ပလိၵ်ႈမၢၼ်ႈ ၵိုင်ႉၵၢင်ႉဢွၵ်ႇမႃး ၵူတ်ႇထတ်းဝတ်းဝႂ်လၢႆႊသိၼ်ႊ ရူတ်ႉၵႃးထႅင်ႈ တီႈဝဵင်းပၢင်လွင်း ၸိုင်ႈတႆးပွတ်းၸၢၼ်း ႁဵတ်းႁႂ်ႈၵူၼ်းမိူင်းၵႂႃႇမႃးယၢပ်ႇၽိုတ်ႇ တႃႇႁႃၵိၼ်လဵင်ႉတွင်ႉဝႃႈၼႆ ။
ၼႂ်းဝၼ်းတီႈ 18/8/2025 ယၢမ်းၵၢင်ၼႂ် ပလိၵ်ႈမၢၼ်ႈ ပႂ်ႉၵူတ်ႇထတ်းဝတ်းဝႂ် တီႈၼႂ်းၵၢင်ဝဵင်းပၢင်လွင်း တီႉၺွပ်း ၵႃးဢမ်ႇမီးဝတ်းဝႂ် 5 လမ်း ၊ ယၢမ်းၵၢင်ၶမ်ႈ ၸင်ႇႁႂ်ႈၸဝ်ႈမၼ်းဢဝ်ငိုၼ်းမႃးထုတ်ႇ ယဝ်ႉၸင်ႇပွႆႇပၼ်ၶိုၼ်း ဝႃႈၼႆ ။
ပလိၵ်ႈမၢၼ်ႈၵိုင်ႉၵၢင်ႉ တီႉၺွပ်းဝတ်းဝႂ် လၢႆႊသိၼ်ႊ ၸိူင်ႉၼၼ်လႄႈ ၵူၼ်းဝၢၼ်ႈ မႃးၶၢႆ ၵၢတ်ႇ တီႈၼႂ်းဝဵင်းပၢင်လွင်း ဢမ်ႇၸၢင်ႈၵႂႃႇမႃး ယၢပ်ႇၽိုတ်ႇတႃႇႁႃၵိၼ် လဵင်ႉတွင်ႉ ဝႆႉဝႃႈၼႆ ။
ၵူၼ်းၸၢႆးဢႃယု 50 ပီလၢတ်ႈၽူႈတွႆႇႁွၵ်ႈဝႃႈ – “မိူဝ်ႈသိုၼ်းၼႆႉ တီႉလႆႈၵႃး 5 လမ်း ပေႃးၶဝ်ၶႂ်ႈၵူတ်ႇထတ်း ၵေႃႈ ၶဝ်ႁႄႉၵႃးသေ ထၢမ်ဝႃႈၸွင်ႇမီးဝႂ် ပေႃးဢမ်ႇမီးၵေႃႈ ၸႂ်ႉၵႂႃႇ ႁူင်းပလိၵ်ႈ ၵမ်းလဵဝ် ၊ ပေႃးၼႂ်းဝဵင်းပၢင်လွင်းတီႉၺွပ်းရူတ်ႉၵႃးၸိူင်ႉၼႆတႄႉ ၵူၼ်းဝၢၼ်ႈမႃးၶၢႆၽၵ်းယိူဝ်ႈၼၢင်းၶဵဝ် ၵေႃႈ ဢမ်ႇၸၢင်ႈမႃးယဝ်ႉ ၊ လႆႈၶၢႆၸွမ်းၵၢတ်ႇဝၢၼ်ႈၽႂ်ဝၢၼ်ႈမၼ်းဢိတ်းဢွတ်းၵူၺ်းယဝ်ႉ ၊ ယၢပ်ႇၽိုတ်ႇတႃႇႁႃၵိၼ်လဵင်ႉတွင်ႉဝႆႉ ၊ ၼႂ်းၵၢတ်ႇတလဵဝ် ၵူၼ်းၵေႃႈဢမ်ႇမီး ဢမ်ႇၶၢႆလီ”- ဝႃႈၼႆ ။
ရူတ်ႉၵႃးဢၼ်တီႉလႆႈၼႂ်းဝၼ်းတီႈ18 /8/2025 တႃႇ 5 လမ်းၼၼ်ႉ ထိုင်ယၢမ်းၵၢင်ၶမ်ႈ ၸဝ်ႈၶွင်ရူတ်ႉၵႃးၵႂႃႇဢုပ်ႇၵၼ်တင်းပလိၵ်ႈသေ ထုတ်ႇဢွၵ်ႇမႃးၶိုၼ်း ၼိုင်ႈလမ်း 20 သႅၼ်ထိုင် 30 သႅၼ်ပျႃးၸိူဝ်းၼႆႉၼႆ ၵူၼ်းပိုၼ်ႉတီႈလၢတ်ႈၼင်ႇၼႆ။
တီႈဝဵင်းပၢင်လွင်းၼႆႉ ဢမ်ႇတီႉၺွပ်း ဝတ်းဝႂ်လၢႆႊသိၼ်ႊၼႆႉ ႁိုင်မႃး 2 လိူၼ် ယဝ်ႉ။ ယၢမ်းလဵဝ်ၸင်ႇၵိုင်ႉၵၢင်ႉတီႉၺွပ်းၶိုၼ်းလႄႈ ႁဵတ်းႁႂ်ႈၵူၼ်းမိူင်းပိုၼ်ႉတီႈ ဢမ်ႇႁတ်းၵႂႃႇမႃး ။ ႁဵတ်းႁႂ်ႈၵူၼ်းၶၢႆၶူဝ်းၼႂ်းၵၢတ်ႇယၢပ်ႇၽိုတ်ႇတႃႇ ၵၢၼ်ႁႃၵိၼ်လဵင်ႉတွင်ႉ ဝႃႈၼႆ ။
ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ယွၼ်ႉဢမ်ႇမီးၵူၼ်းမႃးၶၢႆၶူဝ်းလႄႈ ၼႂ်းၵၢတ်ႇၵေႃႈ ၶၢႆၶူဝ်း ဢမ်ႇၶႅမ်ႉဢမ်ႇလီ။ မၢင်ဝၼ်းဢမ်ႇလႆႈႁူဝ်မၢၼ်မၼ်းလူးၵွၼ်ႇ။ ၵူႈပွၵ်ႈၶၢႆလႆႈ ၼိုင်ႈဝၼ်း 2 သႅၼ်ၼႆႉ။ ယၢမ်းလဵဝ် ငိုၼ်းဢမ်ႇၶဝ်ႈသေဢိတ်း ၊ ၵူၼ်းၶၢႆၶူဝ်းၼႂ်းၵၢတ်ႇၵေႃႈ ဢမ်ႇၸၢင်ႈႁဵတ်းၵိၼ် ၵၢၼ်သင် ယဝ်ႉ ”- ဝႃႈၼႆ ။
ပလိၵ်ႈမၢၼ်ႈသိုၵ်းမၢၼ်ႈၵႆႉပႂ်ႉၵူတ်ႇထတ်းၼႆႉပဵၼ်တီႈ ၵူၼ်းၵိုၼ်းၶွၼ်ႈၵႂႃႇမႃးၼမ် မိူၼ်ၼင်ႇ ၸွမ်းတၢင်းလူင်ဝဵင်းပၢင်လွင်း ၊ တၢင်းၶဝ်ႈတၢင်းဢွၵ်ႇဝဵင်း တီႈၵဵတ်ႉလၢၼ်ႇ ဝဵင်းပၢင်လွင်းၸိူဝ်းၼႆႉ-ဝႃႈၼႆ ။
လိူၼ်မေႊ ဝၼ်းတီႈ 2 ၸွမ်ၸိၵ်းသိုၵ်းမၢၼ်ႈ မိၼ်းဢွင်ႇလၢႆႇ ၸီႉသင် ႁႂ်ႈၵူတ်ႇထတ်းရူတ်ႉၵႃး ၸိူဝ်းဢမ်ႇမီးမၢႆၾၢင် (လၢႆႊသိၼ်ႊ) ၼႆလႄႈ ၶႃႈႁၢပ်ႇၵၢၼ်ၶုၼ်ၾၢႆႇၵဵဝ်ႇၶွင်ႈ လိုပ်ႈလမ်းတီႉၺွပ်း ရူတ်ႉၵႃးၵူၼ်းမိူင်း ၵူႈတီႈၵူႈဝဵင်း၊ ၼႂ်းမိူင်းတႆးၵေႃႈ မိူၼ်ၼင်ႇဝဵင်းဢွင်ႇပၢၼ်း ၊ တူၼ်ႈတီး ၊ ယွင်ႁူၺ်ႈ ၊ လွၵ်ႉၸွၵ်ႇ ၊ သီႇသႅင်ႇ ၊ ပၢင်လွင်း ၊ ပၢင်လူင် ၊ ၼမ်ႉၸၢင် ၸိူဝ်းၼႆႉၵေႃႈၵူတ်ႇထတ်းႁၢဝ်ႈႁႅင်း ။
ၾၢႆႇတင်းပလိၵ်ႈသိုၵ်းမၢၼ်ႈၵူတ်ႇထတ်းဝတ်းဝႂ်လၢႆႊသိၼ်ႊ ၼႂ်းဝၼ်းတီႈ 1/6/2025 ထိုင် ဝၼ်းတီႈ5/6/2025 ၼႂ်းၶၢဝ်းတၢင်း 5 ဝၼ်း ၊ ပတ်းပိုၼ်ႉၸိုင်ႈမိူင်းတီႉၺွပ်း လႆႈရူတ်ႉၶိူင်ႈ ရူတ်ႉၵႃး 400 ပၢႆ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ