ၼင်ႇႁိုဝ် တေႁူႉငဝ်းလၢႆး ၵၢၼ်သိုၵ်း၊ ၵၢၼ်မိူင်းလႄႈ ပိူင်ပဵၼ်တႄႉမီးတႄႉ ၼႂ်းမိူင်းႁူမ်ႈတုမ်ၼၼ်ႉ ႁွင်ႈၵၢၼ် ၽွင်းလူင် ၾၢႆႇၵပ်းသိုပ်ႇၼွၵ်ႈမိူင်း မိူင်းမလေးသျႃး မူဝ်ႊႁႃႊမၵ်ႉ ႁႃႊသၼ်ႊ တေဢွၼ်ဢဝ်ၸုမ်း တူဝ်တႅၼ်းၸိုင်ႈမိူင်းဢႃႊသီႊယၼ်ႊ မိူဝ်းဢႅဝ်ႇလႄႇလဵပ်ႈႁဵၼ်း ၼႂ်းမိူင်းႁူမ်ႈတုမ်မၢၼ်ႈ ၼႂ်းလိူၼ်သႅပ်ႊထႅမ်ႊပိူဝ်ႊ တေမႃးၼႆႉ။

တူဝ်တႅၼ်း ၽွင်းလူင်ၼွၵ်ႈမိူင်း မိူၼ်ၼင်ႇ – မိူင်းထႆး၊ မိူင်းၾိလိပ်ႉပိၼ်းသ်လႄႈ မိူင်းဢိၼ်ႊတူဝ်ႊၼီႊသျႃး ၸုမ်းဢႃႊသီႊယၼ်ႊ တေၵႂႃႇၵူတ်ႇထတ်းတူၺ်း ငဝ်းလၢႆး လူင်ပွင်ၸိုင်ႈၸုမ်းမႂ်ႇ ဢၼ်တင်ႈၶိုၼ်ႈမႃး ဝၢႆးလင်သိုၵ်းမၢၼ်ႈ ႁုပ်ႈယိုတ်းၶိုၼ်း ငဝ်းလၢႆးၶိုၵ်ႉၶၵ်ႉၼၼ်ႉၼႆ ၽွင်းလူင် မူဝ်ႊႁႃႊမၵ်ႉ ပိုၼ်ၽၢဝ်ႇဢွၵ်ႇဝႆႉၼင်ႇၼႆ။

“မိူဝ်ႈဢွၼ်တၢင်း ၸိူဝ်းပဵၼ်မိူင်းထႆး၊ မိူင်းၾိလိပ်ႉပိၼ်းသ်လႄႈ ဢိၼ်ႊတူဝ်ႊၼီႊသျႃး ၸိူဝ်းၼႆႉ ၶဝ်ႁၢင်ႈႁႅၼ်း ၵႂႃႇႁင်းၵူၺ်းၶဝ်။ ၵူၺ်းၵႃႈ ပွၵ်ႈၼႆႉတႄႉ ႁဝ်းလူဝ်ႇၼႄလွင်ႈၽွမ်ႉႁူမ်ႈႁဝ်း။ ၸိုင်ႈမိူင်းၾိလိပ်ႉပိၼ်းသ်ၼႆႉ ပေႃးထိုင်မႃး ပီ 2026 တေလႆႈႁပ်ႉပုၼ်ႈၽွၼ်း ပဵၼ်ႁူဝ်ပဝ်ႈ ဢႃႊသီႊယၼ်ႊယဝ်ႉလႄႈ တေႁွင်ႉမၼ်းၵႂႃႇပႃး”။

မိူဝ်ႈဝၼ်းတီႈ 08/08/2025 ၼၼ်ႉ တီႈပၢင်ၵႅဝ်ႈ ၶွပ်ႈၶူပ်ႇတဵမ် 58 ပီ ၸုမ်းဢႃႊသီႊယၼ်ႊ ဢၼ်ၸွမ်ၽွင်းလူင် မိူင်းမလေးသျႃး ဢွၼ်ၼမ်းၸတ်းႁဵတ်းၼၼ်ႉ ၽွင်းလူင် မူဝ်ႊႁႃႊမၵ်ႉ လၢတ်ႈၵႂႃႇထႅင်ႈဝႃႈ သင်ပဵၼ် ႁူဝ်ပဝ်ႈဢႃႊသီႊယၼ်ႊမႃးၸိုင် တေလႆႈႁဵတ်းသင်လၢႆလၢႆၼႆ ႁႂ်ႈၶဝ်ပေႃးႁူႉၵႂႃႇ ၼႆယဝ်ႉ။

လႆႈႁူႉဝႃႈ ၵွၼ်ႇပႆႇထိုင် ဝၼ်းပၢင်ၵုမ်ၺီႇလႃႇၶၢမ်ႇလူင် ၸုမ်းဢႃႊသီႊယၼ်ႊ ပွၵ်ႈၵမ်း 47 ၼႂ်းလိူၼ်ဢွၵ်ႊထူဝ်ႊပိူဝ်ႊၼႆႉ ၽူႈၼမ်းၼႂ်း ၸုမ်းဢႃႊသီႊယၼ်ႊ လႆႈတႅပ်းတတ်းသဵၼ်ႈ ၸႂ် တမ်းဝၢင်းၽႅၼ်ၵၢၼ်ဝႆႉ တႃႇၵႂႃႇလဵပ်ႈႁဵၼ်း လွင်ႈလူင်ပွင်ၸိုင်ႈမႂ်ႇ မိူင်းႁူမ်ႈတုမ် ၼႂ်းဝၼ်းတီႈ 19/09/2025 တေထိုင်ၼႆႉ။

ၼႂ်းႁၢင်ပီ 2025 လိူၼ်တီႊသႅမ်ႊပိူဝ်ႊၼႆႉ ၸုမ်းသိုၵ်းမၢၼ်ႈ ပိုၼ်ၽၢဝ်ႇဢွၵ်ႇပဵၼ်တၢင်းၵၢၼ်ဝႆႉ တေၸတ်းႁဵတ်းပၢင်လိူၵ်ႈတင်ႈ ပတ်းပိုၼ်ႉၼႂ်းမိူင်းႁူမ်ႈတုမ်။ ၵၢၼ်တီႈသိုၵ်းမၢၼ်ႈႁုပ်ႈယိုတ်းၶိုၼ်း ၶေႃႈပူင်ငဝ်းလၢႆး ၶိုၵ်ႉၶၵ်ႉၼႂ်းမိူင်းသေ တႅပ်းတတ်းသဵၼ်ႈၸႂ်ဢမ်ႇသိုပ်ႇဢႃယု ယိုတ်းၵုမ်းဢႃႇၼႃႇဝၢၼ်ႈမိူင်းၵႂႃႇၼၼ်ႉ ႁဵတ်းၸွမ်းပိူင်ငဝ်ႈပိုင်းမိူင်းၼႆသေတႃႉ ပၢင်လိူၵ်ႈတင်ႈ ဢၼ်သိုၵ်းမၢၼ်ႈယိုတ်းမိူင်း ပိုၼ်ၽၢဝ်ႇၼၵ်းၼႃဝႃႈ ဢၢၼ်းတေႁဵတ်းသၢင်ႈၵႂႃႇယူႇမႅၵ်းမႅၵ်းၼႆႉ ၸွင်ႇမီးငဝ်းလၢႆး တေႁဵတ်းလႆႈတဵမ်ထူၼ်ႈတႄႉယူႇႁိုဝ်ၼႆ ၸုမ်းဢႃႊသီႊယၼ်ႊ ၶႂ်ႈႁူႉၸႅင်ႈၸႅင်ႈလႅင်းလႅင်း ၼႆယဝ်ႉ။

မိၼ်းဢွင်ႇလၢႆႇ ၵေႃႉယုၵ်ႉယွင်ႈၸဝ်ႈၵဝ်ႇ ၶိုၼ်ႈပဵၼ်ၸၼ်ႉ ၸွမ်ၸိုင်ႈမိူင်းႁူမ်ႈတုမ်၊ ဢဝ်ဝႆႉတီႈယူႇ ၸၼ်ႉဢႃႇၼႃႇသုင်သုတ်း ၼႂ်းတပ်ႉသိုၵ်းမၢၼ်ႈၼႆ မိူဝ်ႈႁူဝ်လိူၼ်ဢေႃႊၵတ်ႊသ်ၼႆႉ ပိုၼ်ၽၢဝ်ႇႁုပ်ႈယိုတ်းၶိုၼ်း ငဝ်းလၢႆးၶိုၵ်ႉၶၵ်ႉ ဝၢၼ်ႈမိူင်းၼႆသေတႃႉ ဝၢႆးလင်ၼၼ်ႉ ၶိုၼ်းပိုၼ်ၽၢဝ်ႇဢွၵ်ႇ ၵၢၼ်ၽွင်းငမ်းၶိုၵ်ႉၶၵ်ႉ ၼႂ်းမိူင်းႁူမ်ႈတုမ်ပတ်းပိုၼ်ႉဝႆႉ တႃႇ 63 ဝဵင်း ၼႆယဝ်ႉ။

တႅမ်ႈ – ၽူၺ်းၼုမ်ႇ