ပၢင်တိုၵ်း သိုၵ်းမၢၼ်ႈယိုတ်းမိူင်းတင်း ၸုမ်းႁူမ်ႈႁွမ်းသိုၵ်းၶၢင် တီႈဝဵင်းမၢၼ်ႈမေႃႇ ၸႄႈမိူင်းၶၢင်ၼၼ်ႉ တိုၵ်ႉသိုပ်ႇပဵၼ်ႁၢဝ်ႈႁႅင်း ၾၢႆႇသိုၵ်းမၢၼ်ႈ ၸႂ်ႉပႃးႁိူဝ်းမိၼ်တိုၵ်း ၶိူင်ႈၵွင်ႈလူင် ၶိူင်ႈတရူၼ်ႊ ၸိူဝ်းၼႆႉသေ လိူဝ်ၼၼ်ႉ ထူဝ်းႁႅင်းသိုၵ်းလေႃႇတိုၵ်းထႅင်ႈ ဝႃႈၼႆ။
တႄႇဢဝ်ဝၼ်းတီႈ 01/08/2025 ၼၼ်ႉမႃး ႁိူဝ်းသိုၵ်းမၢၼ်ႈ လုၵ်ႉတီႈသဵၼ်ႈတၢင်းၼမ်ႉသေ ထႅမ်ႁႅင်းသိုၵ်း ထိုင်မႃးတီႈဝဵင်းမၢၼ်ႈမေႃႇ။ ဝၢႆးၼၼ်ႉ ၸႂ်ႉႁိူဝ်းမိၼ်တင်း ၶိူင်ႈတရူၼ်ႊသေ ထူဝ်းသိုၵ်းလေႃႇတိုၵ်း တပ်ႉသိုၵ်းၶၢင်ႁၢဝ်ႈႁႅင်း ထိုင်တီႈယိုတ်းၵုမ်းလႆႈၶိုၼ်း ၼႃႈတီႈၵမ်ႈၽွင်ႈ ၼႆယဝ်ႉ။
ၼႂ်းၵၢင်လိူၼ်ၼႆႉ ၸုမ်းသိုၵ်းၶၢင် လႆႈထွႆဢွၵ်ႇၶိုၼ်း တပ်ႉၵွင်ႈလူင်သိုၵ်းမၢၼ်ႈ 366 လႄႈတင်း ဝၢင်းႁိူဝ်းမိၼ်၊ ၾၢႆႇသိုၵ်းမၢၼ်ႈ ၶိုၼ်းၶဝ်ႈပၵ်းတပ်ႉသေ သွင်ၾၢႆႇတိုၵ်ႉသိုပ်ႇပဵၼ်ပၢင်တိုၵ်းၵၼ်ဝႆႉ ဝႃႈၼႆ။
ပၢင်တိုၵ်းယိုတ်း ဝဵင်းမၢၼ်ႈမေႃႇၼႆႉ ၸုမ်းႁူမ်ႈႁွမ်းသိုၵ်းၶၢင်ၶဝ် ၶဝ်ႈလေႃႇတိုၵ်းတပ်ႉသိုၵ်းမၢၼ်ႈ မႃးႁိုင်ၶၢဝ်းတၢင်း 8 လိူၼ်ပၢႆ။ ၾၢႆႇသိုၵ်းမၢၼ်ႈၵေႃႈ ၼင်ႇႁိုဝ် တေဢမ်ႇပွႆႇသုမ်းဝဵင်းမၢၼ်ႈမေႃႇၼၼ်ႉ လုၵ်ႉတီႈသဵၼ်ႈတၢင်းၼမ်ႉသေ ထႅမ်ႁႅင်းသိုၵ်းႁႅင်းၵွင်ႈၵၢင်ႇတင်းၼမ်၊ ႁိူၼ်းယေးၵူၼ်းမိူင်းၵေႃႈ ၺႃးၸၢၵ်ႇမၢၵ်ႇလူႉၵွႆၼမ် ၵူၼ်းမိူင်းပိုၼ်ႉတီႈ လႆႈငိူင်ႉပၢႆႈၽေးသိုၵ်းဝႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ