ဝၼ်းတီႈ 18/08/2025 ယၢမ်းၵၢင်ၼႂ်ၼႆႉ သိုၵ်းမၢၼ်ႈ ယိုတ်းမိူင်း ၸီႉသင်ႇပိၵ်ႉဢိုတ်းပႅတ်ႈ ၶူဝ်မၢႆ 2 တီႈဝဵင်းမျႃႉဝတီႇ မိူင်းယၢင်းၽိူၵ်ႇ လႅၼ်လိၼ်ယၢင်းထႆး- မၢၼ်ႈ။  

ၶူဝ်မၢႆ 2 ၼႆႉ ပဵၼ်ၶူဝ်တႃႇရူတ်ႉၵႃးတၢင်ႇၶူဝ်းၵုၼ်ႇ လတ်းၶၢမ်ႈတေႃႉသူင်ႇၸူးၵၼ် တီႈလႅၼ်လိၼ်ထႆး – မၢၼ်ႈ။

ပူၼ်ႉမႃးလၢႆဝၼ်းၼႆႉ သိုၵ်းမၢၼ်ႈ ၵူတ်ႇထတ်းတီႉၺွပ်းလႆႈ ၶူဝ်းၵုၼ်ႇဢၼ်ဢမ်ႇသႂ်ႇၶွၼ်ႇသေ တေႃႉတၢင်ႇမႃးၸွမ်း သဵၼ်ႈတၢင်းၼမ်ႉ မိူင်းမၢၼ်ႈပွတ်းတႂ်ႈ။ ဝၢႆးလင်ၼၼ်ႉ ၵူၼ်း ၵႃႉၵမ်ႈၽွင်ႈ ၶိုၼ်းလၢႆႈသဵၼ်ႈတၢင်းသေ ဢၢၼ်းတေႃႉတၢင်ႇမႃးသဵၼ်ႈတၢင်းမျႃႉဝတီႇ – မႄႈသွတ်ႇ။

ဢိင်ၼိူဝ်လွင်ႈၼႆႉသေ သိုၵ်းမၢၼ်ႈ ၸင်ႇၸီႉသင်ႇပိၵ်ႉဢိုတ်းဝႆႉၶူဝ်မၢႆ 2 ၼႆႉ ၸူဝ်ႈၶၢဝ်းၼႆ ၵူၼ်းၸမ်ၸႂ်တင်း ၾၢႆႇၽွင်းငမ်းဝဵင်းမျႃႉဝတီႇ တွပ်ႇဝႆႉတီႈသိုဝ်ႇၶၢဝ်ႇ Mizzima ၼင်ႇၼႆ။

တႄႇႁူဝ်လိူၼ်ၼႆႉမႃး ၾၢႆႇၵဵပ်းၶွၼ်ႇ တႂ်ႈသိုၵ်းမၢၼ်ႈ ၵူတ်ႇထတ်းရူတ်ႉၵႃးတၢင်ႇၶူဝ်းၵုၼ်ႇ တီႈလႅၼ်လိၼ်ထႆး – မၢၼ်ႈ ႁၢဝ်ႈႁႅင်း။ ၵႃးလူင်ႇတၢင်ႇၶူဝ်းၶွင် ၼႂ်းမိူင်းထႆး ၼပ်ႉႁူဝ်ပၢၵ်ႇလမ်း ဢၼ်တေတေႃႉသူင်ႇမႃးတၢင်းမိူင်းမၢၼ်ႈ ၼႂ်းဝဵင်းမျႃႉဝတီႇၼၼ်ႉ လႆႈၵိုတ်းပဵၼ်ထႅဝ်ဝႆႉ တီႈဝဵင်းမႄႈသွတ်ႇ ႁိုင်ၶၢဝ်းတၢင်းမွၵ်ႈ 10 ဝၼ်းယဝ်ႉ။ ၵမ်ႈၼမ် ပဵၼ်ၵႃးတၢင်ႇၶိူင်ႈ ၸႂ်ႉၶူဝ်းတိုဝ်း၊ ၶိူင်ႈၾႆးၾႃႉ၊ ၶိူင်ႈၵေႃႇသၢင်ႈလႄႈ တၢင်းၵိၼ်ယႅမ်ႉ ၸိူဝ်းၼႆႉ။

ယွၼ်ႉသိုၵ်းမၢၼ်ႈ ပိၵ်ႉဢိုတ်းၶူဝ်မၢႆ 2 တီႈဝဵင်းမျႃႉဝတီႇၼႆႉသေ ၶူဝ်းၶွင်မိူင်းထႆး ဢၼ်ဝၢင်းၶၢႆ ယူႇတီႈဝဵင်းလူင်တႃႈၵုင်ႈလႄႈ လၢႆလၢႆၸႄႈဝဵင်းၼႆႉ ၵႃႈၶၼ်ပုင်ႈၶိုၼ်ႈႁႅင်း။

လိူဝ်ၼၼ်ႉ သိုၵ်းမၢၼ်ႈႁၢမ်ႈဢိုတ်းဝႆႉ လွင်ႈတေႃႉတၢင်ႇၶူဝ်းၵုၼ်ႇ 35 မဵဝ်း ၶဝ်ႈၼႂ်းမိူင်းမၢၼ်ႈ ဝႃႈၼႆ။