ဝၼ်းတီႈ 05/08/2025 ၼႆႉ ၼမ်ႉၵူမ်ႇဢုင် ၵိုင်ႉၵၢင်ႉလႆၼွင်းထူမ်ႈ ၼႂ်းဝဵင်းတႃႇရႃႇလီႇ (Dharali) ၸႄႈတွၼ်ႈဢုတရၶၢၼ်း (Uttarakhand) ဢၼ်မီးၼႂ်းပိုၼ်ႉတီႈ လွႆႁိမဝုၼ်ႇတႃႇ မိူင်းဢိၼ်းတီးယိူဝ်း မီးၵူၼ်းလူႉတၢႆ 4 ၵေႃႉ ႁၢႆလၢႆဝႆႉႁိမ်းၸမ် 100 ၵေႃႉ ဝႃႈၼႆ။

ၼမ်ႉၵူမ်ႇဢုင်ၼၼ်ႉ လုၵ်ႈၼႂ်းၵႄႈလွႆသေ လေႃႈလႆလူင်းမႃးသႂ်ႇ ၼႂ်းဝဵင်းတႃႇရႃႇလီႇ ႁၢဝ်ႈႁႅင်း၊ ႁိူၼ်းယေး ဢွင်ႈတီႈယူႇသဝ်းၵူၼ်းမိူင်း လူႉၵွႆၵႂႃႇတင်းၼမ်။ တပ်ႉသိုၵ်းမိူင်းဢိၼ်းတီးယိူဝ်း လႆႈသူင်ႇႁႅင်းသိုၵ်း 150 ၵေႃႉ ၵႂႃႇတီႈဝဵင်းၼၼ်ႉသေ လႆႈၸွႆႈထႅမ်ၵူၼ်းမိူင်းဝႆႉမွၵ်ႈ 20 ၵေႃႉ။

ၸွမ်ၽွင်းလူင် ၸႄႈတွၼ်ႈဢုတရၶၢၼ်း လၢတ်ႈဝႃႈ – ၼမ်ႉၵိုင်ႉၵၢင်ႉၼွင်းထူမ်ႈမႃးၼႆႉ ပဵၼ်ယွၼ်ႉၾူၼ် တူၵ်းႁၢဝ်ႈႁႅင်း – ဝႃႈၼႆ။

ယၢမ်းလဵဝ် ဢွင်ႈတီႈၵမ်ႈၼမ် ၼႂ်းဝဵင်းတႃႇရႃႇလီႇၼႆႉ ပဵၼ်ၼမ်ႉၵူမ်ႇဢုင် ၼွင်းထူမ်ႈဝႆႉသေ မၢင်တီႈ လိုၵ်ႉထိုင် 15 မီႊတိူဝ်ႊ၊ ႁိူၼ်းယေးၵေႃႈ ၸူမ်ဝႆႉၼႂ်းၼမ်ႉတင်းၼမ်။ ၾၢႆႇတပ်ႉသိုၵ်းမိူင်းဢိၼ်းတီးယိူဝ်း လၢတ်ႈဝႃႈ – လႆႈၸႂ်ႉဢဵၼ်ႁႅင်းတင်းၼမ်သေ ႁၢင်ႈႁႅၼ်ႈၸွႆႈထႅမ်ၵူၼ်းၸိူဝ်းႁၢႆလၢႆဝႆႉလႄႈ ၸိူဝ်းၶမ်ဝႆႉၼႂ်းၵႄႈ ၼမ်ႉထူမ်ႈၼၼ်ႉယူႇ ဝႃႈၼႆ။

ႁွင်ႈၵၢၼ် ၾၢႆႇၾိင်ႈၾႃႉရႃႇသီႇ မိူင်းဢိၼ်းတီးယိူဝ်း လႆႈပိုၼ်ၽၢဝ်ႇပိုၼ်ႉတီႈၼၼ်ႉ ပဵၼ်ဢွင်ႈတီႈမီးၽေး ၸၼ်ႉသီလႅင်။

တီႈမိူင်းဢိၼ်းတီးယိူဝ်းၼႆႉ တႄႇဢဝ်လိူၼ်ၵျုၼ်ႊတေႃႇထိုင် လိူၼ်သႅပ်ႊထႅမ်ႊပိူဝ်ႊ ၽွင်းၶၢဝ်းၾူၼ်ၵူႈပီ ၵႆႉၺႃးၽေးၼမ်ႉထူမ်ႈၼမ်ႉၼွင်း၊ လိၼ်ၵူၼ်ႇပင်းလႄႈ မီးၵူၼ်းလူႉတၢႆ ႁၢႆၼမ်။

ယွၼ်ႉၾိင်ႈၾႃႉရႃႇသီႇလႅၵ်ႈလၢႆႈ၊ လူၵ်ႈၵမ်ႇၽႃႇလိူတ်ႇႁွၼ်ႉမႆႈၶိုၼ်ႈမႃးလႄႈ ၽေးသၽႃႇဝၵေႃႈ ၸင်ႇၼမ်ၶိုၼ်ႈႁၢဝ်ႈႁႅင်းမႃး – ၽူႈလူင်ႉလႅၼ်ႇၶဝ် ပၼ်ၾၢင်ႉဝႆႉၼင်ႇၼႆ။

ဢၢင်ႈဢိင် – CNA