ဝႃႈႁိုဝ်ၵေႃႈယဝ်ႉ တၢင်းလီၼႆႉ တၢင်းၸႃႉတိုၼ်းဢမ်ႇႁူမ်ႇတဵင်လႆႈ၊ ဝၼ်း ႞ မႃး တေႁၼ်ယူႇပႃႈၼႃႈ၊ ၵူၼ်းၵုသူဝ်ႇၵၢမ်ႇလီမိူဝ်းမီးမိူင်းၽီၵေႃႈ ပေႃးၸၢမ်ႇၵုသူဝ်ႇသဵင်ႈယဝ်ႉ၊ တေ ၶိုၼ်းလူင်းမႃးမိူင်းၵူၼ်းယူႇ။ ၵေႃႉဢၼ်တူၵ်းငရၢႆးၵေႃႈ ပေႃးဝူတ်ႈမၼ်းပေႇယဝ်ႉ တေၶိုၼ်းမႃးမိူင်းၵူၼ်းယူႇ၊ တေႃႈလဵဝ်ၼႆႉ မၢၼ်ႈၵမ်ႇၵေႃႈယဝ်ႉ၊ မၢၼ်ႈလႅင်ၵေႃႈယႃႇ၊ ဝၼ်း႞မႃး မၼ်းတေထူပ်းၺႃး ဢၼ်မၼ်းႁဵတ်းဝႆႉတၢင်းၸႃႉၼၼ်ႉ။ တႆးဢၼ် လႆႈတုၵ်ႉၶ ၶၢၼ်ၸႂ် ၸိူဝ်းၼႆႉၵေႃႈ ဝၼ်း ႞ မႃး – တေလႆႈႁၼ်ဢၼ်လီယူႉ။

မိူဝ်ႈတဵၵ်းၼမ်ႉႁႃၽိုၼ်း မၢၼ်ႈၶဝ်ဢမ်ႇႁူႉ၊ ႁဝ်းၵေႃႉႁႃ၊ ပေႃးတူမ်ႈသုၵ်းႁုင်ပူၺ်ႇၵွၼ်ႉတၵ်းမႃးၼိူဝ်ၽိူၼ်ယဝ်ႉ မၢၼ်ႈၶဝ်ၵိၼ်ဢွၼ်တၢင်း၊ လုပ်ႇပွတ်းလုပ်ႇပႅတ်းၵၢင်ႈယွႆႈၵၢင်ႈယႅမ်းပႅတ်ႈၵႂႃႇတႂ်ႈၽိူၼ်၊ ၶုၼ်ၶၢႆ ၸၢတ်ႈၸိူဝ်းဢၼ်ယူႇၼႂ်းဝဵင်း ၵမ်ႈၽွင်ႈသမ်ႉ ၵဵပ်းလႅမ်းႁိမ်ၵၼ်ၵိၼ်ၸၢပ်ႉၸၢပ်ႉၸိပ်ႉၸိပ်ႉ တႂ်ႈၽိူၼ်ပိူၼ်ႈ လီၸၢၼ်ႈလီမိူဝ်ႇလီဢၢႆပိူၼ်ႈတႄႉတႄႉ။

ပိူၼ်ႈဝႃႈ ၼင်လိၼ်မိူင်းၼႃဝႃႇ၊ ပေႃးမႃးၶႆႈၸႂ်တူၺ်းတႄႉ – ၼင်တႆးၼႆႉ ယင်းတေၼႃသေ ၼင်လိၼ်မိူင်း ၵွၼ်ႇႁိုဝ်ဢမ်ႇႁူႉ။

ၵူၼ်းတႆးၼူၵ်ႇၼႃ ဢမ်ႇႁူႉပႃႈသၢႆႉပႃႈၶႂႃ ဢမ်ႇမိုၼ်းႁူမိုၼ်းတႃၸိူဝ်းၼၼ်ႉ လီတိုၼ်ႇတူဝ်ယဝ်ႉ။ ၵႂၢမ်းမိူဝ်ႈၵွၼ်ႇဝႃႈဝႆႉ ပေႃႈၶႂ်ႈၽၵ်ႉယွႆႈႁႂ်ႈလပ်ႉၽၢႆၽၢႆ ပေႃးလပ်ႉၽၢႆၽၢႆယဝ်ႉ ၸင်ႇ ၽၵ်ႉယွႆႈယွႆႈဝႃႈၼႆ၊ ပေႃးတိုၼ်ႇတူဝ်ယဝ်ႉ ႞ ၵေႃႉၵႂႃႇႁဵတ်း ႞ ဢၼ်လႄႈ “ၵူၼ်းၵဝ်ႈၵေႃႉၽၵ်းၵဝ်ႈၵမ် ၵူၼ်းၼမ်ၵိၼ်ဢမ်ႇသဵင်ႈ၊ ၵဝ်ႈၵေႃႉ ႁဵတ်းၵဝ်ႈၵႄႇ ႁႃၽိုၼ်းသႄႇၵူၼ်ႈမေႃႈဢမ်ႇမီး” ၼၼ်ႉ ယႃႇႁႂ်ႈမၼ်းလႆႈပဵၼ်။ ၵေႃႉမေႃတႅမ်ႈလိၵ်ႈၵေႃႈ တႅမ်ႈလိၵ်ႈ၊ ၵေႃႉမေႃႁဵတ်းသိုၵ်းၵေႃႈ ႁဵတ်းသိုၵ်းလႄႈ၊ မေႃႁဵတ်းၵၢၼ်ၵုသူဝ်ႇၼႃးမုၼ်ၵေႃႈႁဵတ်းလႄႈ ႁႂ်ႈၵူၼ်းတႆးႁဝ်း ပေႃးလႆႈပူၼ်ႉတၢင်းယၢပ်ႇၶၢၼ်ၸႂ်လႄႈ။

သမ်ႉထႅင်ႈၾၢႆႇ ႞ ၊ ၵဝ်းၵၼ်ႁဵတ်းၵၢၼ်ၵမ်ႇမထၢၼ်းဝႃႇ- ၵႂႃႇႁဵတ်းသမထိ ဝိပသ်ႉသၼႃႇဝႃႇ၊ တူဝ်ၵဝ်ႇ ဢမ်ႇၸႂ်ႈတူဝ်ၵဝ်ႇ၊ လုၵ်ႈမေးႁိူၼ်းယေး ၸိူဝ်းၼႆႉၵေႃႈ မၼ်းပဵၼ်သင်ႇၶႃႇရယိုတ်ႈယၢဝ်း၊ မဵဝ်းႁပ်းတၢင်းၼိပ်ႉပၢၼ်ႇဝႃႇ၊ တူဝ်ၵဝ်ႇလုၵ်ႈမေးႁိူၼ်းယေးမၼ်း – မၼ်းပေႃးဢမ်ႇသွၼ်ႇယဝ်ႉ။ ဢၼ်ဝႃႈၸိူဝ်ႉၸၢတ်ႈဝၢၼ်ႈမိူင်းၼၼ်ႉ မၼ်းၶႅၼ်း တေႁဵတ်းႁိုဝ်သွၼ်ႇ ၼႆႉၵေႃႈ ပဵၼ်တၢင်းၽိတ်းလူင်ဢၼ် ႞ ယဝ်ႉ။

ႁၼ်ယိူဝ်ႇဢမ်ႇႁၼ်မဵတ်းဢဝ်ပႃႁဵတ်းၼမ်ႉၽိတ်ႉၼင်ႇၵဝ်ႇ

ၼႆႉၵေႃႈ ၸင်ႇဢမ်ႇပဵၼ်လၢႆးသုမ်းပိူၼ်ႈႁိုဝ်။ ပေႃးလုၵ်ႈႁဝ်းလၢၼ်ႁဝ်းမႃး ႁဵတ်းသိုၵ်းသမ်ႉဝႃႈ – ၵူဝ်လုၵ်ႈလၢၼ်ႁဝ်းတုၵ်ႉၶ ၶၢၼ်ၸႂ်ဝႃႈၼႆ၊ ဢၼ်မၢၼ်ႈၶဝ် ၵဵပ်းၵႂႃႇဢဝ်ၵႂႃႇႁဵတ်း “ယႄးၺုၼ်ႉ” ဝႃႇ၊ ဢဝ်ၵႂႃႇႁဵၼ်းၵႃႈၼၼ်ႈ ဢဝ်ၵႂႃႇသွၼ်ၵႃႈၼႆႈဝႃႇ၊ ဝၢႆးမႃးသမ်ႉ ပဵၼ်လုၵ်ႈသိုၵ်းသေမႃးတိုၵ်းတႆးၶိုၼ်း၊ ဢၼ်ၼၼ်ႉသမ်ႉ ဢမ်ႇဝႃႈဢမ်ႇၸၢင်ႈႁဵတ်းႁိုဝ်၊ ဢမ်ႇပေႉပိူၼ်ႈလႆႈ၊ ၵွပ်ႈပိူၼ်ႈပဵၼ်ၸဝ်ႈပဵၼ်ၶုၼ်ႁဝ်း ဝႃႈၸိူင်ႉၼႆ။

လွင်ႈၸိူဝ်းၼႆႉ မုၼ်ၸဝ်ႈမုၼ်ၸၢင်းလႄႈ ဢိၵ်ႇပႃးၸဝ်ႈသၢင်ႇၼၢႆးၶၢဝ်ႁဝ်းၶဝ် ၵူႈၸဝ်ႈၵူႈတူၼ်လူဝ်ႇၶဝ်ႈၸႂ်၊ ၽႅဝ်ၵႃႈလႂ်ႁေႃးၵႃႈၼၼ်ႈ၊ ဢမ်ႇႁူႉႁႂ်ႈပေႃးႁူႉ၊ ႁူႉယဝ်ႉ ႁႂ်ႈလၵ်းလႅမ်၊ လၵ်းလႅမ်ယဝ်ႉ ႁႂ်ႈမေႃၶွၼ်ႈတွမ် ႁွမ်ႁႅင်းၵၼ်ႁဵတ်းသိုၵ်းသႃႇသၼႃႇ။ သိုၵ်းဢူၼ်ႈဢွၼ်ႇ ၵလႃးၼႃႈၽိူၵ်ႇၶဝ် ၶဝ်ႈမႃးမိူင်းမၢၼ်ႈၼႆႉ ၶဝ်ဢဝ်သႃႇသၼႃႇ၊ ၽႃႇသႃႇၶရိတ်ႉၶဝ် ၶဝ်ႈမႃးဢွၼ်တၢင်းယဝ်ႉ။ မႃးတင်ႈၸၢၵ်ႈဢိတ်ႇလိၵ်ႈ တီႈဝဵင်းတႃႈၵုင်ႈ၊ ဝၢႆးၼၼ်ႉ ဢဝ်ၵူၼ်းၵႃႉၶဝ်ၶဝ်ႈမႃးၵႃႉၶၢႆမႆႉသၵ်း တင်ႈၸၢၵ်ႈလိူဝ်ႈမႆႉ တၢင်းမေႃႇလမႅင်ႇယဝ်ႉ၊ ဝၢႆးၼၼ်ႉ ၶုၼ်ႁေႃၶမ်း ဝဵင်းတႃႈလိူဝ်ႇ ၶႂ်ႈလႆႈၸၢၵ်ႈပေႃႉလိၵ်ႈလႄႈ သိုဝ်ႉဢဝ်ၶဝ်ႈမႃးတင်ႈၼႂ်းႁေႃၶမ်း၊ သမ်ႉၶႂ်ႈႁႂ်ႈလုၵ်ႈလၢင်းၶဝ်မေႃႁူႉလိၵ်ႈ၊ မိူဝ်ႈၼၼ်ႉ ဢိင်းၵလဵတ်ႈ ၸင်ႇဢဝ်မုၼ်ၸဝ်ႈၼၢႆးၶၢဝ်ၶဝ် မႃးသွၼ်ၼႂ်းႁေႃၶမ်း ယဝ်ႉ။

ဝၢႆးသေ သိုၵ်းၵလႃးၼႃႈၽိူၵ်ႇၶႂၢၵ်ႈမိူင်းၶဝ် ႁူႉလွင်ႈတၢင်းၼႂ်းမိူင်းမၢၼ်ႈလီငၢမ်းယဝ်ႉ ၶဝ်ၸင်ႇၶဝ်ႈလႆႈမိူင်း မၢၼ်ႈငၢႆႈငၢႆႈလူမ်လူမ်ယဝ်ႉ။

ၵမ်းၼႆႉ တႃႇမုၼ်ၸဝ်ႈ ဢၼ်ၼင်ႈဝတ်ႉၼင်ႈၵျွင်းၵေႃႈ ပိူၼ်ႈႁဵတ်းမႃးပၵ်းပိူင်မၼ်းယဝ်ႉ၊ ၵူႈၸိူဝ်ႉၵူႈပိူင် ဢမ်ႇထၢင်ႇႁၢင်းတၢမ်ၸႂ်ၸိူင်ႉၵူႈပွၵ်ႈ၊ မုၼ်ၸဝ်ႈၵေႃႈ ပေႃးပဵၼ်တႆးၼႆႉ ပေႃးထၢင်ႇထိူမ်ၶႂ်ႈတီႉတီႈလႂ်တီႉ၊ ၶႂ်ႈၺွပ်းလႂ်ၺွပ်း၊ ၶႂ်ႈၶင်ၵႃႈလႂ်ၵေႃႈၶင်။

တၢင်းယၢမ်ႈမုၼ်ၸဝ်ႈတႆးႁဝ်းၼႆႉ ယူႇဢမ်ႇၶၢမ်ႇႁိုင်၊ ပေႃးထၢၵ်ႈပႅတ်ႈၵေႃႈ မုၼ်ၸဝ်ႈမၢၼ်ႈသမ်ႉမႃးပုတ်ႈ။ မိူၼ်တၢင်းႁဝ်းႁဵတ်းဝတ်ႉၵျွင်းဝႆႉပၼ်မၢၼ်ႈယဝ်ႉ။ တီႈယူႇႁဝ်း၊ ဝၢၼ်ႈႁဝ်းမိူင်းႁဝ်းၼႆႉဢမ်ႇလီၶၢႆႉ။ ပေႃးႁဝ်းၶၢႆႉတီႈယူႇတီႈၼင်ႈ မိူၼ်ပၼ်မၢၼ်ႈမႃးယူႇၵူၺ်း။ ၼင်ႇႁိုဝ် တေဢမ်ႇလႆႈၶၢႆႉပၢႆႈ ၼင်ႇႁိုဝ် တေဢမ်ႇလႆႈထၢၵ်ႈၼၼ်ႉ ႁဝ်းတေလႆႈႁဵတ်းႁိုဝ်။ ဝူၼ်ႉဢိတ်း ႞ လႄႈ ။ တီႈတႄႉမၼ်း ပေႃးတၵႃႇႁဝ်းၶဝ် လႆႈလွတ်ႈတၢင်းတုၵ်ႉၶယၢပ်ႇၽိုတ်ႇၶၢၼ်ၸႂ်မႃးတႄႉ မုၼ်ၸဝ်ႈႁဝ်းၶဝ် ၶႂ်ႈယူႇၵျွင်းတိူၵ်ႈဝႃးလူင်ၵေႃႈလႆႈယူႇ။

ဢွၼ်ၵၼ်ဝူၼ်ႉၵႂၢင်ႈၵႂၢင်ႈ၊ တူၺ်းလိုၵ်ႉလိုၵ်ႉ၊တူၺ်းၵႆၵႆ၊ ယႃႇႁၼ်ထိုင်သုၼ်ႇတူဝ် ပူၼ်ႉတီႈ၊ ႁႂ်ႈႁၼ်သုၼ်ႇ ၵူၼ်းတင်းၼမ်သေၵမ်း။

“လီတွင်းဝႆႉ” – မိူဝ်ႈဝႃး ဢမ်ႇႁဵတ်းဝႆႉ၊ မိူဝ်ႈၼႆႉ ၸင်ႇပဵၼ်ၼႆ၊ မိူဝ်ႈၼႆႉ ဢမ်ႇႁႅၼ်းထႃႈ၊ မိူဝ်ႈၼႃႈ ၶႅၼ်းတေၼႃႇ၊ ပဵၼ်သိူဝ် ယႃႇႁႂ်ႈလိုမ်းလၢႆး၊ ပဵၼ်တႆး ယႃႇႁႂ်ႈလိုမ်းၸၢတ်ႈ၊ ႁဝ်းၼင်ႇၵၼ် ႁၵ်ႉၵၼ် ၽေးသင်လၼ် ၶဝ်ႈယၢပ်ႇ၊ ၸင်းၵၼ် ဢမ်ႇလႆႈၶေႃႈ၊ ၽူႈၶဵၼ်လေႃႈ မႃးၸမ်၊ ႁႂ်ႈၸိုမ်းၼင်ႇၼမ်ႉ၊ ႁႂ်ႈၵမ်ႉၼင်ႇၾၢႆ၊ ႁႂ်ႈႁၢႆၼင်ႇၾူၼ်။

မၢၼ်ႈၶဝ်မႃးၵိၼ်ၵျေုႇ ယူႇၼႂ်းမိူင်းတႆးႁဝ်းၼႆႉ မၼ်းမိူၼ်မႃၵၢပ်ႈလႆႈၵွၼ်ႈၼိူဝ်ႉယဝ်ႉ။ မႃတူဝ်ၵၢပ်ႈလႆႈ ၵွၼ်ႈၼိူဝ်ႉၼၼ်ႉ ၵႃႈႁူဝ်မၼ်း ဢမ်ႇတႅၵ်ႇ တိၼ်မၼ်းဢမ်ႇပုတ်း မိုဝ်းမၼ်းဢမ်ႇၶၢတ်ႇ ပေႃးဝႃႈၼႆၸိုင် မၼ်းတေႁဵတ်းႁိုဝ်ၽႃႈပွႆႇပႅတ်ႈ ၵွၼ်ႈၼိူဝ်ႉလူင်ၼၼ်ႉလႆႈ။

မေႃႇငိုၼ်းပၢင်ယုင်းၼမ်ႉတူႈႁဝ်း၊ မေႃႇသႅင်လူင်မိူင်းၵုတ်ႈႁဝ်း၊ မေႃႇသႅင်မိူင်းသူႈႁဝ်း၊ မႆႉသၵ်းမႆႉတိုင်းႁဝ်း၊ ၼၢင်းသၢဝ်တႆးႁဝ်းလႄႈ တီႈလိၼ်ၽုၵ်ႇသွမ်ႈသူၼ်ႁႆႈၼႃးႁဝ်း ၸိူဝ်းၼႆႉ ပဵၼ်ၵွၼ်ႈၼိူဝ်ႉလူင်ၵမ်ႇၽႃႇ ပုၼ်ႈတႃႇၶဝ်ၵမ်းလဵဝ်ယဝ်ႉ။

ပိူၼ်ႈလႆႈမႃးယိပ်းႁူဝ်ငမ်ၸိၵ်းလႆႈယူႇၵျေႃႇၵိၼ်ၵျေႃႇတၢၼ်ႇၼႆႉ ႁႂ်ႈၶဝ်ဢီးလူတႆးႁဝ်းသေ ထွၼ်ဢွၵ်ႇမိူဝ်းၵႂႃႇငၢႆႈငၢႆႈလူမ်လူမ်ဢၼ်ဝႃႈၼၼ်ႉ ၽြႃးသႅၼ်ပၢၼ်ၵေႃႈ ဢမ်ႇဢွၵ်ႇလႆႈ၊ လူဝ်ႇဢဝ်ႁူဝ်မၼ်းတႅၵ်ႇ ဢဝ်ၶေႃးမၼ်းပုတ်း ဢဝ်တိၼ်မိုဝ်းမၼ်းႁၵ်းၶၢတ်ႇလူးၵွၼ်ႇ မၼ်းၸင်ႇၵွႆႈဢွၵ်ႇယဝ်ႉ။

တႆးႁဝ်းၼႆႉ ပေႃးတူၵ်းတၢင်းတုၵ်ႉၶယၢပ်ႇၽိုတ်ႇၶၢၼ်ၸႂ်မႃး သမ်ႉဝႃႈ ၵၢမ်ႇႁဝ်းပေႉမႃးႁၢႆႉ ၾႃႉၽီပေႉမႃး တူၺ်းလၢႆတူၺ်းလွၵ်ႇ ဝႃႈၼႆ။ ဢၼ်တူဝ်ၸဝ်ႈၵဝ်ႇ ဢမ်ႇလႆႈလွင်ႈတူဝ်ၸဝ်ႈၵဝ်ႇဢမ်ႇႁူႉသင် ဢမ်ႇလဵပ်ႈႁဵၼ်းတူၺ်းလွမ်သင်ၼၼ်ႉ သမ်ႉဢမ်ႇသွၼ်ႇ၊ တၢင်းႁူႉမီးၵႃႈလႂ်၊ တၢင်းႁၼ်မီးၵႃႈလႂ်သမ်ႉ ဢမ်ႇႁႃ။

တႆးၼႆႉ ၵႆႉၸူးငၢႆႈၶီႈၵႆႇတေႃႇၸႂ်ဢေႃႇဢႄႇ ၸႂ်ဢမ်ႇၶႂ်ႈႁၵ်ႉၶႂ်ႈပႅင်းၵၼ်၊ မီးၸႂ်ၶႂ်ႈယူႇငၢႆႈၵိၼ်လူမ် ပေႃးႁဝ်းၼင်ႇၵၼ်တႄႉ ႁတ်းတွပ်ႇၵၼ်ထဵင်ၵၼ် ပေႃးပဵၼ်ပိူၼ်ႈသဵင်ပေႃးသၼ်ႇ ၸၢမ်ႉၸၢမ်ႉ၊ ဢမ်ႇႁတ်းဢုပ်ႇ ႁတ်းထဵင်သေၶေႃႈ ပေႃးႁဝ်းလၢတ်ႈ10 ၶေႃႈ သမ်ႉဝႃႈ ဢမ်ႇပွင်ႇသင်၊ ပေႃးပိူၼ်ႈလၢတ်ႈၼိုင်ႈၶေႃႈသမ်ႉဝႃႈ ၸႂ်ႈဢိူဝ်ႈ ငွၵ်းႁူဝ်တွၵ်ႉတွၵ်ႉယဝ်ႉ။

ၵွပ်ႈၼၼ် ၵႂၢမ်းပူႇမွၼ်ႇၼၢႆးယႃႈႁဝ်းႁဵတ်းဝႆႉဝႃႈ –

တိုၼ်းသိူဝ်ၶိူဝ်းသၢင်ၶူင်းၵၢင်လူးလၢႆးတႆးႁဝ်းၼႆႉ ၶိူဝ်းႁၢႆႉၶိူဝ်းႁၢၼ် – ငၢၼ်ၸုၼ်ႉၶတ်းၵတ်ႉႁတ်ႉၶီႇႁူဝ်သိုၵ်း၊ သမ်းၸၢတ်ႇမိုၵ်ႉလမ်ၸမ်ႉၼႂ်း ပႂ်ႉထၢမ်ႈၶၢမ်ႇၵၢၼ် လွင်ႈၾၼ်းတိုၵ်းသိုၵ်းၵွင်ႈႁွၵ်ႇလၢပ်ႇတၢပ်ႇ ၾၼ်းၽူႈၶဵၼ်ၶႂၢၵ်ႈမိူင်းၶဝ်ယဝ်ႉ။

သႅၼ်ဝီသီႇပေႃႉ ဢမ်ႇၶျေႃႉဢုင်းပွင်ႇၵတ်ႉၶွင်ႇသေႇသေႇၵုင်ႇသရေႇတႆးၼႆႉ မီးၵႃႈမီးၶၼ် – ငၢၼ်ၵတ်ႉ တွၼ်းၸၢၵ်ႈသွၼ်းၶႅပ်ႇသိူဝ်ဢၢင်ႈ၊ ယွင်ႁူၺ်ႇပူၺ်းလၸဝ်ႈၾႃႉမၢဝ်းမေႃႇ ၸိုင်ႈဢႃႇဝဢမ်ႇငၢႆႈ မုၼ်ႁၢပ်ႈ ႁိူင်းၵိုၼ်းပိုၼ်းၸူဝ်ႈပူႇမွၼ်ႇဢွၼ်ပူၼ်ႉမႃးႁိုင်ဢေႃႈ။

ၵဵင်းတွင်းၵဵင်းႁၢႆးမိူင်းၼၢႆးၵဵင်းလၢဝ် ၸၢဝ်းလဵဝ်ၶိူဝ်းယူၼ်းၵူၼ်းထႆးႁူမ်ႈမိူင်းမိတ်ႈမိူင်းၵိုင် – ထိုင်ႁွတ်ႈပွတ်း ၶႅပ်ႇလိၼ်ၵလႃးတင်ႈတႄႇ ယွင်ႁူၺ်ႈပူၺ်းလ ၸဝ်ႈၾႃႉမၢဝ်းမေႃႇၸိုင် ႁွတ်ႈမိူင်းၵျွတ်ႈမိူင်းယေႃ – ပႃးထႅင်ႈ မိူင်းၶႄႇၶိုၼ်လိုဝ်ႉလႅမ်းၶႅမ်ႉသုတ်းသၼ်ယဝ်ႉ။

မျၢၼ်ႇမႃႇတလႅင်းၸၵႅင်းပူးၵမ်ႇလႆႈတမ်ႇၼွႆႉယူႇတႂ်ႈပၼ် ႁႂ်ႈၶမ်းၸဝ်ႈဢုင်းပွင်ႇၽွင်းဢုပ်ႉၵိၼ်မိူင်း။

သိူဝ်ႁူမ်ႇသိူဝ်ၵၢႆႇငၢႆးတၢၼ်ႇၶႂၢၼ်ၽႃႇ ငၢၼ်ၼႃႇလူင်းၵႂႃႇဢုပ်ႉႁဵတ်းၸဝ်ႈသဝ်းၽုင်ႇႁေႃႁိူင်း – မိူင်းမၢၼ်ႈ မႅင်းဢုပ်ႇဢူၼ်ႁူၼ်ႈၵူၼ်းၵူမ်ႈႁိမ်းတိၼ်ၸဝ်ႈယဝ်ႉ၊ ဢဝ်ၸဵမ်မိူင်းၵွင်းမိူင်းယၢင်းႁွမ်းၶၢင်းမိူင်းမၢဝ်းမိူင်း လၢဝ်းဢုပ်ႉငမ်းၵိၼ် – လိၼ်ၼမ်ႉၼမ်ၵႂၢင်ႈတႆးသၢင်ႈဝၢင်းတေႃႇႁေႃၶမ်း၊ မီးၸဵမ်တပ်ႉၸၢင်ႉတပ်ႉမႃႉ တႆးမိုၼ်ႇတိုၼ်းဢမ်ႇၵၢၼ်ႉသေပွၵ်ႈလၢႆးၵတ်ႉ ၾၼ်းၵျၢင်ႇႁႅမ်လိုပ်ႈလူၺ်းလမ်း – ပၢၼ်ၸိုၼ်ႉသိုၼ်း ႁၢဝ်ႈဝိုၼ်းၵေႃႇႁွပ်ႇသႂ်ႇဢႃႇၼႃႇယႂ်ႇပိုၼ်းသိူၵ်ႈမီးႁိုင်ယဝ်ႉ။

ၼႂ်းဝၢင်းၼိူဝ်လိၼ်တၢင်းၵိၼ်မီးၸေး သထေးမိူင်းတႆးၶပ်ႉသွၼ်ႉယႆ လၢႆလွင်ႈတွင်းထွမ်ႇလွမ်ဢၢမ်း၊ ၶႂ်ႈလႆႈၵိူဝ်ၵႂႃႇမေႃႇၵျူဝ်ႇ လူဝ်ႇသႅင်ၵႂႃႇမိူင်းၵုတ်ႈ ၶႂ်ႈၶုတ်းၵွၼ်ႈငိုၼ်းၵဵဝ်ႇပဵၼ်တီႈပၢင်ယုင်း၊ ထုင်းမိူဝ်ႈၵွၼ်ႇ မီးဝႆႉၼႆၵေႃႈ – ယၢမ်ႈတေႃႈလဵဝ်ၼႆႉယူႇပဝ်ႇ ဢဝ်တႄႉႁိုဝ်လႆႈမီးၽီဢိူဝ်ႈ။

လွႆသွမ်ႇလွမ်ႉဝိူင်းမိူင်းတူင်ႇထုင်ႉမၢဝ်း မႆႉပဝ်းမႆႉသၵ်းမႆႉတိုင်း လိူင်ႇလၢႆလႅမ်ႈလဝ်းလီ ၽီသွမ်ႈၽၼ်းၸိူဝ်ႉ မၼ်းဝၢၼ်ႇပိုၼ်လူင်း၊ ယၢမ်းတေႃႈလဵဝ်မႆႉႁဝ်း လုၵ်ႈတႆးလႆႈငဝ်ၵဝ်ႉႁၢမ်းပဝ်ႇယွမ်ၶေႃႉငိုပ်းသူင်း – သူၼ်ႁႆႈၼႃးပိူၼ်ႈမႃးၶီႇၸိၵ်း ႁုပ်ႈသိမ်းဢဝ်ၼႄႈ။

မီးၼႆ ၸဵမ်သိုၼ်းပိုၼ်းသိူဝ်လူးလၢႆးတႆးႁဝ်းၼႆႉ တွင်းဝႆႉဝၼ်းၼႂ် – ၽႂ်ၵေႃႈလၢႆး ၵေႃႉၸၢႆးယႃႇယၢၼ်ၶိူဝ်း ၶႅၼ်းတေႃႈၼွင်ႉပီႈယႃႇၽၢတ်ႇသူၼ်ႁၢတ်ႇတႆးၸႃႇတိမႅတ်ႇလူမ်ႈယူႇႁူမ်ႈ ၸၢႆးမိုၵ်ႉသမ်း ၶၢမ်ႇထႅမ်ထႅင်ႈ ၸုမ်းၸိူဝ်းမိူဝ်းၼႃႈမႃးၽႄႈလႃးယႂ်ႇၽုင်မုၵ်ႉတႆးၼႆႉ ၶိုတ်းၵၢပ်ႈၶိုတ်းပၢၼ်ဢိူဝ်ႈ။

ၸဝ်ႈသၢင်ႇဢႃႇလေႃးၵႃႉ ၵျွင်းမိူင်းလီ သႅၼ်ဝီႁွင်ႇ 09/04/1996

ၶေႃႈမုလ်း – ပပ်ႉၵွၼ်းၶေႃ မၢႆ 144 ပီ 1996