တပ်ႉပႂ်ႉလႅၼ်လိၼ် မိူင်းယၢင်းၽိူၵ်ႇ BGF တီႉၺွပ်းၵူၼ်းမိူင်းၶႄႇ 14 ၵေႃႉ ဢၼ်ထၢင်ႇထိူမ်ဝႃႈ ပဵၼ်ႁူဝ်ၼႃႈ ၸုမ်းၵျႃးၽႅၼ်ႉ ၼၼ်ႉဝႆႉသေ ႁၢင်ႈႁႅၼ်းတႃႇသူင်ႇမွပ်ႈဢၢပ်ႈပၼ် ၼႂ်းမိုဝ်းလူင်ပွင်ၸိုင်ႈမိူင်းၶႄႇ ဝႃႈၼႆ။  

ၵူၼ်းၸၢဝ်းၶိူဝ်းၶႄႇ ၸိူဝ်းၺႃးတီႉၺွပ်းဝႆႉၼၼ်ႉ ပဵၼ်ႁူဝ်ၼႃႈ ၸုမ်းၵျႃးၽႅၼ်ႉ ဢၼ်မီးဝႆႉတီႈၼႂ်းသူၺ်ႇၵူၵ်ႉၵူဝ်ႇ ဝဵင်းမႂ်ႇ ၶွင်ၸႄႈတွၼ်ႈမျႃႉဝတီႇ လႅၼ်လိၼ်မိူင်းယၢင်းၽိူၵ်ႇ – မိူင်းထႆးၼၼ်ႉသေ ၵူၼ်းၸိူဝ်းၼႆႉ ႁဵတ်းပူၼ်ႉပႅၼ်သုၼ်ႇလႆႈၵူၼ်း၊ ၵၼ်ႉၸၼ်လူလၢႆၼၢင်းယိင်းလႄႈ ၶႃႈႁႅမ်ၵူၼ်းတၢႆဝႆႉ ၼႆယဝ်ႉ။

ၵႅမ်ၸဝ်ႈသိုၵ်းလူင် ၼၢႆႇမွင်ႇၸေႃႇ တပ်ႉပႂ်ႉလႅၼ်လိၼ် BGF လၢတ်ႈဝႃႈ -“တေဢဝ်ၶဝ်ၸိူဝ်းၼႆႉ သူင်ႇမွပ်ႈ ပၼ်ထိုင်ၼႂ်းမိုဝ်းလူင်ပွင်ၸိုင်ႈမိူင်းၶႄႇ ႁင်းၵူၺ်းၶဝ်ၶေႃၶေႃ၊ ၵွပ်ႈဝႃႈ ၶဝ်ၸိူဝ်းၼႆႉ ပဵၼ်ၵူၼ်းဢၼ်ပူၼ်ႉပႅၼ်ဝႆႉ သုၼ်ႇလႆႈၵူၼ်း တဵၵ်းတဵင်ၵူၼ်း ၼိၵ်ႈၸၢၵ်ႈ ပေႃႉထုပ်ႉၵူၼ်းၸိူဝ်းၼႆႉ။ ၶဝ်ပဵၼ်ႁူဝ်ၼႃႈသႅၼ်းဢွၼ်ႇဝႆႉ”- ဝႃႈၼႆ။

ၵူၼ်းၸိူဝ်းၺႃးတီႉၺွပ်းဝႆႉ 14 ၵေႃႉၼႆႉ ပႃးဝႆႉ ႁူဝ်ၼႃႈၸုမ်းၵျႃးၽႅၼ်ႉ 6 ၵေႃႉ ဢၼ်ၺႃးၺွပ်းဝႆႉသေ ပိုၼ်ၽၢဝ်ႇဝႃႈ တေသူင်ႇမွပ်ႈပၼ်ၼႂ်းမိုဝ်း လူင်ပွင်ၸိုင်ႈမိူင်းၶႄႇ ၼႂ်းလိူၼ်ၾႅပ်ႊပိဝ်ႊရီႊပူၼ်ႉမႃးၼၼ်ႉ ၼႆယဝ်ႉ။

မိူဝ်ႈပူၼ်ႉမႃး ပီ 2024 လိူၼ်မၢတ်ႊၶျ်ၼၼ်ႉၵေႃႈ တပ်ႉပႂ်ႉလႅၼ်လိၼ် BGF ဢၼ်ၸေႃးၶျိတ်ႉတူႇ ဢွၼ်ႁူဝ်ၼႆႉ ယၢမ်ႈပိုၼ်ၽၢဝ်ႇဝႃႈ တေထွၼ်တူဝ်ဢွၵ်ႇတႂ်ႈၵုမ်းၵမ်သိုၵ်းမၢၼ်ႈသေ ၽွတ်ႈၶိုၼ်းႁႂ်ႈပဵၼ် တပ်ႉသိုၵ်းၵႅတ်ႇၶႄၸိူဝ်ႉၸၢတ်ႈယၢင်းၽိူၵ်ႇ (KNA) ၼႆသေတႃႉ ႁၢၼ်ႉတေႃႇထိုင်ယၢမ်းလဵဝ်ၵေႃႈ ပႆႇႁၼ်သိုၵ်း မၢၼ်ႈႁူမ်ႈမိုဝ်းႁဵတ်းသၢင်ႈၸွမ်းလႄႈ ယင်းပႆႇမီးလွင်ႈလႅၵ်ႈလၢႆႈ။

ၵူၼ်းမိူင်းၶႄႇၼႆႉ ၶဝ်ႈမႃးယူႇၼႂ်းမိူင်းႁူမ်ႈတုမ် (မိူင်းမၢၼ်ႈ) သေ ၵပ်းသိုပ်ႇၵွင်ႉၵၢႆႇၸွမ်း ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းပိုၼ်ႉတီႈသေ ႁဵတ်းလွင်ႈပူၼ်ႉပႅၼ်သုၼ်ႇလႆႈၵူၼ်း ပေႉၵိၼ်တဵၵ်းတဵင် လူလၢႆၶႃႈႁႅမ် တၢႆၵူၼ်းၼႂ်းမိူင်းမၢၼ်ႈ တင်းၼမ် ၼႆယဝ်ႉ။

မိူဝ်ႈဝၼ်းတီႈ 07/07/2025 ၼႆႉၵေႃႈ ၵႅမ်ၽူႈၸတ်းၵၢၼ် ၾၢႆႇႁွင်ႈၵၢၼ်ၽွင်းလူင်ၵၢၼ်ၵႅတ်ႇၶႄၵူၼ်းမိူင်း မိူင်းၶႄႇ Mr.Chen Wen Feng လုၵ်ႉတၢင်းမိူင်းထႆး ၶဝ်ႈၵႂႃႇထိုင် ၼႂ်းဝဵင်းမျႃႉဝတီႇသေ ႁူပ်ႉထူပ်းဢုပ်ႇဢူဝ်းၸွမ်း ၽူႈမီးပုၼ်ႈၽွၼ်း ၼႂ်းႁွင်ႈၵၢၼ် ၽွင်းလူင်ၼႂ်းမိူင်း တပ်ႉသိုၵ်းမၢၼ်ႈတင်း လူင်ပွင်ၸိုင်ႈမိူင်းထႆး ၵဵဝ်ႇလူၺ်ႈတႃႇတီႉၺွပ်းပၼ် ၵူၼ်းမိူင်း ၶႄႇ 3 မိုၼ်ႇၵေႃႉ ၸိူဝ်းႁဵတ်းၵၢၼ်ၵျႃးၽႅၼ်ႉဝႆႉၼၼ်ႉ ၼႆယဝ်ႉ။

လႆႈႁူႉဝႃႈ ၵူၼ်းမိူင်းၶႄႇၼႆႉ ၶဝ်ႈမႃးၼႂ်းမိူင်းႁူမ်ႈတုမ်သေ ႁဵတ်းၵၢၼ်ၵျႃးၽႅၼ်ႉ လွၵ်ႇလႅၼ်ၵိၼ်ငိုၼ်းၼိူဝ် ဢွၼ်ႊလၢႆႊယူႇလႄႈ ၾၢႆႇလူင်ပွင်ၸိုင်ႈမိူင်းၶႄႇ ၸင်ႇၶႂ်ႈလႆႈတူဝ်ၵူၼ်းမိူင်းၶဝ် ၸိူဝ်းႁဵတ်းၵၢၼ်ဝႆႉ ၼႂ်းၸႄႈမိူင်းယၢင်းၽိူၵ်ႇ ၸႄႈတွၼ်ႈၵျႃႇဢိၼ်း သဵၵ်ႉၵျီး (ကြာအင်းဆိပ်ကြီးခရိုင်) ၸွမ်းၽြႃးသၢမ်သူႇ၊ သူၺ်ႇၵူၵ်ႉၵူဝ်ႇ၊ KK Park၊ ဝၼ်ႇၶ(ဝမ်ခ)၊ မႄႇထေႃႇတလေး (မယ်ထော်သလေး) လႄႈ ၵျွၵ်ႉၶတ်ႉ(ကျောက်ခတ်) ၸိူဝ်းၼႆႉ။

ၼႂ်းလိၵ်ႈၽိုၼ်ၶၢဝ်ႇ တႂ်ႈသိုၵ်းမၢၼ်ႈၵုမ်းၵမ်ဝႆႉၼၼ်ႉၵေႃႈ ပိုၼ်ၽၢဝ်ႇဢွၵ်ႇဝႆႉ မိူဝ်ႈဝၼ်းတီႈ 7 ၼႆႉဝႃႈ -“တႄႇႁၢင်လိူၼ်ၵျႅၼ်ႊၼိဝ်ႊရီႊ ပီ 2025 တေႃႇထိုင် လိူၼ်ၵျူႊလၢႆႊ ဝၼ်းတီႈ 7 ၼႆႉ လႆႈဢဝ်ၵူၼ်းမိူင်းၶႄႇ ၸိူဝ်းမႃးႁဵတ်းၵၢၼ်ၵျႃးၽႅၼ်ႉ ၼႂ်းမိူင်းယၢင်းၽိူၵ်ႇ သူင်ႇမွပ်ႈပၼ်ၶိုၼ်းတီႈ လူင်ပွင်ၸိုင်ႈမိူင်း ၸိူဝ်းၵဵဝ်ႇၶွင်ႈ။ ဢဝ်ၵူၼ်းမိူင်းၼွၵ်ႈသူင်ႇမွပ်ႈၵႂႃႇ တႃႇ 9,198 ၵေႃႉ၊ ႁူမ်ႈမိုဝ်းၵၼ်တင်း လူင်ပွင်ၸိုင်ႈမိူင်းထႆးသေ သူင်ႇမိူဝ်းၵႂႃႇၶိုၼ်းတၢင်းမိူင်းထႆး 8,987 ၵေႃႉ။ တႃႇသိုပ်ႇသူင်ႇဢွၵ်ႇထႅင်ႈၼၼ်ႉ မီးယူႇ 211 ၵေႃႉ”- ဝႃႈၼႆ။

ၼႂ်းႁူဝ်ပီ 2025 မႃးၼႆႉ မီးၸၢႆးၸိူင်း ၸိုဝ်ႈလိုဝ်းလင် ၼႂ်းမိူင်းၶႄႇ ၺႃးၸုမ်းၵျႃးၽႅၼ်ႉ လွၵ်ႇလႅၼ်မႃးႁဵတ်းၵၢၼ် ၼႂ်းပိုၼ်ႉတီႈမျႃႉဝတီႇ မိူင်းယၢင်းၽိူၵ်ႇ လႅၼ်လိၼ်မိူင်းထႆး – မိူင်းယၢင်းၽိူၵ်ႇသေ ဝၢႆးလင်ၼၼ်ႉ ဢမ်ႇႁိုင် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း ၼႂ်းမိူင်းယၢင်းၽိူၵ်ႇၶဝ် ၸွမ်းတီႉၺွပ်းဢဝ် ၵူၼ်းႁဵတ်းၵၢၼ်ၵျႃးၽႅၼ်ႉမႃးႁၢဝ်ႈႁႅင်း ၼႆယဝ်ႉ။

တႅမ်ႈ – ၽူၺ်းၼုမ်ႇ