သိုၵ်းမၢၼ်ႈ ယိုတ်းမိူင်း ၸႂ်ႉႁိူဝ်းမိၼ် Y-12 ပွႆႇမၢၵ်ႇသႂ်ႇၼႂ်းဢိူင်ႇၼွင်ပိင် ၸႄႈဝဵင်းၵျွၵ်ႉမႄး တိူဝ်ႉၺႃးႁိူၼ်းယေး ၵူၼ်းမိူင်းထုၵ်ႇၾႆးမႆႈ လူႉၵွႆၼမ်။

ဝၼ်းတီႈ 20/08/2025 ယၢမ်းၵၢင်ၼႂ် သိုၵ်းမၢၼ်ႈတင်း သိုၵ်းတဢၢင်း TNLA ပဵၼ်ပၢင်တိုၵ်းၵၼ် ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ် ပွႆႇမၢၵ်ႇသႂ်ႇတီႈႁိမ်းၵၢတ်ႇ ပွၵ်ႉ (1) ၾၢႆႇလင်ပႃႇလီႇ၊ ပွၵ်ႉ (5) လႄႈ ဝၢၼ်ႈလုၵ်းပႃ ၼႂ်းဢိူင်ႇၼွင်ပိင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ၸၢၵ်ႇမၢၵ်ႇတိူဝ်ႇၺႃး ႁိူၼ်းယေးၵူၼ်းမိူင်းထုၵ်ႇၾႆးမႆႈ လူႉၵွႆၼမ်။

ၵူၼ်းပိုၼ်ႉတီႈ ဢိူင်ႇၼွင်ပိင် လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈဝႃး ႁူဝ်ၶမ်ႈ ၾႆးမႆႈႁိူၼ်းယေး တၢင်းလင် ပႃႇလီႇၼၼ်ႉတင်းမူတ်းဢေႃႈ။ ပဵၼ်ႁိူဝ်းမိၼ် Y – 12 ၶႃႈဢေႃႈ ဢၼ်မႃးပွႆႇမၢၵ်ႇၼၼ်ႉ။ ယဝ်ႉၵေႃႈ ပၢႆယိုဝ်းၵွင်ႇသႂ်ႇထႅင်ႈ။ မိူဝ်ႈဝႃး ၶဝ်မႃးပွႆႇၵမ်းၼိုင်ႈ၊ မိူဝ်ႈၼႆႉၵေႃႈ မႃးပွႆႇထႅင်ႈဢေႃႈ။ ႁိူၼ်းယေးၵူၼ်းဝၢၼ်ႈ လုၵ်းပႃတႄႉ လူႉၵွႆတင်းၼမ်ၼႆၶႃႈဢေႃႈ။ မိူဝ်ႈၼႆႉ ပၢင်တိုၵ်း တိုၵ်ႉသိုပ်ႇပဵၼ်ထႅင်ႈႁၢဝ်ႈႁႅင်းယူႇၶႃႈ”- ဝႃႈၼႆ။

ဢိင်ၼိူဝ် လွင်ႈသိုၵ်းမၢၼ်ႈ ၸႂ်ႉႁိူဝ်းမိၼ် မႃးပွႆႇမၢၵ်ႇႁႅင်း 500 ပွင်ႊ လုၵ်ႈၼိုင်ႈ တီႈဝိႁၢၼ်ၵျွင်းၵၢင် ဝၢၼ်ႈပၢင်တီး ဢိူင်ႇၼွင်ပိင် မိူဝ်ႈဝႃးၼၼ်ႉသေ တိူဝ်ႉၺႃးၵူၼ်းၼွင်ၶဵဝ် ဢၼ်ပၢႆႈ ၽေးမႃးသွၼ်ႈဝႆႉတီႈၼၼ်ႈ လႆႈမၢတ်ႇၸဵပ်းလူႉတၢႆ 40 ပၢႆ ၼႆယဝ်။

ယူႇတီႈ ၸုမ်းၸွႆႈထႅမ်ပရႁိတၶဝ် လႆႈၸွႆႈဢဝ်ၵူၼ်းမၢတ်ႇၸဵပ်း သူင်ႇယူတ်းယႃတူဝ် တၢင်းဝဵင်းလႃႈသဵဝ်ႈ၊ ၵူတ်ႉၶၢႆလႄႈ ၼမ်ႉလၼ်ႈ ၸိူဝ်းၼၼ်ႉဝႆႉ။ ယၢမ်းလဵဝ် ယၢပ်ႇၽိုတ်ႇဝႆႉ ၵႃႈယူတ်းယႃလႄႈ ၶဝ်ႈၼမ်ႉတၢင်းၵိၼ် တႃႇၵူၼ်းပၢႆႈၽေးသိုၵ်း ၼႆယဝ်ႉ။

ထိုင်မႃးဝၼ်းတီႈ 21 ယၢမ်းဝၢႆးဝၼ်း 1 မူင်းပၢႆၼႆႉ ၵူၼ်းမၢတ်ႇၸဵပ်းတီႈဝဵင်းၵျွၵ်ႉမႄး ႁွတ်ႈထိုင်ဝႆႉ တီႈႁူင်းယႃလူင်ဝဵင်းလႃႈသဵဝ်ႈ မီးၵႂႃႇ 34 ၵေႃႉယဝ်ႉ ၼႂ်းၼၼ်ႉ ပႃးလုၵ်ႈဢွၼ်ႇလႄႈ ၵူၼ်းထဝ်ႈၼႆ – ၵူၼ်းပိုၼ်ႉတီႈ ဝဵင်းလႃႈသဵဝ်ႈလၢတ်ႈ။