မိူဝ်ႈၼႆႉ ဝၼ်းတီႈ 13/08/2025 ယၢမ်းၵၢင်ၼႂ်ၸဝ်ႉမွၵ်ႈ 1 မူင်းၼၼ်ႉ ႁိူဝ်းမိၼ်ၵျႅၵ်ႉၾၢႆႇတႃႇ (Jetfighter) သိုၵ်းမၢၼ်ႈ ပွႆႇမၢၵ်ႇလူင် သႂ်ႇႁိူၼ်းယေးၵူၼ်းမိူင်း ၼႂ်းၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

မၢၵ်ႇႁိူဝ်းမိၼ်သိုၵ်းမၢၼ်ႈ တူၵ်းသႂ်ႇၺႃးႁိူၼ်းယေးၵူၼ်းမိူင်း တီႈဝၢၼ်ႈပၢင်ပဝ်း (ပၢင်မၢၵ်ႇၶေႃ – ဇီးပင်စခန်း) ပဵၼ်မၢၵ်ႇလူင်သႅၼ်း 500 ပွင်ႊလႄႈ ႁဵတ်းႁႂ်ႈႁိူၼ်းယေးၵူၼ်းမိူင်း လူႉၵွႆၵႂႃႇၸွမ်းတင်းၼမ်ၼႆ ၼၢင်းယိင်းဢႃယု 30 ပီပၢႆ ၵေႃႉယူႇဝႆႉၼႂ်းဝဵင်းၵျွၵ်ႉမႄး လၢတ်ႈၼႄတီႈၽူႈတွႆႇႁွၵ်ႈၼင်ႇၼႆ။

“မိူဝ်ႈၽွင်းၶဝ်မႃးပွႆႇမၢၵ်ႇၼၼ်ႉ ႁိူၼ်းပေႃးသၼ်ႇလူင်ၵႂႃႇ။ ထွမ်ႇသဵင်မၼ်းတႄႉ လႅပ်ႈပဵၼ်ႁႅင်း 500 ပွင်ႊၼၼ်ႉ။ ၸိူဝ်းၼၼ်ႉ ၵူၼ်းဢမ်ႇပႆႇမႃးယူႇလႄႈ ဢမ်ႇတိူဝ်ႉၵူၼ်း။ ႁိူၼ်းတႄႉၵေႃႈ ၵွႆၵႂႃႇမွၵ်ႈ 7-8 လင်ၼႆႉယူႇ”။

မိူဝ်ႈဝၼ်းတီႈ 12 ယၢမ်းႁူဝ်ၶမ်ႈၼၼ်ႉၵေႃႈ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇ ၼႂ်းဝၢၼ်ႈတေႃႉၽႄႇ ဢိူင်ႇၵုၼ်ၵေႃ ၸႄႈဝဵင်းၵျွၵ်ႉမႄးသေတႃႉ ယွၼ်ႉၵူၼ်းဝၢၼ်ႈၸိူဝ်းယူႇၼႂ်းထုင်ႉၼၼ်ႉ ဢမ်ႇမီးလႅင်းၾူၼ်း လႅင်းဢိၼ်ႊထိူဝ်ႊၼႅတ်ႉလႄႈ ၵပ်းသိုပ်ႇတိတ်းတေႃႇ ပႆႇလႆႈႁူႉၸွမ်းႁူဝ်ယွႆႈတႅတ်ႈတေႃး။

ၼႂ်းၶၢဝ်းတၢင်းၽၢၵ်ႇလိူၼ် တႄႇဢဝ်ဝၼ်းတီႈ 02-13/08/2025 ၼႆႉ သိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇသႂ်ႇၼႂ်းၼႃႈတီႈသိုၵ်းတဢၢင်းၵုမ်းၵမ် ၸူဝ်ႈၶၢဝ်းၼႆႉ ဢမ်ႇယွမ်း 10 ပွၵ်ႈယဝ်ႉသေ မီးၵူၼ်းမိူင်း မၢတ်ႇၸဵပ်းလူႉတၢႆၵႂႃႇၸွမ်း 34 ၵေႃႉ၊ ႁိူၼ်းယေးၵူၼ်းမိူင်းလူႉၵွႆၵႂႃႇၸွမ်း ၼပ်ႉႁူဝ်သိပ်းလင်။ ၵူၼ်းမိူင်း ၼႂ်းပိုၼ်ႉတီႈၵမ်ႈၽွင်ႈ ဢမ်ႇႁတ်းယူႇၸွမ်းဝၢၼ်ႈၸွမ်းဝဵင်း လႆႈငိူင်ႉပၢႆႈဢွၵ်ႇၵႂႃႇယူႇဝႆႉတၢင်ႇတီႈ ၼႆယဝ်ႉ။

ၸႄႈဝဵင်းၵျွၵ်ႉမႄးၼႆႉ သိုၵ်းတဢၢင်း TNLA ၵုမ်းၵမ်ဝႆႉၸူဝ်ႈၶၢဝ်းသေ ဝၢႆးလင် သိုၵ်းမၢၼ်ႈ တိုၵ်းယိုတ်း ဢဝ်လႆႈၶိုၼ်း ဝဵင်းၼွင်ၶဵဝ်ၼႆႉ ၾၢႆႇသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်း ပွႆႇမၢၵ်ႇလူင်သႂ်ႇၼႂ်းၼႃႈတီႈ သိုၵ်းတ ဢၢင်းၵုမ်းၵမ် ပိူဝ်ႈတႃႇပဵၼ်ႁႅင်းဢီး ဢဝ်မႃးတေႃႇလွင်းၵၼ် တင်းသိုၵ်းတဢၢင်း ၼႂ်းပၢင်ႁူပ်ႉဢုပ်ႇဢူဝ်း ၵၼ် ၼႂ်းလိူၼ်ဢေႃႊၵတ်ႊသ်ၼႆႉၼႆ – လူၺ်းယေႇဢူး ၽူႈၶၢၼ်ပၢၵ်ႇ ၸုမ်းသိုၵ်းတဢၢင်း ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ ၼင်ႇၼႆ။

တႅမ်ႈ – ၽူၺ်းၼုမ်ႇ