ပျီႇတူႉၸိတ်ႉ ပဢူဝ်း PNO ၸႂ်ႉၵူၼ်းမိူင်းၼုင်ႈၶူဝ်းသိုၵ်း ဢဝ်ႁူမ်ႇလူမ်ႈၼႂ်းဝၢၼ်ႈလိၼ်ပူၵ်ႇတႅၵ်ႇလႄႈ ဝၢၼ်ႈလွႆၼွႆႉ ၼႂ်းၸႄႈဝဵင်းယွင်ႁူၺ်ႈ ၸိုင်ႈတႆးပွတ်းၸၢၼ်း   ။

တႄႇၼႂ်းႁၢင်လိူၼ်ၵျူႊလၢႆႊၼႆႉမႃးၸုမ်းပျီႇတူႉၸိတ်ႉပဢူဝ်း PNO ၵဵပ်းငိုၼ်းၵူၼ်းဝၢၼ်ႈ လိၼ်ပူၵ်ႇတႅၵ်ႇ လႄႈ ဝၢၼ်ႈလွႆၼွႆႉ ၊ ပေႃးဢမ်ႇသၢႆႈလႆႈငိုၼ်းၼႆၸိုင်ႇ ၸႂ်ႉၵူၼ်းမိူင်းၼုင်ႈၶူဝ်း PNO သေ ဢဝ်ႁူမ်ႇလူမ်ႈ ၼႂ်းဝၢၼ်ႈဝႃႈၼႆ ။

တီႈဝၢၼ်ႈလိၼ်ပူၵ်ႇတႅၵ်ႇၼႆႉ လင်ႁိူၼ်း မီး 300 ၊ ၼိုင်ႈႁိူၼ်းၼႆႉ တေလႆႈပၼ်ငိုၼ်း 8 သႅၼ်ပျႃး ၊ ပေႃးဢမ်ႇပၼ်လႆႈၼႆၸိုင် ၸႂ်ႉၼုင်ႈၶူဝ်း PNO သေပၼ်ႇပုတ်ႈၵၼ် ဢဝ်ႁူမ်ႇလူမ်ႈၼႂ်းဝၢၼ်ႈဝႃႈၼႆ ။

ၵူၼ်းၸၢႆးဝၢၼ်ႈလိၼ်ပူၵ်ႇတႅၵ်ႇလၢတ်ႈၽူႈတွႆႇႁွၵ်ႈဝႃႈ – “ တီႈဝၢၼ်ႈၼႆႉၵၢၼ်ၵေႃႈဢမ်ႇၸၢင်ႈႁဵတ်း ၊ ငိုၼ်းၵေႃႈတေလႆႈပၼ် ၼိုင်ႈႁိူၼ်း 8 သႅၼ်ၼႆ ၊ တေလႆႈၵႂႃႇဢဝ်တီႈလႂ်မႃးပၼ် ၊ ပေႃးၸႃႉမီးငိုၼ်းတႄႉပၼ်ငိုၼ်းဢဝ် ၊ ပေႃးဢမ်ႇမီးငိုၼ်း လႆႈၼုင်ႈၶူဝ်း PNO သေလႆႈပႂ်ႉယၢမ်းပၼ်ၶဝ်   ယဝ်ႉလႆႈသူင်ႇပၼ်ႁေႃႇၶဝ်ႈပႃး ”- ဝႃႈၼႆ ။

မိူၼ်ၼင်ႇၼႆ တီႈဝၢၼ်ႈလွႆၼွႆႉၵေႃႈ ပျီႇတူႉၸိတ်ႉပဢူဝ်း PNO ၸႂ်ႉၵူၼ်းဝၢၼ်ႈပၼ်ႇပုတ်ႈၵၼ် ဢဝ်ႁူမ်ႇလူမ်ႈၼႂ်းဝၢၼ်ႈ 15 ဝၼ်းၼိုင်ႈပွၵ်ႈ ၊ ၼိုင်ႈပွၵ်ႈၼႆႉ 5 ၵေႃႉၼႆယဝ်ႉ ။

ဝၢၼ်ႈလိၼ်ပူၵ်ႇတႅၵ်ႇၼႆႉ မီးၾၢႆႇဢွၵ်ႇဝဵင်းၾၢႆၶုၼ် ယၼ်ၵႆၵၼ်တင်းၼွင်ႁၢႆးယႃႈ 2  လၵ်းယၢမ်းလဵဝ် သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း PNO ပၵ်းတပ်ႉဝႆႉၼႂ်းဝၢၼ်ႈဝႃႈၼႆ ။

မိူၼ်ၼင်ႇၼႆ တီႈဝၢၼ်ႈၽြႃးလွႆၵေႃႈ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ၸႂ်ႉၵူၼ်းပိုၼ်ႉတီႈပွၵ်ႈမိူဝ်းယူႇၶိုၼ်းလႆႈယဝ်ႉသေတႃႉ ပေႃးပွၵ်ႈမိူဝ်းတေလႆႈပၼ် ငိုၼ်း 5 သႅၼ်ပျႃး သေ တေလႆႈၶဝ်ႈႁၢပ်ႇၵၢၼ်သိုၵ်းပႃးၼႆလႄႈ ၵူၼ်းမိူင်းဢမ်ႇႁတ်းပွတ်ႈၶိုၼ်းႁိူၼ်းယေးၽႂ်မၼ်းဝႃႈၼႆ ။

ၵူၼ်းၸၢႆးဢႃယု 30 လၢတ်ႈၽူႈတွႆႇႁွၵ်ႈဝႃႈ -“ဝၢၼ်ႈတႄႉပွၵ်ႈမိူဝ်ၶိုၼ်းလႆႈယဝ်ႉၼႆဝႃႇ ၊ ၵၢၼ်တင်းၼွၵ်ႈၵေႃႈဢမ်ႇပၼ်ၵႂႃႇႁဵတ်း ၊ ႁဝ်းၶႃႈ ဢမ်ႇႁတ်းပွၵ်ႈမိူဝ်းၶိုၼ်း ၊ ပေႃႈဢမ်ႇပွၵ်ႈတလဵဝ်ၵေႃႈ တင်းပီဢမ်ႇလႆႈပွၵ်ႈၼႆၶႃႈဝႃႇ ၊ ပေႃးမိူဝ်းၵေႃႈတေလႆႈၵႂႃႇႁၢပ်ႇၵၢၼ်သိုၵ်းၼႆႉဢေႃႈ”- ဝႃႈၼႆ ။

ၵူၼ်းမိူင်း ၼႂ်းၸႄႈဝဵင်းယွင်ႁူၺ်ႈ မိူၼ်ၼင်ႇ ဝၢၼ်ႈၽြႃးလွႆ ၊ လွႆၼွႆႉ ၊ ၺွင်ႇလေးပိၼ်ႇ ၊ ဝၢၼ်ႈၼမ်ႉဢုၼ်ႇ လႄႈ  ဝၢၼ်ႈၼမ်ႉတူၵ်းၼႂ်းၸႄႈဝဵင်းပၢင်လွင်းၼႆႉ လႆႈပၢႆႈၽေးသိုၵ်းမီး 6 လိူၼ်ယဝ်ႉ ၊ ထိုင်မႃး ၼႂ်းလိူၼ်ၵျူႊလၢႆႊ ၼႆႉၸင်ႇပွၵ်ႈမိူဝ်းၶိုၼ်းၽႂ်မၼ်းလႆႈ ဝႃႈၼႆ ။

ယွၼ်ႉသိုၵ်းမၢၼ်ႈႁူမ်ႈပျီႇတူႉၸိတ်ႉပဢူဝ်း လႄႈ ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ်တီႈတၢင်းၾၢႆႇဢွၵ်ႇဝဵင်းၾၢႆၶုၼ် ၼႂ်းထုင်ႉၼွင်ႁၢႆးယႃႈ သေၾၢႆႇတင်းသိုၵ်းမၢၼ်ႈဢဝ်ႁိူဝ်းမိၼ်ပွႆႇမၢၵ်ႇတူၵ်းလႄႈၵူၼ်းမိူင်းလႆႈပၢႆႈၽေးသိုၵ်းမႃးႁိုင်ၶၢဝ်းတၢင်း 6 လိူၼ်ပၢႆ ပႆႇၸၢင်ႈပွၵ်ႈမိူဝ်းၶိုၼ်းႁိူၼ်းယေး ။