မိူဝ်ႈဝၼ်းတီႈ 10/08/2025 ယၢမ်းၵၢင်ၼႂ်ၸဝ်ႉ ၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး ၵႂႃႇထူပ်းႁၼ်တူဝ်တၢႆ လုၵ်ႈဢွၼ်ႇသႅၼ်းဢႃယု 6 ၶူပ်ႇ တီႈႁိမ်းၶဵင်ႇၽီ ဝၢၼ်ႈလွႆပဝ်း ပွၵ်ႉ 8 ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ။

ပိူင်ပဵၼ်မၼ်းတႄႉ ၼႂ်းဝၼ်းတီႈ 9 ယၢမ်းႁူဝ်ၶမ်ႈၼၼ်ႉ မီးၵူၼ်းၸၢႆးဢႃယု မွၵ်ႈ 50 ပီ ႁွင်ႉဢဝ်လုၵ်ႈဢွၼ်ႇၸၢႆး ၵေႃႉၼိုင်ႈၵႂႃႇၶႃႈႁႅမ်သေ ဢဝ်တူဝ်ပႅတ်ႈဝႆႉတီႈၼႂ်းယုမ်းႁိမ်းၶဵင်ႇၽီ ဝၢၼ်ႈလွႆပဝ်း ယၢၼ်ၵႆၵၼ်တင်း ႁိူၼ်းလုၵ်ႈဢွၼ်ႇၼၼ်ႉ မွၵ်ႈ 10 မိၼိတ်ႉ ၼႆယဝ်ႉ။

ၽူႈမီးပုၼ်ႈၽွၼ်း ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး လၢတ်ႈၼႄတီႈၽူႈတွႆႇႁွၵ်ႈဝႃႈ – “ပဵၼ်ၵႂႃႇ ၽွင်းပေႃႈလုၵ်ႈဢွၼ်ႇ ၵႂႃႇႁဵတ်းၵၢၼ်။ ၵိုတ်းမႄႈၶဝ်လႄႈ လုၵ်ႈ ဢွၼ်ႇၼႆႉယူႇဝႆႉတီႈႁိူၼ်း။ ၵူၼ်းႁိမ်းႁိူၼ်းၶဝ်လၢတ်ႈၼႄဝႃႈ ဢၼ်ႁွင်ႉလုၵ်ႈဢွၼ်ႇၵေႃႉၼႆႉၵႂႃႇၼၼ်ႉ ပဵၼ်ၵူၼ်းၸၢႆး လုင်းဢၼ်ယူႇႁိမ်းႁိူၼ်းၶဝ်ၼၼ်ႉ။ ဝၢႆးလင်ၼၼ်ႉ ဢမ်ႇႁိုင် ႁႃတူဝ်လုၵ်ႈဢွၼ်ႇၵေႃႈ ဢမ်ႇႁၼ်တင်းၶမ်ႈ။ မိူင်းလႅင်းမႃး ၸင်ႇထူပ်းႁၼ်တူဝ်တၢႆလုၵ်ႈဢွၼ်ႇၼၼ်ႉၼႃႇ”- ဝႃႈၼႆ။

ၸွမ်းၼင်ႇၵူတ်ႇထတ်းတူၺ်း တူဝ်တၢႆလုၵ်ႈဢွၼ်ႇၸၢႆးၼၼ်ႉ လႆႈႁၼ်မီးႁွႆးဢဝ်မိုဝ်း မိပ်ႇငႅၼ်းၶေႃးဝႆႉ ၵူၺ်းဢမ်ႇၵႃး ၸွမ်းတူဝ်မၼ်းၸၢႆးၼၼ်ႉၵေႃႈ မီးႁွႆးမၢတ်ႇၸဵပ်း ႁွႆးၸမ်ႉဝႆႉလၢႆလၢႆတီႈ ဝႃႈၼႆ။

လႆႈႁူႉဝႃႈ ယၢမ်းလဵဝ်ၼႆႉ ၵူၼ်းၸၢႆးၵေႃႉဢၼ်ၺႃးထၢင်ႇထိူမ်ဝႃႈ ၶႃႈႁႅမ်လုၵ်ႈဢွၼ်ႇတၢႆၼႆၼၼ်ႉ ပၢႆႈၵႂႃႇယူႇဝႆႉတၢင်းဝၢၼ်ႈၶၢႆးမွၼ်။ ၵူၼ်းၸၢႆးၵေႃႉၼၼ်ႉ ပဵၼ်ၵူၼ်းသူႇသမ်းယႃႈမဝ်းၵမ်။ ႁၢၼ်ႉတေႃႇထိုင်ယၢမ်းလဵဝ်ၵေႃႈ ၸဝ်ႈၼႃႈတီႈ ၽူႈမီးပုၼ်ႈၽွၼ်းၶဝ် ယင်းပႆႇတီႉၺွပ်းလႆႈတူဝ်မၼ်းၸၢႆး ၼႆယဝ်ႉ။

“ဝၢႆးလင်မႃးၼႆႉ ၵူၼ်းယွင်ႇယႃႈ ၼႂ်းၸႄႈဝဵင်းၵျွၵ်ႉမႄး လိူင်ႇၼမ်မႃးႁႅင်းၼႃႇ။ ပၵ်းပိူင်ၾိင်ႈမိူင်း ဢၼ်တေၸၢင်ႈဢဝ်လိူင်ႈၵၼ်လႆႈထိုင်တီႈထိုင်လႅၼ်ၵေႃႈ ဢမ်ႇမီး။ ဢမ်ႇႁူမ်ႇငမ်းလႆႈ။ ပေႃးပဵၼ်လႆႈတႄႉ ၶႂ်ႈႁႂ်ႈၵူႈၵေႃႉၾၢင်ႉယူႇၾၢင်ႉၵိၼ်ၾၢင်ႉၵႂႃႇမႃးၵၼ်။ ၼႂ်းၶၢဝ်းယၢမ်းငဝ်းလၢႆးဝၢၼ်ႈမိူင်းဢမ်ႇလီၸိူင်ႉၼႆ ပေႃးပဵၼ်မႃးၸဝ်ႈၵဝ်ႇၵူၺ်းတေလႆႈၶၢမ်ႇ။ ဢမ်ႇမီးၽႂ် ၸွႆႈဢဝ်လိူင်ႈသင်ၵၼ်လႆႈ”- ၽူႈမီးပုၼ်ႈၽွၼ်း ၼႂ်းၸုမ်းၼမ်ႉၶူင်း ၶႅၵ်ႇလီပၢင်ၸႃႉတႆး ဝဵင်းၵျွၵ်ႉမႄး ပၼ်ၾၢင်ႉဝႆႉၼင်ႇၼႆ။

ၸႄႈဝဵင်းၵျွၵ်ႉမႄးၼႆႉ ဝၢႆးလင်ပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး သိုၵ်းတဢၢင်း TNLA ပိုၼ် ၽၢဝ်ႇၵၢၼ်ၽွင်းငမ်းဝႆႉ ပဵၼ်တၢင်းၵၢၼ်သေ ၵုမ်းၵမ်ဝႆႉၸူဝ်ႈၶၢဝ်း ၼႆယဝ်ႉ။

ပူၼ်ႉမႃး မိူဝ်ႈဝၼ်းတီႈ 10/07/2025 ၼၼ်ႉၵေႃႈ ဢွၼ်ႇယိင်းဢႃယု 8 ၶူပ်ႇ ၼႂ်းပွၵ်ႉဝၢၼ်ႈႁွင်ႇ ဝဵင်းတႃႈၶီႈလဵၵ်း ၼၼ်ႉၵေႃႈ ၺႃးၵူၼ်းႁူႉၸၵ်း ဢၼ်ယူႇႁိမ်းၵိၼ်ၸမ်ၵၼ် လွၵ်ႇလႅၼ်ဝႃႈ တေသိုဝ်ႉလဵင်ႉၶဝ်ႈမုၼ်းၼႆသေ ႁွင်ႉၵႂႃႇလူလၢႆယဝ်ႉ ၶႃႈႁႅမ်တၢႆပႅတ်ႈ။ ထိုင်မႃး ဝၼ်းတီႈ 04/08/2025 ၼႆႉ ၸင်ႇထူပ်းႁၼ်တူဝ်တၢႆ ဢွၼ်ႇယိင်းၵေႃႉၼၼ်ႉ ၼႆယဝ်ႉ။  

တႅမ်ႈ – ၽူၺ်းၼုမ်ႇ