တႄႇၵၢင်လိူၼ်ၵျူႊလၢႆႊမႃး ဝၢႆးသိုၵ်းမၢၼ်ႈယိုတ်းၵုမ်းၶိုၼ်း ၸႄႈဝဵင်းၼွင်ၶဵဝ် တႂ်ႈသိုၵ်းတဢၢင်းၵုမ်းၵမ် ဝႆႉၼၼ်ႉ သိုၵ်းမၢၼ်ႈၵူတ်ႇထတ်း ၵူၼ်းပၢႆႈၽေးသိုၵ်း ၸိူဝ်းပွၵ်ႈမႃးယူႇ ၶိုၼ်းႁိူၼ်းၼၼ်ႉသေ သင်ဢမ်ႇၸႂ်ႈၵူၼ်းယိပ်းမၢႆၾၢင် ဝဵင်းၼွင်ၶဵဝ်ဝႆႉၸိုင် ဢမ်ႇပၼ်ၶဝ်ႈၶိုၼ်း ၼႂ်းဝဵင်းၼွင်ၶဵဝ် ၸိုင်ႈတႆးပွတ်းႁွင်ႇ။

သိုၵ်းမၢၼ်ႈမၢပ်ႇၼႄး ၵူၼ်းမိူင်းၸိူဝ်းပၢႆႈၽေးပၢင်တိုၵ်း ၼႂ်းၸႄႈဝဵင်းၼွင်ၶဵဝ် ဢွၵ်ႇၵႂႃႇယူႇဝႆႉဢွင်ႈတီႈ လွတ်ႈၽေးဝႆႉၵမ်ႈၽွင်ႈ ၼၼ်ႉဝႃႈ ပဵၼ်ၵူၼ်းၵမ်ႉထႅမ် သိုၵ်းတဢၢင်း TNLA ၊ သိုၵ်းထၼူႉ (DPLA) လႄႈ ၸုမ်း PDF ၸိူဝ်းၼႆႉသေ တီႉၺွပ်းဢဝ်ၵႂႃႇၼႆ – ၵူၼ်းဝဵင်းၼွင်ၶဵဝ် လၢတ်ႈၼႄၼင်ႇၼႆ။

“ၵူၼ်းၸိူဝ်းပွၵ်ႈမိူဝ်းယူႇတၢင်း ဝၢၼ်ႈတွင်းၶမ်းၸိူဝ်းၼၼ်ႉၵမ်ႈၽွင်ႈ ၺႃးသိုၵ်းမၢၼ်ႈၺွပ်းဢဝ်တူဝ်ၵႂႃႇ။ မၢပ်ႇၼႄးဝႃႈ ၶဝ်ပဵၼ်ၵူၼ်းၵမ်ႉထႅမ် သိုၵ်းတဢၢင်း(ပလွင်ႈ)၊ သိုၵ်းထၼူႉ ၸိူဝ်းၼၼ်ႉၼႆႁႄ မႃးႁွင်ႉၵႂႃႇ။ ၵူၼ်းၸၢဝ်းထၼူႉၶဝ် ၺႃးႁွင်ႉၵႂႃႇၼမ်ႁႄပိူၼ်ႈယဝ်ႉ။ ပေႃးၵႂႃႇၼႂ်းဝဵင်းၼႆ ၼႂ်းမၢႆၾၢင်ပဵၼ် 13/ ယူႇၵေႃႈ တီႈယူႇၼၼ်ႉ ပေႃးသႂ်ႇဝႆႉဝႃႈ ဝဵင်းၼွင်ၶဵဝ် ၼႆၵွၼ်ႇ ၶဝ်ၸင်ႇပၼ်ၶဝ်ႈဝဵင်း”။

ဢွင်ႈတီႈဢၼ်သိုၵ်းမၢၼ်ႈ ၸွမ်းတီႉၺွပ်းဢဝ်ၵူၼ်း ၼႂ်းၸႄႈဝဵင်းၼွင်ၶဵဝ်ၼႆႉ ပဵၼ်ၸွမ်းပွၵ်ႉ ဢၼ်သိုၵ်းတဢၢင်းယၢမ်ႈၵုမ်းၵမ်ၵႂႃႇ မိူဝ်ႈပူၼ်ႉမႃးၼၼ်ႉသေ ဝၢၼ်ႈၼွင်ၶဵဝ်ဢွၼ်ႇ၊ ဝၢၼ်ႈမႆႉပူၵ်ႇ၊ ဝၢၼ်ႈၼွင်လႅင်၊ ဝၢၼ်ႈၼွင်ဢေႃႈ၊ ဝၢၼ်ႈၺၢၼ်ႇတေႃး၊ ဝၢၼ်ႈသူၺ်ႇတုၼ်းလႄႈ ဝၢၼ်ႈသူၺ်ႇပျီႇၺုၼ်ႉ ၸိူဝ်းမီးၸၢဝ်းၶိူဝ်းထၼူႉယူႇသဝ်းၼမ်လိူဝ်ပိူၼ်ႈ ၾၢႆႇၸၢၼ်းဝဵင်းၼွင်ၶဵဝ်။

လိူဝ်ၼၼ်ႉ ႁိူၼ်းယေးၵူၼ်းမိူင်း ၸိူဝ်းၺႃးထၢင်ႇထိူမ် မၢပ်ႇၼႄးဝႃႈ ၵမ်ႉၸွႆႈပၼ်ႁႅင်းသိုၵ်းတဢၢင်းလႄႈ သိုၵ်းထၼူႉၼႆသေ ႁိူၼ်းၵူၼ်းမိူင်းမွၵ်ႈ 20 လင် ၺႃးသိုၵ်းမၢၼ်ႈ ဢဝ်ၼမ်ႉယႃႈသီလႅင် ၶိတ်ႇႁဵတ်းၶႂၢႆႇၶႂႃပေသေ ယိုတ်းဢဝ်ပဵၼ် ဢွင်ႈတီႈၶူဝ်းၶွင်ၵၢင်ပႅတ်ႈ ၼႆယဝ်ႉ။

လႆႈႁူႉဝႃႈ ၵူၼ်းမိူင်းၸိူဝ်းၶဝ်ႈယူႇၶိုၼ်းလႆႈ ၼႂ်းဝဵင်းၼွင်ၶဵဝ်ၼၼ်ႉၵေႃႈ ၺႃးသိုၵ်းမၢၼ်ႈႁၢမ်ႈ ဢမ်ႇပၼ်ဢွၵ်ႇၼႂ်းပိုၼ်ႉတီႈ ၸႄႈဝဵင်းၼွင်ၶဵဝ် တႃႇၶၢဝ်းတၢင်းသၢမ်လိူၼ်။ ယၢမ်းလဵဝ် ၶူဝ်လူင်ႁူၺ်ႈၵိုတ်ႈ ၵႄႈၵၢင်ၼွင်ၶဵဝ် – ၵျွၵ်ႉမႄးၼၼ်ႉၵေႃႈ ၺႃးယႃႉလူႉၵွႆဝႆႉလႄႈ ၵူၼ်းမိူင်းၸိူဝ်းပၢႆႈၽေးပၢင်တိုၵ်း ၵႂႃႇယူႇဝႆႉတၢင်းထုင်ႉၼွင်ပိင်ၼၼ်ႉ သင်ၶႂ်ႈပွၵ်ႈၶိုၼ်း ဝဵင်းၼွင်ၶဵဝ်ၸိုင် လႆႈပၼ်ၵႃႈၵႃး ၼိုင်ႈၵေႃႉလႂ် 5 မိုၼ်ႇပျႃး တေႃႇထိုင် 1 သႅၼ်ပျႃးသေ ပၼ်ႇဢွမ်ႈၵႂႃႇၸွမ်းသဵၼ်ႈတၢင်းတႃႇသီႇ (အထက်ရဲရွာမှ သာစည်) ၼၼ်ႉ ဝႃႈၼႆ။

ဝၢႆးလင် သိုၵ်းမၢၼ်ႈၵုမ်းၵမ်လႆႈၶိုၼ်း ဝဵင်းၼွင်ၶဵဝ်ၼႆႉ လွင်ႈၵူတ်ႇထတ်းႁၢဝ်ႈႁႅင်းၵူၼ်းၵႂႃႇမႃး ၼိူဝ်သဵၼ်ႈတၢင်းၼွင်ၶဵဝ် – ပၢင်ႇဢူႈလူင် – ဝဵင်းလိူဝ်ႇလႄႈ ၼွင်ၶဵဝ် – ၵျွၵ်ႉၵူႇ – ဢၢင်ႇတေႃး – လွၵ်ႉၸွၵ်ႇ ၸိူဝ်းၼႆႉ။

ၾၢႆႇၼိုင်ႈၵေႃႈ သိုၵ်းမၢၼ်ႈ ႁွမ်ႁႅင်းၵူၼ်းႁႅင်းၶိူင်ႈၵွင်ႈၵၢင်ႇ တဵမ်ထူၼ်ႈသေ လုၵ်ႉတၢင်းၽႄဢုမ်တီး ဝဵင်းၼွင်ၶဵဝ် မုင်ႈၼႃႈၵႂႃႇၸွမ်း သဵၼ်ႈတၢင်း ဝဵင်းပၢင်ႇဢူႈလူင် – ၼွင်ၶဵဝ် – မိူင်းၵုတ်ႈၼၼ်ႉယူႇ ဝႃႈၼႆ။

တႅမ်ႈ – ၽူၺ်းၼုမ်ႇ