သိုၵ်းမၢၼ်ႈယိုတ်းမိူင်းသေ ဝၢၼ်ႈမိူင်းသုၵ်ႉယုင်ႈဢူၼ်ၵဝ်း၊ ၸုမ်းသိုၵ်းၼႂ်းမိူင်းၼင်ႇၵၼ် ႁိမ်ၸိင်းဢွင်ႈတီႈၵၼ် ၸုမ်းလႂ်ၵေႃႈၶႂ်ႈမီးဢႃႇၼႃႇယႂ်ႇလူင်သေဢဝ်ပေႉပုၼ်ႈၵဝ်ပုၼ်ႈမႂ်း။ ၵူၼ်းမိူင်းတႄႉ တေယူႇၵေႃႈၵူဝ် တေပၢႆႈသမ်ႉဢမ်ႇလွတ်ႈတုၵ်ႉ။

မိူၼ်ၼင်ႇ ၵူၼ်းမိူင်းတႆးပွတ်းႁွင်ႇၼႆႉ ၸဵမ်မိူဝ်ႈၽႅၼ်ယၼ်ႇသိုၵ်း 1027 တႄႇၼၼ်ႉသေ ၵူၼ်းမိူင်းၵမ်ႈၼမ် ႁိူၼ်းဢမ်ႇလႆႈယူႇ ၵူႇဢမ်ႇလႆႈၼွၼ်း ၵုမ်ႇလႆႈပၢႆႈၽေးသိုၵ်းၵူၺ်း။ ၵၢၼ်ႁႃၵိၼ်လဵင်ႉတွင်ႉၵေႃႈ ဢမ်ႇၸၢင်ႈႁဵတ်းႁႃသင်လႄႈ ၸိူဝ်းပၢႆႈသွၼ်ႈယူႇၼႂ်းမိူင်းၶႄႇၵေႃႈ မီးတင်းၼမ်။ ၵူၼ်းၸိူဝ်းႁွတ်ႈ မိူင်းၶႄႇၵေႃႈ ဢမ်ႇလွတ်ႈတၢင်းမႆႈၸႂ်။ တႃႇတေယူႇလွတ်ႈလႆႈၵႂႃႇၵူႈဝၼ်းဝၼ်းၵေႃႈ ဢမ်ႇငၢႆႈ။

ၵူၼ်းမိူင်းတႆးၼႆႉ ၸဵမ်မိူဝ်ႈပၢၼ်တႅပ်း 4 တႅပ်း 1996-97 ၊ ဢိင်ၼိူဝ် ၵၢၼ်သိုၵ်းၶဵင်ႈၶႅင်တေႃႇၵၼ်သေ ၸင်ႇပဵၼ်မႃးပၼ်ႁႃဢၼ်ယႂ်ႇလူင် ဢၼ်ႁဵတ်းႁႂ်ႈၵူၼ်းမိူင်းတႆးၼပ်ႉႁူဝ်ႁဵင် ပၢႆႈပႅတ်ႈသူၼ်ႁႆႈၼႃး ပွႆႇပႅတ်ႈႁိူၼ်းယေးၸဝ်ႈၵဝ်ႇသေ ပၢႆႈယဝ်ႉပၢႆႈထႅင်ႈ ဢမ်ႇမီးတီႈသုတ်းတီႈသဵင်ႈသေပွၵ်ႈ။

ၸိူဝ်းပၢႆႈၶဝ်ႈမိူင်းထႆးၵေႃႈ ဢိင်ၼိူဝ်ပၵ်းပိူင်ၸိုင်ႈမိူင်းထႆးသေ ယူႇၵိၼ်ယၢပ်ႇလၢႆၸိူဝ်ႉလၢႆပိူင် ၊ ၵူၼ်းၸိူဝ်းတူၵ်းမိူင်းၶႄႇၵေႃႈ ဢိင်ၼိူဝ်ပၵ်းပိူင်လၢႆသႅၼ်းလၢႆပိူင်သေ တႃႇယူႇလွတ်ႈ ၼၼ်ႉၵေႃႈ ႁိုဝ်ၸႂ်ႈလွင်ႈငၢႆႈ။

ၶၢဝ်းၽႅၼ်ယၼ်ႇသိုၵ်း 1027 ဢၼ်ၸုမ်းဢူၺ်းလီပွတ်းႁွင်ႇၼမ်းၸတ်းၼၼ်ႉၵေႃႈ ႁိုင်ၶၢဝ်းတၢင်း ၼိုင်ႈပီပၢႆယဝ်ႉသေတႃႉ ၽွၼ်းၸႃႉၼမ်လိူဝ်ၽွၼ်းလီ၊ ၵူၼ်းမိူင်းႁၢမ်းတီႈယူႇ၊ ၸိူဝ်းလူႉႁၢႆတၢႆ ယွၼ်ႉပၢင်တိုၵ်းၼမ်ၶိုၼ်ႈမႃးၵူႈမိုဝ်ႉၵူႈဝၼ်း။

တႃႇလိပ်းၶီးမီးၸႂ်ၵႂႃႇမိူဝ်းၼႃႈၼၼ်ႉ ၵူၼ်းမိူင်းၵႃႈလႆႈ ၶၢႆႉပၢႆႈယူႇတီႈလွတ်ႈၽေးၽႂ်မၼ်။ ၸိူဝ်းပၢႆႈဢမ်ႇထုၵ်ႇတီႈထုၵ်ႇတၢင်းၵေႃႈ လႆႈလူႉသုမ်းသၢႆၸႂ်ၼႂ်းၵႄႈမၼ်းၵေႃႈၼမ်။ ၸိူဝ်းပၢႆႈထိုင်မိူင်းၶႄႇၵေႃႈ လႆႈၶတ်းၸႂ်ႁႂ်ႈမီးယူႇမီးၵိၼ်။

သင်ဝၢၼ်ႈမိူင်း ဢမ်ႇပဵၼ်ၽိုၼ်းပဵၼ်ၾႆးမိူၼ်ၼႆ ၵူၼ်းမိူင်းၵေႃႈထၢင်ႇႁၢင်ႈလိူၵ်ႈႁဵတ်းၵၢၼ် တႃႇၶိုၼ်ႈယႂ်ႇမၢၵ်ႈမီးၽႂ်မၼ်း။

ၵူၼ်းၼုမ်ႇၵေႃႈ ၸၢင်ႈလိူၵ်ႈႁဵတ်းၸွမ်းၼင်ႇၵၢင်ၸႂ် ဝႃႇသၼႃႇၸဝ်ႈၵဝ်ႇမီး။ ငဝ်းလၢႆးမိူဝ်ႈလဵဝ်တႄႉ ယႃႇဝႃႈတေႁဵတ်းၸွမ်းၼင်ႇဢၼ်ၶႂ်ႈလႆႈၶႂ်ႈပဵၼ် ႁိူၼ်းၸဝ်ႈၵဝ်ႇၵူၺ်းၵေႃႈ ယူႇသဝ်းပေႃးဢမ်ႇလႆႈ။

ၼုမ်ႇၸၢႆး ၵူၼ်းၵျွၵ်ႉမႄး ၵေႃႉၼိုင်ႈ ဢၼ်တိုၵ်ႉႁဵတ်းၵၢၼ်မိူင်းၶႄႇ လၢတ်ႈၼႄလွင်ႈၶႂ်ႈပဵၼ်မၼ်းဝႃႈ –

“ၸူးၸႂ်တႄႉ ပေႃးဝၢၼ်ႈမိူင်းႁဝ်းသႃႇယႃႇမိူၼ်ၸိူင်ႉၼင်ႇ မိူဝ်ႈဢွၼ်တၢင်းတႄႉ ယိူင်းဢၢၼ်း ၶႂ်ႈမီးၼႃႈၵၢၼ်သုၼ်ႇတူဝ်။ ၶႂ်ႈၵႂႃႇသွၼ်ပၢႆးပၺ်ႇၺႃႇ မေႃတိၼ်မေႃမိုဝ်းတီႈမိူင်းမၢၼ်ႈ ႁေ။ မိူၼ်ၼင်ႇ လွၵ်းလၢႆးမႄးၾူၼ်းႁႃႉ လွၵ်းလၢႆးမႄးရူတ်ႉၶိူင်ႈ ၸိူဝ်းၼႆႉ။ ပေႃးႁဝ်းမေႃၵေႃႈ ၶိုၼ်းမႃးၽုၺ်ႇႁွင်ႈၽုၺ်ႇသႅင်ႇ ၼႂ်းမိူင်းႁဝ်း။ လႆႈႁဵတ်းၵၢၼ်တူဝ်ၵဝ်ႇႁေ ယဝ်ႉၵေႃႈ လႆႈၸွႆႈပႃးၵၢၼ်တူင်ႇဝူင်းၵူၼ်း ၸိူဝ်းၼႆႉ။ ယိူင်းဢၢၼ်းတႄႉ ၸိူင်ႉၼၼ်။ မိူဝ်ႈလဵဝ်တႄႉ သုၵ်ႉသၵ်ႉလႄႈ တၢင်းယိူင်းဢၢၼ်းၼၼ်ႉ ဢဝ်မွတ်ႇႁၢႆပႅတ်ႈၵမ်း။ မိူဝ်ႈလဵဝ်တႄႉ မႃးႁဵတ်း ၵၢၼ်ႁွမ်ငိုၼ်းႁွမ်တွင်းတၢင်းမိူင်းပိူၼ်ႈပႂ်ႉထႃႈႁဵတ်းၼၼ်ၵူၺ်းဢေႃႈ”။

ၵူၼ်းမိူင်းတႆးပွတ်းႁွင်ႇ ဢိၵ်ႇပႃးၵူၼ်းမိူင်းမၢၼ်ႈတူင်ႈပဵင်း ၸိူဝ်းၼႆႉ မိူဝ်ႈဢွၼ်တၢင်းၵေႃႈ ၵႆႉဢွၼ်ၵၼ်ၵႂႃႇ ႁဵတ်းၵၢၼ်ပွတ်းတၢင်းမိူင်းတႂ်ႈၶူင်း – မိူင်းၶွၼ် ဢၼ်မီးၼႂ်းမိူင်းယုၼ်ႊ ၼၢၼ်ႊ ယူႇမိူင်းၶႄႇ ၸိူဝ်းၼႆႉယူႇ။ ၵမ်ႈၼမ် ၵႂႃႇႁဵတ်းၵေႃႈ မီးတၢင်းမုင်ႈမွင်းတႃႇမႃးတင်ႈတူဝ်တၢင်း ဝၢၼ်ႈၵိူတ်ႇမိူင်းၼွၼ်း ၸဝ်ႈၵဝ်ႇၶိုၼ်း။ မိူဝ်ႈလဵဝ်တႄႉ ပႆႇႁတ်းဝူၼ်ႉတႃႇပွၵ်ႈ ၶိုၼ်း ဢမ်ႇႁူႉပၢင်တိုၵ်း တေယဝ်ႉတေတူဝ်ႈ မိူဝ်ႈလႂ်ၼႆ ၵူၼ်းၼုမ်ႇတႆး ဢၼ်ၵႂႃႇႁဵတ်းၵၢၼ် ၼႂ်းမိူင်းၶႄႇၵေႃႉၼိုင်ႈလၢတ်ႈ။

တေႃႈၼင်ႇ ၼႂ်းလိူၼ်ဢေႃႊၵတ်ႊသ် 2025 ၼႆႉ ၵျွၵ်ႉမႄး သီႇပေႃႉ ၵမ်းၵမ်းၺႃးသိုၵ်းမၢၼ်ႈ ဢဝ်ႁိူဝ်းမိၼ် မႃးပွႆႇမၢၵ်ႇသႂ်ႇလႄႈ ၵူၼ်းမၢတ်ႇၸဵပ်းလူႉတၢႆၵေႃႈ မီးၸွမ်းၵူႈၵမ်း။

ၵူၼ်းမိူင်းၸိူဝ်းၵႂႃႇပဵၼ်ႁႅင်းၵၢၼ်ဝႆႉ ၸွမ်းၶွပ်ႇလႅၼ်မိူင်းၶႄႇ ဢၼ်တိတ်းၸပ်းတၢင်းမိူင်းႁူမ်ႈတုမ်မၢၼ်ႈဝႆႉၸိူဝ်းၼႆႉ ၸိူဝ်းလူင်ႉလႅၼ်ႇလွင်ႈၵႂႃႇလွင်ႈပႆယဝ်ႉၵေႃႈ ၶိုၼ်းၶၢႆႉၶဝ်ႈၵႂႃႇၼႂ်းမိူင်းၼႂ်းဝဵင်း ဢၼ်ၵူၼ်းၵိုၼ်း။ မၢင်ၸိူဝ်းၵေႃႈ ယွၼ်ႉလွင်ႈၶွင်ႈၶမ်ၽႃသႃၵႂၢမ်းလၢတ်ႈၵေႃႈပိူင်ၼိုင်ႈ ယွၼ်ႉဝႂ်ၶႂၢင်ႉတႃႇယူႇ မိူင်းၶႄႇ ဢမ်ႇတဵမ်ထူၼ်ႈၵေႃႈ ပိူင်ၼိုင်ႈလႄႈ ၵႃႈလႆႈယူႇ ၸွမ်းၶႅပ်ႇလႅၼ်မိူင်းၸိူဝ်းၼႆႉၵူၺ်း ဝႃႈၼႆ။

ႁႅင်းၵၢၼ်မၢင်ၸိူဝ်းၵေႃႈ ၵႂႃႇၸွမ်းဢၼ်ၶွမ်ႊပၼီႊၶႄႇ မိူၼ်ၼင်ႇ ၶွမ်ႊပၼီႊ ဢၼ်ႁဵတ်းၶိူင်ႈၸႂ်ႉၶူဝ်းသွႆႈ တႃႇၼႂ်းႁိူၼ်းၼႂ်းယေး၊ ၶွမ်ႊပၼီႊ ဢၼ်ႁဵတ်းၶိူင်ႈသၢင်ႈႁိူၼ်း ၸိူဝ်းၼႆႉ။ မၢင်ၸိူဝ်းၵေႃႈ ႁဵတ်းၸွမ်းငဝ်းလၢႆးဢၼ်ပၼ်မႃး ပေႃးပဵၼ်ၶၢဝ်းတေႃႉၶဝ်ႈၵၢပ်ႇၵေႃႈတေႃႉ ပေႃးပဵၼ်ၶၢဝ်းတေႃႉ ဢႃႇလူး (မၼ်းၶိူဝ်) ၼႆၵေႃႈၵႂႃႇတေႃႉ။ ယွၼ်ႉတူၵ်းမိူင်းပိူၼ်ႈလႄႈ သဵတ်ႈၵၢၼ်ဢမ်ႇလႆႈၼႆ ၵူၼ်းႁဵတ်းၵၢၼ်ၼႂ်းမိူင်းၶႄႇ ၵေႃႉၼိုင်ႈလၢတ်ႈ။

ယူႇၼႂ်းမိူင်းၶႄႇ မီးၵၢၼ်ႁဵတ်းယဝ်ႉသေတႃႉ တႃႇတေလႆႈၵႃႈမႃႇၵႃႈႁႅင်းၸဝ်ႈၵဝ်ႇၵေႃႈ သမ်ႉဢမ်ႇၸႂ်ႈလွင်ႈငၢႆႈ။ ဢိင်ၼိူဝ်ၵႂၢမ်းလၢတ်ႈဢမ်ႇပွင်ႇၵၼ် ဝႂ်ၶႂၢင်ႉယူႇၼႂ်းမိူင်းၶႄႇ ဢမ်ႇတဵမ်ထူၼ်ႈၼၼ်ႉသေ ၵႆႉၺႃးႁူဝ်ၼႃႈလႄႈ ပေႃႈလဵင်ႉၼၢႆးၸၢင်ႈၶဝ် ၵိၼ်ၸိၵ်းတွၵ်ႇၸွၵ်းၼႆ – ၼုမ်ႇၸၢႆး ၵျွၵ်ႉမႄး ဢၼ်ၵႂႃႇႁဵတ်းၵၢၼ်မိူင်းၶႄႇၼၼ်ႉ သိုပ်လၢတ်ႈၼင်ႇၼႆ –

“ၵူၼ်းမေႃၵႂၢမ်းၶႄႇၼၼ်ႉသမ်ႉၶိုၼ်း ပေႉၵိၼ်ၼိူဝ်ၵူၼ်းဢၼ်ဢမ်ႇမေႃၵႂၢမ်းၶႄႇၼၼ်ႉၵေႃႈ ၵႆႉမီးယူႇ။ မၢင်ပွၵ်ႈမႃး ႁူဝ်ၼႃႈသမ်ႉႁူႉၵႂၢမ်းၶႄႇသေ လုၵ်ႈၼွင်ႉၸိူဝ်းၼၼ်ႉသမ်ႉ ဢမ်ႇမေႃၼႆ။ ပေႃးႁူဝ်ၼႃႈၼၼ်ႉ ၵႂႃႇသွၼ်ႇငိုၼ်း ဢဝ်ငိုၼ်းလိူၼ်ႁဝ်းၶႃႈၼၼ်ႉၼႆ။ ငိုၼ်းဢၼ်ပိူၼ်ႈၸၢင်ႈမႃးၼၼ်ႉ တီႈငဝ်ႈမၼ်းပိူၼ်ႈပၼ်မႃးယူႇ။ ႁဝ်းၶႃႈ မီး 10 ၵေႃႉ ၼႆၵေႃႈ ပိူၼ်ႈတေပၼ်မႃး 1,500 ။ ၵေႃႉဢၼ်ပဵၼ် ႁူဝ်ၼႃႈသမ်ႉ ၶိုၼ်းမႃးဝႃႈ လႆႈမႃး 1,000 ၵူၺ်း 10 ၵေႃႉၵေႃႈ လႆႈၵေႃႉပၢၵ်ႇပၢၵ်ႇၵူၺ်းၼႆ ၸိူဝ်းၼႆႉ ၵေႃႈမီး”။

ၵူၼ်းမိူင်းၸိူဝ်းၵႂႃႇႁဵတ်းၵၢၼ်ၼႂ်းမိူင်းၶႄႇၼႆႉ ဢိင်ၼိူဝ် ၼႃႈတီႈၵၢၼ်ငၢၼ်းဢမ်ႇမိူၼ်ၵၼ်သေ ငိုၼ်းလိူၼ်ၵေႃႈ တေပိူင်ႈၵၼ်။ မၢင်ၸိူဝ်းၵိၼ်ၸၢင်ႈၼႂ်းသူၼ်ၼႂ်းၼႃး မၢင်ၸိူဝ်း ၵေႃႈ ၵၢၼ်ၵေႃႇၵၢႆႇၵူႈသႅၼ်းသႅၼ်း မၢင်ၸိူဝ်းၵေႃႈ ႁဵတ်းၵၢၼ်ၸွမ်းၼႂ်းႁၢၼ်ႉၼႂ်းသႅင်ႇ။

ႁႅင်းၵၢၼ်ၵမ်ႈၼမ်တႄႉ ၶႂ်ႈလႆႈငိုၼ်းလိူၼ် 2,500 ယႂၼ်ႊထိုင် 3,000 ယႂၼ်ႊ (ပေႃးဢဝ်ငိုၼ်းမၢၼ်ႈ ဝႃႈၸိုင်မွၵ်ႈ 700,000 ပျႃးထိုင် 900,000 ပျႃး) ။ ၵူၺ်းၵႃႈ ဢိင်ၼိူဝ်ငဝ်းလၢႆးသေ ၸိူဝ်းလႆႈ 1,000 ယႂၼ်ႊ ပၢႆၵူၺ်းၵေႃႈမီး။

ပေႃႈလဵင်ႉမၢင်ၸိူဝ်း ၶဝ်ႁူႉဝႃႈ ႁႅင်းၵၢၼ်ဢမ်ႇမီးဝႂ်တဵမ်ထူၼ်ႈလႄႈ ငိုၼ်းလိူၼ်ၵေႃႈဢမ်ႇၶႂ်ႈပၼ်တဵမ် ၵိုင်ႇလီလႆႈၼိုင်ႈလိူၼ် 3,000 ယႂၼ်ႊသေတႃႉ ပၼ်မွၵ်ႈ 500 ယႂၼ်ႊ 1,000 ယႂၼ်ႊ (ငိုၼ်းမၢၼ်ႈမွၵ်ႈ 300,000 ပျႃးထိုင် 600,000 ပျႃး) ၸိူဝ်းၼႆႉၵူၺ်း ၵေႃႈမီး။ ပေႃးဝႃႈ တဵၵ်းယွၼ်းတိၵ်းတိၵ်းၵေႃႈ ၸၢင်ႈၺႃးပေႃႈလဵင်ႉၶႄႇၸိူဝ်းၼႆႉ ၵႂႃႇတၢင်ႇလၢတ်ႈပလိၵ်ႈ ၶႄႇၶဝ်သေ မႃးတီႉၺွပ်းလူးၵွၼ်ႇၼႆ ၵူၼ်းႁဵတ်းၵၢၼ်မိူင်းၶႄႇၵေႃႉၼိုင်ႈလၢတ်ႈ။

ႁႅင်းၵၢၼ်မၢင်ၸိူဝ်းၵေႃႈ ႁႃႁဵတ်းၵၢၼ်လၢႆးဝၼ်း။ ဢိင်ၼိူဝ်ၵၢၼ်သေ ၼိုင်ႈဝၼ်းလႂ် 70 ယႂၼ်ႊ ထိုင် 200 ယႂၼ်ႊ ၸိူဝ်းၼႆႉ(ၼပ်ႉငိုၼ်းမၢၼ်ႈ 1 မိုၼ်ႇ ထိုင် 5 မိုၼ်ပျႃး) ၼႆယဝ်ႉ။

ႁဵတ်းၵၢၼ်ၼႂ်းမိူင်းၶႄႇၼႆႉ တုၵ်ႉတူဝ်တုၵ်ႉၸႂ်ယူႇၵေႃႈ ၵႃႈလႆႈယဵၼ်ႉသေယူႇ၊ ပေႃးၼိူင်းၵၼ်တင်း မိူင်းတႆးမိူဝ်ႈလဵဝ် ႁဵတ်းၵၢၼ်လၢႆးဝၼ်းၼႆႉ ၵျႃႉၼႃႇၵေႃႈ လႆႈ 1 မိုၼ်ႇပျႃးၵူၺ်း၊ သိုဝ်ႉၵိၼ်ယမ်ႉၼႂ်းၼႃႈ ႁိူၼ်းၵူၺ်းၵေႃႈ ဢမ်ႇလိူဝ်သင်။

ၼႂ်းမိူင်းၶႄႇတႄႉ ၼိုင်ႈဝၼ်းလႂ် လႆႈလၢႆးဝၼ်း ၼမ်လိူဝ်မိူင်းတႆး 3-4 ပုၼ်ႈ။ ၵၢၼ်သိုၵ်းသိူဝ်ၵေႃႈ ဢမ်ႇလႆႈၵူဝ်။ ၵူၺ်းၵႃႈ ယွၼ်ႉဢမ်ႇၸႂ်ႈၵူၼ်းမိူင်းပိူၼ်ႈလႄႈ သုၼ်ႇလႆႈဢၼ်ၵူၼ်းမိူင်း ၼိုင်ႈၵေႃႉ ထုၵ်ႇလီမီးၼၼ်ႉတႄႉ တိုၵ်ႉၵႆၼႃႇလိူဝ်သေၵႆယူႇ ၼႆယဝ်ႉ။

ထႅင်ႈလွင်ႈၼိုင်ႈ ၵူၼ်းမိူင်းတႆးၵမ်ႈၼမ် ပေႃးၵႂႃႇထိုင်မိူင်းၶႄႇယဝ်ႉ ၵႆႉၵပ်းသိုပ်ႇႁႃၵၼ်ယၢပ်ႇ။ မၢင်ၸိူဝ်း ၶၢတ်ႇသၢႆၵပ်းသိုပ်ႇၵၼ်ၵႂႃႇႁိုင်ပဵၼ်လၢႆလိူၼ်၊ မၢင်ၸိူဝ်းၵေႃႈ ၼပ်ႉပဵၼ်ပီ။ ပေႃႈမႄႈပီႈၼွင်ႉ ၸိူဝ်းၵိုတ်းတၢင်းလင်မႆႈၸႂ်သေ ပိုၼ်ၽၢဝ်ႇႁႃဝႆႉၼိူဝ်ဢွၼ်ႊလၢႆႊၵေႃႈ မီးတင်းၼမ်။

ၵမ်ႈၼမ် ပေႃးႁွတ်ႈမိူင်းၶႄႇယဝ်ႉ တၵ်းလႆႈသိုဝ်ႉသိမ်းၵၢတ်ႉသ်ၾူၼ်းၶႄႇသေ ၸႂ်ႉတိုဝ်း၊ ပေႃးၸႂ်ႉ ဢိၼ်ႊထိူဝ်ႊၼႅတ်ႉၶႄႇသမ်ႉ ဢမ်ႇၶဝ်ႈၼႂ်းၾဵတ်ႉသ်ပုၵ်ႉဢၼ်ယၢမ်ႈၸႂ်ႉၼႂ်းမိူင်းမၢၼ်ႈၼႆႉလႆႈ။

သင်ဝႃႈ တေပိုတ်ႇ Wechat ၊ Tiktok တူဝ်ႊယိင်ႊ ဢၼ်ၸႂ်ႉၼႂ်းမိူင်းၶႄႇၼၼ်ႉၼႆၵေႃႈ သမ်ႉလူဝ်ႇ ၵူၼ်းယိုၼ်ယၼ်ပၼ်ၸိူဝ်းၼႆႉလႄႈ လႃႈလီႈႁဵတ်းၵမ်းလဵဝ်ဢမ်ႇလႆႈ။ ၵူၼ်းမိူင်း ၸိူဝ်းပႆႇလႅၼ်ႇလွင်ႈၸႂ်ႉတိုဝ်းမၼ်းၵေႃႈ ၸၢင်ႈဢဝ်သၢႆၵပ်းသိုပ်ႇၸဝ်ႈၵဝ်ႇ ႁၢႆလၢႆပႅတ်ႈ။ သင်ပဵၼ်လႆႈ မၢႆၾူၼ်းလႄႈ တီႈၵပ်းသိုပ်ႇၵူႈဢၼ်ဢၼ်ၼႆႉ တႅမ်ႈမၢႆဝႆႉၼႂ်းပပ်ႉၸဝ်ႈၵဝ်ႇသေ ဢဝ်ၵႂႃႇပႃးလီတီႈသုတ်းၼႆ ႁႅင်းၵၢၼ်ၼႂ်းမိူင်းၶႄႇ ၵေႃႉၼိုင်ႈလၢတ်ႈ။

ၶၢဝ်းတၢင်းၵၢၼ်သိုၵ်း ၼႂ်းမိူင်းႁူမ်ႈတုမ် ပႆႇယဵၼ်ၼႆႉတႄႉ ႁႂ်ႈၸုမ်းလႂ်မႃးႁႄႉႁၢမ်ႈ ယႃႇႁႂ်ႈၵူၼ်းမိူင်းပၢႆႈ ဢွၵ်ႇမိူင်းၼႆၼၼ်ႉ လႅပ်ႈတေဢမ်ႇလႆႈ။ ဢိင်ၼိူဝ် လွင်ႈႁူမ်ႇလူမ်ႈသၢႆၸႂ်ၽႂ်မၼ်းလႄႈ ၵၢၼ်လဵင်ႉၼႃႈ ႁိူၼ်းၽႂ်မၼ်းသေ တိုၼ်းတေၽူင်ႉဢွၵ်ႇယူႇၵူႈဝၼ်း။ လွင်ႈၼႆႉ ၶႂ်ႈႁႂ်ႈၽူႈၸတ်းပွင်ၵၢၼ်သိုၵ်း ၵၢၼ်မိူင်းၶဝ် ႁႃလၢႆးၵႄႈလိတ်ႈဢၼ်ၸႅတ်ႈဢၼ်ၸၢင်ႇမၼ်းဝႆးဝႆးၼႆ ၵူၼ်းၼုမ်ႇမိူင်းတႆးပွတ်းႁွင်ႇ ၵေႃႉၼိုင်ႈလၢတ်ႈ။