ၸွမ်ၽွင်းလူင်ၸိုင်ႈတႆးဢူးဢွင်ႇဢွင်ႇ လႄႈတူဝ်တႅၼ်းၸုမ်းသိုၵ်းမၢၼ်ႈယိုတ်းဢႃႇၼႃႇၸိုင်ႈမိူင်း ႁူပ်ႉထူပ်းၽူႈမီးပုၼ်ႈၽွၼ်းၽူႈၼမ်းၸုမ်းမိူင်းလႃးၸိုင်ႈတႆးပွတ်းဢွၵ်ႇယဝ်ႉသေ သိုပ်ႇဢႅဝ်ႇယဵမ်ႈလႅၼ်လိၼ် ၶႄႇ-မၢၼ်ႈ။

ဝၼ်းတီႈ 7 လႄႈ 8/08/2025 ၼၼ်ႉ ၸုမ်းတူဝ်တႅၼ်းၾၢႆႇၽွင်းငမ်း ၸုမ်းသိုၵ်းမၢၼ်ႈ ၸိူဝ်းႁွတ်ႈထိုင်ဝဵင်းမိူင်းလႃး ႁူပ်ႉထူပ်းတူဝ်တႅၼ်းၸုမ်းမိူင်းလႃး ဢုပ်ႇဢူဝ်းၵၼ်လွင်ႈ ပၢႆးပၺ်ႇၺႃႇ ၊ ပၢႆးယူႇလီ၊ လွင်ႈႁုၼ်ႈမုၼ်းမႂ်ႇသုင်ၼႂ်းပိုၼ်ႉတီႈၸိူဝ်းၼႆႉသေ လၢတ်ႈဝႃႈတေၸွႆႈပူၵ်းပွင်ၵႂႃႇ ဝႃႈၼႆ။

တီႈပၢင်ႁူပ်ႉထူပ်းၵၼ်ၼၼ်ႉ ၸွမ်ၽွင်းလူင်ၸိုင်ႈတႆး ဢူးဢွင်ႇဢွင်ႇလႄႈ ၽူႈၵွၼ်းတိူင်းသၢမ်ၸဵင်ႇၵဵင်းတုင် ၸွမ်သိုၵ်းၸူဝ်းလၢႆႇဢွၼ်ႁူဝ်မူႇၸုမ်း ႁူပ်ႉထူပ်းၵၼ်တင်း ၵႅမ်ႁူဝ်ပဝ်ႈၵေႃႇမတီႇ လွင်ႈၽွမ်ႉႁူမ်ႈ လႄႈ လွင်ႈငမ်းယဵၼ် NDAA ဢူးသၢၼ်းပိူဝ်ႇ လႄႈ လုင်းသၢင်ႇလူႇ၊ ၽူႈၶဝ်ႈၵေႃႇမတီႇ ဢူးၶေႃႇၶျၢၼ်ႇပၢဝ်ႇ၊ ဢူးၵျီႇမျိၼ်ႉ၊ လုင်းၸၢႆးၶမ်းမွင်ႇ၊ လုင်းၸၢႆးတိပ်ႉၶဝ်ၸိူဝ်းၼႆႉ- ၼႆ ႁွင်ႈၵၢၼ်ၾၢႆႇပွင်ႇၶၢဝ်ႇ ၼႃႈလိၼ်ၶိုၵ်ႉတွၼ်းမၢႆ 4 ပိုၼ်ၽၢဝ်ႇဝႆႉၼင်ႇၼႆ။

ၸုမ်းသိုၵ်းမိူင်းလႃးလႆႈတုၵ်းယွၼ်း ႁႂ်ႈသိုၵ်းမၢၼ်ႈလူတ်းယွၼ်ႇပူတ်းပွႆႇပၼ်ၶိုၼ်း ၸိုဝ်ႈသဵင်မိူင်းလႃးဢၼ်ပႃးၼႂ်း 63 ဝဵင်း ဢၼ်ထုၵ်ႇပိုၼ်ၽၢဝ်ႇဝႆႉငဝ်းလၢႆးၶိုၵ်ႉၶၵ်ႉ- ၾၢႆႇသိုၵ်းမၢၼ်ႈလၢတ်ႈဝႃႈတေဢဝ်မိူဝ်းလၢတ်ႈပၼ်ၶိုၼ်းတၢင်းၼိူဝ်ဝႃႈၼႆ။

ဝၢႆးႁူပ်ႉထူပ်းၵၼ်ယဝ်ႉ ၸုမ်းတူဝ်တႅၼ်းသိုၵ်းမၢၼ်ႈ ၵႂႃႇဢႅဝ်ႇယဵမ်ႈ လႅၼ်ၶႅၼ်ႈလႅၼ်လိၼ်တႆး-ၶႄႇသေ ဢုပ်ႇၵုမ်တွင်ႈထၢမ်လွင်ႈႁူင်းႁဵၼ်းလႄႈ ႁူင်းယႃၼႂ်းပိုၼ်ႉတီႈ – သေလၢတ်ႈဝႃႈ တေၸွႆႈထႅမ်ပၼ်တႃႇၵုမ်းၵေႃႇလုမ်းလႃးဝႃႈၼႆ။

လိူဝ်ၼၼ်ႉ ၾၢႆႇမိူင်းလႃးပိုၼ်ၽၢဝ်ႇဝႆႉထႅင်ႈဝႃႈ တူဝ်တႅၼ်းသိုၵ်းမၢၼ်ႈလၢတ်ႈဝႃႈ မၵ်းမၼ်ႈၼပ်ႉယမ် ၽႅၼ်တၢင်းတပ်ႉသိုၵ်းမိူင်းလႃး ဢၼ်ပဵၼ် “ငမ်းယဵၼ်၊ ၽွမ်ႉႁူမ်ႈ၊ ႁုၼ်ႈမုၼ်း” ၼၼ်ႉသေ လုၵ်ႉတီႈၵၢၼ်ႁူပ်ႉထူပ်းၵၼ်ပွၵ်ႈၼႆႉသေ တေၸွႆႈထႅမ်ၵၢၼ်ပူၵ်းပွင်လွင်ႈႁုၼ်ႈမုၼ်းၼႂ်းပိုၼ်ႉတီႈ ဝႃႈၼႆ။

ၵူၺ်းၵႃႈၽွင်းတူဝ်တႅၼ်းသိုၵ်းမၢၼ်ႈၵႂႃႇပၼ်ၵႂၢမ်းမၼ်းလွင်ႈတေၸွႆႈပူၵ်းပွင်ႁူင်းႁဵၼ်းလႄႈ ႁူင်းယႃ ယူႇတၢင်းမိူင်းလႃးၼၼ်ႉ တပ်ႉသိုၵ်းမၢၼ်ႈဢဝ်ႁိူဝ်းမိၼ်သိုၵ်းဢႅဝ်ႇႁႃပွႆႇမၢၵ်ႇသႂ်ႇၼႂ်းဝၢၼ်ႈၼႂ်းဝဵင်း ၼႂ်းၸႄႈဝဵင်းသီႇပေႃႉ ၵျွၵ်ႉမႄး မိူင်းၵုတ်ႈ ။ ၸၢၵ်ႇမၢၵ်ႇတိူဝ်ႉသႂ်ႇၵူၼ်းမိူင်းလႄႈလုၵ်ႈဢွၼ်ႇမၢတ်ႇၸဵပ်းလူႉတၢႆ။ မၢၵ်ႇတူၵ်းသႂ်ႇ ႁိူၼ်းယေးလႄႈႁူင်းႁဵၼ်း ႁူင်းယႃ လူႉၵွႆ ။