ဝၼ်းတီႈ13/8/2025 ယၢမ်းႁူဝ်ၶမ်ႈ 9 မူင်း ၾူၼ်တူၵ်းဢမ်ႇထၢတ်ႇ ၼမ်ႉၼမ်ၶိုၼ်ႈမႃးလႄႈ ၵူၼ်းမိူင်းၼႂ်းၼွင်ႁၢႆးယႃႈ ၸိုင်ႈတႆးပွတ်းၸၢၼ်း ၵိုင်ႉၵၢင်ႉလႆႈၶၢႆႉၶူဝ်းဝႆႉတီႈသုင်  လႆႈငိူင်ႉပၢႆႈၽေးၼမ်ႉ ထႅင်ႈ  ။

ၼၢင်းယိင်းဢႃယု 24 ပီ ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ၶမ်ႈဝႃးၼႆႉ ၾူၼ်တူၵ်းႁႅင်းၼႃႇၼမ်ႉၵိုင်ႉၵၢင်ႉၶိုၼ်ႈမႃးၸမ်သွၵ်ႇလႆႈဢွၼ်ၵၼ် လုၵ်ႉၶၢႆႉၶူဝ်းၶၢႆႉလဵင်း တေႃႉဝႆႉတီႈသုင် ၊ ၵူၼ်းၵေႃႈလႆႈငိူင်ႉပၢႆႈၽေးၼမ်ႉ ၊ တလဵဝ် ၼႂ်းၼွင်ႁၢႆးယႃႈၼႆႉ ၼမ်ႉယိုင်ႈဝႆႉတင်းၼွင်ယဝ်ႉ  ၊ ႁိူၼ်းသွင်ၸၼ်ႉၼၼ်ႉ ၸၼ်ႉၼိုင်ႈၼမ်ႉထူမ်ႈ ဢမ်ႇၸၢင်ႈယူႇယဝ်ႉ”- ဝႃႈၼႆ ။

ယွၼ်ႉၼမ်ႉၵိုင်ႉၵၢင်ႉယိုင်ႈလႄႈၵူၼ်းမိူင်းလႆႈဢွၼ်ၵၼ်ငိူင်ႉပၢႆႈၽေးၼမ်ႉ ၵႂႃႇယူႇဝႆႉတီႈ ၵျွင်းမုၼ်ၸဝ်ႈ ၊ ပၢႆႈၵႂႃႇယူႇၼိူဝ်ၵုင်း  ၊ ႁိူၼ်းပီႈႁိူၼ်ႈၼွင်ႉ လူဝ်ႇတင်းၸွႆႈထႅမ်တီႈယူႇတၼ်းသဝ်း ။

ၼၢင်းယိင်းၵူၼ်းဝၢၼ်ႈတွင်ႇပူဝ်ႉၵျီး လၢတ်ႈၽူႈတွႆႇႁွၵ်ႈဝႃႈ-“ တလဵဝ် ၼႆႉယၢပ်ႇတႃႇတီႈယူႇတၼ်းသဝ်းဝႆႉ ပေႃးတေၶၢႆႉယူႇၼိူဝ်ၵုင်း လူဝ်ႇၽႃႈယင်မူဝ်းၵႃႇ ၊ မႆႉတႃႇႁဵတ်းသုမ်ႉယူႇ ၊ ပေႃးၵူၼ်းၸိူဝ်းၶၢႆႉၵႂႃႇယူႇၼိူဝ်လွႆၸိူဝ်းၼၼ်ႉၵေႃႈ ပေႃးၵၢင်ၶမ်ႈၼႆႉၼွၼ်းဢမ်ႇလႆႈ ယုင်းၵေႃႈၼမ် ပဵၼ်ၶၢဝ်းၾူၼ်လႄႈ မႅင်းၸိူဝ်းၼႆႉၵေႃႈလိူင်ႇၼႃႇ ၊ ပေႃးၵူၼ်းႁဵတ်းသုမ်ႉယူႇၸိူဝ်းၼၼ်ႉသမ်ႉ ပေႃးၾူၼ်တူၵ်းၽႃႈယင်ၸိူဝ်းၼၼ်ႉဢမ်ႇၶၢမ်ႇလႆႈ ၊ ပေႃးယူႇတီႈၵျွင်းမုၼ်ၸဝ်ႈၵေႃႈ တီႈၵျွင်းၵူၼ်းၼမ်ႁႅင်းၼႃႇ ဢမ်ႇႁူႉတေလႆႈၵႂႃႇယူႇတီႈလႂ်”- ဝႃႈၼႆ ။

ယၢမ်းလဵဝ် ၼမ်ႉၵိုင်ႉၵၢင်ႉၶိုၼ်ႈမႃးႁႅင်းထႅင်ႈလႄႈ  ၵူၼ်းပိုၼ်ႉတီႈလီဢွၼ်ၵၼ်ႁၢင်ႈႁႅင်း တီႈယူႇတင်းသဝ်းတႃႇငိူင်ႉပၢႆႈၽေးၼမ်ႉလႄႈသင်  ထၢင် ၊ ၽိုၼ်း-ထၢၼ်ႇ ၊ ၶဝ်ႈၼမ်ႉတင်းၵိၼ် လႄႈသင် လီႁၢင်ႈႁႅင်းဝႆႉ -ၵူၼ်းပိုၼ်ႉတီႈလၢတ်ႈ ။

ၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ-“ ပေႃးပၢႆႈၽေးၼမ်ႉၼႆႉ ၵျွင်းမုၼ်ၸဝ်ႈၼႆႉ မီးၵူၼ်းၼမ်ၼႃႇ ။ ပီၵၢႆ ယွၼ်ႉၵူၼ်းၼမ်လႄႈ မီးတၢင်းလူဝ်ႇတင်းၼမ် ၊ ပီၼႆႉတႄႉ ဢွၼ်ၵၼ်ႁၢင်ႈႁႅင်း တေႁဵတ်းႁိုဝ် ၵူၼ်းတေယူႇလႆႈၼမ် ၊ ထၢင် ၸိူဝ်းၼႆႉ ၵေႃႈႁၢင်ႈႁႅင်းဝႆႉပႃးယဝ်ႉ ။ တလဵဝ်ၼႆႉ ၼမ်ႉၵေႃႈၸမ် သၢႆၾႆးၾႃႉ ၼႃႇယဝ်ႉပေႃးၾူၼ်တူၵ်းထႅင်ႈဢိတ်းၵေႃႈ ပေႃးၼမ်ႉတိူဝ်ႉသၢႆၾႆး ၾႆးၸၢင်ႈမႆႈလႄႈ တေလႆႈႁၢင်ႈႁႅင်းပႃးတႃႇၽေးၾႆးပႃးထႅင်ႈ”-  ဝႃႈၼႆ ။

ပေႃးမႃးတူၺ်းၶိုၼ်းၼႂ်းပီ2025 ၼႆႉ ၼႂ်းၼွင်ႁၢႆးယႃႈ ၼမ်ႉၶိုၼ်ႈ 2 ပွၵ်ႈ ။ မိူဝ်ႈလိူၼ် 10/6/2025 ၼမ်ႉၾူၼ်တူၵ်းဢမ်ႇထၢတ်ႇလႄႈၼမ်ႉၶိုၼ်ႈ ႁဵတ်းႁႂ်ႈ သူၼ်ထူဝ်ႇလိၼ် ၊ မၢၵ်ႇၶိူဝ်သူမ်ႈ သုမ်းတိုၼ်းလၢင်းပွၵ်ႈၼိုင်ႈ  ယၢမ်းလဵဝ်ၼႂ်းလိူၼ် ဢေႃႊၵတ်ႊသ် ၼမ်ႉထူမ်ႈၶဝ်ႈၼႂ်းႁိူၼ်းယေးလႄႈ ႁဵတ်းႁႂ်ႈၵူၼ်းပိုၼ်ႉတီႈလႆႈငိူင်ႉပၢႆႈၽေးၼမ်ႉထႅင်ႈ ပွၵ်ႈၼိုင်ႈ ၼႆယဝ်ႉ ။

မိူၼ်ၼင်ႇၼႆၼင်ႇၵဝ် ၾူၼ်တူၵ်းဢမ်ႇထၢတ်ႇ ႁဵတ်းႁႂ်ႈၼမ်ႉၵိုင်ႉၵၢင်ႉၶိုၼ်ႈၼႂ်းပွၵ်ႉ ၵၢၼ်တႃႇလႄႈ ၼၼ်းပၼ်ႇ ဢၼ်မီးတီႈဝဵင်းယွင်ႁူၺ်ႈ ႁဵတ်းႁႂ်ႈၵူၼ်းမိူင်းလႆႈငိူင်ႉပၢႆႈၽေးၼမ်ႉၵႂႃႇယူႇဝႆႉၵျွင်းမုၼ်ၸဝ်ႈ မျူႉၸေႇတီႇ (မြစေတီ)ဝႆႉ ၼႆယဝ်ႉ ။