ဝၼ်းတီႈ 13/08/2025 ပူၼ်ႉမႃးၼႆႉ လုမ်းတတ်းသိၼ်ပိူင်ငဝ်ႈပိုင်းမိူင်း မိူင်းထႆး (ထိုင်းဖွဲ့စည်းပုံအခြေခံဥပဒေခုံရုံး) ပိုၼ်ၽၢဝ်ႇမၵ်းမၼ်ႈဝႃႈ – ပေႃးထိုင်မႃး ၼႂ်းဝၼ်းတီႈ 29 လိူၼ် ၼႆႉ ၶၢဝ်းယၢမ်းမိူင်းထႆး ဝၢႆးဝၼ်း 3 မူင်းၸိုင် တေတႅပ်းတတ်းတြႃး လွင်ႈၸွမ်ၽွင်းလူင်မိူင်းထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ဢၼ်ၺႃးသင်ႇၵိုတ်းလိုဝ်ႈတၼ်းႁဵင်းၼႃႈၵၢၼ်ဝႆႉၼၼ်ႉ ၸွင်ႇထုၵ်ႇလီထွၼ်တူဝ်ဢွၵ်ႇႁိုဝ် တေသိုပ်ႇႁဵတ်းသၢင်ႈၵႂႃႇၸိူင်ႉႁိုဝ်ၼႆၸိူဝ်းၼၼ်ႉ ဝႃႈၼႆ။

ၸွမ်ၽွင်းလူင်မိူင်းထႆး ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊၼႆႉ မီးလွင်ႈမိုတ်ႈၵိုဝ်းၸမ်ၸႂ်ၵၼ်ဝႆႉတင်း လူင်ပွင်ၸိုင်ႈမိူင်းၵမ်ႇပူးၶျႃး ၸဵမ်မိူဝ်ႈမိူင်းထႆးတင်း ၵမ်ႇပူးၶျႃး ပႆႇပဵၼ်ပၼ်ႁႃၵၼ် ၸွမ်းလႅၼ်လိၼ်ၼၼ်ႉ။ ၵူၺ်းၵႃႈ ယူႇတီႈပဵၼ်ၸွမ်ၽွင်းလူင်သေ ယွၼ်ႉမၼ်းၼၢင်း ႁဵတ်းႁႂ်ႈမီးလွင်ႈထၢင်ႇထိူမ် ၼႂ်းၾိင်ႈတိုဝ်းၵမ် ၸွမ်ၽွင်းလူင်ၼၼ်ႉလႄႈ ၸင်ႇလႆႈၺႃးသင်ႇၵိုတ်းလိုဝ်ႈၼႃႈၵၢၼ်ဝႆႉ။

ဝၢႆးသေ ၶလိပ်ႉသဵင် ၸွမ်ၽွင်းလူင်မိူင်းထႆး ဢုပ်ႇၵၼ်တင်းၸွမ်ၽွင်းလူင် (ၵဝ်ႇ) ႁုၼ်ႊသဵၼ်ႊ မိူင်းၵမ်ႇပူးၶျႃး ၸွတ်ႇၽႄႈၵႂႃႇယဝ်ႉ ယူႇတီႈ ပႃႇတီႇၾၢႆႇသၢၼ်ၶတ်းၶဝ် ၸင်ႇတၢင်ႇယိုၼ်ႈထိုင်တီႈလုမ်းတြႃး ႁႂ်ႈသင်ႇၵိုတ်းလိုဝ်ႈၼႃႈၵၢၼ်ဝႆႉၸူဝ်ႈၶၢဝ်း။

ၼႂ်းၶၢဝ်းယၢမ်းၼႆႉ ၸွမ်ၽွင်းလူင် တေလႆႈႁႃသၢၵ်ႈသေႇလၵ်းထၢၼ် တႃႇတေၼႄဝႃႈ မၼ်းၼၢင်းဢမ်ႇမီးတၢင်းၽိတ်း။

ၵဵဝ်ႇလူၺ်ႈ ၶလိပ်ႉသဵင် ၸွတ်ႇၽႄႈၵႂႃႇၼၼ်ႉသေ ၾၢႆႇၸုမ်းလူင်ပွင်ၸိုင်ႈမိူင်းထႆးၶဝ်တႄႉ မၢပ်ႇၼႄးဝႆႉဝႃႈ ပဵၼ်ၼမ်ႉမိုဝ်း ၸွမ်ၽွင်းလူင်(ၵဝ်ႇ) မိူင်းၵမ်ႇပူးၶျႃးၼႆသေ တွပ်ႇထဵင်ဝႆႉၼင်ႇၼႆ။  

ၾၢႆႇၼိုင်ႈၵေႃႈ လွင်ႈမိူင်းထႆးတင်း ၵမ်ႇပူးၶျႃး ပဵၼ်ပၼ်ႁႃၵၼ်ၸွမ်းလႅၼ်လိၼ်ၼႆႉ ႁဵတ်းႁႂ်ႈမီးလွင်ႈတုမ်ႉယွၼ်ႈၼိူဝ်မၼ်းၼၢင်းပႃး။ ၵူၺ်းၵႃႈ မၼ်းၼၢင်းတႄႉ သၢၼ်ၶတ်းလွင်ႈႁဵတ်းသၢင်ႈမိူင်းၵမ်ႇပူးၶျႃးသေ ၵမ်ႉထႅမ်ပၼ်ႁႅင်း လွင်ႈတူင်ႉၼိုင်ၵၢၼ်သိုၵ်း တပ်ႉသိုၵ်းထႆးဝႆႉယူႇ။

သင်ဝႃႈ ၼၢင်းသၢဝ်ၽႄႊထွင်ႊထၢၼ်ႊ သျိၼ်ႊၼဝတ်ႊ ၺႃးလုမ်းတြႃး တႅပ်းတတ်းႁႂ်ႈထွၼ်တူဝ် ဢွၵ်ႇတၼ်းႁဵင်းၸိုင် ၼႂ်းၸိူဝ်ႉၶိူဝ်းသျိၼ်ႊၼဝတ်ႊၼၼ်ႉ မၼ်ၼၢင်း တေပဵၼ်မႃး ၸွမ်ၽွင်းလူင် ၵေႃႉထီႉသၢမ် ဢၼ်ၶၢဝ်းယၢမ်းႁၢပ်ႇၵၢၼ်ပႆႇတဵမ်သေ ၺႃးထွၼ်တူဝ်ဢွၵ်ႇ။

မိူၼ်ၼင်ႇ ၵေႃႉပဵၼ်ပေႃႈမၼ်းၼၢင်း ထၵ်ႊသိၼ်ႊ သျိၼ်ႊၼဝတ်ႊလႄႈ ဢႃမၼ်းၼၢင်း ယိင်ႊလၵ်ႉ သျိၼ်ႊၼဝတ်ႊၵေႃႈ ၺႃးပူတ်းဢွၵ်ႇတၼ်းႁဵင်းၸွမ်ၽွင်းလူင် ယွၼ်ႉတပ်ႉသိုၵ်း ယိုတ်းဢႃႇၼႃႇၸိုင်ႈမိူင်း – သိုဝ်ႇၶၢဝ်ႇ CNA ဢွၵ်ႇဝႆႉၼင်ႇၼႆ။