ၸုမ်းလုၵ်ႉၽိုၼ်ႉထွႆႇဢွၵ်ႇ ဝဵင်းၾၢႆၶုၼ်ယဝ်ႉသေ သိုၵ်းမၢၼ်ႈတင်းပျီႇတူႉၸိတ်ႉပဢူဝ်း PNO ၶဝ်ႈပၵ်း တပ်ႉဝႆႉ ၼႂ်းဝၢၼ်ႈ ၼႂ်းႁိူၼ်းယေး ၵူၼ်းပိုၼ်ႉတီႈၵူၺ်းဢမ်ႇၵႃး ႁိူၼ်းယေးၸိူဝ်းဢၼ်ၶဝ်ဢမ်ႇယူႇၼၼ်ႉ သမ်ႉၽဝ်ပႅတ်ႈ မၢင်လင်မႆႈမူတ်း မၢင်လင်မႆႈၽွင်ႈဢမ်ႇၸၢင်ႈယူႇသဝ်း ၊ ႁဵတ်းႁႂ်ႈၵူၼ်းပၢႆႈၽေးသိုၵ်းၸိူဝ်းပွၵ်ႈႁိူၼ်းၶိုၼ်းၸိူဝ်းၼၼ်ႉဢမ်ႇမီးတီႈယူႇသဝ်း ပဵၼ်ဢၼ်ယၢပ်ႇၽိုတ်ႇ။
တႄႇၼႂ်းႁူဝ်လိူၼ် ဢေႃးၵတ်ႉသ် ၼႆႉမႃးၵူၼ်းဝၢၼ်ႈၼႃးၵူင်းလႄႈ ဝၢၼ်ႈၸၢင်ႈၸွႆႉ ၸိူဝ်းပၢႆႈၽေးသိုၵ်းၸိူဝ်းၼၼ်ႉဢွၼ်ၵၼ်ပွၵ်ႈၶိုၼ်းႁိူၼ်းယေးတႃႇ ႁူဝ်ၵူၼ်းမွၵ်ႈ 200 ၊ ၽိူဝ်ႇထိုင်ၶိုၼ်းဝၢၼ်ႈ သမ်ႉဢမ်ႇမီးႁိူၼ်းယေးတႃႇယူႇသဝ်းလႄႈထိုင်တီႈလႆႈႁဵတ်းသုမ်ႉသွင်းယူႇသဝ်း၊ ပဵၼ်ဢၼ်လူဝ်ႇတၢင်းၸွႆႈထႅမ်တႄႉတႄႉဝႃႈဝႃႈ ဝႃႈၼႆ။
ၽူႈၶၢၼ်ပၢၵ်ႇ ၸုမ်းၵူၼ်းၼုမ်ႇတႆးၾၢႆၶုၼ် လၢတ်ႈၽူႈတွႆႇႁွၵ်ႈဝႃႈ -“ဝၢႆးသေၸုမ်းလုၵ်ႉၽိုၼ်ႉ ထွႆဢွၵ်ႇၵႂႃႇယဝ်ႉ ၵူၼ်းမိူင်းပွၵ်ႈမိူင်းၶိုၼ်းယူႇသေတႃႉ ဢမ်ႇမီးႁိူၼ်းယေး လႆႈႁဵတ်းသုမ်ႉယူႇသဝ်း။ၵမ်ႈၽွင်ႈ လႆႈယူႇၸွမ်းဝတ်ႉၵျွင်းၸိူဝ်းၼႆႉ ၊ လူဝ်ႇတင်းၸွႆႈထႅမ် ၽႃႈႁူမ်ႇၶူဝ်းၼွၼ်း ၽႃႈယၢင်ႁႄႉၾူၼ် ၶဝ်ႈၼမ်ႉတင်ႈၵိၼ်ၸိူဝ်းၼႆႉ ႁၢဝ်ႈႁႅင်း ”- ဝႃႈၼႆ ။
ၼႂ်းဝၼ်းတီႈ 30/7/2025 ႁိူၼ်းယေးၵူၼ်းမိူင်း ဝၢၼ်ႈၼႃးၵူင်း၊ ဢိူင်ႇၼႃးႁီး ၺႃးၽဝ် 27 လင် ၊ ၼႂ်းဝၼ်းထီႉ 9/5 /2025 ဝၢၼ်ႈၸၢင်ႈၸွႆႉ၊ ဢိူင်ႇဝၢၼ်ႈပၢင်ႇ ၸႄႈဝဵင်းယွင်ႁူၺ်ႈ ဢၼ်မီးၾၢႆႇ ႁွင်ႇဝၢၼ်ႈၼႃးၵူင်းမွၵ်ႈ 3 လၵ်းၼၼ်ႉၵေႃႈ ၺႃးၽဝ်ဢမ်ႇယွမ်း 30 လင် ၼႆယဝ်ႉ ။
ၵူၼ်းၸၢႆးပၢႆႈၽေးသိုၵ်းပွၵ်ႈၶိုၼ်းႁိူၼ်းလၢတ်ႈၽူႈတွႆႇႁွၵ်ႈဝႃႈ – “မၢင်ၸိူဝ်းမႃးႁၼ်ႁိူၼ်းၶဝ်ၾႆးမႆႈၸိူင်ႉၼႆႉ ၊ ပေႃးၶႂ်ႈယွင်ႇၵႂႃႇၵေႃႈမီး ။ ပွၵ်ႈမိူဝ်း ဢမ်ႇၸၢင်ႈယူႇတီႈလႂ် တေပူၵ်းပွင်ၶိုၼ်းၵေႃႈယၢပ်ႇ ၊ တေႁဵတ်း သူၼ်ႁႆႈၼႃးၶိုၼ်းၵေႃႈယၢပ်ႇ”- ဝႃႈၼႆ ။
လိူဝ်ၼၼ်ႉ တီႈၼႂ်းဝၢၼ်ႈၼႃးၵူင်းၼႆႉ သိုၵ်းမၢၼ်ႈတင်း ပျီႇတူႉၸိတ်ႉပဢူဝ်း ၶဝ်ႈသွၵ်ႈတဝ် ၼႂ်းႁိူၼ်း ၵူၼ်းပိုၼ်ႉတီႈ ဢဝ်ၶိူဝ်းၶွင်ၵႃႈၶၼ်ယႂ်ယဝ်ႉၸင်ႇ ၶဝ်ႈဢဝ် ၾႆးၽဝ်ႁိူၼ်းၵူၼ်းမိူင်းပိုၼ်ႉတီႈ ဝႃႈၼႆ ။
“ ၶိူဝ်းႁိူၼ်းၶိူဝ်းယေး ၸၢၵ်ႈထႆၼႃး ၊ ၸၢၵ်ႈပၼ်ႇၼမ်ႉၸိူဝ်းၼႆႉ ၶဝ်ဢဝ်ၵႂႃႇမူတ်း။ ဝၢႆးၼၼ်ႉ ၸင်ႇၽဝ် ႁိူၼ်းယေး ထိုင်တီႈဢမ်ႇၵိုတ်းသင်။ ၶဝ်ဝူၼ်ႉဝႃႈ ၸုမ်းလုၵ်ႉၽိုၼ်ႉ ၶဝ်ႈယူႇၼႂ်းႁိူၼ်းယေး ၵူၼ်းမိူင်းႁိုဝ် ၼႆသေ မႆႈၸႂ်သေလႄႈၸင်ႇလၢမ်းလိမ်းၽဝ်ပႅတ်ႈၼၼ်ႉၼႃႇ ”- ဝႃႈၼႆ။
ယၢမ်းလဵဝ် သဵၼ်ႈတၢင်းရူတ်ႉၵႃး မိူင်းပၢႆး- ယွင်ႁူၺ်ႈ ပိုတ်ႇပၼ်ၶိုၼ်းယဝ်ႉသေတႃႉ ၾၢႆႇတင်းသိုၵ်းမၢၼ်ႈ လႄႈ ပျီႇတူႉၸိတ်ႉ PNO ၵူတ်ႇထတ်းၵူၼ်းၵႂႃႇမႃး ႁၢဝ်ႈႁႅင်း ။ ပေႃးတေလတ်းၵႂႃႇမႃးၼႆၸိုင်ႇ တေလႆႈဢဝ် ဝႂ်ၵမ်ႉထႅမ်တီႈသိုၵ်းမၢၼ်ႈယဝ်ႉ ၸင်ႇၵႂႃႇမႃးလႆႈၼႆ ၵူၼ်းပၢႆႈၽေးသိုၵ်းလၢတ်ႈ ။
ဝၼ်းတီႈ 07/07/2025 သိုၵ်းမၢၼ်ႈ ပိုၼ်ၽၢဝ်ႇယိုတ်းၵုမ်းလႆႈၶိုၼ်း ဝဵင်းမိူင်းပၢႆးတင်းသဵင်ႈယဝ်ႉသေ ၼႂ်းဝၼ်းတီႈ 11/7/2025 သိုၵ်းမၢၼ်ႈပိုတ်ႇပၼ်တၢင်းလူင်ရူတ်ႉၵႃးၵႂႃႇမႃး တီႈၼိူဝ်သဵၼ်ႈတၢင်း ပၢင်လွင်း – ၾၢႆၶုၼ် – မိူင်းပၢႆး – လွႆၶေႃ ၶိုၼ်းဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ