မိူဝ်ႈၼႆႉ ဝၼ်းတီႈ 18/08/2025 ယၢမ်းၵၢင်ၼႂ် 9 မူင်းၶိုင်ႈ ႁိူဝ်းမိၼ်တိုၵ်းသိုၵ်းမၢၼ်ႈ ၵႂႃႇပွႆႇမၢၵ်ႇလူင်သႂ်ႇ ၼႂ်းပွၵ်ႉဝဵင်းၸၢၼ်းလႄႈ ပွၵ်ႉဢွၵ်ႇ ဝဵင်းသီႇပေႃႉ ၵူၼ်းမိူင်းတိူဝ်ႉမၢတ်ႇၸဵပ်း ၸွမ်းၵႂႃႇ 3 ၵေႃႉ ႁိူၼ်းယေး လူႉၵွႆၵႂႃႇၸွမ်း ဢမ်ႇယွမ်း 10 လင်။
ၵူၼ်းမိူင်းၸိူဝ်းၺႃးတိူဝ်ႉမၢတ်ႇၸဵပ်းၼႆႉ ပဵၼ်ၵူၼ်းၸၢႆး ဢႃယုမွၵ်ႈ 50 ပီ ၵေႃႉၼိုင်ႈတိူဝ်ႉၺႃးတီႈၶႃ၊ ၼၢင်းယိင်းဢႃယု 37 ပီ ၵေႃႉၼိုင်ႈလႄႈ ဢႃယု 67 ပီ ၵေႃႉၼိုင်ႈၵေႃႈ မၢတ်ႇၸဵပ်းၵႂႃႇႁၢဝ်ႈႁႅင်းၼႆ ၵူၼ်းမိူင်းၵေႃႉယူႇဝႆႉ ၼႂ်းပိုၼ်ႉတီႈဝဵင်းသီႇပေႃႉ လၢတ်ႈၼႄၼင်ႇၼႆ။
“ဢၼ်ၶဝ်မႃးပွႆႇၼႆႉ မၼ်းပဵၼ်ပွင်ႊ 500 ၼၼ်ႉ။ ပွႆႇၵႂႃႇ ၾၢႆႇၼႃႈႁူင်းႁႅမ်း Tai House သီႇပေႃႉၼၼ်ႉ ၼိုင်ႈလုၵ်ႈ၊ ဢၼွၵ်ႉယႅၵ်ႉ (အနောက်ရပ်) ၼၼ်ႉၼိုင်ႈလုၵ်ႈ။ ၾၢႆႇၼႃႈႁူင်းႁႅမ်းၼၼ်ႉ တူၵ်းၺႃးၼႂ်း လုၵ်းၵူမ်ႇဢုင်ၼၼ်ႉလႄႈ ၶႅၼ်းဢိတ်းၼိုင်ႈ။ ဢၼ်ၵူၼ်းမၢတ်ႇၸဵပ်းၵႂႃႇၸွမ်းၼႆႉ ပဵၼ်တၢင်းပွၵ်ႉဝဵင်း ၸၢၼ်းၼၼ်ႉၶႃႈဢေႃႈ”။
ပူၼ်ႉမႃးမိူဝ်ႈဝၼ်းတီႈ 14/07/2025 ၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇတီႈႁူင်းႁႅမ်း Tai House ဝဵင်းသီႇပေႃႉၼၼ်ႉသေ မီးၵူၼ်းမိူင်းလူႉတၢႆၵႂႃႇၸွမ်း 2 ၵေႃႉ မၢတ်ႇၸဵပ်းၵႂႃႇ 5 ၵေႃႉ။
ဝၢႆးလင် ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 ၼႆႉမႃး ယွၼ်ႉပၢင်တိုၵ်းၵေႃႈ ပိူင်ၼိုင်ႈ၊ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ၵမ်းၵမ်းပွႆႇမၢၵ်ႇသႂ်ႇ ႁိူၼ်းယေးၵူၼ်းမိူင်းၵေႃႈ လွင်ႈၼိုင်ႈလႄႈ ၵူၼ်းမိူင်းၼႂ်းပိုၼ်ႉတီႈ ဢွၼ်ၵၼ်လႆႈၶၢႆႉဢွၵ်ႇၵႂႃႇသွၼ်ႈယူႇဝႆႉတၢင်ႇဝၢၼ်ႈတၢင်ႇဝဵင်းမွၵ်ႈ 2 ပုၼ်ႈပၢႆ။
တႄႇလိူၼ်ၵျူႊလၢႆႊ တေႃႇထိုင် လိူၼ်ဢေႃႊၵတ်ႊသ် ဝၼ်းတီႈ 18 ၼႆႉ ၶၢဝ်းတၢင်းၼိုင်ႈလိူၼ်ပၢႆၽၢၵ်ႇၵူၺ်း သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းၸႄႈဝဵင်းသီႇပေႃႉ တင်းမူတ်းမီးၵႂႃႇ 8 ပွၵ်ႈယဝ်ႉ။ ၵူၼ်းမိူင်းၸိူဝ်းလူႉတၢႆလႄႈ မၢတ်ႇၸဵပ်းၸွမ်းၵေႃႈ မီးၵႂႃႇတင်းၼမ် ၼႆယဝ်ႉ။
ၼႂ်းၸႄႈဝဵင်းသီႇပေႃႉၼႆႉ တင်းမူတ်းမီးယူႇ 11 ပွၵ်ႉသေ ၵူၼ်းမိူင်းလၢႆၸၢဝ်းၶိူဝ်း ႁူမ်ႈၵၼ်ယူႇသဝ်းဝႆႉ သွင်မိုၼ်ႇပၢႆ။ ပဵၼ်ဝဵင်း ဢၼ်လမ်ႇလွင်ႈတႃႇသဵၼ်ႈတၢင်းၵၢၼ်ၵႃႉၶၢႆ မိူင်းမၢၼ်ႈ – မိူင်းၶႄႇလႄႈ ၼင်ႇႁိုဝ် သိုၵ်းမၢၼ်ႈ တေၶိုၼ်းၵုမ်းၵမ်လႆႈၼၼ်ႉ မိူင်းၶႄႇ ယူႇၵႄႈၵၢင်သေ ပၼ်ႁႅင်းမိပ်ႇဢီးတေႃႇ ၸုမ်းသိုၵ်းတဢၢင်း TNLA ။
ၾၢႆႇၼိုင်ႈၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းသေ ပွႆႇမၢၵ်ႇသႂ်ႇႁိူၼ်းယေးၵူၼ်းမိူင်း၊ ႁူင်းႁဵၼ်း၊ ဝတ်ႉဝႃးၽႃသိူဝ်ႇ ၸွမ်းဢွင်ႈတီႈသိုၵ်းတဢၢင်း ၵုမ်းၵမ်ဝႆႉၸူဝ်ႈၶၢဝ်းၼၼ်ႉ ႁၢဝ်ႈႁႅင်းယူႇ။
ဝဵင်းသီႇပေႃႉ၊ ဝဵင်းၵျွၵ်ႉမႄး၊ ဝဵင်းၼွင်ၶဵဝ်ၼႆႉ ပဵၼ်ဝဵင်းဢၼ်လမ်ႇလွင်ႈ ပိူဝ်ႈတႃႇၶၵ်ႉၵၢၼ်ပၢႆးမၢၵ်ႈမီး ၸိုင်ႈမိူင်း ပဵၼ်ဝဵင်းဢၼ်မီးသဵၼ်ႈတၢင်းလူင်ၵၢၼ်ၵႃႉၶၢႆ မိူင်းမၢၼ်ႈ – မိူင်းၶႄႇလႄႈ ၾၢႆႇသိုၵ်းမၢၼ်ႈ ၶတ်းၸႂ်ႁဵတ်းသၢင်ႈၵူႈလွင်ႈလၢႆတၢင်း ပိူဝ်ႈတႃႇသိုၵ်းတဢၢင်းထွႆဢွၵ်ႇပၼ်ၶိုၼ်းႁႂ်ႈပေႃးလႆႈ ၼၼ်ႉယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ