵူဝ်ၵႂၢမ်းဢၢႆ မၼ်းတေပဵၼ်ၵူၼ်းဢၼ်ဝူၼ်ႉဝႃႈ တူဝ်ၸဝ်ႈၵဝ်ႇ ၽိတ်းယူႇတႃႇသေႇ ၸိူင်ႉၼၼ်ၶႃႈ။

ဝၢႆးလင်ပဵၼ်ၽူႈယႂ်ႇတဵမ်တူဝ်မႃးသေ မႃးႁဵၼ်းႁူႉလွင်ႈပၢႆးၸႂ်ၸိူဝ်းၼႆႉယဝ်ႉ လႆႈႁူႉဝႃႈ ၼႂ်းၵႃႈၶၼ်ၵူၼ်း ၵေႃႉၼိုင်ႈၼၼ်ႉ ပိူၼ်ႈတေတူၺ်းလွင်ႈႁဵတ်းလွင်ႈသၢင်ႈပဵၼ်ပိူင်လူင်လမ်ႇလွင်ႈ။ ဝၢႆးသေမႃးပွင်ႇၸႂ်လွင်ႈ ၼႆႉယဝ်ႉၵေႃႈ လႆႈပိုတ်ႇတူဝ်ပဵၼ်တၢင်းၵၢၼ်။ မိူဝ်ႈဢွၼ်တၢင်းတႄႉ ၶႃႈၵေႃႈမိူၼ်ၼင်ႇၵူႈၵေႃႉၵူၺ်း – ၵူဝ် ပေႃႈမႄႈႁူႉ၊ ယွမ်ႉႁပ်ႉတူဝ်ၸဝ်ႈၵဝ်ႇဢမ်ႇလႆႈသေ ဝူၼ်ႉၼမ်ႁႅင်းထိုင်တီႈ တေပဵၼ်ရေႃးၵႃႇတၢင်းပဵၼ် ယွၼ်ႉလွင်ႈၼႆႉ။ ဢၼ်ႁဝ်းၵျိူၵ်ႈသမ်ႉပဵၼ်မဵဝ်းၼိုင်ႈ၊ ဢၢင်ႇၵႃႇလၵ်ႉၶၼႃႇႁဝ်းသမ်ႉပဵၼ်မဵဝ်းၼိုင်ႈ ႁဝ်းတေႁဵတ်းႁိုဝ်ၼႆသေ ပၢႆးၸႂ်ႁဝ်းၼႆႉ တေဝူၼ်ႉပၼ်ႇတူင်ႇသေၵူဝ်။ ပေႃးယူႇၼႂ်းလွင်ႈတၢင်းၵူဝ် ႁိုင်ၼၢၼ်းႁႅင်းၵေႃႈ ႁဵတ်းႁႂ်ႈတုမ်ႉတိူဝ်ႉပၢႆးၸႂ် ထၢတ်ႈၸႂ်တူၵ်း၊ တၢင်းပဵၼ်ႁူဝ်ၸႂ်၊ ပဵၼ်ၵူၼ်းဢမ်ႇမီးလွင်ႈယုမ်ႇယမ်တူဝ် ၸိူဝ်းၼႆႉဢေႃႈ။

ဝၢႆးသေ ပဵၼ်ၽူႈယႂ်ႇတဵမ်တူဝ်မႃး ၸင်ႇလႆႈၶိုၼ်းထၢမ်တူဝ်ၸဝ်ႈၵဝ်ႇဝႃႈ ယွၼ်ႉသင်လႄႈၵူဝ်၊ ယွၼ်ႉသင် လႄႈဢၢႆ ၊ ယွၼ်ႉပဵၼ်ၼႆသေ ၸွင်ႇၵႂႃႇပၼ်တၢင်းလိူတ်ႇမႆႈၽႂ် ၊ ၸွင်ႇႁဵတ်း ႁႂ်ႈတူဝ်ၸဝ်ႇၵဝ်ႇလိူတ်ႇမႆႈ ၊ ၵႂႃႇႁဵတ်းၽိတ်း လၵ်ႉၸူၼ်ၽႂ် ဢမ်ႇၼၼ် ႁဵတ်းၽိတ်းပၵ်းပိူင်သင် ၸိူဝ်းၼႆႉဢေႃႈ။ ပေႃးၸႂ်ႉပၢႆးဝူၼ်ႉဢၼ် ၵူဝ်ၼႆႉသေ သိုပ်ႇပႆၵႂႃႇၶၢဝ်းတၢင်းၼႃႈတိၵ်းတိၵ်းတႄႉ ဢမ်ႇထုၵ်ႇယဝ်ႉၼႆသေ ၸင်ႇထၢမ်တူဝ်ၸဝ်ႈၵဝ်ႇၶိုၼ်း။ ပေႃးဝႃႈ ႁဝ်းႁဵတ်းၸွမ်းတူဝ်ၸဝ်ႈၵဝ်ႇဢမ်ႇလႆႈၼႆႉ ဢၼ်ၼႆႉပဵၼ်တၢင်းတုၵ်ႉၶၸႂ်ၸဝ်ႈၵဝ်ႇဢိူဝ်ႈ ၼႆသေ ႁႃၵႂၢမ်းတွပ်ႇ/ တၢင်းႁူႉတၢင်းႁၼ်ပၼ်တူဝ်ၸဝ်ႈၵဝ်ႇ၊ ပိုတ်ႇမၢၵ်ႇႁူဝ်ၸႂ်ၵႂၢင်ႈၵႂၢင်ႈသေ တူၺ်းၵမ်ႇၽႃႇၵႂၢင်ႈၵႂၢင်ႈၶိုၼ်ႈ လႆႈၵႂၢမ်းတွပ်ႇပၼ် ၸဝ်ႈၵဝ်ႇလီငၢမ်းယဝ်ႉ၊ ပေႃးဝၢႈမၼ်ႈၸႂ်ယဝ်ႉ ဢုပ်ႇတေႃႇၵေႃႉၼႆႉယဝ်ႉ မၼ်းပၼ်တၢင်းဢုၼ်ႇၸႂ်ႁဝ်း ၊ ပၢႆးဝူၼ်ႉယိူင်းမၢႆႁဝ်းမိူၼ်ၵၼ် ၊ လွင်ႈတၢင်းၵျိုၵ်ႈတၢင်းသူင် ဝႃႇသၼႃႇ မိူၼ်ၵၼ်လၢႆဢၼ်လၢႆမဵဝ်း – ၶဝ်ၵေႃႈ တေမႃးပဵၼ်သုၼ်ႇၼိုင်ႈၼႂ်းၸၢတ်ႈပၢၼ်ႁဝ်းသေ မူၼ်ႉမႄးၵၼ်ၵႂႃႇ သၢင်ႈဢႃႇၼႃႇၵၢတ်ႈၸွမ်းၵၼ်ၵႂႃႇ ဢမ်ႇဝႃႈပၢႆးတူဝ်ပၢႆးၸႂ် ၵူႈၸိူဝ်ႉၵူႈလွင်ႈၸဵမ်ဢဝ်ၵၢၼ်ငၢၼ်း ၊ ၼႃႈတီႈပုၼ်ႈၽွၼ်း ဢၼ်လူဝ်ႇလႆႈႁဵတ်းပၼ်ပေႃႈမႄႈၵေႃႈ လႆႈႁဵတ်းပၼ်ယဝ်ႉၼႆလႄႈ ၸင်ႇလႆႈပိုတ်ႇတူဝ်ပဵၼ်တၢင်းၵၢၼ် ဢမ်ႇမီးဢၼ်လႂ်လွင်ႈသင်မီးတိတ်းၸပ်းၼႂ်းၸႂ် ၸဝ်ႈၵဝ်ႇ။ ပေႃးႁဝ်းပိုတ်ႇသေ မႃး ပဵၼ်တူဝ်ၸဝ်ႈၵဝ်ႇတႄႉတႄႉၼႆ ႁဝ်းတေပဵၼ်ၵူၼ်းဢၼ်မီးတၢင်းသိူဝ်းၸႂ် ၸႅတ်ႈၸၢင်ႇလႆႈၼၼ်ႉ ယဝ်ႉၶႃႈ။

တႃႇတေႁွတ်ႈမႃးထိုင် ၶၵ်ႉတွၼ်ႈၼႆႉၵေႃႈဢမ်ႇငၢႆႈ။ ဢၼ်ယၢပ်ႇလိူဝ်ပိူၼ်ႈတႄႉ ပဵၼ်တူဝ်ၸဝ်ႈၵဝ်ႇယဝ်ႉၶႃႈ။

ထၢမ် – ၵဵဝ်ႇလူၺ်ႈလွင်ႈၼႆႉသေ ၸွင်ႇပေႃႈမႄႈၶတ်းၶႂၢင်ၶႃႈႁႃႉ? ၶဝ်ႁၼ်ထိုင်ၸိူင်ႉႁိုဝ်ၶႃႈၼေႃ?

တွပ်ႇ –  မိူၼ်ၶႃႈလၢတ်ႈ မိူဝ်ႈၸဝ်ႉၼၼ်ႉယဝ်ႉၶႃႈ မိူဝ်ႈတႄႇတႄႉဢမ်ႇမီးၽႂ်ႁၼ်လီၸွမ်း၊ ၶႃႈၵေႃႈ ယွမ်းႁပ်ႉတူဝ်ၸဝ်ႈၵဝ်ႇၶိုၼ်းဢမ်ႇလႆႈ။ ၵူၺ်းၵႃႈ ၼႂ်းသၢၵ်ႈသေႇဢၼ်လမ်ႇလွင်ႈ တီႈတေႁဵတ်းႁႂ်ႈယွမ်းႁပ်ႉ တူဝ်ၸဝ်ႈၵဝ်ႇလႆႈလႄႈ ႁဵတ်းႁႂ်ႈပေႃႈမႄႈႁဝ်း ယွမ်းႁပ်ႉႁဝ်းလႆႈၼႆၼၼ်ႉၵေႃႈ ပဵၼ်ၼမ်ႉၵတ်ႉတူဝ်ၸဝ်ႈၵဝ်ႇ ဢၼ်တေလႆႈၸၼ်ဢွၵ်ႇမႃး ႁႂ်ႈၶဝ်လႄႈ တူဝ်ၸဝ်ႈၵဝ်ႇလႆႈႁၼ်သၢၵ်ႈသေႇမၼ်း။ ႁဝ်းၵိူတ်ႇမႃးၸိူင်ႉၼႆ ဢမ်ႇၸႂ်ႈဝႃႈ ႁဝ်းပဵၼ်ၵူၼ်းဢမ်ႇတဵမ်ထူၼ်ႈ၊ ဢမ်ႇၸႂ်ႈဝႃႈ ဢမ်ႇႁဵတ်းသင်လႆႈ လွင်ႈႁဵတ်းသၢင်ႈ ၵူၼ်းၸၢႆးမီးၸိူင်ႉႁိုဝ် ႁဝ်းၶႃႈၵေႃႈ ႁဵတ်းလႆႈ၊ ၼၢင်းယိင်းၶဝ် ႁဵတ်းႁိုဝ်ႁဝ်းၵေႃႈ ႁဵတ်းလႆႈ။

ဝၢႆးသေသၢၵ်ႈသေႇ ဢၼ်ၸဝ်ႈၵဝ်ႇႁဵတ်းဢွၵ်ႇမႃးၼၼ်ႉ ၼႄပၼ်တူဝ်ၸဝ်ႈၵဝ်ႇ၊ ၼႄပၼ်ပေႃႈမႄႈႁဝ်းဝႃႈ ႁဝ်းႁဵတ်းပၼ်ၸိူင်ႉၼႆယဝ်ႉ၊ ႁဝ်းပဵၼ်ၵူၼ်းၵိူတ်ႇမႃး ၼႂ်းၸၢတ်ႈပၢၼ်ပဵၼ် Gay သေတႃႉၵေႃႈ ႁဝ်းဢမ်ႇလႆႈမီးၶေႃႈယွမ်းသုမ်းသင်။ ယဝ်ႉၵေႃႈ ႁဝ်းဢမ်ႇၸႂ်ႈၵူၼ်းၵႂႃႇလၵ်ႉပိူၼ်ႈ၊ ဢမ်ႇလႆႈႁဵတ်းၽိတ်းသင် ၸိူဝ်းၼႆႉ မၼ်းႁဵတ်းႁႂ်ႈပေႃႈမႄႈႁဝ်းႁၼ်။ ပေႃးၶဝ်လႆႈႁၼ် ၼမ်ႉၵတ်ႉသၢၵ်ႈသေႇတီႈႁဝ်းယဝ်ႉၼႆ ၵႂၢမ်းထၢမ် ဢၼ်ၶဝ်မီးဝႆႉၼၼ်ႉၵေႃႈ ၶဝ်တေဢမ်ႇထၢမ်ယဝ်ႉ။ ၶဝ်တေယွမ်းႁပ်ႉလူၺ်ႈသၽႃႇဝၵႂႃႇ ၸိူင်ႉၼၼ်ၶႃႈ။  မီးလွင်ႈၶဵင်ႇတႃႉယူႇၶႃႈ၊ ငၢႆႈတႄႉဢမ်ႇငၢႆႈ။

ထၢမ် – ၼႂ်းတူင်ႇဝူင်းႁိမ်းႁွမ်း မိူဝ်ႈၽွင်းၼၼ်ႉၶႃႈလူး ႁၼ်ထိုင်ၼိူဝ်လွင်ႈ LGBT ၼႆႉၸိူင်ႉႁိုဝ်ၽွင်ႈၶႃႈ?

တွပ်ႇ – မိူဝ်ႈဢွၼ်တၢင်းတႄႉ ပဵၼ်ၵူၼ်းဢမ်ႇပွင်ႇၸႂ်ၵမ်ႈၼမ်ၶႃႈဢေႃႈ။ ဝၢႆးသေ ႁဝ်းၶႃႈႁဵတ်းၼႄ ႁႂ်ႈႁၼ်သၢၵ်ႈသေႇဝႃႈ ပဵၼ် LGBT ၼႆႉယဝ်ႉ၊ ဢမ်ႇၸႂ်ႈဝႃႈ ပဵၼ်ၵူၼ်းဢမ်ႇမီးၼမ်ႉၵတ်ႉ၊ ဢမ်ႇၸႂ်ႈၵူၼ်းတူၵ်းသုမ်း ၼႂ်းၵၢၼ်ႁဵတ်းၵၢၼ်သၢင်ႈၵၢၼ်ဝူၼ်ႉ ၸိူဝ်းၼႆႉယဝ်ႉၼႆၵေႃႈ … ၵမ်ႈၼမ်ဝၢႆးသေ ၶႃႈပိုတ်ႇတူဝ်ၵႂႃႇယဝ်ႉ Follower တင်း TikTok ၊ Facebook မွၵ်ႈ 99% ၸိူဝ်းၼႆႉ ဢွၼ်ၵၼ်ပၼ်ႁႅင်းၶႃႈဢေႃႈ။ ၸိူဝ်းဢမ်ႇပွင်ႇၸႂ်ၵေႃႈ တိုၵ်ႉမီးယူႇ … ၵူၺ်းၵႃႈ ႁဝ်းဢမ်ႇၸၢင်ႈႁႂ်ႈပိူၼ်ႈမႃးပွင်ႇၸႂ်ႁဝ်းလႆႈတင်းမူတ်း ၼႆႉပဵၼ်သၽႃႇဝမၼ်း၊ ဢၼ်လမ်ႇလွင်ႈတႄႉ တူဝ်ၸဝ်ႈၵဝ်ႇ ပွင်ႇၸႂ်ၼိူဝ်ၸဝ်ႈၵဝ်ႇၼၼ်ႉ လီလိူဝ်ပိူၼ်ႈသုတ်းယဝ်ႉၶႃႈ။

ထၢမ် – ပၢႆးဝူၼ်ႉလွင်ႈႁၼ်ထိုင်ၼိူဝ် LGBT ၼႆႉ တူင်ႇဝူင်းတႆးလႄႈတင်း တူင်ႇဝူင်းၼွၵ်ႈမိူင်း မီးလွင်ႈပႅၵ်ႇပိူင်ႈၵၼ်ၸိူင်ႉႁိုဝ်ၽွင်ႈၶႃႈၼေႃ?

တွပ်ႇ – လွင်ႈၼႆႉတႄႉ ပိူင်ႈၵၼ်ၾႃႉလႄႈ လိၼ်မိူင်းယဝ်ႉၶႃႈ။ ၸွမ်းၼင်ႇတူဝ်ထူပ်းၶႃႈ မီးဢူၺ်းၵေႃႉၼွၵ်ႈ မိူင်းလၢႆလၢႆၸၢဝ်းၶိူဝ်း လဵၼ်ႈၵေႃႉၵၼ်သေ မိူဝ်ႈဢွၼ်တၢင်းတႄႉ ၶႃႈ ၵေႃႈတိုၵ်ႉၵူဝ်တိုၵ်ႉႁႄ ပႆႇႁတ်းပိုတ်ႇတူဝ်တႄႉတႄႉၶႃႈ။ ၵူၺ်းၵႃႈ မီးဝၼ်းၼိုင်ႈ ၶႃႈလႄႈတၢင်း ဢူၺ်းၵေႃႉၶႃႈ (ဢူၺ်းၵေႃႉပဵၼ် ၵူၼ်းၸၢႆးတႄႉ မီးမေးပဵၼ်တႆး) ႁဝ်းၶႃႈၵႂႃႇလႄႇၸွမ်းၵၼ် ၶဝ်ႁၼ်ၶႃႈလႄႈတင်းၵူႈႁူမ်ႈၸၢတ်းပၢၼ်ၶႃႈ မေႃႁၵ်ႉၵၼ် မေႃတူၺ်းထိုင်ၵၼ်သေ ၶဝ်ထၢမ်ဝႃႈ မိူဝ်ႈလႂ်တေပိုတ်ႇတူဝ်ၼႆဢေႃႈ။ ၶႃႈၵေႃႈလႆႈလၢတ်ႈၵႂႃႇဝႃႈ တိုၵ်ႉၵူဝ်တိုၵ်ႉ ဢၢႆၼႆလႄႈ ဢူၺ်းၵေႃႉၶႃႈၼၼ်ႉၶိုၼ်းလၢတ်ႈမႃးဝႃႈ လူဝ်ႇလႆႈသိုဝ်ႈယူဝ်းတေႃႇတူဝ်ၸဝ်ႈၵဝ်ႇၵူၺ်း၊ ပေႃးဢမ်ႇသိုဝ်ႈယူဝ်းတေႃႇတူဝ်ၸဝ်ႈၵဝ်ႇ၊ တိုၵ်ႉၸႂ်ႉတၢင်းၵူဝ်တၢင်းဢၢႆ ဢၼ် ဢမ်ႇထုၵ်ႇလီမီးၼၼ်ႉသေ ၸႂ်ႉၸၢတ်ႈပၢၼ်ယူႇၼႆႉ မိူဝ်ႈလႂ်တေၶိုၼ်ႈယႂ်ႇ ၼႆၶႃႈဝႃႇ။

ၶႃႈၵေႃႈတူၵ်းၸႂ်ၵႂႃႇသေ မႃးၼွၼ်းဝူၼ်ႉၶိုၼ်း လႆႈႁၼ်ဝႃႈမၼ်းၵေႃႈပဵၼ်လွင်ႈတႄႉ။ ပေႃးႁဝ်းပိုတ်ႇတူဝ် ၵဵဝ်ႇလူၺ်ႈၵႂၢမ်းႁၵ်ႉၵႂၢမ်းပႅင်းၼႆႉ မၼ်းပဵၼ်လွင်ႈတီႈလီ၊ ပေႃးဢမ်ႇမီးတၢင်းႁၵ်ႉ ႁဝ်းၵေႃႈဢမ်ႇၸၢင်ႈမီး မႅတ်ႉတႃႇတေႃႇပိူၼ်ႈ။ ဝၢႆးၼၼ်ႉယဝ်ႉထႅင်ႈဝၼ်းၼိုင်ႈၵေႃႈ လႆႈပိုတ်ႇတူဝ်ၵႂႃႇၵမ်းလဵဝ် မၼ်းဢမ်ႇၸႂ်ႈလွင်ႈလီဢၢႆ။

ၵူၺ်းၵႃႈပေႃးယူႇ ၼႂ်းတူင်ႇဝူင်းတႆးႁဝ်းတႄႉ ပိူၼ်ႈတေဢမ်ႇလၢတ်ႈသိုဝ်ႈသိုဝ်ႈၸိူင်ႉၼၼ် – ပိူၼ်ႈတေဝႃႈ သူပဵၼ်ၸိူင်ႉၼၼ် လီဢၢႆပိူၼ်ႈ ၊ သူဢမ်ႇၸႂ်ႈမႄႈယိင်းၵူၼ်းၸၢႆးလူးၼႆသေ ၶဝ်တတ်းလွင်ႈတၢင်းႁၵ်ႉဢွၵ်ႇပႅတ်ႈ၊ ၶဝ်တေၸပ်းပႅင်း ၼိူဝ်လွင်ႈတူဝ်ၶိင်းၾၢင်ႁၢင်ႈတၢင်းၼွၵ်ႈ၊ တႃႇတေႁၵ်ႉၵၼ်ၼၼ်ႉ လူဝ်ႇလႆႈမီးၵူၼ်းၸၢႆး၊ ၼၢင်းယိင်းၵူၺ်းတေဝႃႈၼႆ။

ၵူၺ်းၵႃႈၶႃႈတႄႉ မီးဢူၺ်းၵေႃႉၼွၵ်ႈမိူင်းပၼ်ႁႅင်း၊ ၶဝ်လၢတ်ႈဝႃႈ “ Love is beautiful – you should show to the world – open to the world ” ၶဝ်ဝႃႈၸိူင်ႉၼႆၶႃႈ။ ပိူၼ်ႈပၼ်ႁႅင်းႁႂ်ႈႁဝ်းၸႅင်ႈလႅင်းလီ ၼႂ်းတူဝ်ၸဝ်ႈၵဝ်ႇ ၸိူင်ႉၼႆၶႃႈဢေႃႈ။ ၶႃႈၵေႃႈဝူၼ်ႉတူၺ်းလီလီသေ ယွၼ်ႉဢမ်ႇလႆႈႁဵတ်းၽိတ်းသင်လႄႈ ဢမ်ႇၵူဝ်ဢမ်ႇဢၢႆသေ ၸင်ႇပိုတ်ႇတူဝ်ၶႃႈဢေႃႈ။

မိူၼ်ၼင်ႇ မၢႆမီႈပၵ်းပိူင်တၢင်းမိူင်းထႆးၼႆႉ ယၢမ်းလဵဝ် ပိူၼ်ႈပၼ်သုၼ်ႇလႆႈသုၼ်ႇပဵၼ်ၸုမ်း LGBT ဢမ်ႇဝႃႈ ၼႂ်းသႅၼ်းလႂ်ၵေႃႈယဝ်ႉ သင်မေႃႁၵ်ႉပႅင်းၵၼ်၊ မေႃပွင်ႇၸႂ်ၵၼ်သေ ၸုင်မိုဝ်းၵၼ်ၶဝ်ႈၵႂႃႇၼႂ်းလုမ်းၸိုင် လူင်းလၢႆးမိုဝ်းလႆႈ ထုၵ်ႇပၵ်းပိူင်မၢႆမီႈမိူင်းထႆးၵမ်းလဵဝ်၊ ပိူၼ်ႈပၼ်သုၼ်ႇလႆႈသုၼ်ႇပဵၼ်ၽဵင်ႇပဵင်းၵၼ်ဝႆႉ ၵမ်းလဵဝ်ယဝ်ႉၶႃႈ။

ထၢမ် – ဢေႃႈၶႃႈ… တီႈၼႆႈၵေႃႈ ၶႂ်းယွၼ်းထၢမ်ၸိမ်ထႅင်ႈဢိတ်ႉဢေႃႈ…ၸွမ်းၼင်ႇဝႃႈမိူင်းထႆးၼႆႉပၼ် သုၼ်ႇလႆႈၽဵင်ႇပဵင်းမႅၼ်ႈၸွမ်းပၵ်းပိူင်မၢႆမီႈယဝ်ႉၼႆလႄႈ ၵူႈပီႈႁဝ်းၶဝ်ၶႃႈလူး တေလႆႈငိၼ်းၶၢဝ်ႇငၢဝ်းလီ မိူဝ်ႈလႂ်ၶႃႈၼေႃ?

တွပ်ႇ – ႁိုမ်း…ႁိုမ်း…လွင်ႈၶၢဝ်ႇလီၶႃႈႁႃႉ…ဢိုမ်း…မိူဝ်ႈလဵဝ်ၵေႃႉႁၵ်ႉၶႃႈၵေႃႈ ၶဝ်တိုၵ်ႉႁဵၼ်းယဝ်ႉသေ တိုၵ်ႉတေလႆႈႁပ်ႉၸုမ်ႈၵူၺ်း။ သွင်ၵေႃႉၵေႃႈ လႆႈဢုပ်ႇၵၼ်သေဝၢင်းၽႅၼ်ဝႆႉယူႇလၢႆဢၼ်လၢႆမဵဝ်း ပႃးၸဵမ်ၵၢၼ်ပၢႆးမၢၵ်ႈမီး။ ပေႃးလွင်ႈၸိူဝ်းၼႆႉ ယဝ်ႉၵႂႃႇမူတ်းယဝ်ႉ ႁဝ်းၶႃႈၸင်ႇတေဢုပ်ႇၵၼ်ထႅင်ႈၵမ်းၼိုင်ႈ လွင်ႈတေၸတ်းပွႆးၸတ်းလၢမ်း ၸိူဝ်းၼၼ်ႉၶႃႈ။ ၵူၺ်းၵႃႈ တေႃႈလဵဝ်တႄႉ တိုၵ်ႉပၵ်းၸႂ်ဝႆႉၼိူဝ်ၼႃႈၵၢၼ် ဢၼ်လမ်ႇလွင်ႈၸိူဝ်းၼၼ်ႉသေၵွၼ်ႇ၊ တိုၵ်ႉႁဵတ်းသၢင်ႈၵႂႃႇၵမ်းၶၵ်ႉၶၵ်ႉယူႇၶႃႈ။

ထၢမ် – မိူဝ်ႈၼႃႈမႃးတႄႉ တေၽိတ်ႈမွၵ်ႇမႃးဢွၵ်ႇလၢႆးၵၢၼ်ၸွမ်း တင်းသွင်ၵေႃႉၶႃႈၼေႃႈ …။ ၸွမ်းၼင်ႇ သုၼ်ႇလႆႈသုၼ်ႇပဵၼ်မီးဝႆႉၽဵင်ႇပဵင်းသေ ယူႇတီႈပီႈၸၢႆးၵွၼ်းလၢဝ် ၶႂ်ႈ ၾၢၵ်ႇၶေႃႈၵႂၢမ်းထိုင် ၸိူဝ်းပႆႇႁတ်းပိုတ်ႇတူဝ်ၼၼ်ႉ ၸိူင်ႉႁိုဝ်ၽွင်ႈၶႃႈ?

တွပ်ႇ – လွင်ႈသုၼ်ႇလႆႈသုၼ်ႇပဵၼ်(Human Rights) ၼႆႉ လမ်ႇလွင်ႈႁႅင်းၼႃႇၶႃႈ။ ၵူၼ်းႁဝ်းၼႆႉ ဢမ်ႇဝႃႈ တေၵိူတ်ႇမႃးပဵၼ်ၼၢင်းယိင်း၊ ၵူၼ်းၸၢႆး ၊ LGBT ၊ ဢမ်ႇဝႃႈပဵၼ်မဵဝ်းလႂ် သုၼ်ႇလႆႈသုၼ်ႇပဵၼ်ၵူၼ်းႁဝ်းၶႃႈၼၼ်ႉ ထုၵ်ႇလီၽဵင်ႇပဵင်းၵၼ်ဝႆႉတင်းမူတ်း။ ပေႃးႁဝ်းဢမ်ႇပွင်ႇၸႂ်၊ ဢမ်ႇၶဝ်ႈၸႂ်ၼႂ်းလွင်ႈၼႆႉၸိုင် ႁဝ်းတေပဵၼ်ၵူၼ်းဢၼ်တႅၵ်ႇယႅၵ်ႈ၊ တႅၵ်ႇၸတ်ႉယူႇတႃႇသေႇ၊ တေတူၺ်းဝႃႈ ၵဝ်သုင်မႂ်းတႅမ်ႇ၊ တေမီးပၢႆးဝူၼ်ႉၸိူင်ႉၼႆယူႇတႃႇသေႇ။ ပေႃးပဵၼ်ၼႆ ၵၢၼ်ၽွမ်ႉႁူမ်ႈတင်းပၢႆးၸႂ်ႁဝ်းၵေႃႈ တေဢမ်ႇပဵၼ်မႃး၊ ပၼ်ႁႃ ဢၼ်ၸွမ်းမႃးတၢင်းလင်ၵေႃႈ တေမီးၼမ်။

ၶႂ်ႈယွၼ်းၾၢၵ်ႇထိုင်တႄႉၵေႃႈ မိူဝ်ႈလဵဝ်ၼႆႉ ၵမ်ႇၽႃႇပိုတ်ႇၵႂၢင်ႈၼႃႇယဝ်ႉ ထိုင်မႃးပီ 2025 ယဝ်ႉ၊ ႁဝ်းၶႃႈ ၵေႃႈ ထုၵ်ႇလီပိုတ်ႇမၢၵ်ႇႁူဝ်ၸႂ်ၸွမ်း ၵမ်ႇၽႃႇတီႈဢၼ်ၵႂၢင်ႈၶိုၼ်ႈ။ ၵူၼ်းႁဝ်းၶႃႈၼႆႉ ပေႃးႁဝ်းပိုတ်ႇမၢၵ်ႇႁူဝ်ၸႂ်သေ မိူဝ်ႈမၢၵ်ႇႁူဝ်ၸႂ်ႁဝ်းပိုတ်ႇယဝ်ႉၼၼ်ႉ ႁဝ်းတေႁၼ်သဵၼ်ႈတၢင်းလၢႆလၢႆတၢင်း တီႈမၼ်းၵႂၢင်ႈၶိုၼ်ႈ ၼႂ်းလွင်ႈတၢင်းဢၼ်ႁဝ်းပႆႇယၢမ်ႈႁၼ် ၵေႃႈ တေႁၼ်ၶိုၼ်ႈမႃး။ ပေႃးၼၼ်ႁဝ်းၵေႃႈ ၸႂ်ႉပၺ်ႇၺႃႇႁဝ်း ၊ ယူႇၼႂ်းသုၼ်ႇလႆႈသုၼ်ႇပဵၼ်ဢၼ်ၽဵင်ႇပဵင်းၼႆႉသေတူၺ်းၸိုင် ပၼ်ႁႃလၢႆဢၼ်လၢႆမဵဝ်း ၼႂ်းတူင်ႇဝူင်းၵူၼ်းႁဝ်းၶႃႈၵေႃႈ တေယွမ်းၵႂႃႇ၊ ႁဝ်းတေပဵၼ်ၵူၼ်းဢၼ်ယွမ်းႁပ်ႉ ပွင်ႇၸႂ်သေ မီးတၢင်းသိူဝ်းၸႂ်လႆႈလႄႈ သိုပ်ႇသူင်ႇလွင်ႈသိူဝ်းၸႂ်ၸိူဝ်းၼႆႉတေႃႇၵႂႃႇထႅင်ႈ လႆႈဝႃႈပဵၼ်ၽွၼ်းလီ ဢၼ်ယႂ်ႇလူင်။

ထႅင်ႈဢၼ်ၼိုင်ႈသမ်ႉ ၶႂ်ႈပၼ်ႁႅင်းထိုင်ၼွင်ႉၶဝ် ၸိူဝ်းယူႇၼႂ်း LGBT တင်းလၢႆဝႃႈ ပေႃးႁဝ်းဢမ်ႇယွမ်းႁပ်ႉ တူဝ်ၸဝ်ႈၵဝ်ႇလႆႈ၊ ဢမ်ႇပွင်ႇၸႂ်တူဝ်ၸဝ်ႈၵဝ်ႇၸိုင် ဢမ်ႇမီးၽႂ်တေမႃးယွမ်းႁပ်ႉႁဝ်း၊ ပွင်ႇၸႂ်ၼိူဝ်ႁဝ်းလႆႈ။ တူဝ်ၸဝ်ႈၵဝ်ႇၶႂ်ႈပဵၼ်ၸိူင်ႉႁိုဝ်၊ ၵျိူၵ်ႈၸိူင်ႉႁိုဝ် ၊ လူဝ်ႇႁဵတ်းၸိူင်ႉႁိုဝ်ၼႆၼၼ်ႉ ၸဝ်ႈၵဝ်ႇႁူႉလိူဝ်ပိူၼ်ႈသုတ်း။ ၵွပ်ႈၼၼ် ၶႂ်ႈပၼ်ႁႅင်းၸႂ်ဝႃႈ ႁဝ်းပဵၼ်ၵူၼ်းလီလႆႈ၊ လိူၵ်ႈႁဵတ်းလိူၵ်ႈသၢင်ႈလႆႈ၊ လိူၵ်ႈပႆၸွမ်းၼင်ႇယိူင်းမၢႆ ၸဝ်ႈၵဝ်ႇၶႂ်ႈလႆႈၶႂ်ႈပဵၼ်ၼၼ်ႉသဵင်ႈသဵင်ႈ။ ယူႇတီႈၸႂ်ႁဝ်းၵူၺ်း ဢမ်ႇလႆႈယူႇတီႈႁၢင်ႈၾၢင်ၾၢႆႇၼွၵ်ႈ။ ၵွပ်ႈ ၼၼ် ႁႂ်ႈဢဝ်ပၢႆးၸႂ်ၼမ်းတၢင်းသေ မေႃပွႆႇဝၢင်း၊ ၸႂ်ႉၸႂ်တႄႉတႄႉသေတူၺ်း။ ယႃႇပေဢဝ်ၸႂ်ဢတ်းတ၊ ယူႇၸဵင်ႇလဵဝ်သေတူၺ်း။

ပေႃးမႄႈၸိူဝ်းမီးလုၵ်ႈလၢင်းပဵၼ်ၸိူင်ႉၼႆႉၵေႃႈ ပေႃးဢမ်ႇယွမ်းႁပ်ႉလႆႈ တေပဵၼ်တၢင်းတုၵ်ႉၶ ၸႂ်ၸဝ်ႈၵဝ်ႇ၊ မိူင်းႁဝ်းသမ်ႉ တေၵႆႉပွင်ႉလႃႇ၊ ႁႅမ်ၵၼ်၊ မၢင်ၸိူဝ်းၵေႃႈ တေဝႃႈပဵၼ်ဝူတ်ႈပဵၼ်ၵၢမ်ႇၼႆသေ ဢွၼ်ၵႂႃႇၼႄပူႇသြႃႇ ႁႂ်ႈလိုပ်ႈႁႂ်ႈႁေႃႈပႅတ်ႈ ၸိူင်ႉၼႆၵေႃႈမီး။ ပေႃးပဵၼ်ၼႆ ႁဵတ်းႁႂ်ႈတုမ်ႉတိူဝ်ႉပၢႆးၸႂ်၊ ၸႂ်တူၵ်းယဝ်ႉၵေႃႈ ႁဵတ်းႁႂ်ႈတုမ်ႉတိူဝ်ႉပႃး ပၢႆးယူႇလီ။ ၵွပ်ႈ ၼၼ် ႁႂ်ႈမေႃပွႆႇဝၢင်းသေ ယွမ်းႁပ်ႉၵၼ်၊ မၼ်းတေၸွႆႈလူတ်းယွမ်းပၼ် ပၼ်ႁႃပေႃႈမႄႈၸိူဝ်းမီးလုၵ်ႈလၢင်းပဵၼ်ၸိူင်ႉၼႆ တင်းၼမ်။ ၵၢပ်ႈပၢၼ်တေႃႈလဵဝ် ဢမ်ႇၸႂ်ႈၵၢပ်ႈဢၼ်တေလႆႈပွင်ႉထႃႉလႃႇၵၼ်၊ ပွင်ႉဝူတ်ႈပွင်ႉၵၢမ်ႇ၊ လူဝ်ႇမေႃပၼ်တၢင်းႁူႉလုၵ်ႈလၢင်း ႁႂ်ႈမေႃၸႂ်ႉၸၢတ်ႈပၢၼ်ယူႇသဝ်းၵႂႃႇၵူၺ်း။ ၶႂ်ႈယွၼ်းပၼ်ႁႅင်းၸႂ် ၵူႈၾၢႆႇၵူႈတၢင်းၼင်ႇၼႆၶႃႈ။

ထၢမ် – ဢၼ်ဢမ်ႇလႆႈထၢမ်မႅၼ်ႈသေ ၶႂ်ႈလၢတ်ႈလူး ၸွင်ႇတေမီးၸိူင်ႉႁိုဝ်ထႅင်ႈၶႃႈၼေႃ?

တွပ်ႇ – ဢေႃႈၶႃႈ… သင်ဝႃႈမီးပၼ်ႁႃၸိူင်ႉႁိုဝ်၊ ၶႂ်ႈဢုပ်ႇဢူဝ်းၸိူင်ႉႁိုဝ်ၼႆၵေႃႈ တူင်ႉတၵ်ႉမႃးၼႂ်းဢၵွင်ႉၶႃႈၵေႃႈ လႆႈယူႇဢေႃႈ။ မိူၼ်ၼင်ႇဝႃႈ ၼႂ်းတူင်ႇဝူင်း LGBT ၼႆႉ ႁဝ်းတေလႆႈဝႆႉဝၢင်းတူဝ်ၸႂ်ၸိူင်ႉႁိုဝ်၊ ၼင်ႇႁိုဝ် တေယွမ်းႁပ်ႉတူဝ်ၸဝ်ႈၵဝ်ႇလႆႈ ၊ ၼင်ႇႁိုဝ် ပေႃႈမႄႈႁဝ်းတေပွင်ႇၸႂ် ၶဝ်ႈၸႂ်ႁဝ်းလႆႈၸိူဝ်းၼႆႉ ၸွမ်းၼင်ႇ ၶႃႈမီးတူဝ်ထူပ်းသေ ပွင်ပဵၼ်လႆႈၼၼ်ႉ တေဢဝ်ဢွၵ်ႇမွၵ်ႇလၢတ်ႈၼႄပၼ်ယူႇၶႃႈ။

ပေႃးႁဝ်းမေႃဝႆႉၸႂ်မိူၼ်ၼမ်ႉဢမ်ႇတဵမ်ၵႅဝ်ႈ ပႂ်ႉတုင်းႁပ်ႉဢဝ်တၢင်းႁူႉလၢႆဢၼ်လၢႆလွင်ႈသေ ၸႂ်ႉၸႂ်ႁဝ်း ထတ်းသၢင်မူၼ်ႉမႄးၵႂႃႇၸိုင် တေပဵၼ်လွင်ႈလီတွၼ်ႈတႃႇတူင်ႇဝူင်းၵူၼ်းႁဝ်းတႄႉတႄႉၶႃႈ။ ငိၼ်းၸူမ်းယႂ်ႇၼမ်ထိုင် ၽူႈပၼ်ႁႅင်းၵူႈၵေႃႉၶႃႈဢေႃႈ။

မႂ်ႇသုင်ၶႃႈ