ႁူဝ်လိူၼ်ဢေႃႊၵတ်ႊသ်ၼႆႉ ၸုမ်းသိုၵ်းဝႃႉ (UWSA) တီႉၺွပ်း ၸုမ်းယိပ်းၵွင်ႈၵၢင်ႇၸုမ်းၼိုင်ႈ သႂ်ႇၶူဝ်းသိုၵ်းဝႃႉသေ ဢႅဝ်ႇႁႃၸူၼ်ပိူၼ်ႈတႂ်ႈတႂ်ႈၼိူဝ်ၼိူဝ် တႃႇ 17 ၵေႃႉ ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။

17 ၵေႃႉ ၸိူဝ်းၺႃးသိုၵ်းဝႃႉ တီႉၺွပ်းၵုမ်းၶင်ၵႂႃႇၼၼ်ႉ ပဵၼ်ၵူၼ်းဝၢၼ်ႈလႂ် ၸိုဝ်ႈသင်ၼႆၼၼ်ႉ ၾၢႆႇၸုမ်းသိုၵ်းဝႃႉ (UWSA) ဢမ်ႇပိုၼ်ၽၢဝ်ႇဢွၵ်ႇဝႆႉပဵၼ်တၢင်း ၵၢၼ်။ ၼႂ်းၸႄႈဝဵင်းတၢင်ႉယၢၼ်းၼႆႉ မီးၽူႈလၵ်ႉၸၵ်ႉၶုတ်ႈၼမ်လိူင်ႇႁႅင်းသေ ၵႆႉၵႆႉႁူပ်ႉပၼ်ႁႃလွင်ႈၸူၼ်ၵၼ် ၸဵမ်ၸိူဝ်းၼႆႉၼႆ – ၵူၼ်းၸၢႆး ဢႃယု 40 ပၢႆ ၵေႃႉယူႇၼႂ်းၸႄႈဝဵင်းတၢင်ႉယၢၼ်း ၵေႃႉၼိုင်ႈ လၢတ်ႈၼႄဝႆႉၼင်ႇၼႆ။

“ပဵၼ်တႄႉဢေႃႈ။ ၵူၼ်းတၢင်ႉယၢၼ်းၶိုၼ်းၵူၺ်း။ ၵူၼ်းၼႂ်းဝဵင်းလႄႈ ၵူၼ်းတၢင်းၼွၵ်ႈႁူမ်ႈၵၼ် ႁဵတ်းပဵၼ်ၸုမ်း။ ၽၢမ်းပွမ်ႁဵတ်းသိုၵ်းဝႃႉယဝ်ႉ ၵႂႃႇႁႃတီႉၺွပ်း ၵူၼ်းၸိူဝ်းႁဵတ်း ၵၢၼ်ၵျႃးၽႅၼ်ႉ၊ ယဝ်ႉၶိုၼ်း ဢဝ် ၵူၼ်းၸိူဝ်းၼႆႉၶၢႆ။ ၵူၼ်းႁဵတ်းၵၢၼ် ၵျႃးၽႅၼ်ႉၼင်ႇၵၼ်ၶိုၼ်းၶၢႆၵိၼ်ၵၼ်။ ၸုမ်းၸိူဝ်းၼႆႉ ၵႂႃႇၺွပ်းလႆႈ ၶႄႇ။ ၶိုၼ်းဢဝ်ၶႄႇၸိူဝ်းၼႆႉၵႂႃႇၶၢႆတေႃႇ ၵျႃးၽႅၼ်ႉ။ ၵွပ်ႈဝႃႈ တီႈၸုမ်းၵျႃးၽႅၼ်ႉၼႆႉ လူဝ်ႇၵူၼ်းႁဵတ်းၵၢၼ်ႁႄ ႁပ်ႉသိုဝ်ႉၼၼ်ႉၼႃႇ။ ၶဝ်သိုဝ်ႉဢဝ်ၵႂႃႇႁဵတ်းၵၢၼ်လႅၼ်ငိုၼ်း။ ၵမ်ႈၽွင်ႈၶိုၼ်းဢဝ် ၵႂႃႇၶၢႆတေႃႇ ထႅင်ႈတၢင်ႇၸုမ်း”။

လႆႈႁူႉဝႃႈ ၼႂ်းႁူဝ်ပီ 2025 လိူၼ်ၵျႅၼ်ႊၼိဝ်ႊရီႊ ဝူင်ႈလိုၼ်းသုတ်းၼၼ်ႉၵူၺ်း ၸုမ်းၵူၼ်းၸူၼ် ယိပ်းၵွင်ႈၵၢင်ႇ ဢမ်ႇႁူႉၾၢႆႇ ၶဝ်ႈႁိမ်ၸူၼ်ဢဝ်ၶမ်း တီႈႁၢၼ်ႉၶၢႆၶမ်းၵႂႃႇ ဢမ်ႇယွမ်းသၢမ်ပွၵ်ႈ ၼႆယဝ်ႉ။

ၵူၼ်းမိူင်းၵေႃႉယူႇသဝ်းဝႆႉ ၼႂ်းဝဵင်းတၢင်ႉယၢၼ်း လၢတ်ႈၼႄဝႃႈ -“ၼႂ်းဝဵင်းတၢင်ႉယၢၼ်းၼႆႉ ၽူႈလၵ်ႉၸၵ်ႉၶုတ်ႈၵေႃႈ ၼမ်ႁႅင်းၼႃႇ။ ၵူၼ်းၼႂ်းပိုၼ်ႉတီႈၵေႃႈ ၵမ်းၵမ်းၺႃးၸူၼ်။ ၵူၼ်းၸူၼ်ၸိူဝ်းၼႆႉ ၶဝ်ႁဵတ်းပဵၼ်ၸုမ်းဝႆႉ။ ပေႃးၸူၼ်ယဝ်ႉပွၵ်ႈၼိုင်ႈ ၶဝ်ၶိုၼ်းၵႂႃႇသွၼ်ႉ တူဝ်ၶဝ်ဝႆႉ။ ပေႃးၶဝ်မႃးၼႂ်းဝဵင်းၼႆ သႂ်ႇသိူဝ်ႈၶူဝ်း သိုၵ်းဝႃႉႁႄ ပႃးၵွင်ႈၵၢင်ႇႁႄ ၵႂႃႇၵႂႃႇမႃးမႃး။ သိူဝ်ႈၶူဝ်းသိုၵ်းၵေႃႈ ႁႃသိုဝ်ႉငၢႆႈၼႃႇ။ ၶႂ်ႈလႆႈၶႂ်ႈသႂ်ႇမဵတ်ႇမၢႆ ၸုမ်းလႂ်ၵေႃႈလႆႈ။ ၵွပ်ႈၼၼ် လွင်ႈၸူၼ်ၵၼ်ၸိူဝ်းၼႆႉၵေႃႈ ၵမ်းၵမ်းပဵၼ်ငၢႆႈၼႃႇ”- ဝႃႈၼႆ။

သိုပ်ႇလၢတ်ႈဝႃႈ – “သႂ်ႇသိူဝ်ႈၶူဝ်းသိုၵ်းႁႄ ႁႃၺွပ်းဢဝ် ၵူၼ်းမိူင်းၵႂႃႇၶၢႆၵိၼ်တေႃႇ ၸုမ်းၵျႃးၽႅၼ်ႉၵေႃႈမီး။ ဢွၼ်ႇယိင်းၼုမ်ႇမၢင်ၸိူဝ်းသမ်ႉ ၺႃးလွၵ်ႇလႅၼ်ႁွင်ႉၵႂႃႇ ႁဵတ်းမေးၼၢင်းၵူၼ်းၼႂ်းၸုမ်းၵျႃးၽႅၼ်ႉၸူဝ်ႈၶၢဝ်းၵေႃႈမီး။ မိူဝ်ႈတႄႇႁွင်ႉၵၼ်ၵႂႃႇတႄႉ ဝႃႈတေလႆႈၵႂႃႇႁုင်ၶဝ်ႈၽၵ်း၊ ႁဵတ်းလွင်ႈမူတ်းသႂ်ပၼ် ၵူၼ်းၼႂ်းၸုမ်းၵျႃးၽႅၼ်ႉၶဝ်ၼႆႁႄ ၺႃးသူင်ႇတူဝ် ၵႂႃႇၶၢႆ တီႈၼိုင်ႈယဝ်ႉတီႈၼိုင်ႈၼၼ်ႉၼႃႇ။ ပေႃးဢွၵ်ႇႁူင်းၵျႃး ၽႅၼ်ႉမႃးလႆႈယဝ်ႉၵေႃႈ ၵူၼ်းဢမ်ႇၶႂ်ႈ မိူၼ်ၵူၼ်းယဝ်ႉ။ တီႈတၢင်ႉယၢၼ်းၼႆႉ ၵူၼ်းၼုမ်ႇတႆးႁဝ်း ၺႃးၼမ် ၼႃႇလိူင်ႈၸိူင်ႉၼႆ”- ဝႃႈၼႆ။

ၸႄႈဝဵင်းတၢင်ႉယၢၼ်းၼႆႉ မီးၸုမ်းယိပ်းၵွင်ႈၵၢင်ႇ လၢႆလၢႆၸုမ်း ႁူမ်ႈၵၼ်ယူႇသဝ်းတူင်ႉၼိုင်ၵႂႃႇမႃးဝႆႉ ၸွမ်းၼင်ႇၵၢၼ်ဢုပ်ႉပိူင်ႇ ၽွင်းငမ်းတၢင်းၵၢၼ်တႄႉ ယူႇတႂ်ႈၵုမ်းၵမ်သိုၵ်းမၢၼ်ႈဝႆႉသေတႃႉ ၼႂ်းပိုၼ်ႉတီႈ မီးပႃးၸုမ်းသိုၵ်းဝႃႉ (UWSA) ၊ ပႃႇတီႇမႂ်ႇသုင်ၸိုင်ႈတႆး (SSPP/SSA) လႄႈ ၸုမ်းပျီႇတူႉၸိတ်ႉၶဝ် ၸႅၵ်ႇၵၼ်ယူႇသဝ်းတူင်ႉၼိုင်ဝႆႉသေတႃႉ ဢမ်ႇမီးၸုမ်းလႂ် ႁပ်ႉပုၼ်ႈၽွၼ်း ၽဵဝ်ႈမူၺ်ႉပၼ် ၸုမ်းၽူႈလၵ်ႉၸၵ်ႉၶုတ်ႈလႄႈ ၸုမ်းၵျႃးၽႅၼ်ႉၼႆႉတႄႉတႄႉဝႃႈဝႃႈ ႁဵတ်းႁႂ်ႈၵူၼ်းမိူင်းၼႂ်းၸႄႈဝဵင်းတၢင်ႉယၢၼ်း ဢမ်ႇလႆႈယူႇသႃႇ မီးလွင်ႈမႆႈၸႂ်ဝႆႉယူႇတႃႇသေႇ ၼႆယဝ်ႉ။

တႅမ်ႈ – ၽူၺ်းၼုမ်ႇ