သိုၵ်းမၢၼ်ႈယိုတ်းမိူင်း ၽႅၼ်ၸတ်းၵၢၼ်သိုၵ်း တိုၵ်းတပ်ႉသိုၵ်းတဢၢင်း TNLA သေ ယိုတ်းၵုမ်းဢဝ်လႆႈၶိုၼ်း ဝဵင်းၼွင်ၶဵဝ်တင်းသဵင်ႈယဝ်ႉၼၼ်ႉ ယၢမ်းလဵဝ် သိုပ်ႇၸတ်းငႃးသိုၵ်း လုၵ်ႉတၢင်းလႅၼ်လိၼ် ဝဵင်းပၢင်ႇဢူႈလူင် – ၼွင်ၶဵဝ် ၶိုၼ်ႈၸွမ်းသဵၼ်ႈတၢင်း ၵႂႃႇဝဵင်းမိူင်းၵုတ်ႈၼၼ်ႉလႄႈ ႁဵတ်းႁႂ်ႈပဵၼ်ပၢင်တိုၵ်းၵၼ်တင်း သိုၵ်းတဢၢင်း TNLA လႄႈ PDF ၸိူဝ်းတူင်ႉၼိုင်ယူႇ ၼႂ်းထုင်ႉၸႄႈဝဵင်းမိူင်းၵုတ်ႈၼၼ်ႉ ၼႆယဝ်ႉ။

တႄႇၵၢင်လိူၼ်ၵျူႊလၢႆႊၼၼ်ႉမႃး သိုၵ်းမၢၼ်ႈ ယိုတ်းဢဝ်လႆႈၶိုၼ်း ဝဵင်းၼွင်ၶဵဝ် တင်းသဵင်ႈယဝ်ႉ သၢႆငႃးသိုၵ်းမၢၼ်ႈ ဢၼ်လုၵ်ႉတီႈသဵၼ်ႈတၢင်းၽႄ ဝဵင်းၼွင်ၶဵဝ် ၵႂႃႇတၢင်းဝဵင်းမိူင်းၵုတ်ႈၼၼ်ႉ ၵႂႃႇၽႃႇၺႃးသိုၵ်းတဢၢင်းလႄႈ ၸုမ်းၵႅတ်ႇၶႄၵူၼ်းမိူင်း PDF သေ တင်းသွင်ၾၢႆႇလႆႈ ပဵၼ်ပၢင်တိုၵ်းၵၼ်ၼႂ်းထုင်ႉၼၼ်ႉဝႆႉၼႆ – ၵူၼ်းႁပ်ႉႁူႉၸွမ်း ငဝ်းလၢႆးၵၢၼ်သိုၵ်း ၼႂ်းပိုၼ်ႉတီႈ လၢတ်ႈၼႄၼင်ႇၼႆ။

“ၸုမ်းသိုၵ်းမၢၼ်ႈ ဢၼ်လုၵ်ႉတၢင်းၽႄဢုမ်တီး ၶိုၼ်ႈမႃးၼၼ်ႉ ယိုဝ်းၵၼ်တင်း PDF ၶဝ်ယူႇ။ သိုၵ်းမၢၼ်ႈၶဝ် သိမ်းဢဝ်လႆႈတီႈ သုမ်ႇသၢႆႇ (သုံးဆယ်) လႄႈ သူၺ်ႇၵျႃႇဢိၼ်းယဝ်ႉႁႄ ႁႅင်းသိုၵ်းၶဝ်ပူၼ်ႉမႃး တၢင်းၽႄ ႁူဝ်ၶူဝ်ယဝ်ႉ။ သၢႆငႃးသိုၵ်းမၢၼ်ႈ ဢၼ်လုၵ်ႉတၢင်း ဝဵင်းပၢင်ႇဢူႈ ၶိုၼ်ႈမႃးၼၼ်ႉၵေႃႈ မႃးပဵၼ်ပၢင်တိုၵ်းၵၼ်ယူႇ ၵျွၵ်ႉမႄးဢွၼ်ႇတင်း တၢၼ်ႇပူဝ်ႇၼၼ်ႉယူႇ”။

ၼႂ်းႁၢင်လိူၼ်ၵျူႊလၢႆႊပူၼ်ႉမႃးၼႆႉ ငႃးသိုၵ်းမၢၼ်ႈ ဢၼ်လုၵ်ႉတၢင်းၽႄဢုမ်တီး ၸႄႈဝဵင်းၼွင်ၶဵဝ် ၶိုၼ်ႈမႃးၼၼ်ႉ ၶိုၼ်ႈမႃးၵုမ်းၵမ် လႆႈဝၢၼ်ႈသၢမ်သိူဝ်လႄႈ ဝၢၼ်ႈသုမ်ႇသၢႆႇ ဢၼ်မီးၼိူဝ် သဵၼ်ႈတၢင်းလူင် ၼွင်ၶဵဝ် – မိူင်းၵုတ်ႈၼၼ်ႉသေ ၸႂ်ႉတိုဝ်းၶိူင်ႈတရူၼ်ႊလႄႈ ၶိူင်ႈၵွင်ႈလူင် ယိုဝ်းသႂ်ႇၼႂ်းပိုၼ်ႉတီႈ ၼႂ်းမူႇဝၢၼ်ႈၵူၼ်းမိူင်းယူႇသဝ်း ၼႆယဝ်ႉ။

မိူၼ်ၼၼ်ၼင်ႇၵဝ်ႇ ငႃးသိုၵ်းမၢၼ်ႈ ဢၼ်လုၵ်ႉတၢင်း ဝဵင်းပၢင်ႇဢူႈလူင် ၶိုၼ်ႈၵႂႃႇၸွမ်းသဵၼ်ႈတၢင်းလူင် ဝဵင်းမိူင်းၵုတ်ႈၼၼ်ႉၵေႃႈ ၺႃး TNLA တင်း PDF ၶဝ်ငွႆးယိုဝ်းသေ သၢႆငႃးသိုၵ်းမၢၼ်ႈသဵၼ်ႈၼၼ်ႉ လႆႈၵႂႃႇသွၼ်ႈယူႇဝႆႉတီႈဝၢၼ်ႈႁူဝ်ၶူဝ် ဢၼ်ပဵၼ်သဵၼ်ႈတၢင်းၶွႆႈ ၵႂႃႇဝဵင်းပၢင်ႇဢူႈလူင် – ၼွင်ၶဵဝ် – မိူင်းၵုတ်ႈၼၼ်ႉဝႆႉ ၼႆယဝ်ႉ။

ၾၢႆႇၼိုင်ႈၵေႃႈ တႄႇဝၼ်းတီႈ 29 လိူၼ်ၵျူႊလၢႆႊတေႃႇထိုင် ဝၼ်းတီႈ 5 လိူၼ်ဢေႃႊၵတ်ႊသ်ၼႆႉ ၾၢႆႇသိုၵ်းတဢၢင်းၶဝ် ပိုၼ်ၽၢဝ်ႇဢွၵ်ႇဝႆႉ ပဵၼ်တၢင်းၵၢၼ်ဝႃႈ ဢိုတ်းသဵၼ်ႈတၢင်းဝႆႉၸူဝ်ႈၶၢဝ်း ပိူဝ်ႈတႃႇမူၼ်ႉမႄးၶူဝ် ဝႃႈၼႆ။

ယၢမ်လဵဝ် ၼႂ်းမိူင်းတႆးပွတ်းႁွင်ႇ သဵင်ၵွင်ႈဢမ်ႇတႅၵ်ႇပၼ်းမိူၼ် မိူဝ်ႈပူၼ်ႉမႃး ယဵၼ်ဝႆႉယူႇၼႆသေတႃႉ ၾၢႆႇသိုၵ်းမၢၼ်ႈတႄႉ ႁႅၼ်းၵူၼ်းၸတ်းငႃးသိုၵ်း ၶိုၼ်ႈၵႂႃႇၸွမ်းသဵၼ်ႈတၢင်းလူင် ၼွင်ၶဵဝ် – မိူင်းၵုတ်ႈသေ ၸႂ်ႉတိုဝ်းပႃး ၶိူင်ႈတရူၼ်ႊၵူႈသႅၼ်းသႅၼ်း ၶဝ်ႈပၢင်တိုၵ်းၸွမ်းဝႆႉလႄႈ ႁဵတ်းႁႂ်ႈသၢႆသိုၵ်း မီးလွင်ႈၶိုပ်ႈၼႃႈၵႂႃႇ ၵမ်းလွႆးလွႆးယူႇ ၼႆယဝ်ႉ။

တႅမ်ႈ – ၽူၺ်းၼုမ်ႇ