ဝၼ်းတီႈ 13/08/2025 ၼႆႉ မီးၶေႃႈပိုၼ်ၽၢဝ်ႇဢွၵ်ႇမႃးဝႃႈ ႁၢမ်ႈဢိုတ်းပႅတ်ႈ လွင်ႈတေႃႉၶဝ်ႈမႃးၶူဝ်းၵုၼ်ႇ ၶိူင်ႈၸႂ်ႉတိုဝ်းၵူၼ်းမိူင်း 35 မဵဝ်း ဢၼ်တေလုၵ်ႉတီႈၼွၵ်ႈမိူင်း တေႃႉၶဝ်ႈ ၼႂ်းမိူင်း ၸိူဝ်းၼၼ်ႉ ဝႃႈၼႆ။

ယူႇတီႈ ၶွမ်ႇမတီႇ ၾၢႆႇၵုမ်းၵမ်ငိုၼ်းၼွၵ်ႈမိူင်း တႂ်ႈသိုၵ်းမၢၼ်ႈ ယိုတ်းမိူင်း ပိုၼ်ၽၢဝ်ႇဢွၵ်ႇဝႆႉ ၼႂ်းၽိုၼ်လိၵ်ႈၼၼ်ႉ ဝၼ်းတီႈတႅတ်းတေႃးတႄႉ ဢမ်ႇတႅမ်ႈပႃးဝႆႉ။

ၶွမ်ႇမတီႇ ၾၢႆႇၵုမ်းၵမ်ငိုၼ်းၼွၵ်ႈမိူင်းၼႆႉ မိူဝ်ႈဝၼ်းတီႈ 01/08/2025 ၼၼ်ႉ သိုၵ်းမၢၼ်ႈ ပိုၼ်ၽၢဝ်ႇ ယႃႉပႅတ်ႈယဝ်ႉသေတႃႉ ၶိူင်ႈၶူဝ်းၶွင်ႁႄႉႁၢမ်ႈ ဢၼ်တႅမ်ႈပႃးဝႆႉ ၼႂ်းၽိုၼ်လိၵ်ႈၼၼ်ႉ တီႈၵဵတ်ႉလၢၼ်ႇလႅၼ်လိၼ်ၵေႃႈ ဢမ်ႇၸၢင်ႈတေႃႉၶဝ်ႈမႃး။

ၼႂ်းၶူဝ်းၵုၼ်ႇၶိူင်ႈၸႂ်ႉတိုဝ်းၵူၼ်းမိူင်း 35 မဵဝ်း ဢၼ်ႁႄႉႁၢမ်ႈၼၼ်ႉပဵၼ် ၶႅပ်းတိၼ်၊ တဵၼ်းႁွမ်၊ မၢၵ်ႇဢူမ်၊ ၶဝ်ႈမုၼ်း ပီႇသၵိတ်ႉ၊ ပႅတ်ႊထရီႊ၊ မၢၵ်ႇၾႆးၾႃႉ၊ မႆႉသီၶဵဝ်ႈ၊ ယႃႈသီၶဵဝ်ႈ၊ ၵွၼ်ႈသီ၊ မၢၵ်ႇယၢင်ရူတ်ႉ ဢိၵ်ႇပႃးထႅင်ႈ ၽႃႈဢွမ်ႈႁူဝ်လိူၼ်ၼၢင်းယိင်း ၸဵမ်ၸိူဝ်းၼႆႉ။

သိုၵ်းမၢၼ်ႈ ယိုတ်းမိူင်းၼႆႉ သုမ်းၼႃႈလိၼ်သိုၵ်းဝႆႉလၢႆလၢႆတီႈသေဢမ်ႇၵႃး ဢွင်ႈတီႈလႆႈငိုၼ်းၶဝ်ႈၼွၵ်ႈမိူင်းၼမ် မိူၼ်ၼင်ႇ တီႈၵဵတ်ႉလၢၼ်ႉလႅၼ်လိၼ်ၵေႃႈ ၸုမ်းယိပ်းၵွင်ႈၵၢင်ႇၶဝ် ယိုတ်း ၵုမ်းဝႆႉ။

ၸုမ်းၾၢႆႇၵဵပ်းၶေႃႈမုလ်း ၵၢၼ်မၢၵ်ႈမီးၸိုင်ႈမိူင်း ၸဵင်ႇၸၢၼ်းဝၼ်းဢွၵ်ႇဢေႊသျႃႊတႄႉ ပိုၼ်ၽၢဝ်ႇဝႆႉဝႃႈ – ဝၢႆးလင် တပ်ႉသိုၵ်းမၢၼ်ႈ ယိုတ်းဢႃႇၼႃႇၸိုင်ႈမိူင်းမႃးၼႆႉ ၵၢၼ်မၢၵ်ႈမီးၼႂ်းမိူင်း တူၵ်းၵႂႃႇႁႅင်း ပဵၼ်တီႈဢၼ်တႅမ်ႇသုတ်းယဝ်ႉ – ဝႃႈၼႆ။