ဝၢၼ်ႈဢိူင်ႇလၢႆလၢႆတီႈ ၼႂ်းၸႄႈဝဵင်းပၢင်လွင်း ၸိုင်ႈတႆးပွတ်းၸၢၼ်း ၺႃးၼမ်ႉၼွင်းလုပ်ႇထူမ်ႈ ႁၢဝ်ႈႁႅင်း ၵူၼ်းပိုၼ်ႉတီႈၼပ်ႉႁူဝ်ပၢၵ်ႇ လႆႈၶၢႆႉပၢႆႈတီႈယူႇႁိူၼ်းယေး သဵၼ်ႈတၢင်းလႄႈ ႁူင်းႁဵၼ်း ၸိူဝ်းၼႆႉၵေႃႈ ၺႃးၼမ်ႉလုပ်ႇထူမ်ႈ လူႉၵွႆတင်းၼမ်။

ပူၼ်ႉမႃး မိူဝ်ႈဝၼ်းတီႈ 02/08/2025 ယၢမ်းၵၢင်ၼႂ် 10 မူင်းပၢႆ ၼမ်ႉႁူၺ်ႈၼမ်ႉလွႆ ၵိုင်ႉၵၢင်ႉလႆလူင်းမႃးသေ ထူမ်ႈဢဝ်ၵႂႃႇႁိူၼ်းယေး သဵၼ်ႈတၢင်း တီႈဝၢၼ်ႈလွႆမွင်း (လွယ်မောင်း) လႄႈ ဝၢၼ်ႈထီႇဝႃးလီႇ (ထီဝါးလီ) ဢိူင်ႇထီႇပွင်း (ထီပေါင်း) ၼႂ်းၸႄႈဝဵင်းပၢင်လွင်း ၵူၼ်းပိုၼ်ႉတီႈ လႆႈဢွၼ်ၵၼ် ၶၢႆႉၵႂႃႇယူႇတီႈ ႁူင်းထမ်ႇမရူင်ႇ ၼိူဝ်ဝဵင်းပၢင်လွင်း။

ၽူႈၵူၼ်းဢိူင်ႇထီႇပွင်း လၢတ်ႈတီႈၽူႈတွႆႇႁွၵ်ႈဝႃႈ – “ၼမ်ႉၼႆႉ ၵိုင်ႉၵၢင်ႉလႆၶဝ်ႈႁိူၼ်းသေ ႁဵတ်းႁႂ်ႈႁိူၼ်းယေး၊ သဵၼ်ႈတၢင်း ၸိူဝ်းၼႆႉ လူႉၵွႆတင်းၼမ်။ လွင်ႈတုမ်ႉတိူဝ်ႉၵူၼ်းပိုၼ်ႉတီႈ လႆႈမၢတ်ႇၸဵပ်းလူႉတၢႆတႄႉ ဢမ်ႇမီး။ တီႈဝၢၼ်ႈလွႆမွင်းတႄႉ ႁိူၼ်းယေးၵူၼ်းဝၢၼ်ႈလူႉၵွႆၼမ်သေပိူၼ်ႈယဝ်ႉ။ ယၢမ်းလဵဝ် ၵူၼ်းဝၢၼ်ႈတႄႉ လႆႈၶၢႆႉမႃးယူႇဝႆႉတီႈဝဵင်းမူတ်းယဝ်ႉ”- ဝႃႈၼႆ။

ႁိူၼ်းယေး ဢၼ်ၺႃးၼမ်ႉၼွင်းထူမ်ႈလူႉၵွႆၵႂႃႇ ဢမ်ႇယွမ်း 15 လင်၊ ႁူင်းႁဵၼ်းၵေႃႈ လူႉၵွႆပႅတ်ႈလင်ၼိုင်ႈ။ ယၢမ်းလဵဝ် ၵူၼ်းပိုၼ်ႉတီႈ တိုၵ်ႉႁၢင်ႈႁႅၼ်း တႃႇတေၶၢႆႉတီႈယူႇထႅင်ႈ ယၢပ်ႇၽိုတ်ႇ ၶူဝ်းၼုင်ႈ၊ ၽႃႈၽႅၼ်ႇလႄႈ တၢင်းၵိၼ်ယႅမ်ႉဝႆႉၼႆ – ၵူၼ်းၼုမ်ႇ ဢၼ်ၸွႆႈထႅမ်ၼႂ်းပိုၼ်ႉတီႈ ၵေႃႉၼိုင်ႈ လၢတ်ႈၼႄဝႆႉၼင်ႇၼႆ။

မိူဝ်ႈပီၵၢႆ ၼႂ်းပိုၼ်ႉတီႈၼႆႉၵူၺ်း ယၢမ်ႈၺႃးၼမ်ႉထူမ်ႈသေတႃႉ ပီၼႆႉ တိူဝ်းႁၢဝ်ႈႁႅင်း လွင်ႈလူႉသုမ်းၵေႃႈ ၼမ်ႁႅင်း။

ဝၢၼ်ႈလွႆမွင်း(လွယ်မောင်း) တင်း ထီႇဝႃးလီႇၼႆႉ မီးဝႆႉတီႈတိၼ်လွႆမွင်း။ ယၢၼ်ၵႆဝဵင်းပၢင်လွင်း မွၵ်ႈ 2 လၵ်း။ ပေႃးၶၢဝ်းၾူၼ်ၸိူင်ႉၼႆ ၼမ်ႉႁူၺ်ႈၼမ်ႉလွႆ ၵႆႉလႆလူင်းမႃးထူမ်ႈသႂ်ႇ ႁိူၼ်းယေးလႄႈ သူၼ်ၽုၵ်ႇသွမ်ႈ ၸိူဝ်းၼႆႉ ႁဵတ်းႁႂ်ႈၵူၼ်းပိုၼ်ႉတီႈ ႁူပ်ႉတၢင်းယၢပ်ႇၽိုတ်ႇ။  

ယၢမ်းလဵဝ် ၼႂ်းမိူင်းတႆးပွတ်းၸၢၼ်းၼႆႉ ထူပ်းၽေးၼမ်ႉထူမ်ႈႁႅင်း မိူၼ်ၼင်ႇ ဝဵင်းၵၢတ်ႇလေႃႉ၊ ထုင်ႉၼွင်ႁၢႆးယႃႈ၊ ပၢင်လႃႈ (ပၢင်းတရႃႉ) ၊ ယႂႃႇငၢၼ်ႇလႄႈ ဝဵင်းတႃႈၶီႈလဵၵ်း မိူင်းတႆးပွတ်းဢွၵ်ႇ ၸိူဝ်းၼႆႉ။ ၼွၵ်ႈလိူဝ်ၼၼ်ႉ သဵၼ်ႈတႃႈသၢႆတၢင်း ၸိူဝ်းၼႆႉၵေႃႈ လူႉၵွႆၼမ်။