ၶွမ်ႊမသျိၼ်ႊ ၾၢႆႇၵၢၼ်ၵပ်းသိုပ်ႇလႄႈ ၾၢႆႇပွႆႇသဵင်ၸိူဝ်ႉၸၢတ်ႈ (NBTC) မိူင်းထႆး ပိုၼ်ၽၢဝ်ႇဝႃႈ – တႄႇဢဝ်ဝၼ်းတီႈ 18/08/2025 ၼႆႉၵႂႃႇ တႃႇတေယိုၼ်ႈတၢင်ႇမၢႆၾၢင် သိမ်းၵၢတ်ႉၾူၼ်းဢၼ်မႂ်ႇၼၼ်ႉ ႁႂ်ႈၾၢႆႇၵၢၼ်ၵပ်းသိုပ်ႇဢေႃႇပရေႇတႃႇ ၼႂ်းမိူင်းထႆးတင်းသဵင်ႈ ပႃးၸဵမ် True လႄႈ AIS ၶဝ် တႄႇၸႂ်ႉပိူင်သၵႅၼ်ႊၼႃႈ (Liveness Detection Technology) ၵႂႃႇ ဝႃႈၼႆ။
မိူဝ်ႈပူၼ်ႉမႃးၼႆႉ သင်ဝႃႈ တေတၢင်ႇမၢႆၾၢင်သိမ်းၵၢတ်ႉ (Sim card) ၾူၼ်းဢၼ်မႂ်ႇၸိုင် ဢမ်ႇလူဝ်ႇလႆႈသၵႅၼ်ႊၼႃႈ။ ၵူၺ်းၵႃႈ ယၢမ်းလဵဝ် ၼင်ႇႁိုဝ် တေၵူတ်ႇထတ်းႁူႉၶိုတ်းတၼ်း ၶၢဝ်းယၢမ်း လႆႈဝႃႈၵူၼ်းၸႂ်ႉတိုဝ်း သိမ်းၵၢတ်ႉၾူၼ်းလႄႈ ၵူၼ်းတၢင်ႇမၢႆၾၢင်ဝႆႉၼၼ်ႉ ၸွင်ႇၸႂ်ႈၵေႃႉလဵဝ်ၵၼ်ၼႆ ၵွပ်ႈၼႆလႄႈ တေၸႂ်ႉတိုဝ်းလွၵ်းလၢႆးပၢႆးပၺ်ႇၺႃႇ ဢၼ်ၼႆႉၵႂႃႇ ဝႃႈၼႆ။
လိူဝ်ၼၼ်ႉ ၼင်ႇႁိုဝ် တေႁႄႉၵင်ႈလႆႈ လွင်ႈလၵ်ႉၶေႃႈမုလ်းလႄႈ လွင်ႈလွၵ်ႇလႅၼ်ၵၼ်၊ ၼင်ႇႁိုဝ် တေလူတ်းယွမ်း လွင်ႈၸႂ်ႉတိုဝ်းမၢႆၾူၼ်းသေ လွတ်ႇငိုတ်ႈၵၼ်တင်း သၢႆႊပိူဝ်ႊ ၸဵမ်ၸိူဝ်းၼႆႉ။
တႃႇတေတၢင်ႇမၢႆၾၢင် သိမ်းၵၢတ်ႉၼၼ်ႉ တေလႆႈၸႂ်ႉတိုဝ်းပပ်ႉၶၢမ်ႈမိူင်း (Passport) ၵူၺ်းၼႆ – NBTC လၢတ်ႈဝႆႉၼင်ႇၼႆ။
ၵဵဝ်ႇလူၺ်ႈ လွင်ႈတၢင်ႇမၢႆၾၢင် သိမ်းၵၢတ်ႉၾူၼ်းၼႆႉသေ ယူႇတီႈ AIS Myanmar ၵေႃႈ ပိုၼ်ၽၢဝ်ႇ ပၼ်ၾၢင်ႉဝႆႉဝႃႈ တႄႇဢဝ်ဝၼ်းတီႈ 18 ၼႆႉၵႂႃႇ တႃႇတေတၢင်ႇမၢႆၾၢင် သိမ်းၵၢတ်ႉၾူၼ်းၼၼ်ႉ တေႁပ်ႉပပ်ႉၶၢမ်ႈမိူင်း (Passport) ဢၼ်လဵဝ်ၵူၺ်း – သိုဝ်ႇၶၢဝ်ႇ The Irrawaddy ဢွၵ်ႇဝႆႉၼင်ႇၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ