မၢႆတွင်း ဝၼ်းၵိူတ်ႇၼၢင်းႁေႃၶမ်းထႆး တူၼ်ထူၼ်ႈ 9 ဢႃယုၶွပ်ႈတဵမ် 93 ပီသေ ယူႇတီႈလွႆၵေႃႇဝၼ်း လႆႈၸတ်းႁဵတ်းပၢင်ယုၵ်ႉယွင်ႈဢဝ်ၵုင်ႇမုၼ်ၵႂႃႇ။
ဝၼ်းတီႈ 12/08/2025 ယၢမ်းၵၢင်ၶမ်ႈ 7 မူင်း ၸဝ်ႈသိုၵ်းလူင် ၶမ်းၵွၼ်းၸိုၼ်ႈ ဢွၼ်ၼမ်း ၸတ်းႁဵတ်းပၢင်ယုၵ်ႉယွင်ႈဢဝ်ၵုင်ႇမုၼ် ဝၼ်းၵိူတ်ႇၸဝ်ႈၼၢင်းႁေႃၶမ်းထႆး တူၼ်ထူၼ်ႈ 9 တီႈၼႃႈလိၼ်သိုၵ်းမၢႆ (1) လွႆၵေႃႇဝၼ်း RCSS မီးၽူႈၶဝ်ႈႁူမ်ႈ 980 ပၢႆ ၼႆယဝ်ႉ။
ပၢင်ယုၵ်ႉယွင်ႈ ဝၼ်းၵိူတ်ႇၼၢင်းႁေႃၶမ်းထႆး တူၼ်ထူၼ်ႈ 9 ၼႂ်းဝၼ်းတီႈ 12 ၼႆႉ ယူႇတီႈ ၼႃႈလိၼ်သိုၵ်း မၢႆ (1) လွႆၵေႃႇဝၼ်းသေ ယၢမ်းၵၢင်ၼႂ် တၵ်းဝၢတ်ႇ (တုင်းသွမ်း) တီႈပၢင်ႇဝတ်ႉၵေႃႇဝၼ်းဢိၼ်း။ လူႇတၢၼ်းယၢတ်ႇၼမ် ၵၢပ်ႈသွမ်းသင်ၶၸဝ်ႈလႄႈ လဵင်ႉလူၵူၼ်းထဝ်ႈ/ ၵူၼ်းၵႄႇ။
ထိုင်မႃး ယၢမ်းၵၢင်ၶမ်ႈ 7 မူင်း – တႄႇၶပ်ႉမၢႆ ပၢင်ၵႅဝ်ႈၵႂႃႇ မိူၼ်ၼင်ႇ – သၢၵ်ႈဢုပ်းငိုၼ်း၊ ဢုပ်းၶမ်းလႄႈ ၸပ်းတဵၼ်းယွၼ်းသူးထိုင် ၸဝ်ႈၼၢင်းႁေႃၶမ်းထႆး တူၼ်ထူၼ်ႈ 9 ၵႂႃႇ ၸဵမ်ၸိူဝ်းၼႆႉ။ ယဝ်ႉၵေႃႈ ၸွမ်ႁၢၼ် ၶိူဝ်းငိုၼ်း ၽူႈပွင်ၵၢၼ်သိုၵ်း တပ်ႉသိုၵ်းၸိုင်ႈတႆး (RCSS) ၵေႃႈ ၶဝ်ႈႁူမ်ႈၸွမ်း။
မိူၼ်ၼႆ ၼင်ႇၵဝ်ႇ ဝၼ်းတီႈ 12 ယၢမ်းၵၢင်ၶမ်ႈ ယူႇတီႈ တႆးႁွတ်ႈမိူင်းၵွၵ်ႇ (ၵုင်းထဵပ်ႈ) ႁူမ်ႈၵၼ် ၵႂႃႇၶဝ်ႈႁူမ်ႈပၢင်ယုၵ်ႉယွင်ႈဝၼ်းၵိူတ်ႇ ၼၢင်းႁေႃၶမ်းထႆး တူၼ်ထူၼ်ႈ 9 တီႈသၼၢမ်လူင် ၵၢင်ဝဵင်းမိူင်းၵွၵ်ႇ ၸိုင်ႈထႆး။
လိူဝ်ၼၼ်ႉ တႆးႁွတ်ႈၵဵင်းမႂ်ႇ ႁႅင်းၵူၼ်း 40 ပၢႆ ႁူမ်ႈၵၼ် ၽုၵ်ႇတူၼ်ႈမႆႉ 100 တူၼ် တႃႇမၢႆတွင်း ဝၼ်းၵိူတ်ႇၼၢင်းႁေႃၶမ်းထႆး တူၼ်ထူၼ်ႈ 9 တီႈဝဵင်းမႄႈရိမ်း ထိုင်မႃးယၢမ်းၵၢင်ၶမ်ႈသမ်ႉ ႁူမ်ႈၵၼ် ၸပ်းတဵၼ်းယွၼ်းသူးထိုင် ၼၢင်းႁေႃၶမ်းထႆးၵႂႃႇ ၼႆယဝ်ႉ။
သူမ်ႊၻဵတ်ႊၽရႃႊၼၢင်းၸဝ်ႈ သီႊရီႊၵိတ်ႊ ၽရႃႊပရူမ်ႊမရႃႊၶျီႊၼီႊၼၢတ်ႊၼႆႉ ၵိူတ်ႇမိူဝ်ႈဝၼ်းတီႈ 12/08/1932 ႁူမ်ႈၽၢၵ်ႈတင်း ၸဝ်ႈမုၼ်ယႂ်ႇၶုၼ်ႁေႃၶမ်းထႆးတူၼ်ထူၼ်ႈ 9 ။ ပဵၼ်မႄႈၸဝ်ႈ မုၼ်ယႂ်ႇၶုၼ် ႁေႃၶမ်းထႆး တူၼ်ထူၼ်ႈ 10 ။ ပေႃးထိုင်မႃးဝၼ်းၵိူတ်ႇမၼ်းၸဝ်ႈၼႆ ၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈမိူင်းထႆးလႄႈ ၵူၼ်းဝၢၼ်ႈၵူၼ်းမိူင်း ၼႂ်းမိူင်းထႆး ၸတ်းႁဵတ်းပၢင်ယုၵ်ႉယွင်ႈဝၼ်းၵိူတ်ႇမၼ်းၸဝ်ႈ ပီႈၼွင်ႉတႆး ၸိူဝ်းႁွတ်ႈၽႅဝ်ၼႂ်းမိူင်းထႆး တင်းၼမ်ၵေႃႈ ၶဝ်ႈႁူမ်ႈၵူႈပီ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ