မိူဝ်ႈဝၼ်းတီႈ 10/08/2025 ယၢမ်းဝၢႆးဝၼ်း ၵူၼ်းမိူင်းၸိူဝ်းယူႇသဝ်း ၼႂ်းပွၵ်ႉ 7 ၵႂႃႇထူပ်းႁၼ်တူဝ်တၢႆ သီႇၵေႃႉပေႃႈလုၵ်ႈ တၢႆဝႆႉယူႇၼႂ်းႁိူၼ်းလင်ၼိုင်ႈ တီႈဝဵင်းလႃႈသဵဝ်ႈ ၸိုင်ႈတႆးပွတ်းႁွင်ႇ။
ၵူၼ်းပိုၼ်ႉတီႈ ဝဵင်းလႃႈသဵဝ်ႈ လၢတ်ႈတီႈၽူႈတွႆႇႁွၵ်ႈဝႃႈ -“လႆႈငိၼ်းဝႃႈ ပဵၼ်ယွၼ်ႉၼီႈၼႆၼေႈ။ မၼ်းလဵင်ႉဢီႈယႃၼူလုၵ်ႈမၼ်းယဝ်ႉႁႄ တူဝ်မၼ်းၵေႃႈ ၶိုၼ်းၵိၼ်ယႃၼူႁႄ ဢွၼ်ၵၼ်တၢႆယူႇ ၼႂ်းႁိူၼ်းလင်ၼၼ်ႉၸွမ်းၵၼ်မူတ်း။ ၽွင်းၼၼ်ႉ မေးမၼ်းတိုၵ်ႉၵႂႃႇႁႆႈၼႆ။ ပွၵ်ႉ 7 ၼႆၵေႃႈ မၼ်းၵႂၢင်ႈၼႃႇလူးၼေႃႈ။ ပိူင်ပဵၼ်တႄႉမၼ်း ၽႂ်ၵေႃႈဢမ်ႇတၼ်းလႆႈႁူႉၸွမ်း။ ၵူၺ်းတီႈတူဝ်ၵေႃႉပဵၼ်ပေႃႈလုၵ်ႈဢွၼ်ႇၼၼ်ႉတႄႉ ႁၼ်မီးဝႆႉထူင်ဢီႈယႃၼူၼၼ်ႉၼႃႇ”- ဝႃႈၼႆ။
လုၵ်ႈဢွၼ်ႇသၢမ်ၵေႃႉ ၸိူဝ်းလူႉတၢႆၵႂႃႇၼၼ်ႉ ပဵၼ်သႅၼ်းဢႃယု 8 ၶူပ်ႇ ၼိုင်ႈၵေႃႉ၊ 10 ၶူပ်ႇ ၼိုင်ႈၵေႃႉ၊ 12 ၶူပ်ႇ ၼိုင်ႈၵေႃႉ ၼႆယဝ်ႉ။
ဝဵင်းလႃႈသဵဝ်ႈၼႆႉ တင်ႈတႄႇၸုမ်းသိုၵ်းၸၢဝ်းၶိူဝ်း သၢမ်ၸုမ်း ၸတ်းပၢင်တိုၵ်း ၽႅၼ်ၵၢၼ်ယၼ်ႇသိုၵ်း 1027 မႃး လႆႈၶၢမ်ႇတၢမ်ႇပၢင်တိုၵ်းသေ ၵူၼ်းၼႂ်းပိုၼ်ႉတီႈဢမ်ႇမီးၵၢၼ်တႃႇႁဵတ်း ႁႂ်ႈပေႃးၵုမ်ႇလဵင်ႉ ၼႃႈႁေႃတေႃႁိူၼ်းလီလီသေ ယၢပ်ႇၽိုတ်ႇၵၢၼ်ႁႃၵိၼ်လဵင်ႉတွင်ႉမႃး ႁၢၼ်ႉတေႃႇထိုင်ယၢမ်းလဵဝ်။
လႆႈႁူႉဝႃႈ ယၢမ်းလဵဝ် သိုၵ်းမၢၼ်ႈ ၶဝ်ႈၵုမ်းၵမ်ၶိုၼ်း ဝဵင်းလႃႈသဵဝ်ႈဝႆႉသေတႃႉ ၸဝ်ႈၵၢၼ်ပၢႆးမၢၵ်ႈမီးယႂ်ႇလူင်ၶဝ် ဢမ်ႇပႆႇႁတ်းၶဝ်ႈ တႄႇႁဵတ်းသၢင်ႈၵၢၼ်ပၢႆးမၢၵ်ႈမီးၶိုၼ်းတႄႉတႄႉလႄႈ ႁဵတ်းႁႂ်ႈၵူၼ်းသႅၼ်းပၢၼ်ၵၢင်ၶဝ် ဢမ်ႇမီးၵၢၼ်ႁဵတ်းၼႆ – ၵူၼ်းမိူင်းလႃႈသဵဝ်ႈ လၢတ်ႈၼႄဝႆႉၼင်ႇၼႆ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ