ဝၼ်းတီႈ 06/08/2025 ၼႆႉ ၸုမ်း FDMR တႂ်ႈသိုၵ်းရၶႅင်ႇ AA တီႉၺွပ်းလႆႈၵူၼ်းမိူင်းၶႄႇ ၸိူဝ်းႁဵတ်းၵၢၼ်လွၵ်ႇလႅၼ်ငိုၼ်းတၢင်းဢွၼ်ႊလၢႆႊ ၸုမ်းၵျႃးၽႅၼ်ႉၼၼ်ႉ 10 ပၢႆသေ သူင်ႇၸူးမိူင်းၶႄႇ တီႈၽၵ်းတူၶၢမ်ႈလႅၼ်လိၼ်ၵျိၼ်ႊသၢၼ်းၵျေႃႉ ၸႄႈဝဵင်းမူႇၸေႊ ၸိုင်ႈတႆးပွတ်းႁွင်ႇ။

ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ -“ႁဝ်းၶႃႈလႆႈႁၼ်ၶဝ် မႃးသူင်ႇတီႈၽၵ်းတူၶၢမ်ႈမိူင်း ၵျိၼ်ႊသၢၼ်ႊၵျေႃႉၼႆႉ။ ၶဝ်ၶီႇမႃးၵႃးႁႃႈႁူၵ်းလမ်း တၢင်ႇမႃးၵူၼ်းၶႄႇမွၵ်ႈ 11 ၵေႃႉၼႆႉ။ ၽူႈမီးပုၼ်ႈၽွၼ်း တၢင်းၾၢႆႇမိူင်းၶႄႇၶဝ် မႃးႁပ်ႉဢဝ်ၵႂႃႇ။ ဢၼ်ၺွပ်းသူင်ႇပၼ်ၼႆႉ ပဵၼ်ၸုမ်း ဢၼ်ယူႇတႂ်ႈသိုၵ်းရၶႅင်ႇ AA ပဵၼ်ၸုမ်း FDMR ။ လွင်ႈၸိူဝ်းၼႆႉ မိူဝ်ႈဢွၼ်တၢင်းတႄႉဢမ်ႇယၢမ်းမီး တိုၵ်ႉႁႃမီးမႃး ပွၵ်ႈၼႆႉၵူၺ်း ဢၼ်ၶဝ်ၺွပ်းၵူၼ်းမႃးသူင်ႇပၼ်ၼႆႉ”- ဝႃႈၼႆ။

ယၢမ်းလဵဝ် ၼႂ်းမိူင်းတႆးပွတ်းႁွင်ႇၼႆႉ မီးၸုမ်းယိပ်းၵွင်ႈၵၢင်ႇလၢႆၸုမ်း ပႃးၸဵမ်သိုၵ်းမၢၼ်ႈ ဢွၼ်တီႉၺွပ်း ၼႄၵူၼ်းႁဵတ်းၵၢၼ်ၵျႃးၽႅၼ်ႉ ႁင်းၽႂ်မၼ်းၼမ်ၶိုၼ်ႈမႃးၵူႈဝၼ်း။ ၵူၺ်း ၵႃႈ ဢမ်ႇမီးၸုမ်းလႂ် တီႉၺွပ်းလႆႈၵူၼ်းလူင် ဢၼ်မႃးလူင်းတိုၼ်းလၢင်း ႁဵတ်းၵၢၼ်ၵျႃးၽႅၼ်ႉၼႆႉ လႆႈသေပွၵ်ႈ။

“ၼႂ်းၸႄႈဝဵင်းမူႇၸေႊၼႆႉ မိူဝ်ႈဝူင်ႈပူၼ်ႉၵေႃႈ ၺွပ်းယူႇ။ ၵူၼ်းၼႂ်းဢၼ် ႁဝ်းၶႃႈႁူႉၸၵ်းၸိူဝ်းၼႆႉၵေႃႈ ပႃးၵႂႃႇတင်းၼမ်ယူႇ။ ဢၼ်ၺွပ်းတႄႉ လႆႈႁၼ်ၶဝ်ၺွပ်းယူႇ ၵူၺ်းၵႃႈ ႁႂ်ႈမူတ်းတႄႉ မၼ်းတေဢမ်ႇမူတ်းလႆႈ။ ၵူၼ်းမိူင်းၶႄႇၵေႃႈ ႁၼ်ၶဝ်ၺွပ်းသေ ၶိုၼ်းမႄးသူင်ႇၵႂႃႇတၢင်းမိူင်းၶႄႇၶိုၼ်း။ ဢၼ်ၶဝ်ၺွပ်းဝႆႉၸိူဝ်းၼၼ်ႉ ပဵၼ်ၵူၼ်းလူင်ႁႃႉ ၵူၼ်းဢွၼ်ႇႁႃႉ ႁဝ်းယင်းဢမ်ႇႁူႉလႆႈ”- ၵူၼ်းပိုၼ်ႉတီႈ ဝဵင်းမူႇၸေႊ သိုပ်ႇလၢတ်ႈၼႄၼင်ႇၼႆ။

သိုပ်ႇလၢတ်ႈဝႃႈ -“ဢၼ်ၶဝ်ၺွပ်းယူႇၼႆႉ မၼ်းမိူၼ်ႁိုဝ်ၼႆ ၶဝ်ၺွပ်းၼႄလုၵ်ႈၼွင်ႉပွင်ႈပၢႆမၼ်းၵူၺ်း။ ဢၼ်ၼႆႉ သွၼ်ႇဝႃႈ ႁဵတ်းဢဝ်ၼႃႈဢဝ်တႃမၼ်းၸိူင်ႉၼၼ်ၵူၺ်း။ သင်ဝႃႈ ဢမ်ႇတီႉၺွပ်းလႆႈငဝ်ႈႁၢၵ်ႈမၼ်း မိူၼ်ၼင်ႇ ၵူၼ်းလူင်ဢၼ်မႃးတႄႇတင်ႈမၼ်း ၸိူဝ်းၼၼ်ႉၸိုင် မၼ်းတေဢမ်ႇမီးၽွၼ်းလီသင်။ ၵွပ်ႈၼႆ ပေႃးဝႃႈဢမ်ႇၺွပ်းလႆႈၵူၼ်းလူင်မၼ်းတႄႉတႄႉၼႆ မၼ်းတိုၼ်းဝႃႈ တေသိုပ်ႇမီးၵႂႃႇတိၵ်းတိၵ်း ႁဵတ်းၼၼ်ယဝ်ႉ။ မၼ်းတိုၼ်းဢမ်ႇႁၢႆလႆႈ”- ဝႃႈၼႆ။

ၽၵ်းတူၶၢမ်ႈလႅၼ်လိၼ်မိူင်းတႆး – မိူင်းၶႄႇ တီႈၵျိၼ်ႊသၢၼ်ႊၵျေႃႉၼႆႉ ပဵၼ်ၽၵ်းတူလႅၼ်လိၼ် ဢၼ်လမ်ႇလွင်ႈ တႃႇၵၢၼ်ပၢႆးမၢၵ်ႈမီးဢၼ်ၼိုင်ႈလႄႈ ၸွမ်းႁိမ်းႁွမ်းၼၼ်ႉ မီးၸုမ်းဢူၺ်းလီသၢမ်ၸုမ်းၶဝ် ၵုမ်းၵမ်ဝႆႉ ၸဵမ်မိူဝ်ႈၽႅၼ်ၵၢၼ်ယၼ်ႇသိုၵ်း 1027 ပွၵ်ႈၵမ်းၼိုင်ႈၼၼ်ႉမႃး။ ယၢမ်းလဵဝ် တႃႇၸဝ်ႈရူတ်ႉၵႃးလူင်ၶဝ် လႆႈသႂ်ႇၶွၼ်ႇ လူၺ်ႈတင်းပိူင်ဢွၼ်ႊလၢႆႊသေ ၸင်ႇလတ်းၽၢၼ်ႇၵႂႃႇမႃးလႆႈ။

ၸုမ်းသိုၵ်းမၢၼ်ႈ ယင်းပိုၼ်ၽၢဝ်ႇ မိူဝ်ႈဝၼ်းတီႈ 04/08/2025 ၼႆႉဝႃႈ ၽွင်းမိူဝ်ႈႁၢင်လိူၼ်ၵျူႊလၢႆႊၼၼ်ႉ ၼႂ်းၸႄႈဝဵင်းမူႇၸေႊၼႆႉၵူၺ်းၼင်ႇၵဝ်ႇ သိုၵ်းမၢၼ်ႈ တီႉၺွပ်းၸုမ်းၵျႃး ၽႅၼ်ႉမွၵ်ႈ 260 ၵေႃႉသေ လႆႈသူင်ႇၸူးတီႈၽူႈမီးပုၼ်ႈၽွၼ်းၼႂ်းမိူင်းၶႄႇၵႂႃႇ ဝႃႈၼႆ။