ဝၼ်းတီႈ 12/08/2025 ယၢမ်းဝၢႆးဝၼ်းမွၵ်ႈ 4 မူင်းၶိုင်ႈ ႁၢၼ်ႉၶၢႆၶမ်း “မွင်ႇႁဵင်း” (မောင်ဟိန်းရွှေဆိုင်) ဢၼ်ပိုတ်ႇဝႆႉတၢင်းဢွၵ်ႇၵၢတ်ႇလူင် ပွၵ်ႉ 3 ဝဵင်းမိူင်းသူႈ ၸိုင်ႈတႆးပွတ်းၸၢၼ်း ၺႃးၽူႈၸၢႆး 2 ၵေႃႉ ယိပ်းၵွင်ႈသေၶဝ်ႈၸူၼ် သုမ်းၵႂႃႇၶမ်း 60 ၵျၢပ်ႈလႄႈ ငိုၼ်း 200 သႅၼ်ပျႃး ၼႆယဝ်ႉ။
ၵူၼ်းပိုၼ်ႉတီႈ ဝဵင်းမိူင်းသူႈ လၢတ်ႈတီႈၽူႈတွႆႇႁွၵ်ႈဝႃႈ – “မိူဝ်ႈၽွင်ႈ ၶဝ်တေပိၵ်ႉႁၢၼ်ႉ တိုၵ်ႉၵဵပ်းၶမ်းယူႇၼၼ်ႉ မီးၵႃးသီၶၢဝ်လမ်းၼိုင်ႈ ပဵၼ်ၽူႈၸၢႆးသွင်ၵေႃႉ သႂ်ႇၶူဝ်းသီလမ် ယိပ်းၵွင်ႈၸေးမိုဝ်းသေ ၶဝ်ႈၸူၼ်ၼႂ်းႁၢၼ်ႉၶမ်းၼၼ်ႉ။ ၵူၼ်းၸူၼ်ၼၼ်ႉ လႆႈၵႂႃႇၶမ်း 60 ၵျၢပ်ႈလႄႈ ငိုၼ်း 200 သႅၼ်ပျႃး။ ယဝ်ႉၵေႃႈ ၵူၼ်းၸူၼ်ၼၼ်ႉ ႁေႃႈၵႃးပၢႆႈဢွၵ်ႇၵႂႃႇတၢင်းမိူင်းၸၢင်ၼၼ်ႉဢေႃႈ”- ဝႃႈၼႆ။
ဝဵင်းမိူင်းသူႈၼႆႉ သိုၵ်းမၢၼ်ႈယိုတ်းမိူင်း တိုၵ်ႉၵုမ်းဝႆႉသေ ပၢင်တေႃႇလွင်း ၵဵမ်းဢွၼ်ႊလၢႆႊ ၸိူဝ်းၼႆႉၵေႃႈ မီးၼမ်လိူင်ႇႁႅင်း။
မိူၼ်ၼႆၼင်ႇၵဝ်ႇ မိူဝ်ႈဝၼ်းတီႈ 28/04/2025 ၼၼ်ႉၵေႃႈ မီးၵူၼ်း 5 ၵေႃႉ ၶဝ်ႈၸူၼ် ႁၢၼ်ႉၶၢႆၶမ်း သူၺ်ႇၸႃႇမၼီႇ ၼႂ်းပွၵ်ႉဢွင်ႇပိၼ်ႇလႄႇ ၸႄႈဝဵင်းၶျၢမ်းမျႃႉတႃႇသီႇ တိူင်းဝဵင်းလိူဝ်ႇ ၼၼ်ႉၵေႃႈ သုမ်းၵႂႃႇၶမ်းမွၵ်ႈ 23 ၵျၢပ်ႈ (ၵိုင်ႇငိုၼ်းမွၵ်ႈ 1,600 သႅၼ်) လႄႈ ၾူၼ်း ၸိူဝ်းၼႆႉ။
တႅမ်ႈ – ၸၢႆးသႅင်ဢၢႆႈ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ