တီႈဝဵင်းလၢႆႇၸႃႇ ငဝ်ႈငုၼ်းသိုၵ်းၶၢင် KIO/ KIA ၼႂ်းမိူင်းၶၢင်ၼၼ်ႉ ယွၼ်ႉၾူၼ်တူၵ်းႁၢဝ်ႈႁႅင်းသေ ႁဵတ်းႁႂ်ႈၼမ်ႉႁူၺ်ႈၼမ်ႉလွႆ လုပ်ႇၼွင်းထူမ်ႈသႂ်ႇႁိူၼ်းယေးၵူၼ်းမိူင်း၊ ႁွင်ႈတၢင်းၶၢႆလႄႈ ရူတ်ႉၵႃး တင်းၼမ် လူႉသုမ်းၸွမ်း။

ၼႂ်းဝၼ်းတီႈ 11/08/2025 တႄႇယၢမ်းၵၢင်ၼႂ်မွၵ်ႈ 5 မူင်း ၾူၼ်တူၵ်းႁၢဝ်ႈႁႅင်း ၼႂ်းဝဵင်းလၢႆႇၸႃႇ။ ထိုင်ၶၢဝ်းယၢမ်းမွၵ်ႈ 10 မူင်းၼႆႉ ၼမ်ႉႁွင်ႈ ဢၼ်လႆလတ်းဝဵင်းလၢႆႇၸႃႇၼၼ်ႉ ၼွင်းလူၼ်ႉၾင်ႇသေ လႆၶဝ်ႈၼႂ်းႁိူၼ်းယေးၵူၼ်းမိူင်းလႄႈ ရူတ်ႉၶိူင်ႈၵေႃႈ လွင်ႈလႆပႃးၵႂႃႇၸွမ်းၼမ်ႉ ဝႃႈၼႆ။

ပူၼ်ႉမႃး မိူဝ်ႈဝၼ်းတီႈ 04/08/2025 ၼၼ်ႉၵေႃႈ ယွၼ်ႉၼမ်ႉႁွင်ႈ ၵိုင်ႉၵၢင်ႉၼွင်းထူမ်ႈႁိူၼ်းယေး ၵူၼ်းမိူင်းၼႂ်းဝဵင်းလၢႆႇၸႃႇလႄႈ ၵူၼ်းမိူင်းလႆၸွမ်းၼမ်ႉ လူႉတၢႆ 6 ၵေႃႉ၊ ႁိူၼ်းယေးလူႉၵွႆပၢၵ်ႇပၢႆ။ ၾႆးၾႃႉၵေႃႈၶၢတ်ႇဝႆႉ တေႃႇထိုင်ဝၼ်းမိူဝ်ႈၼႆႉ။

တီႈဝဵင်းလၢႆႇၸႃႇၼႆႉ ၵူၼ်းပၢႆႈၽေးသိုၵ်းၵေႃႈ မႃးယူႇသဝ်းဝႆႉတင်းၼမ်။ ယၢမ်းလဵဝ် ၺႃးၽေးၼမ်ႉထူမ်ႈသေ လႆႈငိူင်ႉပၢႆႈတီႈယူႇထႅင်ႈ ယၢပ်ႇၽိုတ်ႇတႃႇယူႇသဝ်းလႄႈ တႃႇၵိၼ်ယႅမ်ႉႁၢဝ်ႈႁႅင်း။ ဢိင်ၼိူဝ်လွင်ႈၼႆႉ ၵူၼ်းပိုၼ်ႉတီႈတုၵ်းယွၼ်းဝႆႉ ႁႂ်ႈၸုမ်းသိုၵ်း KIO ၸွႆႈလူလွမ်တူၺ်းထိုင်ပၼ် – သိုဝ်ႇၶၢဝ်ႇ Kachin News Group ဢွၵ်ႇဝႆႉၼင်ႇၼႆ။