ဝၼ်းတီႈ 04/07/2025 ၼႆႉ လုမ်းၽွင်းတၢင်မိူင်းၶႄႇ ဢၼ်ပၵ်းသဝ်းဝႆႉ ၼႂ်းမိူင်းထႆး ၸွႆႈထႅမ်လႆႈၸၢႆးၸိူင်း ၸိုဝ်ႈလိုဝ်း ၼႂ်းမိူင်းၶႄႇၵေႃႉၼိုင်ႈ ၸိုဝ်ႈ “ၵျွင်ႊ” (Zhong) ၵေႃႉဢၼ်မႃးထိုင်ဝၢင်းႁိူဝ်းမိၼ် ၻွၼ်းမိူင်း ၸိုင်ႈထႆးယဝ်ႉ ၺႃးလွၵ်ႇလႅၼ်ႁႂ်ႈၶၢမ်ႈလႅၼ်လိၼ်ထႆး ၶဝ်ႈၵႂႃႇၼႂ်းမိူင်းမၢၼ်ႈ ပိူဝ်ႈတႃႇထၢႆႇႁၢင်ႈသႂ်ႇၼႃႈ သိူဝ်ႈပပ်ႉမႅၵ်ႇၵသိၼ်း ဝႃႈၼႆ။
မိူဝ်ႈဝၼ်းတီႈ 13/06/2025 ပူၼ်ႉမႃးၼၼ်ႉ ၸၢႆးၸိူင်းၵေႃႉၺႃးလႅၼ်ၵႂႃႇၼႂ်းမိူင်းမၢၼ်ႈၼၼ်ႉ ႁွင်ႉ Video Call တေႃႇၵေႃႉပဵၼ် ၼွင်ႉယိင်းမၼ်းၸၢႆးသေ ယွၼ်းတၢင်းၸွႆႈထႅမ်ၵႂႃႇ။ လၢတ်ႈဝႃႈ ၸဝ်ႈၵဝ်ႇၺႃးလွၵ်ႇ လႅၼ်မႃးမီးယူႇဝႆႉ ၼႂ်းမိူင်းမၢၼ်ႈ ပဵၼ်ဢွင်ႈတီႈလႂ်ၼႆတႄႉၵေႃႈ ဢမ်ႇလၢတ်ႈပႃး။ ဝၢႆးလင်ၼၼ်ႉ ၼွင်ႉ ယိင်းမၼ်းၸၢႆး ၸင်ႇလႆႈၵပ်းသိုပ်ႇၸူး ပလိၵ်ႈထႆး တီႈမိူင်းၵွၵ်ႇလႄႈ ပလိၵ်ႈၶႄႇ တီႈဝဵင်းၵွမ်ႊၵျူဝ်း (ကွမ်ကျိုး) သေ ယွၼ်းတၢင်းၸွႆႈထႅမ်ၵႂႃႇ ၼႆယဝ်ႉ။
မိူဝ်ႈဝၼ်းတီႈ 03/07/2025 ၼႆႉ ႁွင်ႈၵၢၼ်ၶၢဝ်ႇ Beijing News ပိုၼ်ၽၢဝ်ႇဢွၵ်ႇဝႃႈ ၸၢႆးၸိူင်း ၵေႃႉယူႇတီႈဝဵင်းၵွမ်ႊၵျူဝ်း (ကွမ်ကျိုး) မိူင်းၶႄႇၼၼ်ႉၵေႃႈ ၺႃးလွၵ်ႇလႅၼ်ႁွင်ႉၶဝ်ႈ ၵႂႃႇၼႂ်းမိူင်းမၢၼ်ႈ ပိူဝ်ႈတႃႇထၢႆႇႁၢင်ႈ သႂ်ႇၼႃႈသိူဝ်ႈပပ်ႉ မႅၵ်ႉၵသိၼ်း ၼႆယဝ်ႉ။
မိူဝ်ႈဝၼ်းတီႈ 08/06/2025 ပူၼ်ႉမႃးၼၼ်ႉ ၸၢႆးၸိူင်း ၶိူဝ်းႁိူၼ်း “ၵျွင်ႊ” (Zhong) ၼႆႉ လုၵ်ႉဝၢင်းႁိူဝ်းမိၼ် မိူင်းၶႄႇ ၵွမ်ႊၵျူဝ်း (ကွမ်ကျိုး) ဢွၵ်ႇမႃးတီႈ ဝၢင်းႁိူဝ်းမိၼ် ၻွၼ်းမိူင်းသေ ၶၢတ်ႇၵၢၼ်ၵပ်းသိုပ်ႇၵႂႃႇ။ မိူဝ်ႈဝၼ်းတီႈ 13/06/2025 ၼၼ်ႉ မၼ်းၸၢႆးသိုပ်ႇၾူၼ်းႁွင်ႉ Video Call တေႃႇၼွင်ႉယိင်းမၼ်းၸၢႆးသေ လၢတ်ႈၼႄဝႃႈ ၺႃးလွၵ်ႇလႅၼ်ႁွင်ႉၶဝ်ႈၵႂႃႇၼႂ်းမိူင်းမၢၼ်ႈ ဝႃႈၼႆ။
ၾၢႆႇႁွင်ႈၵၢၼ် လုမ်းၽွင်းတၢင်မိူင်းၶႄႇ တီႈမိူင်းၵွၵ်ႇ ၸိုင်ႈထႆး ပိုၼ်ၽၢဝ်ႇပၼ်ၾၢင်ႉဝႆႉဝႃႈ ယႃႇႁႂ်ႈၵူၼ်းမိူင်းၶႄႇ ႁပ်ႉၵၢၼ်ဢၼ်ငၢႆႈလူမ်၊ ယႃႇလႃႈလီႁပ်ႉၵၢၼ်ဢၼ်ပိူၼ်ႈယိုၼ်ႈယွၼ်းမႃးၼၼ်ႉငၢႆႈငၢႆႈ ဝႃႈၼႆ။
ပူၼ်ႉမႃး မိူဝ်ႈဝၼ်းတီႈ 03/01/2025 ၼၼ်ႉၵေႃႈ ၸၢႆးၸိူင်းၶႄႇ Wang Xing (ဢၼ်တင်းၼမ်ႁွင်ႉဝႃႈ Xingxing) ၼၼ်ႉၵေႃႈ မၼ်းၸၢႆးၺႃးၸုမ်းၵျႃးၽႅၼ်ႉ လွၵ်ႇႁွင်ႉၵႂႃႇၾိုၵ်း တႃႇလွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊ တီႈမျႃႉဝတီႇ ၸႄႈမိူင်းယၢင်းၽိူၵ်ႇ ထိုင်မႃးဝၼ်းတီႈ 07/01/2025 ပလိၵ်ႈထႆးတင်း တပ်ႉပႂ်ႉလႅၼ်လိၼ်မိူင်းမၢၼ်ႈ လႆႈႁူမ်ႈၵၼ်ႁႃတူဝ်ထူပ်းႁၼ်ၶိုၼ်းသေ ၸွႆႈဢဝ်ဢွၵ်ႇမႃး ၼႆယဝ်ႉ။
တႅမ်ႈ – ၽူၺ်းၼုမ်ႇ
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ