ယွၼ်ႉငဝ်းလၢႆးပိုၼ်ႉတီႈ ဢမ်ႇၼိမ်သဝ်း သိုၵ်း KNDF ပိုၼ်ၽၢဝ်ႇႁၢမ်ႈၵူၼ်းမိူင်း ယႃႇႁႂ်ႈလတ်းၵႂႃႇမႃးၼိူဝ်သဵၼ်ႈတၢင်းလူင် လွႆၶေႃ – တီးမူဝ်းသူဝ်ႇ(တီႈမူၵ်းသိူဝ်) – ၽလူႊသူဝ်ႊ (ဖရူဆို) တီႈလႅၼ်လိၼ်တႆး- ယၢင်းလႅင် ဝႃႈၼႆ ။
တႄႇဝၼ်းတီႈ 8/8/2025 မႃးၼႆႉ ၾၢႆႇသိုၵ်းမၢၼ်ႈ ထူဝ်းသိုၵ်းၶဝ်ႈဝဵင်း တီႈမူၵ်းသိူဝ်လႄႈ ႁဵတ်းႁႂ်ႈ ပၢင်တိုၵ်းၼႂ်းၵႄႈ သိုၵ်းမၢၼ်ႈလႄႈ သိုၵ်း KNDF သိုပ်ႇပဵၼ်ၶိုၼ်း ။ ယွၼ်ႉၼၼ်လႄႈ KNDF ၸင်ႇပိုၼ်ၽၢဝ်ႇ ႁၢမ်ႈၵူၼ်းမိူင်းၵႂႃႇမႃးၼိူဝ်သဵၼ်ႈတၢင်းလူင် လွႆၶေႃ – တီႈမူၵ်းသိူဝ် -ၽလူႊသူဝ်ႊ တႄႇဝၼ်းတီႈ 10/8/2025 ၼႆႉၵႂႃႇ ဝႃႈၼႆ ။
ၼႂ်းလိၵ်ႈပိုၼ်ၽၢဝ်ႇၼၼ်ႉပႃးဝႆႉဝႃႈ -“သိုၵ်းမၢၼ်ႈလႄႈ ၸုမ်းလုၵ်ႉၽိုၼ်ႉ ပဵၼ်ပၢင်တိုၵ်းၵၼ် ဝႆႉသေ ၾၢႆႇသိုၵ်းမၢၼ်ႈ ဢၼ်ပၵ်းတပ်ႉဝႆႉတီႈ ၽလူႊသူဝ်ႊ ၼၼ်ႉ လၢမ်းယိုဝ်းၵွင်ႈလူင် ဢမ်ႇထၢတ်ႇ ”- ဝႃႈၼႆ ။
ထႅင်ႈၾၢႆႇၼိုင်ႈၵေႃႈ ၼႂ်းဝၼ်းတီႈ 11/7/2025 သိုၵ်းမၢၼ်ႈပိုတ်ႇပၼ်တၢင်းလူင်ရူတ်ႉၵႃးၵႂႃႇမႃး တီႈၼိူဝ်သဵၼ်ႈတၢင်း ပၢင်လွင်း – ၾၢႆၶုၼ် – မိူင်းပၢႆး – လွႆႇၶေႃ ၶိုၼ်းသေ ၼႂ်းဝၼ်းတီႈ 23/7/2025 ၼႆႉမႃး ၸဝ်ႈၵႃးၵႂႃႇမႃးလႆႈၶိုၼ်း မိူၼ်ၵဝ်ယဝ်ႉဝႃႈၼႆ ။
ၸဝ်ႈၵႃးၵႂႃႇမႃးသဵၼ်ႈတၢင်း လွႆၶေႃ – ပၢင်လွင်းလၢတ်ႈၽူႈတွႆႇႁွၵ်ႈဝႃႈ -“ ၵႃးတၢင်ႇၵူၼ်းၵႂႃႇမႃးလႆႈမိူၼ်ၵဝ်ၶိုၼ်းယဝ်ႉ။ ၵူၺ်းသိုၵ်းမၢၼ်ႈပၵ်းတပ်ႉဝႆႉၼမ်ၼႃႇ ၊ ပၢင်လွင်း-လွႆၶေႃၼႆႉ ၵဵတ်ႉမီးၸမ် 10 ၵဵတ်ႉၼႆႉ”- ဝႃႈၼႆ ။
သဵၼ်ႈတၢင်းလူင် ပၢင်လွင်း – ၾၢႆၶုၼ် – မိူင်းပၢႆး – လွႆၶေႃ ၼႆႉ ယွၼ်ႉပၢင်တိုၵ်း 1111 လႄႈ တႄႇဢိုတ်းမႃးၸဵမ် ၼႂ်းလိူၼ် November ပီ 2023 ။
ယၢမ်းလဵဝ် ၵူၼ်းမိူင်းဝဵင်းလွႆၶေႃ ဢၼ်ပၢႆႈၽေးသိုၵ်းဝႆႉၼၼ်ႉပွၵ်ႈၶိုၼ်းႁိူၼ်း 3 ပုၼ်ႈ 2 ပုၼ်ႈ ယဝ်ႉ။ ၵူၺ်းၵႃႈ ၶူဝ်းၵုၼ်ႇၵိၼ်ယမ်ႉ ၵႃႈယႂ်ႇႁႅင်း၊ ၵၢၼ်ငၢၼ်းၵေႃႈဢမ်ႇမီး ၵူၼ်းဝၢၼ်ႈၵူၼ်းမိူင်းပဵၼ်ဢၼ်ယၢပ်ႇၽိုတ်ႇဝႆႉ ဝႃႈၼႆ ။
ဝဵင်းလွႆၶေႃၼႆႉ သိုၵ်းလုၵ်ႉၽိုၼ်ႉၶဝ်ယိုတ်းဢဝ်လႆႈၸဵမ်မိူဝ်ႈပီ 2023 ။ ဝၢႆးၼၼ်ႉသိုၵ်းမၢၼ်ႈၵေႃႈၶိုၼ်းထႅမ်ႁႅင်းသိုၵ်းၶဝ်ႈပိုတ်းယိုဝ်းၶိုၼ်းတင်းပီ။ ပီၵၢႆ 2024 သိုၵ်းမၢၼ်ႈပိုၼ်ၽၢဝ်ႇဝႃႈလႆႈၶိုၼ်းယဝ်ႉၼႆသေတႃႉပၢင်တိုၵ်းသိုပ်ႇပဵၼ်ထႅင်ႈဢမ်ႇထၢတ်ႇလႄႈၵူၼ်းၸိူဝ်းပၢႆႈၽေးသိုၵ်းဝႆႉ ဢမ်ႇပႆႇၸၢင်ႈပွၵ်ႈၶိုၼ်းႁိူၼ်းယေး။
ဝၢႆးသိုၵ်းမၢၼ်ႈယိုတ်းမိူင်းမႃး ၸႄႈဝဵင်းမိူင်းပၢႆး၊ၾၢႆၶုၼ်လႄႈၸွမ်းလႅၼ်လိၼ်တႆး-ယၢင်းလႅင် ၼႂ်းၸႄႈဝဵင်းလွႆၶေႃၸိူဝ်းၼႆႉ သိုၵ်းမၢၼ်ႈယိုတ်းမိူင်းတင်း သိုၵ်းPDF ပဵၼ်ပၢင်တိုၵ်းၵၼ် ႁၢဝ်ႈႁႅင်း ။ ၸုမ်းသိုၵ်းမၢၼ်ႈ ၵႆႉယိုဝ်းမၢၵ်ႇလူင် တူၵ်းသႂ်ႇၼႂ်းဝၢၼ်ႈ။ ယွၼ်ႉပၢင်တိုၵ်းၼႆႉသေ ၵူၼ်းမိူင်းထူပ်းၽေးပၢႆႈၽေးပဵၼ်ႁူဝ်ႁဵင် တေႃႇထိုင်ဝၼ်းမိူဝ်ႈၼႆႉ ဝႃႈၼႆ ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ