ၼႂ်းလိူၼ်ၵျူႊလၢႆႊပူၼ်ႉမႃးၼႆႉ ၶၢဝ်းတၢင်းၼိုင်ႈလိူၼ် ယွၼ်ႉသိုၵ်းမၢၼ်ႈ ယိုတ်းမိူင်း ၸႂ်ႉႁိူဝ်းမိၼ် တိုၵ်းပွႆႇမၢၵ်ႇ၊ ၸႂ်ႉၶိူင်ႈၵွင်ႈလူင် လၢမ်းယိုဝ်းၸိူဝ်းၼႆႉသေ တိူဝ်ႉၺႃးၼၢင်းယိင်း လူႉတၢႆ 64 ၵေႃႉ မၢတ်ႇၸဵပ်း 80 ၵေႃႉ လွင်ႈတပ်ႉသိုၵ်းမၢၼ်ႈ ၸႂ်ႉႁိူဝ်းမိၼ်ပွႆႇမၢၵ်ႇယိုဝ်းၼႆႉ ၼမ်မႃးလိူဝ်ၵူႈလိူၼ်ၼႆ – ၸုမ်းၼၢင်းယိင်းမိူင်းမၢၼ်ႈ BWU ၵဵပ်းၶေႃႈမုလ်း ႁၢႆးငၢၼ်းဝႆႉၼင်ႇၼႆ။

ၼၢင်းယိင်း 52 ၵေႃႉၼႆႉ လူႉတၢႆယွၼ်ႉႁိူဝ်းမိၼ်တိုၵ်းသိုၵ်းမၢၼ်ႈ၊ ၼၢင်းယိင်းထႅင်ႈ 11 ၵေႃႉသမ်ႉ လူႉတၢႆယွၼ်ႉသိုၵ်းမၢၼ်ႈ ၸႂ်ႉၶိူင်ႈၵွင်ႈလူင်သေ လၢမ်းယိုဝ်း။ ၼၢင်းယိင်းၵေႃႉၼိုင်ႈသမ်ႉ ၽွင်းတူၵ်းၶွၵ်ႈယူႇၼၼ်ႉ ယွၼ်ႉဢမ်ႇလႆႈလွင်ႈယူတ်းယႃလီလီလႄႈ လႆႈလူႉတၢႆၵႂႃႇ ဝႃႈၼႆ။

မိူၼ်ၼႆ ယွၼ်ႉသိုၵ်းမၢၼ်ႈ ၸႂ်ႉႁိူဝ်းမိၼ်တိုၵ်းပွႆႇမၢၵ်ႇ၊ ၸႂ်ႉၶိူင်ႈၵွင်ႈလူင်လၢမ်းယိုဝ်း၊ ႁၢင်ႈၵၢင်မၢၵ်ႇ မႅင်းၾင်လိၼ်ဝႆႉၸိူဝ်းၼၼ်ႉသေ ၼၢင်းယိင်းမွၵ်ႈ 80 ၵေႃႉ မၢတ်ႇၸဵပ်း။ လိူဝ် ၼၼ်ႉ ၼႂ်းဢွင်ႈတီႈ သိုၵ်းသွင်ၾၢႆႇၶဵင်ႈၶႅင်ၵၢၼ်သိုၵ်းယူႇၼၼ်ႉ ၼၢင်းယိင်း 5 ၵေႃႉ ၺႃးလူလၢႆပူၼ်ႉပႅၼ် – ၸုမ်း BWU ႁၢႆးငၢၼ်းဝႆႉၼင်ႇၼႆ။

ၼၢင်းယိင်း ဢၼ်ၺႃးသိုၵ်းမၢၼ်ႈႁဵတ်းႁၢႆႉယိုဝ်းတိုၵ်းသေ လႆႈလူႉတၢႆၵႂႃႇ ၼမ်သုတ်းၼႆႉ ပဵၼ်ၼႂ်းတိူင်းၸႄႈၵႅင်း မီးဝႆႉ 28 ၵေႃႉ၊ ၼႂ်းမိူင်းယၢင်းလႅင် 9 ၵေႃႉ၊ တိူင်းဝဵင်းလိူဝ်ႇ (မၼ်းတလေး) 9 ၵေႃႉ၊ ၼႂ်းမိူင်းတႆးလႄႈ တိူင်းတၼၢဝ်းသီသမ်ႉ 4 ၵေႃႉ၊ တိူင်းမၵူၺ်း 3 ၵေႃႉ၊ ၼႂ်းမိူင်းၶၢင်လႄႈ မိူင်းမွၼ်းသမ်ႉ 2 ၵေႃႉ၊ ၼႂ်းမိူင်းယၢင်းၽိူၵ်ႇ 1 ၵေႃႉလႄႈ တိူင်းတႃႈၵုင်ႈ 1 ၵေႃႉ ၼႆယဝ်ႉ။