ၵဵဝ်ႇလူၺ်ႈပၼ်ႁႃ လွင်ႈပိုတ်းယိုဝ်းၵၼ် တီႈလႅၼ်လိၼ်ထႆး – ၵမ်ႇပူးၶျႃးၼၼ်ႉသေ ႁႅင်းၵၢၼ်မိူင်းၵမ်ႇပူးၶျႃး ၼပ်ႉႁူဝ်ႁဵင်ႁူဝ်မိုၼ်ႇ ဢွၼ်ၵၼ်ပွၵ်ႈမိူဝ်းၶိုၼ်း ၼႆယဝ်ႉ။
ၵွပ်ႈၼႆလႄႈ တႃႇဢွင်ႈတီႈႁႅင်းၵၢၼ်ၵမ်ႇပူးၶျႃးၼၼ်ႉ တေႁွင်ႉဢဝ်ႁႅင်းၵၢၼ်မိူင်းမၢၼ်ႈ မွၵ်ႈ 42,000 ၵေႃႉ မႃးတႅၼ်းတၢင်ၶိုၼ်းၼႆ ၽွင်းလူင် ၾၢႆႇႁႅင်းၵၢၼ်ထႆး ယိုၼ်ယၼ်တွပ်ႇဝႆႉ မိူဝ်ႈပူၼ်ႉမႃး ၼႂ်းဝၼ်းတီႈ 14/08/2025 ၼၼ်ႉၼင်ႇၼႆ။
တႃႇတေႁွင်ႉဢဝ် ႁႅင်းၵၢၼ်မိူင်းၾလိပ်ႉပိၼ်း၊ ဢိၼ်ႇတူဝ်ႇၼီးသျႃး၊ ၼီႇပေႃးလႄႈ မိူင်းသီရိလင်းၵႃး ႁူဝ်ၵူၼ်းမွၵ်ႈ 1 သႅၼ်ၼၼ်ႉၵေႃႈ တေတင်ႈၶွမ်ႊမတီႊ မူႇဝႃႇတလွင်ႈႁႅင်း ၵၢၼ် ALEM ဝႃႈၼႆ။
ႁႅင်းၵၢၼ်မိူင်းၵမ်ႇပူးၶျႃးမွၵ်ႈ 9 မိုၼ်ႇၵေႃႉ ဢၼ်တိုၵ်ႉၵိုတ်းယူႇ တီႈၼႂ်းမိူင်းထႆးၼၼ်ႉၵေႃႈ တေတေႃႇဢႃယုပၼ်ယူႇသဝ်းႁဵတ်းၵၢၼ်ၵႂႃႇထႅင်ႈ ၶၢဝ်းတၢင်း 6 လိူၼ်။
လိူဝ်ၼၼ်ႉ ၼႂ်းဢွင်ႈတီႈၼႃႈၵၢၼ်ႁႃပႃၼၼ်ႉၵေႃႈ ၸဝ်ႈၼႃႈတီႈထႆးၶဝ် တိုၵ်ႉႁွင်ႉႁႃႁႅင်းၵၢၼ် မိူင်းမၢၼ်ႈထႅင်ႈယူႇ။
တီႈၼႃႈၵၢၼ်ႁႃပႃၼႆႉ ႁႅင်းၵၢၼ်မိူင်းၵမ်ႇပူးၶျႃး ႁဵတ်းဝႆႉမွၵ်ႈ 15,000 ၵေႃႉ။ ယွၼ်ႉပၼ်ႁႃတီႈလႅၼ်လိၼ်သေ ႁႅင်းၵၢၼ်မိူင်းၵမ်ႇပူးၶျႃး မွၵ်ႈ 5,000 ၵေႃႉ ပွၵ်ႈမိူဝ်းလႄႈ ၸဝ်ႈၼႃႈတီႈထႆး ၸင်ႇၼႅတ်ႈႁွင်ႉႁႅင်းၵၢၼ်မိူင်းမၢၼ်ႈ ၼႆယဝ်ႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ