ယၢမ်းလဵဝ် တီႈၶူဝ်ၶၢမ်ႈလႅၼ်လိၼ်တႆး – ထႆး ၶူဝ်မိုတ်ႈၵိုတ်းမၢႆ (1) ဝဵင်းတႃႈၶီႈလဵၵ်း ၸိုင်ႈတႆးပွတ်းဢွၵ်ႇၼႆႉ ၽူႈမီးပုၼ်ႈၽွၼ်းၾၢႆႇၵၢၼ်လုမ်းၶဝ် ႁပ်ႉႁဵတ်းပၼ်ၶိုၼ်းပပ်ႉမႂ်ႇ တႃႇၶၢမ်ႈလႅၼ်လိၼ် ဢၼ်မီးဢႃယု ၼိုင်ႈပီယဝ်ႉၼႆသေတႃႉ ၼိုင်ႈဝၼ်းလႂ် ၶဝ်ႁပ်ႉႁဵတ်းပၼ်မွၵ်ႈႁူဝ်သိပ်းၵေႃႉၵူၺ်းလႄႈ ႁဵတ်းႁႂ်ႈၵူၼ်းမိူင်း လႆႈၶဝ်ႈထႅဝ်ပႂ်ႉၼပ်ႉႁူဝ်ပၢၵ်ႇ။

ၵူၼ်းပိုၼ်ႉတီႈ ဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ပပ်ႉၼိုင်ႈပီၼႆႉ မိူဝ်ႈတႄႇမၼ်းဝႃႈ တေႁဵတ်းပၼ်ၼိုင်ႈဝၼ်းၼႆႉ 50 ၵေႃႉၼႆဝႃႇ။ မၢင်ဝၼ်းသမ်ႉ ၶဝ်ႁဵတ်းပၼ် 10 ၵေႃႉၵူၺ်း။ ဢၼ်ႁဵတ်းတႄႉ ၶဝ်ႁဵတ်းပၼ်ယူ။ ၵူၺ်းၵႃႈ ပေႃးမႃးတႅၵ်ႈၵၼ်တူၺ်း မိူဝ်ႈၵူႈပွၵ်ႈၼၼ်ႉ ပေႃးတေႁဵတ်းၼႆ ႁဝ်းဢဝ်ၶေႃႈမုလ်း မိူၼ်ၼင်ႇ – ၶႅပ်းႁၢင်ႈ၊ မၢႆၾၢင် ၸိူဝ်းၼႆႉ ၵႂႃႇၾၢၵ်ႇဝႆႉသေ ပေႃးၵၢင်ဝၼ်းမႃးၵေႃႈ လႆႈယဝ်ႉ။ ပွင်ႇဝႃႈ ၵႂႃႇၵၢင်ၼႂ်ၵေႃႈ ၵၢင်ဝၼ်းမႃးလႆႈယဝ်ႉႁဵတ်းၼၼ်ဢေႃႈ။ ဢၼ်ၸႂ်ႉၵူၼ်းၵၢင် (ၼၢႆးၼႃႈ) သေ ႁဵတ်းၵေႃႈမီး ၵူၺ်းၵႃႈ တေမီးသၢႆၽႂ်သၢႆမၼ်း။ မိူဝ်ႈၵူႈပွၵ်ႈတႄႉ ႁဵတ်းလႆႈငၢႆႈယူႇသေတႃႉ မိူဝ်ႈလဵဝ်ၼႆႉ ႁဵတ်းယၢပ်ႇဢေႃႈ။ တေဝႃႈႁိုဝ်ၼႆ ဝၢႆးၼမ်ႉထူမ်ႈမႃးၼႆႉ ႁဵတ်းႁိုဝ်ၵေႃႈ ဢမ်ႇႁူႉယဝ်ႉ”- ဝႃႈၼႆ။

ယွၼ်ႉၼမ်ႉထူမ်ႈလႄႈ တႃႇႁဵတ်းပပ်ႉၶၢမ်ႈလႅၼ်လိၼ် ဢၼ်မီးဢႃယုၼိုင်ႈပီၼႆႉ ၾၢႆႇၵၢၼ်လုမ်းၶဝ် ၵိုတ်းလိုဝ်ႈဝႆႉ တင်ႈတႄႇႁၢင်လိူၼ်ၵျူႊလၢႆႊ ပီ 2025 ၼၼ်ႉမႃးသေ တိုၵ်ႉမႃးႁဵတ်းပၼ်ၶိုၼ်း ၼႂ်းဝၼ်းတီႈ 12/08/2025 ၼႆႉၵူၺ်း။ တႃႇတေႁဵတ်းပပ်ႉလႆႈၼၼ်ႉ ၵူၼ်းပိုၼ်ႉတီႈ ဢၼ်လႆႈၵႂႃႇပႂ်ႉၶဝ်ႈထႅဝ် ၸဵမ်မိူဝ်ႈမိူင်းပႆႇလႅင်းၵေႃႈမီး ၼႆယဝ်ႉ။

“ဢၼ်ၶဝ်ႁဵတ်းပၼ်ၼၼ်ႉ ၼိုင်ႈဝၼ်းၼႆႉ တေမီးမွၵ်ႈ 30 ၵေႃႉႁဵတ်းၼႆၵူၺ်း။ ၵူၼ်းဢၼ်မႃးႁဵတ်းၵေႃႈ လႆႈၸႅၼ်ႇထႅဝ်ၵၼ် ၸဵမ်မိူဝ်ႈမိူင်းပႆႇလႅင်းၼၼ်ႉၼႃႇ။ မွၵ်ႈၵၢင်ၼႂ် 4 မူင်း ၼၼ်ႉၵူၺ်းၵေႃႈ သမ်ႉပေႃးမီး ၵူၼ်းၸႅၼ်ႇထႅဝ်ယူႇယဝ်ႉ။ ပေႃးဝႃႈၶဝ်ႁဵတ်းပၼ်တဵမ်ၵႂႃႇ 30 ၵေႃႉယဝ်ႉၼႆတႄႉ မႃးထႅင်ႈၵေႃႈ ဢမ်ႇႁဵတ်းပၼ်ယဝ်ႉၸိူင်ႉၼၼ်ဢိူဝ်ႈ။ ၶဝ်လၢတ်ႈ ၼႄ ၶေႃႈဢၢင်ႈမၼ်းဝႃႈ ပပ်ႉမၼ်းဢမ်ႇပေႃးၼႆၶႃႈဝႃႇ”- ၵူၼ်းပိုၼ်ႉတီႈ သိုပ်ႇလၢတ်ႈၼႄၼင်ႇၼႆ။

ယွၼ်ႉၼမ်ႉမႄႈသၢႆ ၵႆႉၼွင်းထူမ်ႈလႄႈ တီႈႁဵတ်းပၼ်ပပ်ႉၶၢမ်ႈလႅၼ်လိၼ်ၸူဝ်ႈၶၢဝ်းတင်း ပပ်ႉတႃႇၼိုင်ႈပီ ၸိူဝ်းၼႆႉ လႆႈမႃးၶွၼ်ႈၵၼ်တီႈၼိူဝ်ၶူဝ်ဝႆႉ။ ယွၼ်ႉၼၼ် ၵူၼ်းပႂ်ႉၶဝ်ႈထႅဝ် တႃႇႁဵတ်းပပ်ႉၵေႃႈၼမ်၊ ၵူၼ်းၸိူဝ်းၶဝ်ႈထႅဝ်တႃႇၶၢမ်ႈၶူဝ်ၵေႃႈ ၼမ်ႁႅင်းလႄႈ ဢွင်ႈတီႈယူႇၸိူဝ်းၼႆႉၵေႃႈ ၵႅပ်ႈပႃးသေ ၵမ်ႈၽွင်ႈ ထိုင်တီႈပဵၼ်လူမ်းၵေႃႈမီး ၼႆယဝ်ႉ။

ၵူၼ်းၶၢႆၵုၼ်ႇ တီႈဝဵင်းတႃႈၶီႈလဵၵ်း လၢတ်ႈတီႈၽူႈတွႆႇႁွၵ်ႈဝႃႈ – “ၵူၼ်းၼမ်ၼႃႇၶႃႈမိူဝ်ႈလဵဝ် ၾင်ႇတီႈတႂ်ႈၼၼ်ႉၵေႃႈ ဝၢႆးၼမ်ႉထူမ်ႈယဝ်ႉ ပိူၼ်ႈဢမ်ႇပႆႇၽဵဝ်ႈႁဵတ်းလွင်ႈမူတ်းသႂ်သင်။ ၵွပ်ႈၼႆ တင်းဝႂ်ပပ်ႉၶဵဝ်၊ ဝႂ်ပပ်ႉၼိုင်ႈပီ ၸိူဝ်းၼႆႉ မႃးၶွၼ်ႈတီႈၼိူဝ်မူတ်း တီႈယူႇမၼ်းၵေႃႈၵႅပ်ႈ ၵူၼ်းၵေႃႈသမ်ႉၼမ်ႁႅင်းၼၼ်ႉၼႃႇ။ ၵူၼ်းဢၼ်ဢဝ်ပပ်ႉသေ ၶၢမ်ႈၵေႃႈမီး ၵူၼ်းဢၼ်ဢဝ်မၢႆၾၢင်သေ ၶၢမ်ႈၵေႃႈမီး ၵူၼ်းတႄႉၼမ်တႄႉၼမ်ဝႃႈ ၼၼ်ႉယဝ်ႉ။ ၵမ်ႈၽွင်ႈ ၸႅၼ်ႇထႅဝ်သမ်ႉ ပေႃးပဵၼ်လူမ်းလူးၵွၼ်ႇဢေႃႈ ရူတ်ႉၵႃးၵေႃႈ တိတ်းၼႃႇ တႃႇတေ ၶၢႆႉလႆႈၼိုင်ႈသွၵ်ႈ ၼိုင်ႈသွၵ်ႈၼႆႉ ဢမ်ႇငၢႆႈၶႃႈ”- ဝႃႈၼႆ။

သိုပ်ႇလၢတ်ႈထႅင်ႈဝႃႈ – “တႃႇႁဵတ်းပပ်ႉၶၢမ်ႈလႅၼ်လိၼ်ၼႆႉ ၵမ်ႈၽွင်ႈ လႆႈပၼ်ငိုၼ်းတီႈၵူၼ်းၵၢင် (ၵူၼ်းၵိၼ်ၸၢင်ႈ) ႁဵတ်းပၼ်ၼိုင်ႈၵေႃႈလႂ် 800 ဝၢတ်ႇ ထိုင် 1,000 ဝၢတ်ႇ ယင်းလႆႈမွၼ်ငိုၼ်းတီႈၾၢႆႇၵၢၼ်လုမ်းၶဝ်သေ ၸင်ႇႁဵတ်းလႆႈၵေႃႈမီးဢေႃႈ”- ဝႃႈၼႆ။

ယၢမ်းလဵဝ် ၵႃႈႁဵတ်းပပ်ႉၶၢမ်ႈလႅၼ်လိၼ် တႃႇၼိုင်ႈပီၼႆႉ သင်ဝႃႈ တေႃႇဢႃယုပပ်ႉၸိုင် တေသဵင်ႈငိုၼ်း 100 ဝၢတ်ႇ၊ သင်ဝႃႈ ႁဵတ်းပပ်ႉမႂ်ႇၸိုင် တေသဵင်ႈယူႇ 300 ဝၢတ်ႇ ၼႆယဝ်ႉ။

ဝၢႆးသိုၵ်းမၢၼ်ႈ ယိုတ်းမိူင်းမႃးၼႆႉ ၵူၼ်းမိူင်းႁႃၵိၼ်လဵင်ႉတွင်ႉယၢပ်ႇ ဢမ်ႇမီးလွင်ႈႁူမ်ႇလူမ်ႈလႄႈ ႁၢမ်းသုၼ်ႇလႆႈတိုဝ်ႉတၢင်း ႁင်းၽႂ်မၼ်း။ ယွၼ်ႉၼၼ် တႃႇယူႇလွတ်ႈလႆႈလႄႈ တႃႇႁႃၵိၼ်လဵင်ႉတွင်ႉၼၼ်ႉ ၵူၼ်းမိူင်းဢွၼ်ပၢႆႈဢွၵ်ႇၼွၵ်ႈမိူင်း ၼမ်ၶိုၼ်ႈမႃးၵူႈမိုဝ်ႉၵူႈဝၼ်း။

ၾၢႆႇပလိၵ်ႈသိုၵ်းမၢၼ်ႈၶဝ်သမ်ႉ ပႂ်ႉၵူတ်ႇထတ်းထဵတ်ႈထၢမ် ၸွမ်းၵဵတ်ႉလၢၼ်ႇၶၢမ်ႈလႅၼ်လိၼ် ၸိူဝ်းၼႆႉ ႁၢဝ်ႈႁႅင်းသေ ႁဵတ်းႁႂ်ႈၵူၼ်းမိူင်း ၸိူဝ်းလူဝ်ႇၶၢမ်ႈလႅၼ်လိၼ် ဢွၼ်ၵၼ်ထူပ်းတၢင်းယၢပ်ႇၽိုတ်ႇ ဝႆႉယူႇတင်းၼမ် ၼႆယဝ်ႉ။