ၵူၼ်းၼုင်ႈၶူဝ်းသိုၵ်းမၢၼ်ႈ ပလိၵ်ႈမၢၼ်ႈ ယွၼ်းၵိၼ်ငိုၼ်း ၵူၼ်းၵႂႃႇသိုဝ်ႉၶူဝ်းၵုၼ်ႇလိပ်းတီႈၵၢတ်ႇလူင် ႁိမ်းၸမ် သီႇယႅၵ်ႈၾႆးၶဵဝ်ၾႆးလႅင် တီႈဝဵင်းတူၼ်ႈတီး ၸိုင်ႈတႆးပွတ်းၸၢၼ်း။
မိူဝ်ႈဝႃးဝၼ်းတီႈ12/8/2025 ယၢမ်းၵၢင်ၼႂ်ၸဝ်ႉ 3 မူင်း ၽွင်းၼၢင်းယိင်းၵူၼ်းၶၢႆၵၢတ်ႇ ၵႂႃႇသိုဝ်ႉၵုၼ်ႇလိပ်း တီႈၼႂ်းၵၢတ်ႇမဵဝ်ႉမ ၼၼ်ႉထုၵ်ႇ ၵူၼ်းၼုင်ႈၶူဝ်းပလိၵ်ႈသိုၵ်းမၢၼ်ႈ 4 ၵေႃႉ ႁႄႉၵူတ်ႇထတ်း ရူတ်ႉၶိူင်ႈ တီႈႁိမ်းၸမ် ၵၢတ်ႇမဵဝ်ႉမ ယွၼ်းငိုၼ်း 3 မိုၼ်ႇပျႃး ဝႃႈၼႆ။
ၼၢင်းယိင်း ဢၼ်လႆႈထူပ်းႁၼ်တေႃႇၼႃႈတေႃႇတႃ ၵေႃႉၼိုင်ႈ လၢတ်ႈၽူႈတွႆႇႁွၵ်ႈဝႃႈ – “ၵၢင်ၼႂ်ၸဝ်ႉတိုၵ်ႉလပ်းသိင်ႇယူႇ၊ ၵူၼ်းၼုင်ႈၶူဝ်းပလိၵ်ႈသိုၵ်းမၢၼ်ႈၶဝ် လုၵ်ႉၼႂ်းလပ်းသိင်ႇ ၼၼ်ႉဢွၵ်ႇမႃး၊ ၶူဝ်းၶဝ် ပေႃးၵူဝ်ႈယွၵ်းယွႆမူတ်း ၊ ၵွင်ႈၵေႃႈဢမ်ႇပႃး ၊ ၵႃးပလိၵ်ႈၵေႃႈ ဢမ်ႇမီး ၊ ၵူတ်ႇထတ်းၵူၼ်းၵႂႃႇမႃး မွၵ်ႈၼိုင်ႈၸူဝ်ႈမူင်းၼႆႉယဝ်ႉ ပႆတၢင်းမိူဝ်းၵႂႃႇၶိုၼ်း ။ မိူင်းလႅင်းယဝ်ႉၵေႃႈဢမ်ႇႁၼ်ၶဝ်ယဝ်ႉ ၊ ၶဝ်ၵူတ်ႇထတ်းၵူၼ်းၵႂႃႇမႃး ယဝ်ႉယွၼ်းငိုၼ်း 3 မိုၼ်ႇပျႃး”- ဝႃႈၼႆ။
ၵူၼ်းၼုင်ႈၶူဝ်းပလိၵ်ႈသိုၵ်းမၢၼ်ႈ ႁႄႉရူတ်ႉၵႃးၵႂႃႇမႃးၼိူဝ်သဵၼ်ႈတၢင်းၵၢတ်ႇၼၼ်ႉသေ ၵူတ်ႇထတ်းယွၼ်းငိုၼ်းပေႃးဢမ်ႇပၼ်လႆႈ တေႁွင်ႉၵႂႃႇလုမ်းၼႆ လွၵ်ႇငိူတ်ႈၼင်ႇၼႆ။ ၽွင်းၼၼ်ႉ လုမ်းပလိၵ်ႈဢမ်ႇပိုတ်ႇလႄႈ ၸၢင်ႈပဵၼ်ပလိၵ်ႈသိုၵ်းမၢၼ်ႈပွမ်ၵူၺ်းၼႆ မၼ်းၼၢင်းသိုပ်ႇလၢတ်ႈထႅင်ႈၼင်ႇၼႆ။
“ငဝ်းလၢႆးဝၢၼ်ႈမိူင်းဢမ်ႇလီ ၊ ၼႆႉတင်းဢမ်ႇမႃးၵၢတ်ႇၵူႈဝၼ်းယင်းၺႃးယူႇ ၊ ၸဝ်ႈၵႃးၸိူဝ်းၼၼ်ႉၵေႃႈႁႄႉသေ ယွၼ်းငိုၼ်း ၊ ပေႃးၵူၼ်းၶီႇရူတ်ႉမႃး ဢဝ်ဝႆႉသေႃးရူတ်ႉသေ ယွၼ်းငိုၼ်း ၊ တႃႇႁႃၵိၼ်လဵင်ႉတွင်ႉၵေႃႈယၢပ်ႇၼႃႇ ထႅင်ႈဢိၼ်ႉမႃးၵၢတ်ႇၵေႃႈဢမ်ႇႁတ်းၵႂႃႇယဝ်ႉ”- ဝႃႈၼႆ။
မိူၼ်ၼင်ႇၼႆ တီႈတၢင်းလဵပ်ႈဝဵင်းတူၼ်ႈတီးႁိမ်းလုမ်း mytel ၼၼ်ႉၵေႃႈၵူၼ်းၼုင်ႈၶူဝ်းပလိၵ်ႈသိုၵ်းမၢၼ်ႈ ယွၼ်းငိုၼ်းၵူၼ်းၵႂႃႇမႃးၽွင်းၵၢင်ၶမ်ႈၵၢင်ၶိုၼ်း ဝႃႈၼႆ။
“တၢင်းလဵပ်ႈဝဵင်းၼႆႉၵေႃႈ မီးပလိၵ်ႈသိုၵ်းမၢၼ်ႈသွင်ၵေႃႉ ၊ ၶဝ်ပႂ်ႉၽွင်းၵၢင်ၶမ်ႈၵၢင်ၶိုၼ်းၵူၺ်း ယဝ်ႉၵေႃႈယွၼ်းငိုၼ်းၵူၼ်းၵႂႃႇမႃး ၊ ပေႃးၵၢင်ၼႂ်မိူင်းလႅင်းတႄႉ ဢမ်ႇႁၼ်ၽႂ်ယဝ်ႉ”- ဝႃႈၼႆ။
ပေႃးႁၼ်ၵူၼ်းၼုင်ႈၶူဝ်းပလိၵ်ႈသိုၵ်းမၢၼ်ႈ ယွၼ်းငိုၼ်း ဢမ်ႇမႅၼ်ႈတင်းၵၢၼ် လႄႈသင် ဢမ်ႇၸႂ်ႈၽွင်းၶၢဝ်းယၢမ်းၼႂ်းၵၢၼ်ၼႆၸိုင် ၵူၼ်းပိုၼ်ႉတီႈထုၵ်ႇလီ ၸႅင်ႈၽူႈမီးပုၼ်ႈၽွၼ်းၼႂ်းပွၵ်ႉၼႂ်းယွမ်ႇၽႂ်မၼ်း- ၵူၼ်းပိုၼ်ႉတီႈလၢတ်ႈ။
ၵူၼ်းၸၢႆးဢႃယု 30 လၢတ်ႈၽူႈတွႆႇႁွၵ်ႈဝႃႈ -“ပေႃးႁၼ်ၵူၼ်းၼုင်ႈၶူဝ်းသိုၵ်းၵေႃႈ ဢမ်ႇၶႂ်ႈႁႂ်ႈၵူဝ်ႇၵမ်းလဵဝ် ၊ ၶဝ်ႁူႉဝႃႈပိူၼ်ႈၵူဝ်ၼႆသေ ၵူၼ်းႁဵတ်းၵိၼ်မီးၼမ်ၼႃႇ ၊ ပေႃးႁၼ်ၵူၼ်းၸိူင်ႉၼႆ ၸႅင်ႈ ၽူႈမီးပုၼ်ႈၽွၼ်းၶဝ်ၼႆႉ လီသေပိူၼ်ႈယဝ်ႉ ၊ ၽူႈမီးပုၼ်ႈၽွၼ်းၶဝ်ၵေႃႈလူဝ်ႇ ဢဝ်လိူင်ႈပၼ်လွင်ႈၼႆႉ”- ဝႃႈၼႆ။
မိူၼ်ၼႆ ၼႂ်းဝၼ်းတီႈ15/7/2025 ယၢမ်းၵၢင်ၶမ်ႈ 9 မူင်း ပလိၵ်ႈမၢၼ်ႈ တီႉၺွပ်း ၵူၼ်းၵႂႃႇႁဵတ်းၵၢၼ်သေပွၵ်ႈႁိူၼ်းၶိုၼ်း ၵူၼ်းၸၢႆး မွၵ်ႈ 20 ၵေႃႉတၢင်းၾၢႆႇႁွင်ႇၵၢတ်ႇလူင်လႄႈ ၼႂ်းပွၵ်ႉၵၢၼ်ႇဢွၵ်ႉ ထိုင်ဝၼ်းမိူဝ်ႈၼႆႉ ဢမ်ႇလႆႈတင်းၵပ်းသိုပ်ႇသင် ဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ