တင်ႈတႄႇဝၼ်းတီႈ30/07/2025 တေႃႇထိုင် ဝၼ်းတီႈ 4/8/2025 ၾူၼ်တူၵ်းထပ်းၵၼ်ဢမ်ႇထၢတ်ႇ ႁဵတ်းႁႂ်ႈ ၼမ်ႉထူမ်ႈၼမ်ႉၼွင်း ၼႂ်းမိူင်းတႆးပွတ်းၸၢၼ်းလၢႆလၢႆဝဵင်း မိူၼ်ၼင်ႇ ဝဵင်းပၢင်လွင်း ၊ ယွင်ႁူၺ်ႈ ၊ ၼွင်ႁၢႆးယႃႈ ၊ ၾၢႆၶုၼ် ၸိူဝ်းၼႆႉ ။
ၾူၼ်တူၵ်းႁႅင်းၼႆႉႁဵတ်းႁႂ်ႈ ၼမ်ႉႁူၺ်ႈၼမ်ႉလွႆၼွင်း မႄႈၼမ်ႉ ၼမ်ႉၵေး လူၼ်ႉၾင်ႇ ၼွင်းၶဝ်ႈ ၼွင်ၾၢႆၶုၼ် ၼမ်ႉၸမ်လူၼ်ႉၾၢႆမိူင်းပၢႆး။ သိုၵ်းမၢၼ်ႈဢမ်ႇပွင်ႇၶၢဝ်ႇသင်သေ ပိုတ်ႇၾၢႆလူင် မိူင်းပၢႆး မိူဝ်ႈဝၼ်းတီႈ 2/8/2025 ႁဵတ်းႁႂ်ႈ ၵူၼ်းမိူင်းလႆႈပၢႆႈၽေးၼမ်ႉထူမ်ႈ ဝႃႈၼႆ ။
ၽူႈၶၢၼ်ပၢၵ်ႇ ၵေႃႁူမ်ႈသၢင်ႈၵူၼ်းၼုမ်ႇတႆး ၾၢႆၶုၼ် လၢတ်ႈၽူႈတွႆႇႁွၵ်ႈ ဝႃႈ- “ယွၼ်ႉၾူၼ်တူၵ်းဢမ်ႇထၢတ်ႇလႄႈ ၼမ်ႉၾၢႆၵေႃႈၸမ်လူၼ်ႉ ၊ ပေႃးဢမ်ႇပိုတ်ႇၾၢႆ မိူင်းပၢႆး ပွတ်းတင်း ထုင်ႉၼွင်ႁၢႆးယႃႈသမ်ႉၼမ်ႉထူမ်ႈၶိုၼ်ႈသုင် ၽူႈမီးပုၼ်ႈၽွၼ်းၶဝ်ၵေႃႈလႆႈပိုတ်ႇၼမ်ႉ။ ပေႃးပိုတ်ႇၾၢႆ ၼမ်ႉသမ်ႉထူမ်ႈပႃးတိူၵ်ႇႁၢႆႈလွၵ်းၼႃးၼႂ်းထုင်ႉမိူင်းပၢႆးတင်းၼမ်”- ဝႃႈၼႆ ။
ၵူၼ်းဢၼ်လႆႈပၢႆႈၽေး ၼမ်ႉယူႇယၢမ်းလဵဝ် ပဵၼ်ၵူၼ်းဝၢၼ်ႈတင်း ၼႂ်းဝဵင်းမိူင်းပၢႆး လွႆၶေႃ လႄႈ ဝၢၼ်ႈၸွမ်းသၢပ်ႇၼမ်ႉ ။ ယၢမ်းလဵဝ် ၵူၼ်းပိုၼ်ႉတီႈလႆႈပၢႆႈၽေးၼမ်ႉ လႆႈၶၢႆႉယူႇတီႈလွတ်ႈၽေးဝႆႉ ဝႃႈၼႆ။
ၼၢင်းယိင်းၵူၼ်းပိုၼ်ႉတီႈလၢတ်ႈၽူႈတွႆႇႁွၵ်ႈဝႃႈ -“ ၵူၼ်းပိုၼ်ႉတီႈလႆႈၶၢႆႉယူႇဝႆႉတီႈသုင် ယွၼ်ႉပိူၼ်ႈဢွၼ်ၵၼ်ပၢႆႈၽေးပၢင်တိုၵ်းဝႆႉႁိုင်ယဝ်ႉလႄႈၵူၼ်းပိုၼ်ႉတီႈတႄႉ ဢမ်ႇပေႃးမီးၼမ် ၊ ၼမ်ႉတေထူမ်ႈသူၼ်ႁႆႈလွၵ်းၼႃးဢၼ်မီးၼႂ်ထုင်ႉမိူင်းပၢႆး မွၵ်ႈ1 ႁဵင်ဢေႊၶိူဝ်ႊ ၼႆႉ”- ဝႃႈၼႆ ။
သိုၵ်းမၢၼ်ႈပိုတ်ႇၾၢႆၼမ်ႉ မိူင်းပၢႆး ၼႂ်းဝၼ်းတီႈ 2/8/2025 သေတႃႉ ထိုင်ယၢမ်းလဵဝ် ၼႂ်းထုင်ႉၼွင်ႁၢႆးယႃႈ ဢမ်ႇယွမ်းလူင်း ၼမ်ႉတိုၵ်ႉထူမ်ႈဝႆႉယူႇလႄႈ ႁဵတ်းႁႂ်ႈၵူၼ်းပိုၼ်ႉတီႈ လႆႈၶၢႆႉပၢႆႈယူႇဝႆႉ တီႈလွတ်ႈၽေးၼမ်ႉဝႆႉ ဝႃႈၼႆ ။
မိူၼ်ၼင်ႇၼႆ ၼႂ်းလိူၼ် ဢေႃႊၵၢတ်ႉသ် ပီ 2024 တပ်ႉသိုၵ်းမၢၼ်ႈ ၶမယ 422 ပိုတ်ႇၾၢႆၼမ်ႉမိူင်းပၢႆးလႄႈ ၵူၼ်းမိူင်းယူႇပွၵ်ႉၺွင်ႇဝၢႆး (ညောင်ဝိုင်း) လႄႈ ၵူၼ်းဝၢၼ်ႈ ၽွင်းတေႃး (ဖောင်းတော) ၊ ဝၢၼ်ႈၽြႃးလႅင်(ဘုရားနီ) ၊ ၽြႃးၽိူၵ်ႇ (ဘုရားဖြူ) ၊ ဢၼ်ယူႇၸမ်ၼမ်ႉမႄႈၽီလူး (ဘီလူးချောင်း) ထုၵ်ႇၼမ်ႉထူမ်ႈၼမ်ႉၼွင်း ႁိုင်မွၵ်ႈ 1 လိူၼ်ၼႆႉဝႃႈၼႆ။
ဢၢၼ်ႇယဝ်ႉႁူမ်ႈပၼ်တၢင်းႁၼ်ထိုင်တီႈၼႆႈ