မိူဝ်ႈၼႆႉ ဝၼ်တီႈ 20 /8/2025 တပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ပိုၼ်ၽၢဝ်ႇဝႃႈ သိုၵ်းမၢၼ်ႈႁူမ်ႈ ပျီႇတူႉၸိတ်ႉပဢူဝ်း ၽဝ်ႁိူၼ်းၵူၼ်းမိူင်း တီႈဝၢၼ်ႈ ၼွင်ထဝ်မႂ်ႇ (နောင်ထော်ရွာသစ်) လႄႈဝၢၼ်ႈတပူးထူဝ်ႇ ၸႄႈဝဵင်းသီႇသႅင်ႇ ၾႆးမႆႈႁိူၼ်းယေးလူႉၵွႆၵႂႃႇတင်းၼမ် ဝႃႈၼႆ ။
ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ မီးၽူႈမၢၵ်ႈၵူၼ်းမီး (ၶရူဝ်ႊၼီႊ) ဢၼ်ၵမ်ႉထႅမ်သိုၵ်းမၢၼ်ႈ ဢွၼ်ဢဝ်ပျီႇတူႉၸိတ်ႉပဢူဝ်း ၶဝ်ႈဝၢၼ်ႈ ၼွင်ထဝ်မႂ်ႇ လႄႈ ဝၢၼ်ႈတပူးထူဝ်ႇ ဝႃႈၼႆဝႆႉ ။
ယၢမ်းလဵဝ်ၵေႃႈ ပျီႇတူႉၸိတ်ႉပဢူဝ်းလႄႈၸုမ်းသိုၵ်းမၢၼ်ႈႁူမ်ႈၵၼ်ႁွၼ်ႈထဝ်ႇၶဝ်ႈတဝ်ၼႂ်း ဢိူင်ႇၼွင်ထဝ် ၼႂ်းဝၢၼ်ႈၼွင်ထဝ်မႂ်ႇ ၊ ၼွင်ထဝ်ပွၵ်ႉၵလႃး ၊ ၼွင်ထဝ်ဢယၢၼ်း ၊ ၼွင်ဝူဝ်လႄႈ ဝၢၼ်ႈတပူးထူဝ်ႇ သေ ၽဝ်ႁိူၼ်းၵူၼ်းမိူင်းလူႉၵွႆႇ 100 ပၢႆ ယဝ်ႉ ဝႃႈၼႆ ။
ၵဵဝ်ႇလွင်ႈၼႆႉ ၶုၼ်ႇရဵင်းယၼ်ႇ ၽူႈၶၢၼ်ပၢၵ်ႇ PNLA လၢတ်ႈၽူႈတွႆႇႁွၵ်ႈဝႃႈ-“ပျီႇတူႉၸိတ်ႉၶဝ် ႁွင်ႉဢဝ်သိုၵ်းမၢၼ်ႈ သေမႃး ၽဝ်ႁိူၼ်းၵူၼ်းမိူင်း ၊ ၶဝ်ၽဝ်ႁိူၼ်းၵူၼ်းၸၢဝ်းပဢူဝ်းတင်းၼမ် ၊ မိူၼ်တင်းဝႃႈ PNO ၽဝ်ႁိူၼ်းၸၢဝ်းၸဝ်ႈၵဝ်ၵူၺ်းယဝ်ႉ ၊ ၸုမ်း PNO ၼႆႉ ထုၵ်ႇလီႁူႉတူဝ်ဝႃႈ ၶဝ်ဢဝ်သၢႆၸႂ် ၵူၼ်းမိူင်းပဢူဝ်းသေ ၵႅတ်ႇၶႄႁႄႉၵင်ႈ ၽွၼ်းလီ ၶရူဝ်ႊၼီႊၼေႇဝုၼ်းထုၼ်း ယူႇၼႆ”- ဝႃႈၼႆ။
မိူၼ်ၼင်ႇၼႆ ၼႂ်းဝၼ်းတီႈ 18/8/2025 သိုၵ်းမၢၼ်ႈ ႁူမ်ႈပျီႇတူႉၸိတ်ႉပဢူဝ်း PNO ၶဝ်ႈၼႂ်းဝၢၼ်ႈၼွင်ဝူဝ် (နောင်ဗို) ၽဝ်ႁိူၼ်းၵူၼ်းပိုၼ်ႉတီႈ ႁဵတ်းႁႂ်ႈႁိူၼ်းၵူၼ်းဝၢၼ်ႈ ၼွင်ဝူဝ် လူႉၵွႆ 20 လင်ပၢႆ ၼႆတပ်ႉသိုၵ်းပူတ်းပွႆႇၸိူဝ်ႉၸၢတ်ႈပဢူဝ်း PNLA ပိုၼ်ၽၢဝ်ႇဝႆႉၼင်ႇၼႆ ။
တႄႇၼႂ်းလိူၼ် ဢေႃႊၵၢတ်ႉသ် ဝၼ်းတီႈ 9 ထိုင် ဝၼ်းတီႈ 17 ၼႆႉသိုၵ်း သိုၵ်းမၢၼ်ႈ ႁူမ်ႈပျီႇတူႉၸိတ်ႉ ပဢူဝ်း ၽဝ်ႁိူၼ်းၵူၼ်းပိုၼ်ႉတီႈဢမ်ႇထၢတ်ႇ ႁဵတ်းႁႂ်ႈ ႁိူၼ်းၵူၼ်းဝၢၼ်ႈၼွင်ထဝ် ဢယၢၼ်း လူႉၵွႆ 100 ပၢႆ လႄႈ ႁိူၼ်းၵူၼ်းပိုၼ်ႉတီႈ ၼွင်ဝူဝ်လူႉၵွႆ 20 လင်ပၢႆ ဝၢၼ်ႈၵလႃးလၢၼ်း လူႉၵွႆၵႂႃႇ 24 လင် PNLA လၢတ်ႈၼင်ႇၼႆ ။
ၵဵဝ်ၵပ်းလွင်ႈၼႆႉယူႇတီႈၸုမ်းႁဝ်းၶႃႈ ၶတ်းၸႂ်ၵပ်းသိုပ်ႇၸူး ၽူႈၶၢၼ်ႇပၢၵ်ႇပျီႇတူႉၸိတ်ႉ ၸဝ်ႈႁၢၼ် တၢၼ်းၵျွႆႇ ယူႇသေတႃႉ ၵပ်းသိုပ်ႇဢမ်ႇလႆႈ ။
ၼႂ်းဝၼ်းတီႈ 7/6 /2025 ၾၢႆႇတၢင်းပျီတူႉၸိတ်ႉပဢူဝ်း PNO သူင်ႇလိၵ်ႈ ႁႂ်ႈၵူၼ်းဝၢၼ်ႈ တပူးထူဝ်ႇ (တပူးထို) ၊ ၵွင်းထူဝ်ႇ(ကောင်ထို) ၊ လွႆငွၼ်း(လွယ်ငွန်း) ၊ ၼွင်ဝူဝ် (နောင်ဘို) ၊ ပၢင်ႇၸၢၵ်ႈ(ပင်စက်) ဢၼ်မီးၼႂ်းဢိူင်ႇၼွင်ၵႅဝ်း လႄႈ ဝၢၼ်ႈၼွင်ထဝ် 6 ဝၢၼ်ႈ ၶၢႆႉပၢႆႈ ယၢမ်းလဵဝ် လူဝ်ႇတင်းၸွႆႈထႅမ် ၶဝ်ႈၼမ်ႉတင်းၵိၼ်ဝႆႉ ႁၢဝ်ႈႁႅင်း ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ