မိူဝ်ႈၼႆႉ ဝၼ်းတီႈ 18/08/2025 ယၢမ်းဝၢႆးဝၼ်း 3 မူင်းပၢႆ ႁိူဝ်းမိၼ်တိုၵ်း သိုၵ်းမၢၼ်ႈ ပွႆႇမၢၵ်ႇသႂ်ႇ ၾၢႆႇဝၼ်းဢွၵ်ႇဝဵင်းမိူင်းၵုတ်ႈ ၼႂ်းၼႃႈတီႈသိုၵ်းတဢၢင်းၵုမ်းၵမ်ၸူဝ်ႈၶၢဝ်း ၵူၼ်းမိူင်းမၢတ်ႇၸဵပ်းၵႂႃႇၸွမ်း 1 ၵေႃႉ။
ၵူၼ်းမိူင်းပိုၼ်ႉတီႈ ၼႂ်းၸႄႈဝဵင်းမိူင်းၵုတ်ႈလၢတ်ႈၼႄဝႃႈ -“မၢၵ်ႇၵႂႃႇတူၵ်းသႂ်ႇႁိမ်းၵၢတ်ႇ (ကျပ်ပြင်ဈေး နာရီစင်နား) ၊ တၢင်းၵျွင်းၼၢႆးၶၢဝ်ၼၼ်ႉ။ ငိၼ်းဝႃႈ တိူဝ်ႉၵူၼ်းမိူင်းၵႂႃႇ ၵေႃႉ ၼိုင်ႈၼႆယူႇ”- ဝႃႈၼႆ။
ၼႂ်းၶၢဝ်းယၢမ်းလဵဝ်ၵၼ်ၵူၺ်း သိုၵ်းမၢၼ်ႈ ၸိူဝ်းၵုမ်းၵမ်ဝႆႉၶိုၼ်းလႆႈ ၸႄႈဝဵင်းၼွင်ၶဵဝ်ၼၼ်ႉၵေႃႈ ၸႂ်ႉၶိူင်ႈၵွင်ႈလူင် ပွႆႇမၢၵ်ႇသႂ်ႇ ၼႂ်းထုင်ႉၼွင်ပိင် ၸႄႈဝဵင်းၵျွၵ်ႉမႄးမွၵ်ႈ 5 – 6 လုၵ်ႈၼႆႉ ႁဵတ်းႁႂ်ႈၵူၼ်းမိူင်းလူႉတၢႆ 1 ၵေႃႉ လိူဝ်ၼၼ်ႉ ၵူၼ်းမိူင်းတူၵ်းၸႂ်တိုၼ်ႇသၢၼ်ႈဢွၼ်ၵၼ်ပၢႆႈ – ၵူၼ်းပိုၼ်ႉတီႈ ဝဵင်းၵျွၵ်ႉမႄး လၢတ်ႈၼႄၼင်ႇၼႆ။
“သဵင်မၢၵ်ႇမႃးတူၵ်း လင်ႁႅင်းၼႃႇ။ ၵႂႃႇတူၵ်းၺႃးသႂ်ႇႁိူၼ်းၽႂ်၊ တီႈလႂ်တႄႉ ပႆႇႁတ်းဢွၵ်ႇၵႂႃႇတူၺ်း။ ပဵၼ်တီႈ ၼွင်ပိင်လူင်ၼႆႉဢေႃႈ။ လႆႈႁူႉဝႃႈ လူႉတၢႆၵေႃႉၼိုင်ႈၼႆၶႃႈဢေႃႈ”။
မိူၼ်ၼႆ ယၢမ်းၵၢင်ၼႂ် 8 မူင်းၶိုင်ႈၼႆႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ႁႅင်းပွင်ႊ 500 မႃးပွႆႇသႂ်ႇ ၼႂ်းဝဵင်းသီႇပေႃႉ 2 လုၵ်ႈလႄႈ ၵူၼ်းမိူင်းတိူဝ်ႉမၢတ်ႇၵႂႃႇၸွမ်း 3 ၵေႃႉ လင်ႁိူၼ်းလူႉၵွႆၵႂႃႇ ဢမ်ႇယွမ်း 10 လင်။
လႆႈႁူႉဝႃႈ ၼႂ်းလိူၼ်ဢေႃးၵတ်ႊသ်ၼႆႉ သိုၵ်းမၢၼ်ႈတင်း သိုၵ်းတဢၢင်း မီးပၢင်ဢုပ်ႇဢူဝ်းၵၼ် ၼႂ်းမိူင်းၶႄႇၼႆလႄႈ ၾၢႆႇသိုၵ်းမၢၼ်ႈၵေႃႈ ၶတ်းၸႂ်ၸႂ်ႉတိုဝ်းႁိူဝ်းမိၼ်တိုၵ်း၊ ၶိူင်ႈၵွင်ႈလူင်ၸိူဝ်းၼႆႉ ပွႆႇမၢၵ်ႇသႂ်ႇ ၼႂ်းၼႃႈတီႈသိုၵ်းတဢၢင်းၵုမ်းၵမ်ဝႆႉၸူဝ်ႈၶၢဝ်း ဢမ်ႇထၢတ်ႇ ၸိူင်ႉၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ