သိုဝ်ႇၶၢဝ်ႇၼႂ်းမိူင်းထႆး ပိုၼ်ၽၢဝ်ႇဢွၵ်ႇမႃးဝႃႈ ၸဝ်ႈၼႃႈတီႈထႆး ၵူတ်ႇထတ်းတီႉၺွပ်းလႆႈ ၵူၼ်းႁဵတ်းၵၢၼ် လွၵ်ႇလႅၼ်ၵိၼ်ငိုၼ်းတင်းဢွၼ်ႊလၢႆႊၵျႃးၽႅၼ်ႉ 17 တီႈဝဵင်းၵဵင်းမႂ်ႇ ၸိုင်ႈထႆး ပဵၼ်ႁႅင်းၵၢၼ်မၢၼ်ႈ 2 ၵေႃႉလႄႈ ၵူၼ်းမိူင်းၶႄႇ 15 ၵေႃႉ။
ဝၼ်းတီႈ 01/07/2025 ပူၼ်ႉမႃးၼႆႉ ၸဝ်ႈၼႃႈတီႈပလိၵ်ႈထႆး လၢႆႁွင်ႈၵၢၼ် ၶဝ်ႈၵူတ်ႇထတ်းႁိူၼ်းလင်ၼိုင်ႈ ၼႂ်းၸႄႈဝဵင်းႁၢင်လူင်း ၸႄႈတွၼ်ႈၵဵင်းမႂ်ႇ တီႉၺွပ်းလႆႈၵူၼ်းႁဵတ်းၵၢၼ် ၵျႃးၽႅၼ်ႉ 17 ၵေႃႉ ဢိၵ်ႇပႃးၶွမ်ႊပိဝ်ႊတိူဝ်ႊ 10 လုၵ်ႈလႄႈ ၾူၼ်း 26 လုၵ်ႈ၊ ၸိူဝ်းၶဝ်ၸႂ်ႉလွၵ်းလၢႆးၵူႈမဵဝ်းသေ လွၵ်ႇလႅၼ်ဢဝ်ငိုၼ်းဝႆႉမွၵ်ႈ တေႃႊလႃႊ 14 လၢၼ်ႉ တီႈၵူၼ်းမိူင်း ၶႄႇ ဝႃႈၼႆ။
ၵဵဝ်ႇလူၺ်ႈလွင်ႈၼႆႉသေ ယူႇတီႈ ၸဝ်ႈၼႃႈတီႈၶဝ် တိုၵ်ႉၵူတ်ႇထတ်း ဢဝ်လိူင်ႈဝႆႉယူႇ ဝႃႈၼႆ။
ပူၼ်ႉမႃး မိူဝ်ႈလိူၼ်ၵျုၼ်ႊ ၼႂ်းၶၢဝ်းတၢင်းၼိုင်ႈလိူၼ်ၵူၺ်း ႁႅင်းၵၢၼ်မၢၼ်ႈ ၺႃးၸဝ်ႈၼႃႈတီႈထႆး ၵူတ်ႇထတ်းတီႉၺွပ်းလႆႈမွၵ်ႈ 370 ၵေႃႉ။ ၵမ်ႈၼမ် ၺႃးတီႉၺွပ်းလူၺ်ႈႁဵတ်းၵၢၼ် ဢၼ်ဢမ်ႇမီးသုၼ်ႇႁဵတ်း မိူၼ်ၼင်ႇ – ၶၢႆတၢင်းၵိၼ်ၶၢင်ႈတၢင်း၊ ႁၢၼ်ႉႁၢင်ႈၶိူင်ႈ၊ ပိုတ်ႇႁၢၼ်ႉတၢင်းၵိၼ်ဝႆႉ ၸိူဝ်းၼႆႉ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ