ယၢမ်းလဵဝ် တီႈလႅၼ်လိၼ်တႆး – ၶႄႇ ဝဵင်းမူႇၸေႊ ၸိုင်ႈတႆးပွတ်းႁွင်ႇၼႆႉ ၸုမ်းၵျႃးၽႅၼ်ႉ ဢၼ်ပႃးၵူၼ်းမိူင်းၶႄႇမွၵ်ႈ 200 ၵေႃႉၼၼ်ႉ ၺႃးသိုၵ်းမၢၼ်ႈ တီႉၺွပ်းလႆႈထႅင်ႈ။
ၼႂ်းၵၢင်လိူၼ်ၵျူႊလၢႆႊ ပီ 2025 ၼႆႉၵူၺ်း သိုၵ်းမၢၼ်ႈ တီႈဝဵင်းမူႇၸေႊ ဢွၼ်ၵၼ်သွၵ်ႈတဝ်ၸွမ်းပွၵ်ႉ ၸွၼ်ႊၸူဝ်ႊ၊ ၵွင်းမူးတူင်ႈ၊ ၵွင်း 45 ပွၵ်ႉၼိူဝ် ၸိူဝ်းၼႆႉသေ တီႉၺွပ်းၵူၼ်းႁဵတ်းၵၢၼ်လႅၼ်ငိုၼ်းၼိူဝ်ဢွၼ်ႊလၢႆႊ ၸုမ်းၵျႃးၽႅၼ်ႉ ၸွမ်းႁိူၼ်းယေးၵူၼ်းမိူင်း ၼႂ်းပွၵ်ႉၼႂ်းယွမ်ႇ ယွၼ်ႉႁႅင်းမိပ်ႇဢီးမိူင်းၶႄႇ ၼႆယဝ်ႉ။
ၵူၼ်းပိုၼ်ႉတီႈ ဝဵင်းမူႇၸေႊ လၢတ်ႈတီႈၽူႈတွႆႇႁွၵ်ႈဝႃႈ -“ယၢမ်းလဵဝ်ၼႆႉ လႆႈႁၼ်သိုၵ်းမၢၼ်ႈ တီႉၺွပ်းၶဝ်သေ ၵႂႃႇၶင်ဝႆႉ ႁူဝ်ၼပ်ႉၵူၼ်းတေမီးၵႃႈႁိုဝ်တႄႉ ႁဝ်းၶႃႈ ပႆႇလႆႈႁူႉတႅတ်ႈတေႃး။ ၵူၺ်းၵႃႈ ၵူၼ်းတႄႉ ၼမ်တႄႉၼမ်ဝႃႈ ပၢၵ်ႇပၢႆတႄႉတိုၼ်းမီးယဝ်ႉ။ ပေႃးယဝ်ႉ ၵူၼ်းမိူင်းၶႄႇ ၸိူဝ်းၼၼ်ႉၵေႃႈ ၶဝ်ၺွပ်ႈပႃး ထႅင်ႈမွၵ်ႈ 30 ပၢႆ။ ၵူၼ်းလူင်မၼ်းတႄႉ ၶဝ်ဢမ်ႇၺွပ်းလႆႈသေၵေႃႉ”- ဝႃႈၼႆ။
ဢၼ်သိုၵ်းမၢၼ်ႈ တီႉၺွပ်းၵူၼ်းၸိူဝ်းႁဵတ်းၵၢၼ်လႅၼ်ငိုၼ်းၼိူဝ်ဢွၼ်ႊလၢႆႊ ၸိူဝ်းၼၼ်ႉ ၵမ်ႈၽွင်ႈ လႆႈဢဝ်ငိုၼ်းၶႄႇ 4 မိုၼ်ႇယႂၼ်ႊထိုင် 7 မိုၼ်ႇယႂၼ်ႊသေ ၵႂႃႇထုတ်ႇတူဝ်ဢွၵ်ႇမႃးၶိုၼ်းၵေႃႈမီး။ တွၼ်ႈတႃႇ ၵူၼ်းဢမ်ႇပဵၼ်လႆႈတႄႉ ထုၵ်ႇဢဝ်လိူင်ႈၸွႆးတြႃး တီႈလုမ်းၸႄႈတွၼ်ႈမူႇၸေႊဝႆႉ။
တီႈဝဵင်းမူႇၸေႊၼႆႉ ပူၼ်ႉမႃး မိူဝ်ႈဝၼ်းတီႈ 11/07/2025 ၼၼ်ႉၵေႃႈ သိုၵ်းမၢၼ်ႈ တီႉၺွပ်းလႆႈ ၵူၼ်းႁဵတ်းၵၢၼ်လႅၼ်ငိုၼ်း ၵျႃးၽႅၼ်ႉၼႆႉ ယဝ်ႉၵမ်းၼိုင်ႈ။ ထိုင်မႃး ဝၼ်းတီႈ 17 ၼႆႉၵေႃႈ တီႉၺွပ်းလႆႈထႅင်ႈ တီႈသဵၼ်ႈတၢင်းၽႄမၢႆ 9 ဝဵင်းမူႇၸေႊ။
ဝဵင်းမူႇၸေႊၼႆႉ ပဵၼ်ဝဵင်းတိတ်းၸပ်းလႅၼ်လိၼ်တႆး – ၶႄႇသေ ပဵၼ်ဝဵင်းဢၼ်ဢမ်ႇမီးပၢင်တိုၵ်းသိုၵ်းသင်လႄႈ သိုၵ်းမၢၼ်ႈၶဝ် တိုၵ်ႉသိုပ်ႇၽွင်းငမ်းပၼ်ႇၵၢၼ်ဝႆႉယူႇ ႁၢၼ်ႉတေႃႇထိုင်ယၢမ်းလဵဝ်ၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ