ဝၼ်းတီႈ 11/08/2025 ၼႆႉ ယူႇတီႈ လုမ်းတြႃးမိူင်းဢိၼ်ႊတီႊယိူဝ်ႊ ပိုၼ်ၽၢဝ်ႇဢွၵ်ႇမႃးဝႃႈ ၼႂ်းၶၢဝ်းတၢင်း 8 ဝူင်ႈၼႆႉ ႁႂ်ႈဢဝ်မႃၸိူဝ်းဢမ်ႇမီးၸဝ်ႈၶွင် (မႃၶၢင်ႈတၢင်း) ဢၼ်မီးၸွမ်း ၼႂ်းပွၵ်ႉၼႂ်းယွမ်ႇလႄႈ ၼႂ်းဝဵင်းလူင်ၼိဝ်ႊတေႊလီႊ ၸိူဝ်းၼၼ်ႉ ႁႂ်ႈၶၢႆႉၵႂႃႇယူႇသဝ်း ဢွင်ႈတီႈတူၺ်းထိုင်လုမ်းလႃးမႃ ဝႃႈၼႆ။

ႁွင်ႈၵၢၼ်သိုဝ်ႇၶၢဝ်ႇၶဝ် ဢွၼ်ၵၼ်ႁၢႆးငၢၼ်းဝႃႈ – လွင်ႈလုၵ်ႈဢွၼ်ႇ ပဵၼ်တၢင်းပဵၼ်မႃမႃႈၼႆႉ ၼမ်ၶိုၼ်ႈမႃးလႄႈ ဝၢႆးလင်ၼၼ်ႉ လုမ်းတြႃးၸင်ႇပိုၼ်ၽၢဝ်ႇဢွၵ်ႇၶေႃႈပူင်ဢၼ်ၼႆႉမႃး – ဝႃႈၼႆ။ 

ပူၼ်ႉမႃး မိူဝ်ႈလိူၼ်ဢေႊပရိူဝ်ႊၼၼ်ႉ လူင်ပွင်ၸိုင်ႈမိူင်းဢိၼ်ႊတီႊယိူဝ်ႊပိုၼ်ၽၢဝ်ႇဝႆႉဝႃႈ – ၼႂ်းလိူၼ်ၵျႅၼ်ႊၼိဝ်ႊရီႊ ႁူဝ်ပီ 2025 ၼႆႉ ၵူၼ်းမိူင်းဢိၼ်ႊတီႊယိူဝ်ႊ ၺႃးမႃၶူပ်းတူဝ်ႈမိူင်းပတ်ႉပိုၼ်ႉ မီး 430,000 ၵေႃႉ။ မိူဝ်ႈပီ 2024 ပူၼ်ႉမႃးၼၼ်ႉသမ်ႉ တင်းပီ ၵူၼ်းၸိူဝ်းၺႃးမႃၶူပ်း မီးဝႆႉ 3.7 လၢၼ်ႉၵေႃႉ – ဝႃႈၼႆ။

သိုဝ်ႇၶၢဝ်ႇၼႂ်းပိုၼ်ႉတီႈတႄႉ ႁၢႆးငၢၼ်းဝႆႉဝႃႈ ၼႂ်းဝဵင်းၼိဝ်ႊတေႊလီႊ ဝဵင်းလဵဝ်ၵူၺ်း မႃၸိူဝ်းဢမ်ႇမီးၸဝ်ႈၶွင် (မႃၶၢင်ႈတၢင်း) မီးယူႇ 1 လၢၼ်ႉတူဝ်။ ၵူၺ်းၵႃႈ ၵဵဝ်ႇလူၺ်ႈႁူဝ်ၼပ်ႉ ၼႆႉသေ ပႆႇမီးၽႂ်ယိုၼ်ယၼ်တႅတ်ႈတေႃး။

ၽူႈၵွၼ်း ၸႄႈဝဵင်းၼိဝ်ႊတေႊလီႊတႄႉ လၢတ်ႈဝႃႈ – တေႁဵတ်းၵႂႃႇၸွမ်းၼင်ႇၶေႃႈပူင်လုမ်းတြႃး ႁႂ်ႈတဵမ်တီႈသေ ၼႂ်းၶၢဝ်းတၢင်း 6 ဝူင်ႈၼႆႉ တေၶတ်းၸႂ်ႁဵတ်း ယႃႇႁႂ်ႈလႆႈႁၼ်မႃ ၸိူဝ်းဢမ်ႇမီးၸဝ်ႈၶွင် (မႃၶၢင်ႈတၢင်း) ၸိူဝ်းၼႆႉၼႆ – သိုဝ်ႇၶၢဝ်ႇ DVB ဢွၵ်ႇဝႆႉၼင်ႇၼႆ။