မိူဝ်ႈၼႆႉ ဝၼ်းတီႈ 18/08/2025 ယၢမ်းၵၢင်ၼႂ် ၵူၼ်းမိူင်း ၼႂ်းၸႄႈဝဵင်းမိူင်းၼၢႆးမွၵ်ႈ 300 ၵေႃႉ ဢွၵ်ႇမႃး ၼိူဝ်သဵၼ်ႈတၢင်းၵၢင်ဝဵင်းသေ ယိပ်းပၢႆႉၼႄၵၢင်ၸႂ်တေႃႇ ၸုမ်းသိုၵ်းၸၢဝ်းၶိူဝ်းသၢမ်ၸုမ်း ၸိူဝ်းတူင်ႉၼိုင်ၵုမ်းၵမ်ဝႆႉလၢႆလၢႆၸႄႈဝဵင်းမိူင်းတႆးပွတ်းႁွင်ႇ။

ၼႂ်းပၢႆႉလိၵ်ႈၼၼ်ႉတႅမ်ႈဝႆႉဝႃႈ – တႃႇၵူၼ်းမိူင်းၼႂ်းပိုၼ်ႉတီႈ တေလႆႈယူႇသဝ်းၵတ်းယဵၼ်ၼၼ်ႉ TNLA / MNDAA / AA သၢမ်ၸုမ်း ႁႂ်ႈဢွၵ်ႇပိုၼ်ႉတီႈၵႂႃႇဝႆးဝႆး ဝဵင်းသီႇပေႃႉ – ၵျွၵ်ႉမႄး – သႅၼ်ဝီ ၸိူဝ်းၼၼ်ႉ ပဵၼ်မိူင်းၸၢဝ်းၶိူဝ်းတႆးႁဝ်းမူတ်းမူတ်း – ၸဵမ်ၸိူဝ်းၼႆႉ။ ၼုမ်ႇယိင်းဢွၼ်ႇ ၵူၼ်းမိူင်းၼၢႆး ၵေႃႉႁွတ်ႈထိုင်ဝႆႉ ၼႂ်းၸႄႈဝဵင်းတူၼ်ႈတီး လၢတ်ႈၼႄၽူႈတွႆႇ ႁွၵ်ႈၼင်ႇၼႆ။

“မိူဝ်ႈဝႃး (ဝၼ်းတီႈ 17/08/2025) သိုၵ်းမၢၼ်ႈ ၸႂ်ႉၵၢင်ႉၵႄႇ မႃးလၢတ်ႈၵူၼ်းၼႂ်းပွၵ်ႉၼႂ်းယွမ်ႇၼႂ်းဝဵင်း – ၶဝ်လၢတ်ႈဝႃႈ တေမီးပၢင်ၵုမ် ႁႂ်ႈမႃးၶဝ်ႈႁူမ်ႈ ၼႆၵူၺ်းၼႃႇ။ ၽိူဝ်ႇၼႂ်ၼႆႉမႃး ၶဝ်ၵေႃႈၸႅၵ်ႇပၢႆႉၸိူဝ်းၼၼ်ႉသေ ၸႂ်ႉပႆတၢင်းလဵပ်ႈဝဵင်း။ ဢဵၼ်ႁႅင်းၵူၼ်းတေမီးမွၵ်ႈ 300 ၵေႃႉ၊ ပဵၼ်ၵူၼ်းဝၢၼ်ႈ ၸွမ်းသၢပ်ႇဝဵင်းၵမ်ႈၼမ်ဢေႃႈ ပိူၼ်ႈဢမ်ႇၽွင်းလိူဝ်လႆႈလူး။ ၵူၼ်း ၼႂ်းပွၵ်ႉၼႂ်းဝဵင်းတႄႉ ဢမ်ႇၶဝ်ႈႁူမ်ႈၸွမ်း။ သိုၵ်းမၢၼ်ႈၶဝ် ဢဝ်ႁေႃႇၶဝ်ႈ၊ တဝ်ႈၼမ်ႉၵိၼ် မႃးၸႅၵ်ႇပၼ်ပႃးႁႄ”။

ၵဵဝ်ႇလူၺ်ႈလွင်ႈၼႆႉသေ ၾၢႆႇၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး (RCSS/ SSA) ပိုၼ်ၽၢဝ်ႇ ဢွၵ်ႇပဵၼ်တၢင်းၵၢၼ်ဝႆႉၼႂ်ၼႆႉၸဵမ်ၸဝ်ႉဝႃႈ – ပဵၼ်ၽႅၼ်ၵၢၼ်သိုၵ်းမၢၼ်ႈ ဢၼ်ၶႂ်ႈၸႅၵ်ႇၽႄလွင်ႈၽွမ်ႉ ႁူမ်ႈၸၢဝ်းၶိူဝ်း ၼႂ်းမိူင်းတႆးႁႂ်ႈတႅၵ်ႇယၢႆႈၵၼ်၊ ႁၼ်ၽိတ်းၼိူဝ်ၵၼ်ၶိုၼ်းသေ ပႅင်းၸင်းၵၼ်၊ ဢဝ်လွင်ႈလိူတ်ႇမႆႈမႃးသႂ်ႇပၼ်ၼႂ်းၸၢတ်ႈပၢၼ်ၵူၼ်းမိူင်းတႆး ဢၼ်ယူႇထင်ၵိၼ်သဝ်းၸွမ်းၵၼ် ၵတ်းၵတ်းယဵၼ် ယဵၼ်ၼၼ်ႉၵူၺ်း – ဝႃႈၼႆဝႆႉ။ 

ပိုၼ်ႉတီႈမိူင်းတႆးပွတ်းၸၢၼ်း ဢၼ်ၶွမ်ႊမသျိၼ်ႊသိုၵ်းမၢၼ်ႈ ၶဝ်ပူင်သင်ႇၸႂ်ႉၼႄၵၢင်ၸႂ်သၢၼ်ၶတ်း ၼၼ်ႉၵေႃႈ ဢမ်ႇလႆႈတိတ်းၸပ်းလႄႈ မီးလွင်ႈၵဵဝ်ႇၶွင်ႈသင်တင်း ပိုၼ်ႉတီႈ ဢၼ်သိုၵ်းၸၢဝ်းၶိူဝ်းသၢမ် ၸုမ်းတူင်ႉၼိုင်။ ၼင်ႇႁိုဝ် တေဢမ်ႇတူၵ်းပဵၼ်ၶိူင်ႈမိုဝ်းပိူၼ်ႈလႆႈငၢႆႈငၢႆႈၼၼ်ႉ ၶႅၼ်းတေႃႈမီးသတိႁင်းၽႂ် မၼ်းသေ ထွမ်ႇၵူႈၾၢႆႇလႄႈ မေႃထတ်းထွင်ၸႅၵ်ႇၽႄငိူင်ႉဝႄႈၵၼ် ႁႂ်ႈလႆႈသေၵမ်းၼႆ ႁွင်ႈၵၢၼ် ၾၢႆႇပိုၼ်ၽၢဝ်ႇ ၶွင်ႇသီႇဢဝ်ၶိုၼ်းၸိုင်ႈတႆး ပိုၼ်ၽၢဝ်ႇၸီႉၸမ်ႈၼႄဝႆႉ ၼင်ႇၼႆ။

လႆႈငိၼ်း ၵူၼ်းပိုၼ်ႉတီႈဝႃႈတႄႉ ၼွၵ်ႈလိူဝ် ဝဵင်းမိူင်းၼၢႆးယဝ်ႉ မိူၼ်ၼင်ႇ ဝဵင်းလၢင်းၶိူဝ်း – မွၵ်ႇမႆႇ – ဝၢၼ်ႈႁၢတ်ႇ – မိူင်းပၼ်ႇ ၸိူဝ်းပဵၼ်ပိုၼ်ႉတီႈ တပ်ႉသိုၵ်းၸိုင်ႈတႆး ၵုမ်းၵမ်ဝႆႉၸိူဝ်းၼၼ်ႉၵေႃႈ သိုၵ်းမၢၼ်ႈ တေၸႂ်ႉဢွၵ်ႇၼႄၵၢင်ၸႂ်သၢၼ်ၶတ်း ၸုမ်းသိုၵ်း 3 ၸုမ်း ၼႂ်းပွတ်းႁွင်ႇဝႃႈၼႆသေတႃႉ တေပဵၼ်ဝၼ်းလႂ်တႄႉ ပႆႇလႆႈႁူႉတႅတ်ႈတေႃး။

မိူၼ်ၼင်ႇ တီႈဝဵင်းမိူင်းၼၢႆးၼႆႉၵေႃႈ သိုၵ်းမၢၼ်ႈ ဢမ်ႇပိုၼ်ၽၢဝ်ႇဝႆႉလူင်ႈၼႃႈ။ ၵိုင်ႉၵၢင်ႉလၢတ်ႈ ၵိုင်ႉၵၢင်ႉၸတ်းၸိူင်ႉၼၼ်ၵူၺ်း။

ၶွမ်ႊမသျိၼ်ႊသိုၵ်းမၢၼ်ႈၼႆႉ ႁၢင်ႈႁႅၼ်းဝႆႉ တေဢၢၼ်းၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉၸိုင်ႈမိူင်း ႁႂ်ႈပေႃးလႆႈၼႂ်းႁၢင်ပီ 2025 ၼႆႉသေ ပိူဝ်ႈတႃႇတေၸတ်းႁဵတ်းလႆႈ ၵူႈၸႄႈဝဵင်း ၼႂ်းမိူင်းတႆးပွတ်းႁွင်ႇ ပႃးၼၼ်ႉ သိုၵ်းမၢၼ်ႈ ၶိုင်ပွင်ၵူႈလၢႆးတၢင်း ပိူဝ်ႈတႃႇၵုမ်းၵမ်ၶိုၼ်းလႆႈ ၸႄႈဝဵင်းၸိူဝ်းလႆႈသုမ်းပၼ် ၸုမ်းသိုၵ်းၸၢဝ်းၶိူဝ်းသၢမ်ၸုမ်း ၵုမ်းၵမ်ဝႆႉၼၼ်ႉ။

တႅမ်ႈ – ၽူၺ်းၼုမ်ႇ