ၽွင်းၵူၼ်းမိူင်းၼႂ်းၼွင်ႁၢႆးယႃႈ ထူပ်းၽေးသၽႃႇဝ ၼမ်ႉထူမ်ႈၼမ်ႉၼွင်း၊ ၽေးပၢႆးမၢၵ်ႈမီးတူၵ်း ၵၢၼ် ၽုၵ်ႇသွမ်ႈဢမ်ႇလီ၊ ၽေးသိုၵ်းမၢၼ်ႈတဵၵ်းငႅၼ်ႉလိုပ်ႈလမ်းတီႈၺွပ်းယူႇၼႆႉ – သိုၵ်းမၢၼ်ႈပိုၼ်ၽၢဝ်ႇသေ ၸီႉသင်ႇ ပီၼႆႉၵေႃႈႁႂ်ႈၸတ်းပွႆးၽြႃးၸၢမ်ၵဝ်ႈတွၼ်ႈ ၽွင်ႇတေႃႇဢူး  ၼွင်ႁၢႆးယႃႈ – ဝႃႈၼႆ  ။

သိုၵ်းမၢၼ်ႈပိုၼ်ၽၢဝ်ႇဝႃႈ တေယေႃးပၢင်းၽြႃးလူင်းၵျွင်း ၼႂ်းဝၼ်းတီႈ 22/9 /2025  သေပၼ်ႇလဵပ်ႈၶဝ်ႈ ဢွၵ်ႇဝၢၼ်ႈ လိုဝ်ႈၵိင်းတီႈဝတ်ႉၼႂ်းၼွင် 21 တီႈ ၊ ထိုင်ဝၼ်းတီႈ 9/10/2025 ၸင်ႇတေယေႃးမုၼ် ၶဝ်ႈဝတ်ႉၵျွင်းလူင်ၸၢမ်ၵဝ်ႈတွၼ်ႈၶိုၼ်းဝႃႈၼႆ ။

ၵွပ်ႈၼႆလႄႈ သိုၵ်းမၢၼ်ႈ ၸီႉသင်ႇၵၢင်ႉၵႄႇၵွၼ်းဢိူင်ႇၵူႈဝၢၼ်ႈၵူႈယွမ်ႇဝႆႉဝႃႈ  ႁႂ်ႈၶၢႆႉၵူၼ်းပၢႆႈၽေးသိုၵ်း ၵူၼ်းထူပ်းၽေးၼမ်ႉထူမ်ႈ  ၸိူဝ်းမႃးသွၼ်ႈယူႇဝႆႉၸွမ်းဝတ်ႉဝႃးၽႃသိူဝ်ႇ တီႈဢၼ် ႁုၼ်ႇႁၢင်ႈၽြႃးၸၢမ်ၵဝ်ႈတွၼ်ႈတေၶဝ်ႈၵိင်းၸိူဝ်းၼၼ်ႉဝႃႈၼႆဝႆႉပႃး။

ၼင်ႇႁိုဝ်ၼမ်ႉၼႂ်းၼွင်တေဢမ်ႇယိုင်ႈၼွင်းဝႆႉၼၼ်ႉၵေႃႈ  သိုၵ်းမၢၼ်ႈသင်ႇႁႂ်ႈပိုတ်ႇၾၢႆၼမ်ႉ ႁႂ်ႈၼမ်ႉၼႂ်းၼွင်လူတ်းယွမ်းလူင်း လႄႈ ၵူၼ်းယူႇႁိမ်းၾင်ႇၼမ်ႉတၢင်းတႂ်ႈၸိူဝ်းၼၼ်ႉ ၸၢင်ႈထူပ်းၽေးၼမ်ႉထူမ်ႈထႅင်ႈ – ၵူၼ်းပိုၼ်ႉတီႈလၢတ်ႈၼင်ႇၼႆ။   

ၵူၼ်းၸၢႆးပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“တႃႇၸတ်းႁဵတ်းပွႆးၼၼ်ႉၵူဝ်ၼမ်ႉထူမ်ႈမိူၼ်မိူဝ်ႈပီၵၢႆလႄႈ သိုၵ်းမၢၼ်ႈၸီႉသင် ပိုတ်ႇၾၢႆၼမ်ႉဝႆႉ ၊ ပိုတ်ႇၾၢႆၼမ်ႉၵေႃႈ ၼမ်ႉတိုၵ်ႉယိုင်ႈယူႇ ပီၼႆႉတႄႉ ပွႆးၽြႃးၼႆႉ တေဢၢၼ်းႁဵတ်းႁႂ်ႈလႆႈၼႆ ၊ တႃႇႁဵတ်းပွႆးၼႆႉ ၵူၼ်းပၢႆႈၽေးသိုၵ်း ၊ပၢႆႈၽေးၼမ်ႉဢၼ်ယူႇတီႈ ၵျွင်းမုၼ် ၸဝ်ႈဢၼ်ၽြႃးတေလဵပ်ႈၶဝ်ႈမႃးၼၼ်ႉ ၸႂ်ႉၶၢႆႉပၢႆႈထႅင်ႈ ”- ဝႃႈၼႆ ။

ယွၼ်ႉသိုၵ်းမၢၼ်ႈၸီႉသင်ႁဵတ်းပွႆးလႄႈ ယၢမ်းလဵဝ် တီႈၼႂ်းၼွင်ႁၢႆးယႃႈ ဢွၼ်ၵၼ်မႄးသၢင်ႈၶိုၼ်း ၵျွင်းမုၼ်ၸဝ်ႈ ဢၼ်လႆႈလူႉၵွႆႇၵႂႃႇၽွင်းၽႅၼ်လိၼ်ဝႆၼၼ်ႉသေ ႁၢင်ႈႁႅင်းဝႆႉလၢႆဢၼ်လၢႆယၢင်ႇ ဝႃႈၼႆ ။

ၵူၼ်းၸၢႆးဢႃယု 40 လၢတ်ႈၽူႈတွႆႇႁွၵ်ႈဝႃႈ – “ ယွၼ်ႉၼမ်ႉထူမ်ႈ ၊ ၽႅၼ်လိၼ်ဝႆသေ ႁိူၼ်းယေးဝတ်ႉဝႃးၵွႆ ဝႆႉလႄႈ   တေလႆႈမႄးၶိုၼ်း တႃႇပႂ်ႉႁပ်ႉႁုၼ်ႇႁၢင်ႈၽြႃးဢၼ်တေယေႃးမုၼ်မႃး။ တေလႆႈႁၢင်ႈႁႅင်းၼမ်ၼႃႇ ၊ ၾၢႆႇတင်းသိုၵ်းမၢၼ်ႈဝႃႈၶဝ်တေဢွၵ်ႇပၼ်ငိုၼ်းတႃႇမႄးၵျွင်းယူႇၼႆသေတႃႉ ၵူၼ်းဝၢၼ်ႈသမ်ႉတေလႆႈႁၢင်ႈႁႅင်း ႁိူဝ်း ဝႃႇၸိူဝ်းၼႆႉပႃး ၊ ၼိုင်ႈဝၢၼ်ႈၼႆႉ လႆႈပၼ် ၼိုင်ႈလမ်းယူႇယဝ်ႉ ၊ တလဵဝ် ၼိုင်ႈလမ်းၼႆႉ တေတူၵ်းမွၵ်ႈ 50 သႅၼ်ၼႆႉ ၵူၼ်းပိုၼ်ႉတီႈ ဢမ်ႇမီးငိုၼ်း ၵၢၼ်ႁႃၵိၼ်လဵင်ႉတွင်ႉၵေႃႈယၢပ်ႇ”- ဝႃႈၼႆ ။

မိူၼ်ၼင်ႇတီႈဝၢၼ်ႈ တွင်ႇပူဝ်ႉၵျီး ၼႂ်းၼွင်ႁၢႆးယႃႈၼႆႉ ၵူၼ်းဝၢၼ်ႈထူပ်းၽေးသိုၵ်း ထူပ်းၽေးၼမ်ႉထူမ်ႈ တႃႇၵိၼ်လဵင်ႉတွင်ႉၵူၺ်းသမ်ႉပေႃးယၢပ်ႇၽိုတ်ႇယဝ်ႉၵမ်းၼႆႉ  ၵၢင်ႉၵႄႇသမ်ႉလူင်းၵဵပ်းငိုၼ်း  ထႅင်ႈပဵၼ်ဢၼ်ယၢပ်ႇၽိုတ်ႇၵိၼ်းၸႂ်ဝႆႉ ဝႃႈၼႆ ။

ၼၢင်းယိင်းဢႃယု 20 ပၢႆလၢတ်ႈၽူႈတွႆႇႁွၵ်ႈဝႃႈ -“ ၶဝ်ဢမ်ႇႁတ်းဝႃႈတႃႇပွႆးၼႆ။ ၶဝ်လၢတ်ႈဝႃႈ တႃႇသွမ်းၽြႃးလႄႈ  တႃႇႁိူဝ်းၼႆသေ ၵဵပ်းၵႂႃႇၼိုင်ႈႁိူၼ်း ၼိုင်ႈမိုၼ်ႇပျႃး။   တလဵဝ်ၼႆႉ ၼႂ်းၼွင်ၼႆႉၵၢင်ႉၵႄႇ ၵမ်းၵမ်းၵဵပ်းငိုၼ်း ၼႂ်ႁူဝ်ၶေႃႈ လွင်ႈၼိုင်ႈယဝ်ႉလွင်ႈၼိုင်ႈ ၊ ၵမ်ႉၵဵပ်းတႃႇ ႁၢပ်ႇၵၢၼ်သိုၵ်း ၊ ၵမ်ႉၵဵပ်းတႃႇ ၵျွင်းမုၼ်ၸဝ်ႈ ၸိူင်ႉၼၼ်တိၵ်းတိၵ်း၊ ငိုၼ်းၶဝ်ႈႁဝ်းသမ်ႉဢမ်ႇမီး   ယၢပ်ႇၽိုတ်ႇၼႃႇ ”- ဝႃႈၼႆ ။

ဝၢႆးလင်သိုၵ်းမၢၼ်ႈယိုတ်းဢႃၼႃႇၸိုင်ႈမိူင်းမႃးၼႆႉပွႆးၽြႃးၸၢမ်ၵဝ်ႈတွၼ်ႈၼၼ်ႉ တိုၵ်ႉလႆႈၸတ်းႁဵတ်းၵႂႃႇ ၼႂ်းပီ 2023 ပီလဵဝ် ၊ ၼႂ်းပီ 2024 ႁၢင်ႈႁႅၼ်းတေၸတ်းႁဵတ်းယူႇသေတႃႉ ယွၼ်ႉၼမ်ႉထူမ်ႈၼမ်ႉၼွင်း ဢမ်ႇပဵၼ်ၸတ်းႁဵတ်း ၼႂ်းပီ 2025 ၼႆႉ ယူႇတီႈသိုၵ်းမၢၼ်ႈလႄႈ ပျီႇတူႉၸိတ်ႉ တေဢဝ်ႁူမ်ႇလူမ်ႈသေ ၸတ်းႁဵတ်းပွႆးၵႂႃႇ – ၵူၼ်းပိုၼ်ႉတီႈလၢတ်ႈ ။   

ယၢမ်းလဵဝ်တီႈၼွင်ႁၢႆးယႃႈ ၾူၼ်တူၵ်းဢမ်ႇထၢတ်ႇ ၼမ့်ၶိုၼ်ႈၼမ်  ၵူၼ်းပိုၼ့်တီႈ ပဵၼ်ဢၼ် ယၢပ်ႇၽိုတ်ႇတႃႇၵႂႃႇမႃး ။